Harani Na an Sarong Kinaban na Mayo nin Kadukhaan

AN MGA retrato nin Paraiso, na siring kan nasa tutob kan magasin na ini, nakakaakit sa mga tawo na nabubuhay sa kadukhaan. An paraiso totoo para sa enot na tawong mag-agom, si Adan asin Eva. An saindang istaran iyo an tatamnan sa Eden. (Genesis 2:7-23) Maski ngani nawara an Paraisong iyan, an pagtubod sa sarong paraiso sa ngapit​—sa sarong bagong kinaban na mayo na nin kadukhaan​—bako sanang pangatorogan. Iyan masarig na nakabasar sa mga panuga na yaon sa Biblia.

Isipon nindo an panuga na ginibo ni Jesu-Cristo sa huring aldaw kan saiyang buhay sa daga. An saro sa mga paragibo nin maraot na nagadan kaiba ni Jesus nagpaheling nin pagtubod sa kakayahan nin Dios na resolberan an mga problema nin tawo. Sia nagsabi: “Jesus, girumdoma man ako kun ika yaon na sa saimong kahadean.” An mga tataramon na ini nagpapaheling na an paragibo nin maraot nagtutubod na si Jesus mamamahala bilang Hade asin na an mga gadan bubuhayon liwat. Si Jesus nagsimbag: “Totoong sinasabi ko sa saimo ngonyan, Ika makakaibahan ko sa Paraiso.”​—Lucas 23:​42, 43.

Nagtataram dapit sa mga mabubuhay sa Paraiso, an Biblia nagsasabi: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan.” (Isaias 65:21) Iyo, “sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.”​—Miqueas 4:4.

Pero, taano ta tinotogotan na mag-eksister an kadukhaan ngonyan? Anong tabang an itinatao nin Dios sa mga nagtitios? Noarin tataposon sa katapustapusi an kadukhaan?

Taano ta Tinotogotan an Kadukhaan?

An Paraiso na binugtakan ki Adan asin Eva nawara bilang resulta kan pagrebelde na pinonan nin sarong maraot na anghel, si Satanas na Diablo. Ginagamit an sarong halas na magtaram para sa saiya, tinentaran ni Satanas si Eva na balgahon an ley nin Dios na dai magkakan kan bunga nin sarong kahoy. Dinaya nia sia na magtubod na an independensia sa Dios matao sa saiya nin mas marahay na buhay. Kan ialok ni Eva an ipinapangalad na bunga ki Adan, ini nagkakan man, na tinatalikdan an Dios apabor sa agom nia.​—Genesis 3:1-6; 1 Timoteo 2:14.

An rebeldeng mag-agom tama sanang pinalayas sa Paraiso asin poon kaidto kaipuhan nindang maglapigot tanganing mabuhay. Sagkod ngonyan, tinotogotan ni Jehova si Satanas na mamahala sa makasalan na katawohan, na pinapangyaring maheling an mga resulta kan kasumbikalan sa Dios. Pinatunayan kan kasaysayan nin tawo na an katawohan dai kayang papangyarihon an Paraiso sa daga. (Jeremias 10:23) Imbes, an independensia sa Dios nagresulta sa kapahapahamak  na mga problema, kaiba an kadukhaan.​—Eclesiastes 8:9.

Minsan siring, an mga dukha dai pinabayaan na daing tabang sa kinaban na ini na pano-pano nin problema. An ipinasabong na Tataramon nin Dios, an Biblia, igwa nin marahay na giya para sa sainda.

“Dai Kamo Noarin Man Maghadit”

Kan nakikipag-olay sa dakol na nagdadangog na kaiba an dakol na dukha, si Jesus nagsabi: “Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinapakakan sinda kan saindong langitnon na Ama. Bako daw na kamo orog na mahalaga kisa sainda? . . . Kaya dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakakaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.”​—Mateo 6:26-33.

