Dai Mag-ontok sa Paggibo nin Karahayan

“PAPAGDANAYON na marahay an saindong gawe-gawe sa tahaw nin mga nasyon,” an sadol ni apostol Pedro. (1 Pedro 2:12) An termino sa Griego na “marahay” nanonongod sa sarong bagay na “magayon, noble, onorable, ekselente.” Ngonyan na mga aldaw, tibaad garo baga bako nanggad na realistiko na laoman an noble o onorableng gawe-gawe sa mga tawo sa pankagabsan. Minsan siring, sa pankagabsan an banwaan ni Jehova ngonyan nagin mapanggana sa pagkuyog sa sadol ni Pedro. Sa katunayan, midbid sinda sa bilog na kinaban huli sa saindang marahay na gawe-gawe.

Ini partikularmenteng pambihira kun iisipon niato an mga tension asin sakit na inaatubang niato durante kan “delikadong mga panahon [na ini] na masakit pakibagayan.” (2 Timoteo 3:1) An mga pagbalo kabtang kan satong pan-aroaldaw na buhay, asin komun an pagtumang sa Kristianong pamumuhay. Dugang pa, minsan ngani temporaryo sana an nagkapirang pagbalo, an iba nagpapadagos na dai nin ontok, na orog pa nganing nagkokosog. Minsan siring, nagsadol si apostol Pablo: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.” (Galacia 6:9) Paano man nanggad posibleng gumibo​—asin padagos na gumibo​—​nin karahayan sa ibong nin makolog sa boot na mga pagbalo asin daing ontok na mga pagtumang?

Tabang sa Paggibo nin Karahayan

An pagigin “noble, onorable, ekselente” malinaw na sarong kamugtakan kan panlaog na pagkatawo, sarong kualidad kan puso. Kun siring, an pagpapadanay nin marahay na gawe-gawe sa ibong nin mga pagbalo asin kasakitan, bakong bigla na sanang reaksion, kundi bunga nin aroaldaw na pagkuyog asin pag-otob kan mga prinsipyo sa Biblia sa gabos na aspekto nin buhay. Ano an nagkapirang bagay na makakatabang sa bagay na ini? Estudyare an minasunod.

Kultibaron an nasa isip na aktitud ni Cristo. Kaipuhan an kapakumbabaan tangani na matagalan an bagay na garo baga bakong makatanosan. An saro na halangkaw an pagheling sa saiyang sadiri posibleng marhay na dai matitios an pagmaltrato. Minsan siring, si Jesus “nagpakumbaba asin nagin makinuyog sagkod sa kagadanan.” (Filipos 2:​5, 8) Paagi sa pag-arog sa saiya, kita ‘dai mapapagal o manluluya’ sa satong sagradong paglilingkod. (Hebreo 12:​2, 3) Mapakumbabang magkuyog paagi sa gikan sa boot na pakikikooperar sa mga nangengenot sa saindong lokal na kongregasyon. (Hebreo 13:17) Makanood na mansayon an iba na “mas halangkaw” sa saindo, na ineenot an intereses ninda kisa kan sa saindo.​—Filipos 2:​3, 4.

Girumdomon na namomotan kamo ni Jehova. Dapat na kombensido kita na si Jehova “iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Sia tunay na nagmamakolog sa sato asin boot nia na kita magkamit nin buhay na daing katapusan. (1 Timoteo 2:4; 1 Pedro 5:7) An paggirumdom na mayo nin ano man na makakagibo na magin imbalido an pagkamoot nin Dios sa sato iyo an makakatabang sa sato na dai sumuko sa irarom nin pagbalo.​—Roma 8:​38, 39.

Lubos na magtiwala ki Jehova. Mahalagang marhay an pagtitiwala ki Jehova, nangorogna kun an mga pagbalo garo baga daing katapusan o nagsasapeligro kan buhay. Dapat na magkaigwa kita nin lubos na pagtitiwala na dai itotogot ni Jehova an ano man na pagbalo na ‘labi sa satong makakaya,’ na sia pirmeng ‘matao nin luluwasan.’  (1 Corinto 10:13) Dawa an huma na kagadanan puedeng atubangon na may kosog nin boot kun ki Jehova kita nagtitiwala.​—2 Corinto 1:​8, 9.

Magmaigot sa pamimibi. Mahalagang marhay an odok sa pusong pamimibi. (Roma 12:12) An sinserong pamibi saro sa mga paagi na kita mapaparani ki Jehova. (Santiago 4:8) Paagi sa personal na eksperyensia, nanonodan niato na “minsan ano an satong hagadon . . . , dinadangog nia kita.” (1 Juan 5:14) Kun itinotogot ni Jehova na magpadagos an pagbalo sa sato bilang pagbalo sa satong integridad, kita namimibi para sa saiyang tabang tangani na makatagal. (Lucas 22:41-​43) An pamibi nagtotokdo sa sato na kita nungkang nagsosolo, na huling si Jehova nasa lado niato, kita pirmeng magigin mapanggana.​—Roma 8:​31, 37.

An Marahay na mga Gibo​—‘Dahelan nin Pag-omaw Asin Onra’

Kun minsan, an gabos na Kristiano ‘nagmomondo sa manlaenlaen na pagbalo.’ Pero dapat na “dai kita mag-ontok sa paggibo nin karahayan.” Kun nasa kasakitan, kumua nin kosog sa pakaaram na an kaimbodan nindo sa katapustapusi magigin “dahelan nin pag-omaw asin kamurawayan patin onra.” (1 Pedro 1:​6, 7) Lubos na aprobetsaran an gabos na espirituwal na probisyon hale ki Jehova tangani na maparigon kamo. Kun kaipuhan nindo nin personal na atension, dumolok sa mga naglilingkod bilang pastor, paratokdo, asin parahatol sa laog kan Kristianong kongregasyon. (Gibo 20:28) Magin regular sa pag-atender sa gabos na pagtiripon kan kongregasyon, na ‘nagdadagka sa sato sa pagkamoot asin sa marahay na mga gibo.’ (Hebreo 10:24) An programa nin aroaldaw na pagbasa sa Biblia asin personal na pag-adal makakatabang na papagdanayon kamong listo asin makosog sa espirituwal; siring man an regular na pakikikabtang sa Kristianong ministeryo.​—Salmo 1:​1-3; Mateo 24:14.

Mientras na naeeksperyensiahan nindo an pagkamoot asin pagmakolog ni Jehova, maorog man an pagmawot nindo na magin “maigot sa marahay na mga gibo.” (Tito 2:14) Girumdomon, “an nakatagal sagkod sa katapusan iyo an maliligtas.” (Mateo 24:13) Iyo, magin determinado na ‘dai mag-ontok sa paggibo nin karahayan’!

[Blurb sa pahina 29]

Dapat na kita magkaigwa nin lubos na pagtitiwala na dai itotogot ni Jehova an ano man na pagbalo na ‘labi sa satong makakaya,’ na sia pirmeng ‘matao nin luluwasan’

[Mga Ritrato sa pahina 30]

An pagdadanay na sibot sa teokratikong mga aktibidad makakatabang na andamon kita na atubangon an mga pagbalo