Ilinigtas, Bakong Huli sa mga Gibo Sana, Kundi Huli sa Dai Na Kutana Maninigong Kabootan

“Kamo ilinigtas paagi sa pagtubod . . . Iyan bakong huli sa mga gibo, tangani na mayo nin tawo na magkaigwa nin dahelan na makapaghambog.”​—EFESO 2:​8, 9.

1. Paano napapalaen an mga Kristiano sa mga tawo sa pankagabsan mapadapit sa personal na mga nagibo, asin taano?

AN MGA tawo ngonyan ipinag-oorgolyong marhay an saindang personal na mga nagibo, asin sa parate ipinaghahambog tolos iyan. Laen an mga Kristiano. Linilikayan ninda an sobra-sobrang pagdodoon sa saindang sadiring mga nagibo, maski sa mga bagay na konektado sa tunay na pagsamba. Minsan ngani ipinaggagayagaya ninda an nagigibo kan banwaan ni Jehova sa kabilogan, dai ninda idinodoon an ikinakakontribwir ninda bilang indibiduwal. Narerealisar ninda na sa paglilingkod ki Jehova, mas mahalaga an tamang motibo kisa personal na mga nagibo. An siisay man na sa katapustapusi tatawan kan balaog na buhay na daing sagkod magkakamit kaiyan, bakong huli sa personal na mga nagibo, kundi paagi sa pagtubod asin huli sa dai na kutana maninigong kabootan nin Dios.​—Lucas 17:10; Juan 3:16.

2, 3. Ano an ipinaghambog ni Pablo, asin taano?

² Aram na marhay ni apostol Pablo an bagay na ini. Pakatapos mamibi nin tolong beses na logod paginhawahon sa “sarong tunok sa laman,” sinimbag sia ni Jehova: “An sakuyang dai na kutana maninigong kabootan igo na para sa saimo;  huli ta an sakuyang kapangyarihan sinasangkap sa kaluyahan.” Mapakumbabang inaako an desisyon ni Jehova, si Pablo nagsabi: “Kun siring, ogmahon pa akong maghambog kun dapit sa sakong mga kaluyahan, tanganing an kapangyarihan kan Cristo magdanay sa ibabaw ko na siring sa sarong tolda.” An mapakumbabang aktitud ni Pablo sarong halimbawa na maninigong booton niatong arogon.​—2 Corinto 12:7-9.

³ Minsan ngani pambihira an Kristianong mga gibo ni Pablo, rinekonoser nia na an saiyang mga nagibo bakong huli sa ano man na partikular na abilidad nia. May kababaan nin boot, sinabi nia: “Sa sako, tawong mas hababa sa pinakahababa sa gabos na banal, itinao an dai na kutana maninigong kabootan na ini, na maninigong ipahayag ko sa mga nasyon an maogmang bareta manongod sa dai marorop na mga kayamanan kan Cristo.” (Efeso 3:8) Mayo sia nin kahambogan ni maabhaw na pagpapakangmatanos. “An Dios minatumang sa mga maabhaw, alagad sia minatao nin dai na kutana maninigong kabootan sa mga mapakumbaba.” (Santiago 4:6; 1 Pedro 5:5) Sinusunod ta daw an halimbawa ni Pablo, na mapakumbabang ibinibilang na kita mas hababa sa pinakahababa sa satong mga tugang?

“Ibinibilang an Iba na Mas Halangkaw”

