An Paglaom na Pagkabuhay Liwat​—Ano an Kahulogan Kaiyan Para sa Saindo?

“Binibiklad mo an saimong kamot asin pinapanigoan an mawot nin lambang bagay na may buhay.”​—SALMO 145:16.

1-3. Ano an paglaom nin nagkapira para sa ngapit? Iilustrar.

AN NUEBE anyos na si Christopher asin an tugang niang lalaki, kaiba an saindang amaon, inaon, asin duwang pinsan, nagharongharong kan aga sa Kristianong ministeryo harani sa Manchester, Inglaterra. Ipinapaliwanag kan kapadis kan magasin na ini na Awake! an nangyari. “Pagkahapon, magkairibanan sindang namasyar sa Blackpool, sarong kaharaning pasyaran sa may gilid nin dagat. Sindang 6 kabilang sa 12 katawo na insigidang nagadan sa sarong banggaan sa tinampo, na ilinadawan kan pulisya na ‘saro nanggad na holocaust.’ ”

² Kan banggi bago kan trahedya, an pamilya nag-atender sa Pag-adal sa Libro kan Kongregasyon, kun saen nagin tema kan pag-orolay an kagadanan. “Si Christopher pirmeng maginirumdom na aki,” an sabi kan saiyang ama. “Kan bangging idto, malinaw an pagkasabi nia manongod sa sarong bagong kinaban asin sa saiyang paglaom sa ngapit. Dangan, mantang nagpapadagos an samong orolay, biglang nagsabi si Christopher: ‘An sarong bagay manongod sa pagigin saro sa Mga Saksi ni Jehova iyo na minsan ngani makolog an kagadanan, aram ta na maherelingan giraray kita sa daga sa maabot na aldaw.’ Daing kaaram-aram an siisay man samo na presente kaidto kun magigin gurano kamemorable an mga tataramon na iyan.” *

³ Dakol na taon bago kaiyan, kan 1940, sarong Austrianong Saksi na an ngaran Franz, an gagadanon paagi sa gilotina huli sa pagsayuma niang talikdan an kaimbodan ki Jehova. Sinuratan ni Franz an saiyang ina kan sia nasa bilanggoan sa Berlin: “Huli sa aram ko na, kun ginibo ko an panunumpa [sa militar], nakagibo kutana ako nin kasalan na maninigo sa kagadanan. Karatan iyan sa sako. Dai na ako bubuhayon liwat. . . . Asin ngonyan, mahal kong Nanay asin gabos kong tugang, isinabi sa sako sa aldaw na ini an sentensia sa sako, asin dai kamo masindak, kagadanan iyan, asin gagadanon ako sa agang-aga. Igwa ako kan sakong kosog hale sa Dios, kapareho kan pirmeng naeeksperyensiahan kan gabos na tunay na Kristiano kaidtong nakaagi. . . . Kun kamo maninindogan nin marigon sagkod sa kagadanan, maherelingan giraray kita sa pagkabuhay liwat. . . . Magherelingan na lang giraray kita.” *

4. Ano an epekto sa saindo kan mga eksperyensiang isinaysay digdi, asin ano an sunod niatong eestudyaran?

⁴ An pagkabuhay liwat mahalagang marhay para ki Christopher sagkod ki Franz. Totoo iyan sa sainda. Siertong napahiro an puso niato kan mga estoryang ini! Tanganing mapararom an satong apresasyon ki Jehova asin tanganing mapakosog an satong paglaom sa pagkabuhay liwat, estudyaran niato kun taano ta mangyayari an pagkabuhay liwat asin kun ano an maninigo na magin epekto kaini sa sato personalmente.

Bisyon kan Daganon na Pagkabuhay Liwat

5, 6. Ano an ihinahayag kan bisyon na isinurat ni apostol Juan sa Kapahayagan 20:​12, 13?

⁵ Sa sarong bisyon kan mga pangyayari durante kan Milenyal na Paghade ni Cristo Jesus, naheling ni apostol Juan an nangyayaring daganon na pagkabuhay liwat. “Naheling ko an mga gadan, an darakula asin an saradit,” an ibinareta nia. “Asin itinao kan dagat an mga gadan na yaon dian, asin itinao kan kagadanan asin kan Hades an mga gadan  na yaon dian.” (Kapahayagan 20:​12, 13) Ano man an posisyon o kamugtakan sa buhay​—baga man “darakula” o “saradit”​—papaluwason an gabos na nalalaom sa laog kan Hades (Sheol), an pankagabsan na lolobngan nin katawohan. An mga nagadan sa dagat mabubuhay man liwat sa panahon na iyan. An makangangalas na pangyayaring ini kabtang kan katuyohan ni Jehova.

