Biglang Nangyari an Sarong Trahedya

SI Owen, sarong aking lalaki na duwa may kabangang taon an edad, nagkakawat sa banyo kan saiyang harong. Nakasakat sia sa kabinet nin mga bolong na hinohona kan saiyang mga magurang na dai nia kayang aboton. Sa laog kaiyan, nakakua sia nin sarong botelya na nakakua kan saiyang atension. Binukasan nia iyan asin ininom an likidong laog kaiyan. Biglang nangyari an trahedya.

An botelya may laog na asido na nakakaraot nin diit-diit, asin makamomondo, nagadan an aking si Owen. Grabe an pagmondo kan saiyang mga magurang. An saiyang ama, si Percy, naghanap nin karangahan sa saiyang iglesia. “Taano ta nangyari ini?” an hapot nia. An klerigo suminimbag, “Gusto nin Dios nin saro pang sadit na anghel sa langit.” Biyong nanluya, an nagadanan na magurang nagsaboot na ini biyong bakong makatanosan. Talaga daw na tinuyo nin Dios na mangyari an siring na trahedya? Huling desganado, si Percy nagdesisyon na magpondo na sa pakikiasosyar sa saiyang iglesia.

Hinohorophorop an nangyari, si Percy nag-iisip-isip: ‘An sakong aki daw nagsasakit pa? Maheheling ko pa daw sia liwat?’

Tibaad kamo nag-iisip-isip man kun ano an nangyayari pagkagadan asin kun baga posible pang makaibanan liwat sa ngapit an nagadan na mga namomotan. Ihinahayag kan Tataramon nin Dios, an Biblia, an simbag sa mga hapot na ini. Makukua sa mga pahina kaiyan an malinaw asin nakakarangang mga simbag para sa gabos na nakaeksperyensia nin kaagid na mga trahedya. Orog pa dian, ihinahayag kaiyan an sarong mamuraway na paglaom na ipinanuga nin Dios​—an pagkabuhay liwat.

Basahon tabi an masunod na artikulo tanganing makanood nin orog pa manongod sa makangangalas na paglaom na ini.