Mga Hapot Hale sa mga Parabasa

Taano ta nagsurat si Pablo mapadapit sa Kristianang agom: “Sia magdadanay na ligtas paagi sa pag-aki”?​—1 Timoteo 2:15.

Ano an ihinahayag kan konteksto kan bersikulong ini manongod sa boot sabihon ni Pablo? Sia pinasabngan na magtao nin hatol dapit sa papel kan Kristianang agom sa kongregasyon. Sia nagsurat: “Sakuyang minamawot na an mga babae magsamno sa saindang sadiri nin husay na gubing, na may kabinian asin toltol na isip, bakong nin mga estilo nin pagsalapid nin buhok asin bulawan o perlas o mamahalon na gayong gubing, kundi sa paagi na angay sa mga babae na naghihingakong sinda may reberensia sa Dios, arin na baga, paagi sa marahay na mga gibo.” (1 Timoteo 2:​9, 10) Sinasadol ni Pablo an saiyang Kristianang mga tugang na magin mabini, magin timbang sa pagpili nin personal na pan-adorno, asin na ‘masamnohan’ nin marahay na mga gibo.

Sunod, ipinaliwanag ni Pablo an areglo sa pagkapayo sa laog kan kongregasyon, na nagsasabi: “Dai ako minatogot na an babae magtokdo, o magkapot nin autoridad sa lalaki, kundi dai maggirong.” (1 Timoteo 2:12; 1 Corinto 11:3) Ipinapaliwanag nia an basehan kan areglong ini paagi sa pagpaheling na mantang si Adan dai nadaya ni Satanas, si Eva “lubos na nadaya asin naholog sa paglapas.” Paano mapoprotehiran an sarong Kristiana sa kasalan na kapareho kan ki Eva? Si Pablo minasimbag: “Minsan siring, sia magdadanay na ligtas paagi sa pag-aki, basta sinda magpadagos sa pagtubod asin pagkamoot asin kabanalan kaiba an toltol na isip.” (1 Timoteo 2:​14, 15) Ano an boot sabihon ni Pablo kan mga tataramon na ini?

An nagkapirang paratradusir garo ipinapakahulogan na an kaligtasan nin sarong babae minadepende sa pagkaigwa nia nin mga aki. Halimbawa, an Today’s English Version nagsasabi: “An sarong babae maliligtas paagi sa pagkaigwa nin mga aki.” Minsan siring, bakong tama an interpretasyon na ini kan mga tataramon ni Pablo. Ipinapaheling kan dakol na teksto na tanganing maligtas, dapat na mamidbid nin saro si Jehova, tumubod ki Jesus, asin gumibo nin pagtubod, na pinapatunayan an pagtubod na iyan paagi sa mga gibo. (Juan 17:3; Gibo 16:​30, 31; Roma 10:10; Santiago 2:26) Dugang pa, dai boot sabihon ni Pablo na an may pagtubod na mga babae ginagarantiyahan nin ligtas na pangangaki. May mga babae na nakaligtas sa eksperyensia nin pangangaki baga man sinda may pagtubod o dai. Asin makamomondo, nagadan an nagkapira sa pangangaki, baga man sinda may pagtubod o dai.​—Genesis 35:16-​18.

An dagdag na hatol ni Pablo mapadapit sa mga babae sa huring parte kan surat man sanang ini nakakatabang sa sato na masabotan an boot niang sabihon. Nagpapatanid sia dapit sa nagkapirang babaeng balo na hoben pa na ‘nagtutukawtukaw, na namamasyar sa mga harong; iyo, bako sanang nagtutukawtukaw, kundi siring man mga tsismosa asin parapakilabot sa gibo nin iba, na nag-oorolay sa mga bagay na dai dapat.’ Ano an isinadol ni Pablo? Sia nagpadagos: “Kun siring minamawot ko na an mga babaeng balo na hoben pa magpaagom, mangaki, mangataman sa harong, tanganing dai madagka an nagtutumang na magmuda.”​—1 Timoteo 5:​13, 14.

Idinodoon ni Pablo an positibong papel nin mga babae sa areglo nin pamilya. Huling sibot sa siring na mga aktibidad na arog kan ‘pangangaki asin pangangataman sa harong,’ an babae na nagpapadagos sa “pagtubod asin pagkamoot asin kabanalan kaiba an toltol na isip” dai mapadara sa gawe-gawe na dai nakakapakosog. An saiyang espirituwalidad mapapagdanay, o “magdadanay na ligtas.” (1 Timoteo 2:15) An paggibo kaiyan makakatabang sa dakol na hoben na babae na likayan an mga siod ni Satanas.

An mga tataramon ni Pablo ki Timoteo nagpapagirumdom sa sato gabos, mga lalaki asin babae, na magin okupado sa may pakinabang na paagi. Sinasadol kan Tataramon nin Dios an gabos na Kristiano: “Magmaan kamong marhay na an saindong paglakaw bakong siring sa mga mangmang kundi siring sa mga madonong.”​—Efeso 5:15.