Kosog nin Boot sa Atubangan nin Pagtumang

PUERSAHAN na pinalaog nin panatikong sururog si Gayo asin Aristarco, duwang kaibaiba ni apostol Pablo, sa teatro nin Efeso. Duman, an anggot na kadaklan nagkururahaw sa laog nin duwang oras: “Dakula si Artemis kan mga taga Efeso!” (Gibo 19:​28, 29, 34) Nanindogan daw nin marigon an mga kaibaiba ni Pablo sa atubangan kan pagtumang na ini? Asin ano an nagin dahelan kan situwasyon na ini?

Mapangganang nakapaghulit si Pablo sa siudad nin Efeso sa laog nin mga tolong taon. Bilang resulta, dakol na taga Efeso an puminondo na sa pagsamba sa mga idolo. (Gibo 19:26; 20:31) An tipikong idolo sa Efeso iyo an gibo sa pirak na sadit na templo ni Artemis, an diosa nin pagigin mainaki, na an dakulang templo nadudungawan an siudad. An sadit na mga representasyon na ini kan templo isinusulot bilang mga anting-anting o ilinalaag sa mga harong. Siempre, an mga Kristiano dai mabakal kan mga idolong ini.​—1 Juan 5:21.

Naniniwala si Demetrio, saro sa mga platero, na isinasapeligro kan ministeryo ni Pablo an saindang maganansiang negosyo. Paagi sa mga tataramon na bakong gabos totoo asin pinasobrahan, nakombensir nia an kapwa nia mga artesano na an mga tawo sa bilog na Asia Minor mapondo na sa pagsamba ki Artemis. Kan an anggot na mga platero magpoon na magkururahaw nin mga pag-omaw ki Artemis, talagang nagkaigwa nin pagkariribok asin nagkariribaraw an bilog na siudad.​—Gibo 19:24-29.

Rinibong tawo an nagtiripon sa teatro, na nagkakaigo an 25,000 na paradalan. Nag-alok si Pablo na kaolayon an maribok na sururog, alagad kinombensir sia kan maboot na mga opisyal na dai iyan paggibohon. Sa katapustapusi, an rehistrador kan siudad nagin mapanggana sa pagpakalma sa kadaklan, asin si Gayo patin si Aristarco nakadulag na dai nakolgan.​—Gibo 19:35-41.

Ngonyan, an banwaan nin Dios tibaad mapaatubang man sa mga paratumang asin pagkariribok pa ngani mantang nagpapadagos sinda sa saindang ministeryo. Parate sindang naghuhulit kan maogmang bareta sa mga siudad kun saen nangingibabaw sa palibot an idolatriya, inmoralidad, asin pagkadelingkuente. Minsan siring, may kosog nin boot na inaarog ninda si apostol Pablo, na ‘dai nagpogol sa pagtokdo sa publiko asin sa pagharongharong’ sa siudad nin Efeso. (Gibo 20:20) Asin naggayagaya man sinda kun naheheling ninda na ‘an tataramon ni Jehova padagos na nagtatalubo asin nangingibabaw.’​—Gibo 19:20.

[Ritrato sa pahina 30]

Kagabaan kan teatro sa Efeso