⁶ An rinibong taon na paghade ni Cristo mapoon paagi sa paggapos ki Satanas asin pagholog sa saiya sa bungaw. Dai na madadaya ni Satanas durante kan paghade na iyan an siisay man sa mga bubuhayon liwat ni an siisay man sa mga makakaligtas sa dakulang kahorasaan, huli ta mayo na siang maginibo. (Kapahayagan 20:1-3) An sangribong taon tibaad garo halawig para sa saindo, alagad an totoo, “sarong aldaw” iyan sa pagheling ni Jehova.​—2 Pedro 3:8.

7. Ano an magigin basehan sa paghokom durante kan Milenyal na Paghade ni Cristo?

⁷ Segun sa bisyon, an Milenyal na Paghade ni Cristo magigin panahon nin paghokom. Si apostol Juan nagsurat: “Naheling ko an mga gadan, an darakula asin an saradit, na nagtitindog sa atubangan kan trono, asin an mga balumbon biniriklad. Alagad saro pang balumbon an biniklad; iyan an balumbon nin buhay. Asin hinokoman an mga gadan sono sa mga bagay na nasusurat sa mga balumbon segun sa saindang mga gibo. . . . Asin an lambang saro hinokoman segun sa saindang mga gibo.” (Kapahayagan 20:​12, 13) Mangnohon na an basehan sa paghokom na ini bakong kun ano an nagibo o dai nagibo kan tawo bago sia nagadan. (Roma 6:7) Imbes, konektado iyan sa “mga balumbon” na bubuksan. An mga gigibohon nin saro pagkatapos niang manodan an laog kan mga balumbon an magigin basehan sa pagdeterminar kun baga nakasurat an ngaran nia sa “balumbon nin buhay.”

“Pagkabuhay Liwat sa Buhay” o “Pagkabuhay Liwat sa Paghokom”

8. Ano an duwang posibleng kaaabtan kan mga bubuhayon liwat?

⁸ Sa kapinonan kan bisyon ni Juan, si Jesus ilinadawan na igwa “kan mga liabe nin kagadanan asin nin Hades.” (Kapahayagan 1:18) Sia an nagseserbing “Pangenot na Ahente nin buhay” ni Jehova, na tinawan nin kapangyarihan na maghokom “sa mga buhay asin sa mga gadan.” (Gibo 3:15; 2 Timoteo 4:1) Paano nia ini gigibohon? Paagi sa pagbuhay liwat sa mga natotorog sa kagadanan. “Dai kamo magngalas kaini,” an sabi ni Jesus sa mga kadaklan na hinuhulitan nia, “huli ta an oras maabot na an gabos na nasa mga lolobngan na girumdoman makakadangog kan saiyang tingog asin maruluwas.” Dangan idinagdag nia: “Idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.” (Juan 5:28-30) Kaya, anong ngapit an naghahalat sa maimbod na mga lalaki asin babae kan suanoy?

9. (a) Pagkabuhay liwat, ano an daing duwa-duwa na maaaraman kan dakol? (b) Anong mahiwas na edukasyon an gigibohon?

⁹ Kun buhayon na liwat an mga maimbod na ini kan suanoy, tolos na maaaraman ninda na an mga panuga na pinanarigan ninda nagkatotoo na sa panahon na iyan. Magigin interesado nanggad sinda na aramon kun siisay an Banhi kan babae nin Dios, na nasambitan sa enot na hula sa Biblia, sa Genesis 3:15! Maoogma nanggad sinda na maaraman na an ipinanugang Mesiyas na ini, si Jesus, nagin maimbod sagkod sa kagadanan, na paagi kaiyan itinao an saiyang buhay bilang atang na pantubos! (Mateo 20:28) An mga masabat sa sainda pagkabuhay ninda liwat maggagayagayang marhay sa pagtabang sa sainda na masabotan na an probisyon na ini na pantubos sarong kapahayagan kan dai na kutana maninigong kabootan asin pagkaherak ni Jehova. Kun maaraman kan mga binuhay liwat kun ano an nahahaman kan Kahadean nin Dios sa pag-otob kan katuyohan ni Jehova para sa daga, an saindang puso daing duda na magsosopay nin mga kapahayagan nin pag-omaw ki Jehova. Magkakaigwa sinda nin bastanteng oportunidad na ipaheling an saindang debosyon sa saindang mamomoton na langitnon na Ama asin sa saiyang Aki. An gabos na nabubuhay maoogmang marhay na makikabtang sa mahiwason na edukasyon na kaipuhan tanganing tokdoan an binilyon na maruluwas sa lolobngan, na kaipuhan man na tumubod sa probisyon nin Dios na pantubos.

