Sa Anong Pundasyon Kamo Nagtotogdok?

MINADEPENDENG marhay an pagkadurable nin sarong edipisyo sa kapusogan kan pansuportar na estruktura o pundasyon kaiyan. Kun beses ginagamit kan Biblia an prinsipyong ini sa piguratibong sentido.

Halimbawa, an propetang si Isaias inaapod si Jehova Dios bilang an saro na “nagbubugtak kan pundasyon kan daga.” (Isaias 51:13) An pundasyon na ini kompuesto kan dai nababagong mga ley nin Dios na nagkokontrol sa paghiro kan daga asin pagpadanay kaiyan sa lugar na kinamumugtakan kaiyan. (Salmo 104:5) An Tataramon nin Dios, an Biblia, nagtataram man dapit sa “mga pundasyon” kan sosyedad nin tawo. Ini iyo an hustisya, ley, asin areglo. Kun ‘magaba’ o lumuya iyan huli sa inhustisya, karatan, asin kadahasan, mabagsak an areglo nin sosyedad.​—Salmo 11:2-6; Talinhaga 29:4.

An prinsipyong ini minaaplikar man sa mga tawo bilang mga indibiduwal. Sa pagtatapos kan saiyang bantog na Sermon sa Bukid, si Jesu-Cristo nagsabi: “An gabos na nagdadangog sa mga tataramon kong ini asin naggigibo kaiyan ibabaing sa sarong tawong mapagmansay, na nagtogdok kan saiyang harong sa ibabaw kan dakulang gapo. Asin buminulos an oran asin nagdatong an baha asin nagdoros patin hinampak nin makuri an harong na idto, alagad ta iyan dai nagaba, huli ta iyan napapasikad sa dakulang gapo. Dugang pa, an gabos na nagdadangog sa mga tataramon kong ini asin dai naggigibo kaiyan ibabaing sa sarong tawong mangmang, na nagtogdok kan saiyang harong sa baybay. Asin buminulos an oran asin nagdatong an baha asin nagdoros patin hinampak nin makuri an harong na idto asin iyan nagaba, asin makangingirhat an pagkagaba kaiyan.”​—Mateo 7:24-27.

Sa anong pundasyon nindo itinotogdok an saindong buhay? Iyan daw sa ibabaw kan daing kasegurohan na baybay nin daing Dios na pilosopiya nin tawo, na maresulta sa pagbagsak kan estruktura kaiyan? O kamo daw nagtotogdok sa masarig na dakulang gapo nin pagkuyog sa mga tataramon ni Jesu-Cristo, na matabang saindo na sagupaon an piguratibong mga bagyo sa buhay?