Mapanggana sa Espesyal na Paagi

NAPAPAATUBANG daw kamo sa pagtumang sa saindong pagtubod​—tibaad sa trabaho, sa eskuelahan, sa pamilya, o huli sa restriksion na inimponer kan Estado? Kun siring, dai kamo madesganar. Dakol na Saksi ni Jehova an napaatubang sa kaagid na mga pagbalo, pero nagin mapanggana sinda. Isipon nindo an halimbawa ni Erna Ludolph.

Namundag si Erna sa Lübeck, Alemania, kan 1908. Sia sana an miembro kan saiyang pamilya na naglilingkod ki Jehova. Kan mapasa kapangyarihan an gobyerno ni Hitler kan 1933, nagin depisil an buhay para sa mga Saksi ni Jehova. An mga kairiba sa trabaho ni Erna idinenunsiar sia huli sa pagsayuma niang magsaludo ki Hitler, asin nagresulta ini sa pag-arestar sa saiya kan mga Nazi. Nabilanggo sia nin walong taon sa manlaenlaen na bilanggoan asin sa kampo de konsentrasyon sa Hamburg-Fuhlsbüttel, Moringen, Lichtenburg, asin Ravensbrück. Mantang si Erna yaon sa Ravensbrück, may nangyari na nagbunga kan kapangganahan nia.

Napapalaen na Paralinig sa Harong

Si Propesor Friedrich Holtz asin an saiyang agom, si Alice, nakaistar sa Berlin. Bako sindang miembro kan partidong Nazi asin dai nagsusuportar sa ideolohiya kaiyan. Minsan siring, paryente sinda kan sarong halangkaw na opisyal nin SS na may paninimbagan sa nagkapirang bilanggo sa kampo de konsentrasyon. Kaya kan an propesor asin an saiyang agom naghahanap nin sarong paralinig sa harong, tinogotan kan opisyal na ini nin SS na magpili sinda nin babaeng bilanggo. Huli kaini, kan Marso 1943, nagbisita si Alice sa Ravensbrück tanganing magpili nin sarong paralinig sa harong. Siisay an pinili nia? Si Erna Ludolph. Si Erna nag-istar sa pamilyang Holtz, na marahay an nagin pagtratar sa saiya. Pagkatapos kan guerra, sia buminalyo kaiba kan pamilyang iyan sa Halle sa may Saale. Duman, napaatubang giraray si Erna sa pagtumang, ngonyan hale sa mga autoridad na Sosyalista sa Sirangan na Alemania. Kan 1957 an pamilya idineportar sa Solnopan na Alemania, asin si Erna buminalyo kaiba ninda. Sa katapustapusi si Erna libre nang otobon an saiyang pagtubod.

Paano nagin mapanggana si Erna sa espesyal na paagi? Bilang resulta kan marahay na gawe-gawe ni Erna asin kan eksperto niang paghuhulit kan mensahe sa Biblia, si Alice Holtz asin an limang aki kaini gabos nagin bautisadong Saksi ni Jehova. Apuera kaini, 11 sa makoapo ni Alice an mga Saksi man. Duwa sa sainda an naglilingkod sa presente sa sangang opisina kan Mga Saksi ni Jehova sa Selters, Alemania. “Sa pankagabsan, an samong pamilya nasa katotoohan huli sa halimbawa ni Erna,” an sabi ni Susanne, saro sa mga aking babae ni Alice. An pakatagal ni Erna binalosan nin abunda. Kumusta man an saindong situwasyon? An saindong maimbod na pakatagal sa irarom nin depisil na mga kamugtakan tibaad magkaigwa man nin nakakakontentong resulta. Iyo, an marahay na gawe-gawe asin ekspertong paghuhulit tibaad makatabang saindo na magin mapanggana sa espesyal na paagi. *

[Nota sa Ibaba]

[Ritrato sa pahina 31]

Si Erna Ludolph (nakatukaw) kaiba kan mga miembro kan pamilyang Holtz