10, 11. (a) An Milenyo matao nin anong mga oportunidad sa gabos na yaon sa daga? (b) Ano an maninigo na magin epekto kaini sa sato?

¹⁰ Kun buhayon na liwat si Abraham, mararanga siang marhay na maeksperyensiahan an totoong  buhay sa irarom kan pamamahala kan “siudad” na iyan na hinalat nia. (Hebreo 11:10) Maoogmang marhay nanggad an maimbod na si Job kan suanoy kun maaraman nia na an paagi nin pamumuhay nia nakapakosog sa ibang lingkod ni Jehova na napaatubang sa mga pagbalo sa saindang integridad! Asin gustong-gusto nanggad ni Daniel na maaraman an manongod sa kaotoban kan mga hula na ipinasabong sa saiya na isurat!

¹¹ Tunay nanggad, dakol pa an maaaraman kan gabos na magkakamit nin buhay sa matanos na bagong kinaban, baga man paagi sa pagkabuhay liwat o paagi sa pagkaligtas sa dakulang kahorasaan, manongod sa katuyohan ni Jehova para sa daga asin sa mga nag-eerok dian. Huli sa esperansang mabuhay sagkod lamang asin mag-omaw ki Jehova sa bilog na panahon na daing sagkod, magigin nanggad nakakaogmang marhay an programa nin edukasyon sa Milenyo. Minsan siring, an pinakamahalaga iyo an kun ano an ginigibo niato bilang mga indibiduwal mantang nanonodan niato an laog kan mga balumbon. Iaaplikar daw niato an satuyang nanonodan? Hohorophoropon asin isasapuso daw niato an mahalagang marhay na impormasyon na mapakosog sa sato na labanan an pangultimong pagprobar ni Satanas na irayo kita sa katotoohan?

12. Ano an matabang sa lambang saro na magkaigwa nin lubos na kabtang sa pagtotokdo sagkod sa paggibo sa daga na magin paraiso?

¹² Dai dapat paglingawan an makangangalas na mga bendisyon na ibubunga kan pag-aplikar sa mga pakinabang kan atang na pantubos ni Cristo. An mga binuhay liwat dai na magkakaigwa kan klase nin mga kamatean o diperensia na namamatean sa presente. (Isaias 33:24) An makosog na hawak asin an esperansang magin sangkap an salud mapangyari sa gabos na mag-eerok sa bagong kinaban na makapakikabtang nin lubos sa pagtotokdo sa binilyon na binuhay liwat sa dalan nin buhay. An mga nag-eerok na iyan magkakaigwa man nin kabtang sa pinakadakulang gibohon na prinobaran kasuarin man sa daga​—an paggibo sa bilog na planeta na magin sarong paraiso para sa kaomawan ni Jehova.

13, 14. Ano an katuyohan kan pagpaluwas ki Satanas sa pangultimong pagbalo, asin ano an posibleng kaabtan niato bilang mga indibiduwal?

¹³ Kun si Satanas paluwason na sa bungaw para sa pangultimong paghokom, poprobaran niang ilagalag giraray an mga tawo. Segun sa Kapahayagan 20:7-9, an gabos na ‘nalagalag na nasyon,’ o mga grupo nin mga tawo, na napasairarom kan maraot na impluwensia ni Satanas hohokoman na maninigo sa kalaglagan: ‘An kalayo mahoholog hale sa langit asin tutunawon sinda.’ Para sa mga kabilang sa sainda na makakaeksperyensia nin pagkabuhay liwat durante kan Milenyo, an paglaglag na ini mangangahulogan na sinda binuhay liwat tanganing hokoman. Sa kabaliktaran, an binuhay liwat na mga nagdanay sa integridad maako kan balaog na buhay na daing katapusan. Tunay nanggad, an pagkabuhay ninda magigin “pagkabuhay liwat sa buhay.”​—Juan 5:29.

¹⁴ Paano kita nararanga dawa ngonyan kan paglaom na pagkabuhay liwat? Orog na mahalaga, ano an dapat niatong gibohon tanganing masegurado na mag-aako kita kan mga pakinabang kaiyan sa ngapit?