4. Taano ta tibaad madepisilan kita kun beses na ibilang na mas halangkaw sa sato an iba?

⁴ Si apostol Pablo nagtaong konseho sa mga Kristiano: “Dai [maggibo] nin ano man huli sa iriwal o huli sa egotismo, kundi sa kababaan nin pag-isip na ibinibilang an iba na mas halangkaw kisa saindo.” (Filipos 2:3) Tibaad ini magin sarong angat, nangorogna kun kita nasa katongdan na may paninimbagan. Tibaad an problema minalataw huli ta kita medyo naimpluwensiahan na kan espiritu nin pakikipagkompetensia na lakop na marhay sa kinaban ngonyan. Posible na kan kita aki pa tinokdoan kitang makikompetensia, magsalang sa satong mga tugang sa harong o sa satong mga kaklase sa eskuelahan. Tibaad pirme kitang sinasadol kaidto na pagmaigotan na aboton an onra na magin an pinakasikat na atleta o pinakamatibay na estudyante sa eskuelahan. Siempre, kaomaw-omaw an pagtao niato kan satong pinakamakakaya sa ano man na gibohon. Minsan siring, ginigibo iyan kan mga Kristiano, bakong tanganing mag-apod nin sobrang atension sa saindang sadiri, kundi tanganing lubos na makinabang sa aktibidad asin tibaad tanganing pakinabangon man an iba. Minsan siring, an pagmawot na pirmeng omawon bilang an numero uno puedeng magin peligroso. Taano man?

5. Kun dai kokontrolon, ano an puedeng ibunga kan espiritu nin pakikipagkompetensia?

⁵ Kun dai kokontrolon, an espiritu nin pakikipagkompetensia o pagigin egotista puedeng magpangyari sa saro na magin daing galang asin arogante. Tibaad mauri sia sa mga abilidad asin pribilehio kan iba. An Talinhaga 28:22 nagsasabi: “An tawong may matang maurihon nasisibot sa pagkamit nin mahahalagang rogaring, alagad dai nia aram na an pagkatikapo maabot sa saiya.” Tibaad may kapangahasan pa ngani siang maghingoang maabot an mga posisyon na dian mayo sia nin deretso. Tanganing ipangatanosan an saiyang mga aksion, tibaad pumoon siang maggumodgumod asin magin mapagtatsar sa iba​—mga tendensia na maninigong rayoan kan mga Kristiano. (Santiago 3:14-16) Ano man an dahelan, sia namemeligrong magkaigwa nin aktitud na ako nguna.

6. Paano nagpapatanid an Biblia tumang sa espiritu nin pakikipagkompetensia?

⁶ Kun siring, an Biblia nagsasadol sa mga  Kristiano: “Dai kita magin egotista, na nagpupukaw nin pagdaraogan, na nagpapauroriurihan.” (Galacia 5:26) Si apostol Juan nagtaram manongod sa sarong kapwa Kristiano na minalataw na nagin biktima kan klaseng ini nin espiritu. “May isinurat ako sa kongregasyon,” an sabi ni Juan, “alagad si Diotrefes, na gustong magkamit kan enot na lugar sa tahaw ninda, dai nag-aako nin ano man hale sa samo na may paggalang. Kaya, pagdatong ko, gigirumdomon ko an saiyang mga gibo na padagos niang ginigibo, na nagtatabil dapit sa samo sa maraot na mga tataramon.” Abaa kamakamomondong situwasyon iyan para sa sarong Kristiano!​—3 Juan 9, 10.

7. Ano an bobooton na likayan nin sarong Kristiano sa pinagtatrabawohan ngonyan na igwa nin pakikipagkompetensia?

⁷ Siempre, bakong realistikong isipon na biyong malilikayan nin sarong Kristiano an gabos na pakikipagkompetensia. Halimbawa, tibaad kalabot sa saiyang sekular na trabaho an pinansial na pakipagkompetensia sa ibang indibiduwal o negosyo na kapareho an mga produkto o kapareho an iinaalok na mga serbisyo. Minsan siring, dawa sa siring na mga kaso, bobooton nin sarong Kristiano na gibohon an saiyang negosyo sa espiritu nin paggalang, pagkamoot, asin konsiderasyon. Dai nia gigibohon an ilegal o bakong sa Kristianong mga gibo asin lilikayan nia na magin tawong sa pangenot midbid sa pakikipagkompetensia asin kasuwapangan. Dai nia iisipon na an pagigin numero uno​—sa ano man na okupasyon​—an pinakamahalagang bagay sa buhay. Kun totoo iyan sa sekular na mga okupasyon, lalo nang totoo iyan may labot sa pagsamba!

“Bakong sa Pagkomparar sa Ibang Tawo”

8, 9. (a) Taano ta mayo nin dahelan na magkorompetensiahan an Kristianong kamagurangan? (b) Taano ta aplikado an 1 Pedro 4:10 sa gabos na lingkod nin Dios?