An sarong tawong dukha dai man kaipuhan na maghabon. (Talinhaga 6:​30, 31) Sia sususteniran kun eenoton nia an Dios sa saiyang buhay. Isipon nindo an kamugtakan ni Tukiso, sarong lalaki sa Lesoto, sa timog nin Aprika. Kan 1998, an mga tropa kan ibang nasyon naglaog sa Lesoto tanganing pondohon an rebelyon tumang sa gobyerno. Bilang resulta kan guerrang iyan, hinabonan an mga tindahan, nawaran nin trabaho an mga tawo, asin nagkaigwa nin grabeng kakulangan sa pagkakan.

Si Tukiso nakaistar sa pinakadukhang parte kan kabisera. Dakol sa saiyang mga kataed an naghahabon sa mga tindahan tanganing mabuhay. Kan magpuli si Tukiso sa saro sanang kuarto na istaran nia, nanompongan nia na si Maseiso, an saiyang kasaroan, igwa nin dakol na kakanon na hinabon nia. “Iluwas mo an mga ini,” an sabi ni Tukiso, na nagpapaliwanag na tumang sa ley nin Dios an paghabon. Nagkuyog si Maseiso. Inolog-olog sinda kan mga kataed ninda asin kinurua kan mga ini an hinabon na mga kakanon.

Ini an paninindogan ni Tukiso huli sa nanodan nia sa saiyang pag-adal sa Biblia sa mga Saksi ni Jehova. An pagkuyog daw nia sa ley nin Dios nagresulta sa makuring gutom? Dai. Paghaloyhaloy, kinontak si Tukiso kan kamagurangan sa kongregasyon kan Mga Saksi ni Jehova na inaatenderan nia asin nagdara sinda sa saiya nin mga kakanon. Sa katunayan, an mga Saksi ni Jehova sa kataed na Aprika del Sur nagpadara nin labing duwang toneladang ayuda para sa saindang Kristianong mga tugang na lalaki asin babae sa Lesoto. Napahiro si Maseiso sa pagkuyog ni Tukiso sa Dios asin sa mamomoton na tabang kan kongregasyon. Sia nagpoon man na mag-adal sa Biblia. Pag-abot nin panahon, sindang duwa nagpakasal nin legal asin sa siring nakualipikar na mabautismohan bilang mga Saksi ni Jehova. Sinda maimbod na naglilingkod sa Dios sagkod ngonyan.

 Si Jehova Dios nagmamakolog sa mga dukha. (Helingon an kahon na may titulong “Ano an Pagmansay nin Dios sa mga Dukha?”) Naggibo sia nin mamomoton na probisyon tanganing tabangan an iba arog ni Tukiso asin Maseiso na makanood nin orog pa manongod sa saiya. Asin sa saiyang Tataramon, nagtao sia nin praktikal na sadol para sa pan-aroaldaw na pamumuhay.

Sarong Marahayon na Probisyon

An Mga Saksi ni Jehova parateng nagmamaigot na ipabanaag an pagmakolog nin Dios sa mga dukha. (Galacia 2:10) Sa parate kun nagkakaigwa nin mga kalamidad sa sarong nasyon asin naaapektaran an tunay na mga Kristiano, may ginigibong mga areglo tanganing ikatao an kinakaipuhan na tabang. Mas mahalaga, an mga Saksi nagpapaheling nin pagmakolog sa espirituwal na pangangaipo kan gabos, kaiba an mga dukha. (Mateo 9:36-38) Durante kan nakaaging 60 taon, rinibong sinanay na ministro an nagboluntaryong maglingkod bilang mga misyonero sa ibang nasyon. Halimbawa, sarong mag-agom na misyonero hale sa Finlandia na nag-adal kan lenguaheng Sesoto an nagtokdo ki Tukiso asin Maseiso na magin mga disipulo ni Jesus. (Mateo 28:​19, 20) Sa parate kalabot sa siring na pagmimisyonero an pagbaya sa sarong komportableng buhay sa may kayang nasyon asin pagbalyo sa sarong dukhang nasyon.