Mga Leksion na Manonodan Ngonyan

15. Paano makakatabang ngonyan an pagtubod sa pagkabuhay liwat?

¹⁵ Tibaad nagadanan kamo kasuarin pa sana nin sarong namomotan asin tibaad kinakaya nindong atubangon an dakulang pagliliwat na ibinunga kan makolog na pagkagadan na iyan. An paglaom na pagkabuhay liwat nakakatabang sa saindo na magkaigwa nin panlaog na pagkakalmado asin kosog na mayo sa mga dai nakakaaram kan katotoohan. “Habo mi na kamo daing pakaaram manongod sa mga natotorog sa kagadanan,” an pagranga ni Pablo sa mga taga Tesalonica, “tanganing dai kamo magmondo siring kan iba na dai nin paglaom.” (1 Tesalonica 4:13) Naiimahinar daw nindo na yaon kamo sa bagong kinaban, na naheheling mismo an pagkabuhay liwat? Maranga kamo ngonyan paagi sa paghorophorop sa paglaom na maheling giraray an saindong mga namomotan.

16. Ano an siertong mamamatean nindo kun mangyari na an pagbuhay liwat?

¹⁶ Tibaad sa presente tinitios nindo an pisikal na epekto kan pagrebelde ni Adan, tibaad huli sa helang na ikakagadan. Dai pagtogotan an kapurisawan na itinatao kaini sa saindo na magin dahelan na malingawan nindo an magayagayang paglaom na personal na maeksperyensiahan an pagkabuhay  liwat na may nakabalik na salud asin bagsik sa bagong kinaban. Dangan pagmuklat nindo asin pagheling nindo sa nagsasabat na maogmang mga lalauogon na gustong-gustong sabihon sa saindo an saindang kagayagayahan na kamo binuhay liwat, seguradong papasalamatan nindo an Dios huli sa saiyang mamomoton na kabootan.

17, 18. Anong duwang mahalagang leksion an maninigo na isapuso niato?

¹⁷ Mientras tanto, isipa nindo an duwang leksion na maninigong isapuso niato. An saro iyo an importansia kan bilog na kalag na paglilingkod ki Jehova ngonyan mismo. Bilang pag-arog sa satong Kagurangnan, si Cristo Jesus, an satong buhay na may pagsakripisyo nagpapaheling nin pagkamoot ki Jehova asin sa satong kapwa. Kun mawara an satong kabuhayan o katalingkasan dahelan sa pagtumang o paglamag, desidido kita na magdanay na marigon sa pagtubod ano man na mga pagbalo an tibaad mapaatubang sa sato. Kun halimbawang an mga nagkokontra humaon kita nin kagadanan, kun siring an paglaom na pagkabuhay liwat rinaranga asin pinapakosog kita na magdanay na maimbod ki Jehova asin sa saiyang Kahadean. Iyo, an kaigotan niato sa paghuhulit kan Kahadean asin paggibo nin mga disipulo nagpapadanay sa sato na nakalinyang magkamit kan daing sagkod na mga bendisyon na itinagama ni Jehova para sa mga matanos.

¹⁸ An ikaduwang leksion konektado sa kun paano niato inaatubang an mga sugot na bunga kan satong makasalan na laman. An kaaraman niato manongod sa paglaom na pagkabuhay liwat asin an satong pag-apresyar sa dai na kutana maninigong kabootan ni Jehova pinapakosog an satong desisyon na magdanay na marigon sa pagtubod. “Dai kamo mamoot sa kinaban o sa mga bagay kan kinaban,” an patanid ni apostol Juan. “Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​—an mawot kan laman asin an mawot kan mga mata asin an pagpaabaw-abaw kan kaya sa buhay​—bakong gikan sa Ama, kundi gikan sa kinaban. Apuera kaini, an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:15-17) An pan-akit kan kinaban paagi sa materyalismo dai magigin nakakaakit sa sato kun ikokomparar niato iyan sa “tunay na buhay.” (1 Timoteo 6:17-19) Kun nasusugotan na gumibo nin inmoralidad, marigon niatong lalabanan iyan. Aram niato na kun halimbawang magadan kita bago an Armagedon, an padagos na paggawe na ikinakaanggot ni  Jehova puedeng magbugtak sato sa kamugtakan na kapareho kan mga mayo nin paglaom na mabuhay liwat.

19. Anong dai masokol na pribilehio an maninigo na dai niato paglingawan?

¹⁹ Orog sa gabos, maninigo na nungka niatong paglingawan an dai masokol na pribilehio na paogmahon an puso ni Jehova ngonyan asin sagkod lamang. (Talinhaga 27:11) An kaimbodan niato sagkod sa kagadanan o an satong padagos na pagdadanay sa integridad sagkod sa katapusan kan maraot na sistemang ini nagpapaheling ki Jehova kun kiisay kita minakampi sa isyu nin unibersal na soberaniya. Kun siring, abaang kagayagayahan na mabuhay sa daganon na Paraiso magsalang paagi sa pagkaligtas sa dakulang kahorasaan o paagi sa pakaeksperyensia nin milagrosong pagkabuhay liwat!