⁸ An maninigong magin aktitud nin mga Kristiano sa saindang pagsamba sinasabi sa ipinasabong na mga tataramon na ini: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.” (Galacia 6:4) An kamagurangan sa kongregasyon, na nakakaaram na dai sinda nagkokorompetensiahan, nagkokooperar asin dayupot na nagtatarabangan bilang sarong grupo. Naggagayagaya sinda sa ikinakakontribwir kan balang saro para sa kabilogan na ikakarahay kan kongregasyon. Sa siring linilikayan ninda an maribok na kompetisyon asin nagtatao nin marahay na halimbawa nin pagkasararo para sa iba pa sa kongregasyon.

⁹ Huli sa edad, eksperyensia, o natural na mga abilidad, an ibang kamagurangan tibaad mas episiente kisa sa iba, o tibaad sinda may mas hararom na pakarorop. Bilang resulta, an kamagurangan may laen-laen na paninimbagan sa organisasyon ni Jehova. Imbes na magkomparar, ginigirumdom ninda an konseho: “Kaoyon sa sokol nin balaog na naako kan lambang saro, gamiton iyan sa paglingkod sa lambang saro bilang marahay na mga mayordomo kan dai na kutana maninigong kabootan nin Dios na ipinapahayag sa manlaenlaen na paagi.” (1 Pedro 4:10) An totoo, an tekstong ini aplikado sa gabos na lingkod ni Jehova, huli ta minsan paano an gabos nag-ako nin balaog nin tamang kaaraman asin an gabos may pribilehiong makikabtang sa Kristianong ministeryo.

10. Sa anong paagi solamenteng aakoon ni Jehova an satong sagradong paglilingkod?

 ¹⁰ An satong sagradong paglilingkod nakakapaogma ki Jehova solamente kun iyan ginibo huli sa pagkamoot asin debosyon, bakong huli sa pag-itaas kan satong sadiri sa iba. Kun siring, mahalagang marhay na magkaigwa nin timbang na pagmansay sa satong aktibidad bilang pagsuportar sa tunay na pagsamba. Minsan ngani mayo nin siisay man na makakapaghokom nin tama sa motibo nin iba, si Jehova “nagsisiyasat kan puso.” (Talinhaga 24:12; 1 Samuel 16:7) Sa siring, marahay na hapoton niato an satong sadiri sa panapanahon, ‘Ano an motibo ko kun ginigibo ko an mga gibo nin pagtubod?’​—Salmo 24:​3, 4; Mateo 5:8.

An Tamang Pagmansay sa Satong Gibo

11. Anong mga hapot manongod sa satong aktibidad sa ministeryo an puedeng rasonable sanang konsideraron?

¹¹ Kun an motibo an pinakamahalaga sa pagkamit kan pag-oyon ni Jehova, kun siring sagkod saen kita maninigong magin interesado sa satong mga gibo nin pagtubod? Sagkod na ginigibo niato an satong ministeryo na may tamang motibo, kaipuhan daw talaga na irekord kun ano an satong nagigibo o kun gurano iyan kadakol? Rasonable an mga hapot na ini, huling habo niato na an mga numero an magin mas mahalaga kisa aktuwal na mga gibo nin pagtubod o na an pagkaigwa nin magayon na report an magin pangenot na may halaga mapadapit sa satong Kristianong aktibidad.

12, 13. (a) Ano an nagkapirang dahelan kun taano ta nag-iingat kita nin rekord kan satong paglilingkod sa langtad? (b) Igwa kita nin anong mga dahelan na maggayagaya kun hineheling an kabilogan na report kan satong paghuhulit?