An paghabon tanganing mabuhay bakong opsion para sa tunay na mga Kristiano. Imbes, igwa sinda nin pagtubod sa kakayahan ni Jehova Dios na magsustenir. (Hebreo 13:​5, 6) An sarong paagi nin pagsustenir ni Jehova sa saiyang banwaan iyo an pambilog na kinaban na organisasyon kan saiyang mga parasamba, na nagmamakolog sa lambang saro.

An saro pang paagi na nagtatabang si Jehova sa mga dukha iyo an pagtao sa sainda nin praktikal na sadol sa pan-aroaldaw na pamumuhay. Halimbawa,  an Biblia nagboboot: “An parahabon dai na maghabon, kundi marahay pa na sia magpagal, na naggigibo nin marahay na gibo paagi sa saiyang mga kamot, tanganing may ikatao sia sa nangangaipo.” (Efeso 4:28) Dakol na mayong trabaho an nakagibo nin sadiri nindang trabaho, na mahigos na nagtatrabaho, arog kan pagtanom asin pag-ataman nin tatamnan nin mga gulay. An Biblia nagtatabang man sa mga dukha na mag-ekonomiya paagi sa pagtokdo sa sainda na likayan an maraot na mga bisyo, arog kan pag-abuso sa inomon na de alkohol.​—Efeso 5:18.

Sarong Kinaban na Mayo nin Kadukhaan​—Noarin?

Sinasabi kan Biblia na nabubuhay na kita sa “huring mga aldaw” kan pamamahala ni Satanas. (2 Timoteo 3:1) Dai na mahahaloy, susugoon ni Jehova Dios si Jesu-Cristo tanganing maghokom sa katawohan. Ano an mangyayari sa panahon na iyan? Itinao ni Jesus an simbag sa saro sa saiyang mga ilustrasyon. Sia nagsabi: “Kun an Aki nin tawo dumatong na sa saiyang kamurawayan, asin an gabos na anghel kaibanan nia, dangan sia matukaw sa saiyang mamuraway na trono. Asin an gabos na nasyon titiponon sa atubangan nia, asin pagbubulagbulagon nia an mga tawo, kun paanong ibinubulag nin pastor an mga karnero sa mga kanding.”​—Mateo 25:31-33.

An mga karnero sa ilustrasyon na ini iyo an mga nagpapasakop sa pagkahade ni Jesus. Iinagid sinda ni Jesus sa mga karnero huli ta nagsusunod sinda sa saiya bilang saindang Pastor. (Juan 10:16) An mga arog-karnerong ini magkakamit nin buhay sa irarom kan sangkap na pamamahala ni Jesus. Iyan maogmang buhay sa bagong kinaban na mayo na nin kadukhaan. An mga tawong arog-kanding, na habo sa pamamahala ni Jesus, gagadanon sagkod lamang.​—Mateo 25:46.

Tataposon kan Kahadean nin Dios an karatan. Dangan an kadukhaan magigin bagay na nakalihis na. Imbes, an daga iistaran nin mga tawo na namomoot asin nagmamakolog sa lambang saro. An siring na bagong kinaban posible huli ta naheheling iyan sa mamomoton na internasyonal na kasararoan nin magturugang kan Mga Saksi ni Jehova, huli ta si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.”​—Juan 13:35.

[Kahon/Mga Ritrato sa pahina 6, 7]

ANO AN PAGMANSAY NIN DIOS SA MGA DUKHA?

Ilinaladawan kan Biblia an Kaglalang kan katawohan bilang “an Saro na nagtatao nin tinapay sa mga nagugutom.” (Salmo 146:7) Igwa iyan nin labing sanggatos na bersikulo na nagdodoon sa pagmakolog nin Dios sa mga dukha.