Pagpanigo sa mga Mawot Niato

20, 21. Ano an makakatabang sa sato na magdanay na maimbod dawa kun igwa kita nin dai pa nasisimbag na mga hapot manongod sa pagkabuhay liwat? Ipaliwanag.

²⁰ Sa pag-orolay niato dapit sa pagkabuhay liwat, may nagkapirang hapot na dai pa nasisimbag. Anong areglo an gigibohon ni Jehova para sa mga may agom kan sinda magadan? (Lucas 20:​34, 35) Mangyayari daw an mga pagbuhay liwat sa lugar na kinagadanan kan mga tawo? Bubuhayon daw sinda liwat harani sa lugar kan saindang pamilya? Kadakol pang ibang hapot manongod sa mga areglo para sa pagkabuhay liwat na dai pa nasisimbag. Minsan siring, dapat niatong tandaan an mga tataramon ni Jeremias: “Marahay si Jehova sa naglalaom sa saiya, sa kalag na padagos na naghahanap sa saiya. Marahay na an saro maghalat, na dai ngani naggigirong, para sa pagliligtas ni Jehova.” (Lamentacion 3:​25, 26) Sa itinalaan na panahon ni Jehova, lubos kitang makokontento sa simbag na itatao sa gabos niatong hapot. Taano ta nakakaseguro kita kaini?

²¹ Horophoropa nindo an ipinasabong na mga tataramon kan salmista kan umawit sia manongod ki Jehova: “Binibiklad mo an saimong kamot asin pinapanigoan an mawot nin lambang bagay na may buhay.” (Salmo 145:16) Mantang kita nagkakaedad, nagbabago an mga mawot niato. An mga linaoman niato kan kita mga aki pa bako nang mawot niato ngonyan. An pananaw niato sa buhay apektado kan mga naeeksperyensiahan niato saka kan satong mga paglaom. Pero, ano man an magigin tamang mga mawot niato sa bagong kinaban, papanigoan nanggad iyan ni Jehova.

22. Taano ta may marahay na dahelan kita na omawon si Jehova?

²² An importante sa lambang saro sa sato ngonyan iyo an magin maimbod. “An hinahanap sa mga mayordomo iyo na an tawo makuang maimbod.” (1 Corinto 4:2) Mga mayordomo kita kan mamuraway na maogmang bareta kan Kahadean nin Dios. An kahigosan niato sa pagbalangibog kan maogmang baretang ini sa gabos na nanonompongan niato nakakatabang sa sato na magdanay na nakalinyang magkamit nin buhay. Nungkang paglingawan an katunayan na “an panahon asin pagkanorongod” nangyayari sa sato gabos. (Eclesiastes 9:11) Tanganing malabanan an ano man na dai kinakaipuhan na kahaditan dahelan sa mga pagkadaing kasegurohan sa buhay, pangaptan nin higot an saindong mamuraway na paglaom na pagkabuhay liwat. Aramon nindo na kun garo baga magagadan kamo bago magpoon an Milenyal na Paghade ni Cristo, mararanga kamo kan kasegurohan na may madatong na kaginhawahan. Sa itinalaan na panahon ni Jehova maootro nindo an mga tataramon ni Job para sa Kaglalang: “Ika maapod, asin ako mismo masimbag sa saimo.” Mapasa ki Jehova logod an kaomawan, na naghihimuyawot na buhayon liwat an gabos na yaon sa saiyang memorya!​—Job 14:15.

[Mga Nota sa Ibaba]

Nagigirumdoman daw Nindo?

• Ano an magigin basehan sa paghokom sa mga tawo durante kan Milenyo?

• Taano an nagkapira ta bubuhayon sa “pagkabuhay liwat sa buhay” asin an iba sa “pagkabuhay liwat sa paghokom”?

• Paano kita nararanga ngonyan kan paglaom na pagkabuhay liwat?

• Paano nakakatabang sa sato an mga tataramon sa Salmo 145:16 na mansayon an dai pa nasisimbag na mga hapot manongod sa pagkabuhay liwat?

[Mga Hapot Para sa Pag-adal]

[Mga Ritrato sa pahina 21]

Paano makakatabang sa sato ngonyan an pagtubod sa pagkabuhay liwat?