An Onestong mga Tawo Nagtataong Kaomawan ki Jehova
Bareta kan mga Parabalangibog kan Kahadean
An Onestong mga Tawo Nagtataong Kaomawan ki Jehova
SA BILOG na daga, midbid an Mga Saksi ni Jehova—hoben asin gurang—sa saindang pagkaonesto. Estudyare an mga halimbawa hale sa tolong kontinente.
An 17 anyos na si Olusola, na nag-iistar sa Nigeria, papuli na hale sa eskuelahan sarong aldaw kan makapurot sia sa daga nin sarong pitaka. Dinara nia iyan sa prinsipal, na iyo an nagbilang kan kuarta, asin iyan uminabot sa ₦6,200 (mga $45, E.U.). Iinuli kan prinsipal an pitaka sa maestro na nakawara kaiyan. Bilang pag-apresyar, tinawan si Olusola kan maestro nin ₦1,000 (mga $7, E.U.) asin sinabihan sia kaini na ibayad iyan sa mga babayadan nia sa eskuelahan. Kan mabaretaan kan ibang estudyante an nangyari, pinag-olog-olog ninda si Olusola. Pakalihis nin nagkapirang semana, an sarong estudyante nagsumbong na hinabon an saiyang kuarta, kaya ipinarekisa sa mga paratokdo an gabos na estudyante. “Tumindog ka digdi,” an sabi kan maestro ki Olusola. “Aram ko na bilang saro sa Mga Saksi ni Jehova, dai mo kayang maghabon.” Nakua an kuarta sa duwang solterito na nag-olog-olog ki Olusola, asin sinda mahigpit na kinastigo. Nagsurat si Olusola: “Naoogma akong marhay na midbid ako bilang saro sa Mga Saksi ni Jehova, na dai noarin man mahabon, sa siring nagtataong kamurawayan ki Jehova.”
Pagkahale sa harong sarong aldaw, si Marcelo, sarong propiong taga Argentina, nakakua sa daga nin sarong portpolyo pirang metro sana an rayo sa pinto sa likod kan saiyang harong. Kan darahon an portpolyo sa laog kan harong, iyan maingat na binuksan nindang mag-agom. Sa pagngalas na gayo ninda, nakakua sinda nin dakulaon na kantidad nin kuarta, mga credit card, asin nagkapirang tsekeng pirmado, na an saro kaiyan sarong milyon pesos. Sa sarong lista nin mga binakalan asin presyo, nakakua sinda nin sarong numero nin telepono. Inapodan ninda sa telepono an kagsadiri asin iinareglo na iuuli an portpolyo kaiba an mga laog kaiyan sa lugar na pinagtatrabawohan ni Marcelo. Kan mag-abot an kagsadiri, sia garo ninenerbios. Sinabihan sia kan among na magin kalmado, huli ta si Marcelo saro sa Mga Saksi ni Jehova. Bilang premyo sa pakakua kan portpolyo, tinawan si Marcelo kan kagsadiri nin 20 pesos sana (mga $6, E.U.). Huli kaini, nagpuputok sa kaanggotan an among huli ta naghanga siang marhay sa pagkaonesto ni Marcelo. Ini nagtao ki Marcelo nin oportunidad na ipaliwanag na bilang saro sa Mga Saksi ni Jehova, boot niang magin onesto sa gabos na panahon.
Hale sa Kyrgyzstan an minasunod na eksperyensia. Si Rinat, sarong sais anyos na aking lalaki, nakakua nin sarong pitaka na sadiri nin sarong babae na nag-iistar sa harani. An pitaka igwa nin 1,100 na som (mga $25, E.U.). Kan ibalik ni Rinat sa babae an nawarang pitaka, binilang kaini an kuarta dangan sinabihan an ina ni Rinat na nawawara an 200 na som. Nagsabi si Rinat na dai nia kinua an kuartang iyan. Dangan nagluwas an gabos tangani na hanapon an nawawarang kuarta asin nakua iyan harani sa lugar kun saen nakua an pitaka. Nagngalas an babae. Ipinahayag nia an saiyang utang na boot ki Rinat asin sa ina kaini, enot huli sa pag-uli kan nawarang kuarta asin ikaduwa, huli sa Kristianong paagi nin pagpadakula sa saiya.