Halimbawa, kan itao ni Jehova an saiyang Ley sa suanoy na nasyon nin Israel, pinagbotan nia an Israelitang mga paraoma na dai pag-uboson na anihon an mga gilid kan saindang oma. Dai sinda dapat na bumalik tanganing tiponon an tadang mga prutas paagi sa pag-arahit sa sarong poon nin olibo o ubas. An mga ley na ini mamomoton na probisyon para sa mga dayo, ilo, babaeng balo, asin iba pang nagsasakit nin makuri.​—Levitico 19:​9, 10; Deuteronomio 24:19-21.

Dugang pa, pinagbotan nin Dios an mga Israelita: “Dai nindo pagpasakitan nin makuri an siisay man na babaeng balo o aking lalaki na ilo sa ama. Kun sia papasakitan nindo nin makuri, dangan kun mag-agrangay sia sa sako, totoong dadangogon ko an saiyang kinurahaw; asin ta malaad nanggad an sakong kaanggotan, asin gagadanon ko nanggad kamo sa minasbad, asin an saindong mga agom na babae magigin mga babaeng balo asin an saindong mga aking lalaki mga aking lalaki na ilo sa ama.” (Exodo 22:22-24) Makamomondo, dai inintindi kan dakol na mayaman na Israelita an mga tataramon na idto. Huli kaini asin kan iba pang maraot na gibo, tinawan ni Jehova Dios an mga Israelita nin manlaenlaen na patanid paagi sa saiyang mga propeta. (Isaias 10:​1, 2; Jeremias 5:28; Amos 4:1-3) Pag-abot nin panahon, pinangyari nin Dios na sakopon kan mga Asirio asin sa huri kan mga Babilonyo an teritoryo kan mga Israelita. Dakol na Israelita an nagadan, asin an mga nakaligtas dinarang bihag sa ibang nasyon.

Ipinabanaag kan namomotan na marhay na Aki nin Dios, si Jesu-Cristo, an mamomoton na pagmakolog kan saiyang Ama sa mga dukha. Ipinapaliwanag an katuyohan kan saiyang ministeryo, si Jesus nagsabi: “An espiritu ni Jehova yaon sa sako, huli ta linahidan nia ako na magpahayag kan maogmang bareta sa mga dukha.” (Lucas 4:18) Dai ini nangangahulogan na linimitaran ni Jesus an saiyang ministeryo sa mga dukha. Mamomoton na tinabangan man nia an mayaman na mga tawo. Minsan siring, kun ginigibo iyan, parateng ipinapahayag ni Jesus an saiyang pagmakolog sa mga dukha. Halimbawa, itinao nia an sadol na ini sa sarong mayaman na namamahala: “Pabakalan an gabos mong sadiri asin tawan sa mga dukha, asin magkakaigwa ka nin kayamanan sa kalangitan; asin madia sumunod ka sa sako.”​—Lucas 14:​1, 12-14; 18:​18, 22; 19:1-10.

Si Jehova Dios asin an saiyang Aki nagmamakolog na marhay sa mga dukha. (Marcos 12:41-44; Santiago 2:1-6) Sa pagpabanaag kan saiyang pagmakolog sa mga dukha, yaon sa memorya ni Jehova an minilyon na dukhang nagadan. An gabos na iyan bubuhayon liwat sa sarong bagong kinaban na mayo nang kadukhaan.​—Gibo 24:15.

[Mga Ritrato]

Ipinapaheling kan internasyonal na kasararoan nin magturugang kan Mga Saksi ni Jehova na posible an bagong kinaban

[Ritrato sa pahina 5]

Si Tukiso asin Maseiso kaiba an misyonerong nagtokdo kan Biblia ki Tukiso

[Ritrato sa pahina 5]

Si Maseiso sa pinto kan saiyang harong kaiba an misyonerang nagtokdo kan Biblia sa saiya