Kun Paano Gigibohon na May Halaga an Kada Aldaw

“TOKDOI kami kun paano bibilangon an samuyang mga aldaw sa paagi na magkamit kami nin puso na may kadonongan.” (Salmo 90:12) Ini an mapakumbabang pamibi kan kagsurat kan Biblia na si Moises. Ano an espesipikong hinahagad nia? Maninigo man daw kitang gumibo nin arog kaiyan na reberensial na kahagadan?

Sa bersikulo 10, si Moises nanangis huli sa kahalipotan nin buhay nin tawo. Sa saro pang pangyayari, isinurat nia an sinabi ni Job: “An tawo, na namundag sa babae, halipot an buhay asin pano nin kasakitan.” (Job 14:1) Malinaw na aram ni Moises, makolog man sa boot, an kahalipotan kan buhay nin bakong sangkap na tawo. Kun siring, minamansay nia an kada aldaw nin buhay bilang mahalagang marhay na regalo. Sa pagngayongayong ini na idinirekta sa Dios, ipinahayag ni Moises an saiyang pagmawot na gamiton an natatada pang mga aldaw kan saiyang buhay sa madonong na paagi, sa paagi na makakapaogma sa saiyang Kaglalang. Bako daw na maninigo man na maghingoa kitang gamiton an satong mga aldaw sa makahulogan na paagi? Iyan an hihingoahon niato kun gusto niatong oyonan kita nin Dios ngonyan.

May saro pang bagay na nakamotibar ki Moises sagkod ki Job, sarong bagay na maninigo man na makamotibar sa sato. Inaantisipar kan duwang diosnon na lalaking ini an sarong balos sa ngapit​—an buhay sa daga sa irarom nin mas marahay na kamugtakan. (Job 14:​14, 15; Hebreo 11:26) Sa panahon na iyan, dai na mapuputol nin kagadanan an marahay na mga ginigibo nin siisay man. Katuyohan kan satong Kaglalang na an mga maimbod mabubuhay sagkod lamang sa paraisong daga. (Isaias 65:21-24; Kapahayagan 21:​3, 4) Ini man an puedeng magin esperansa nindo kun ‘bibilangon nindo an saindong mga aldaw sa paagi na magkamit kamo nin puso na may kadonongan.’