Mga Hapot Hale sa mga Parabasa

Taano ta dai ginadan si David asin Bat-seba huli sa pagsambay, mantang an saindang bagong mamundag na aki nagadan?

An Ley ni Moises nagsasabi: “Kun an sarong lalaki manompongan na nakikidorog sa sarong babae na sadiri nin sarong kagsadiri, kun siring sindang duwa dapat na magadan na magkaibanan, an lalaking nakidorog sa babae asin an babae. Sa paaging iyan mo hahaleon an maraot sa Israel.” (Deuteronomio 22:22) Kun itinogot ni Jehova Dios na mga tawong hokom an magkapot kan hudisyal na kaso kan kasalan ni David asin Bat-seba base sa Ley, an duwang parasambay ginadan kutana. Mantang an mga hokom na tawo dai nakakabasa nin puso, mahokom sinda basado sa iginawe kan mga naggibo nin maraot na pinapatunayan nin mga prueba. Sentensiang kagadanan an padusa sa akto nin pagsambay. Dai inautorisaran an mga hokom na Israelita na magpatawad kan kasalan na iyan.

Sa ibong na lado, an tunay na Dios nakakabasa nin puso asin nagpapatawad nin mga kasalan kun nakakaheling sia nin basehan tanganing gibohon iyan. Mantang si David an imbuelto sa kaso, na pinakipagtipanan Nia para sa Kahadean, nagdesisyon si Jehova na gumibo nin eksepsion asin na sia na mismo an magkapot kan kaso. (2 Samuel 7:12-16) “An Hokom sa bilog na daga” igwa nin deretso na gumibo kan siring na desisyon.​—Genesis 18:25.

Ano an naheling ni Jehova kan siniyasat nia an puso ni David? An nota sa itaas sa Salmo 51 nagsasabi na ihinahayag kan salmong ini an saboot ni David “kan si Natan na propeta duminuman sa saiya pagkatapos na makidorog sia ki Bat-seba.” An Salmo 51:1-4 nagsasabi: “Kaherake ako, O Dios, sono sa saimong mamomoton na kabootan. Sono sa kadakolan kan saimong mga pagkaherak paraa an sakuyang mga kalapasan. Hugasan mo ako nin biyo sa sakong sala, asin linigan mo ako sa sakong kasalan pa ngani. Huli ta aram ko an sakuyang mga paglapas, asin an sakuyang kasalan danay na nasa atubangan ko. Sa saimo, sa saimo sanang gayo, nagkasala ako, asin an maraot sa saimong mga mata nagibo ko.” Seguradong minansay ni Jehova an grabeng pagbasol na ini sa puso ni David bilang ebidensia nin tunay na pagsolsol asin nagdesisyon sia na may basehan sa pagpaheling nin pagkaherak sa mga naggibo nin maraot. Dugang pa, si David mismo sarong maheherakon na tawo, asin si Jehova nagpapaheling nin pagkaherak sa mga maheherakon. (1 Samuel 24:4-7; Mateo 5:7; Santiago 2:13) Huli kaini, kan admitiron ni David an saiyang kasalan, sinabihan sia ni Natan: “Si Jehova man nagpalihis sa saimong kasalan. Dai ka magagadan.”​—2 Samuel 12:13.

Dai madudulagan ni David asin Bat-seba an gabos na epekto kan pagkakasala ninda. “Huli ta daing duda na trinatar mo si Jehova nin daing paggalang sa bagay na ini,” an sabi ni Natan ki David, “an aki man mismo, na namundag pa sana sa saimo, siertong magagadan.” An saindang aki nagkahelang asin nagadan sa ibong kan pag-ayuno asin pagmondo ni David sa laog nin pitong aldaw.​—2 Samuel 12:14-18.

May nagkapira na nasasakitan na masabotan kun taano ta kaipuhan na magadan an aki, mantang an Deuteronomio 24:16 nagsasabi: “An mga aki dai maninigong gadanon huli sa mga ama.” Alagad ta kaipuhan na girumdomon niato na kun mga tawong hokom an nagkapot kan kaso, ginadan kutana an mga magurang saka an aki na nasa matris pa. An pagkagadan kan aki tibaad nakatabang man ki David na marealisar nin mas malinaw kun gurano an pagkaanggot ni Jehova sa kasalan ninda ni Bat-seba. Makakakompiar kita na hinokoman ni Jehova an kaso sa makatanosan na paagi, huli ta “sangkap an saiyang dalan.”​—2 Samuel 22:31.

[Ritrato sa pahina 31]

Si David nagpaheling nin tunay na pagsolsol