¹² Mangnohon an sinasabi kan librong Organisado sa Paggibo kan Kabotan ni Jehova: “An enot na mga parasunod ni Jesu-Cristo nagin interesado sa mga report nin progreso sa paghuhulit. (Marcos 6:30) An libro sa Biblia na Gibo nagsasabi sa sato na igwa nin mga 120 katawo na presente kan an banal na espiritu ibubo sa mga disipulo kan Pentecostes. Dai nahaloy an kabilangan kan mga disipulo nagin 3,000 dangan nagin 5,000. . . . (Gibo 1:15; 2:5-11, 41, 47; 4:4; 6:7) Sierto nanggad na an mga baretang ini nin pagdakol nagtao nin marahayon na pagparigon sa boot para sa mga disipulo!” Sa kaparehong dahelan, hinihingoa kan Mga Saksi ni Jehova ngonyan na mag-ingat nin tamang mga rekord kan nahahaman sa bilog na kinaban bilang kaotoban kan mga tataramon ni Jesus: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An siring na mga report nagtatao nin realistikong ladawan kan nahahaman sa bilog na kinaban. Ipinapaheling kaiyan kun saen nangangaipo  nin tabang asin kun arin na literatura saka gurano kadakol kaiyan an kaipuhan tanganing paoswagon an paghuhulit.

¹³ Sa siring, an pagreport kan satong aktibidad sa paghuhulit nagpapangyaring maotob niato an sugo sa sato na ihulit an maogmang bareta kan Kahadean sa mas epektibong paagi. Apuera kaiyan, bako daw na napaparigon an boot niato kun nakakadangog kita nin bareta manongod sa gibohon kan satong mga tugang sa ibang kabtang kan kinaban? An mga bareta dapit sa pag-oswag asin paghiwas sa bilog na daga nagpapagayagaya sa sato, nagpapahiro sa sato na gumibo nin orog pa, asin nag-aasegurar sa sato kan bendisyon ni Jehova. Asin nakakakontento nanggad na maaraman na an satong personal na report kaiba sa pambilog na kinaban na report na iyan! An report niato sadit kun ikokomparar sa kagabsan na total, alagad naririsa iyan ni Jehova. (Marcos 12:​42, 43) Girumdomon, kun mayo an saimong report, dai kompleto an kabilogan na report.

14. Apuera sa paghuhulit asin pagtotokdo, ano an kaiba sa satong pagsamba ki Jehova?

¹⁴ Siempre, an kadaklan na ginigibo kan lambang Saksi sa pag-otob kan saiyang paninimbagan bilang nagdusay na lingkod ni Jehova dai maheheling sa saiyang report. Halimbawa, dai kaiba sa report an regular na personal na pag-adal sa Biblia, pag-atender asin pakikikabtang sa Kristianong mga pagtiripon, mga katongdan sa kongregasyon, pagtabang sa mga kapagtubod kun kinakaipuhan, pinansial na suporta sa pambilog na kinaban na gibohon sa Kahadean, asin iba pa. Sa siring, minsan ngani mahalaga an satong report sa paglilingkod sa langtad, na tinatabangan kitang papagdanayon an satong kaigotan sa paghuhulit asin likayan an paghinugak, dapat na papagdanayon niato an tamang pagmansay dian. Dai iyan maninigong mansayon bilang espirituwal na lisensia o pasaporte, sa pagkamit niato nin buhay na daing katapusan.

“Maigot sa Marahay na mga Gibo”

15. Minsan ngani bakong mga gibo sana an makakapagligtas sato, taano ta kaipuhan iyan?

¹⁵ Malinaw nanggad, minsan ngani bakong mga gibo sana an makakapagligtas sato, kaipuhan iyan. Iyan an dahelan kun taano an mga Kristiano ta inaapod na “sarong banwaan na magigin saiya sana nanggad, maigot sa marahay na mga gibo” asin kun taano ta ineenkaminar sindang “konsideraron . . . an lambang saro tanganing mandagka sa pagkamoot asin sa marahay na mga gibo.” (Tito 2:14; Hebreo 10:24) An saro pang kagsurat kan Biblia, si Santiago, mas deretso sa punto na nagsasabi: “Kun paanong an hawak na daing espiritu gadan, siring man an pagtubod na daing mga gibo gadan.”​—Santiago 2:26.

