Kaya daw nin Tawo na Taposon an Kadukhaan?

MINILYON an nagdakula na dai nakaeksperyensia nin kadukhaan. Nungka sindang natorog na gutom o napatorog na nagkukubogkubog sa lipot. Pero, dakol sa mga indibiduwal na iyan an naheherak sa mga dukha asin nagmamaigot na marhay na tabangan sinda.

Minsan siring, an kadukhaan nagdadanay na sarong masakit na katunayan para sa mga tawo na pinapasakitan nin guerra sibil, mga baha, tigmara, asin iba pang problema. An mga bagay na ini garo pangum-um sa Aprikanong mga paraoma na an nakukua tama sanang may makakan. An nagkapira napiritan na bayaan an saindang mga harong asin magbalyo sa darakulang siudad o mag-istar sa ibang nasyon bilang mga dulag. An ibang nag-iistar sa probinsia nagbabalyo sa mga siudad huli ta naaakit sinda sa mga panuga na magkakaigwa sinda nin mas marahay na buhay.

An surusuan na mga siudad sa parate nagin gikanan nin kadukhaan. Kakadikit an espasyo, kun igwa man, na matatanoman. Sa parate depisil makahanap nin trabaho. Huli sa biyong pagkadesesperar, dakol an nagigin kriminal. An mga nag-eerok sa siudad nag-aagrangay para sa tabang, alagad dai kayang resolberan kan mga gobyerno nin tawo an nagdadakulang problema nin kadukhaan. Sinasambit an report kan Naciones Unidas na ilinuwas kan Nobyembre 2003, an The Independent kan Londres nagsabi: “An kinaban lalong nagugutom.” Idinugang kaiyan: “Sa bilog na kinaban kinakalkulo na 842 milyones katawo an kulang sa pagkakan ngonyan​—asin an kabilangan na iyan naglalangkaw giraray, na may 5 milyon pa na nagugutom kada taon.”

Kun beses an sangang opisina kan Mga Saksi ni Jehova sa Aprika del Sur nakakaresibi nin mga surat hale sa nagtitios na mga tawo. Halimbawa, sarong lalaki na taga Bloemfontein an nagsurat: “Mayo ako nin trabaho, asin naghahabon ako sa siudad basta may oportunidad. Kun dai ko iyan gigibohon, magugutom kami sa laog nin pirang aldaw​—dai na baga pagsambiton pa an grabeng lipot. Mayo nanggad nin makukuang trabaho. Dakol an naglalagawlagaw sa mga tinampo sa paghanap nin trabaho asin makakakan. May mga midbid ako na naghahanap nin kakanon sa basurahan. May nagkapira na naghuhugot. Dakol na arog ko an nagmomondo nin makuri asin dai nang paglaom. Garo baga mayo na nin paglaom sa ngapit. Dai daw ini naheheling kan Dios, na naglalang sa sato na may pangangaipong magkakan asin gubingan an satong sadiri?”

Igwa nin nakakarangang simbag sa mga ikinakapurisaw kan lalaking ini. Arog kan ipapaheling sa masunod na artikulo, manonompongan an mga simbag na ini sa mga pahina kan Tataramon nin Dios, an Biblia.