16. Ano an mas mahalaga pa ngani kisa sa mga gibo, alagad sa ano kita maninigong mag-ingat?

¹⁶ Minsan ngani tibaad mahalaga an marahay na mga gibo mismo, orog pa nganing mahalaga an mga motibo sa paggibo kaiyan. Kun siring, madonong na siyasaton niato an satong mga motibo sa panapanahon. Minsan siring, huling mayo nin tawo na tamang makakaaram kan mga motibo nin iba, dapat na mag-ingat kita sa paghokom sa iba. “Siisay ka na naghohokom sa oripon nin iba?” an hapot sa sato, na an malinaw na simbag: “Sa saiyang sadiring kagurangnan sia nagtitindog o napupukan.” (Roma 14:4) Si Jehova, an Kagurangnan kan gabos, asin an saiyang ninombrahan na Hokom, si Cristo Jesus, iyo an mahokom sa sato, bakong basado sa satong mga gibo sana kundi basado man sa satong mga motibo, sa  satong mga oportunidad, sa satong pagkamoot, asin sa satong debosyon. Si Jehova asin si Cristo Jesus sana an tamang makakapaghokom kun baga ginibo niato an isinasadol na gibohon kan mga Kristiano, sa mga tataramon ni apostol Pablo: “Gibohon mo an bilog mong makakaya tanganing ikaatubang mo an saimong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.”​—2 Timoteo 2:15; 2 Pedro 1:10; 3:14.

17. Mantang nagmamaigot na gibohon an satong pinakamakakaya, taano ta maninigo niatong pirmeng girumdomon an Santiago 3:17?

¹⁷ Si Jehova rasonable sa kun ano an linalaoman nia sa sato. Segun sa Santiago 3:​17, “an kadonongan hale sa itaas,” kabilang sa iba pang bagay, “rasonable.” Bako daw na an madonong na gibohon, saka masasabing tunay na nagibo, iyo an arogon niato si Jehova sa bagay na ini? Sa siring, dai kita maninigong magbugtak nin bakong rasonable asin dai maaabot na mga linalaoman para sa satong sadiri o para sa satong mga tugang.

18. Ano an maaasahan niato kun kita may timbang na pagmansay sa satong mga gibo asin sa dai na kutana maninigong kabootan ni Jehova?

¹⁸ Sagkod na pinapagdadanay niato an timbang na pagmansay sa satong mga gibo nin pagtubod asin sa dai na kutana maninigong kabootan ni Jehova, mapapagdanay niato an kagayagayahan na nagpapamidbid na tanda nin tunay na mga lingkod ni Jehova. (Isaias 65:​13, 14) Makakapaggayagaya kita sa mga bendisyon na ibinububo ni Jehova sa saiyang banwaan sa kabilogan, gurano man kadakol an tibaad personal na nakakaya niatong gibohon. Mantang nagpapadagos sa “pamibi asin pagngayongayo na may pasalamat,” makikimaherak kita sa Dios na tabangan kitang magibo an satong pinakamakakaya. Sa siring, daing duwa-duwa, “an katoninongan nin Dios na minalampas sa gabos na kaisipan mag-iingat kan [satong] puso asin kan [satong] mga pag-isip paagi ki Cristo Jesus.” (Filipos 4:4-7) Iyo, mararanga kita asin mapaparigon an satong boot sa pakaaram na puede kitang maligtas, bakong huli sa mga gibo sana, kundi huli sa dai na kutana maninigong kabootan ni Jehova!

Ikakapaliwanag daw Nindo Kun Taano an mga Kristiano ta

• naglilikay na ipaghambog an personal na mga nagibo?

• naglilikay na magpaheling nin espiritu nin pakikipagkompetensia?

• nagrereport kan saindang Kristianong aktibidad sa ministeryo sa langtad?

• naglilikay na hokoman an mga kapwa Kristiano?

[Mga Hapot Para sa Pag-adal]

[Ritrato sa pahina 15]

“An sakuyang dai na kutana maninigong kabootan igo na para sa saimo”

[Mga Ritrato sa pahina 16, 17]

An kamagurangan naggagayagaya sa ikinakakontribwir kan balang saro para sa ikakarahay kan kongregasyon

[Mga Ritrato sa pahina 18, 19]

Kun mayo an saimong report, dai kompleto an kabilogan na report