Nakikipag-olay daw Kamo sa Saindong mga Mahal sa Buhay?

“AN ABILIDAD niato na makikomunikar sa satong mga mahal sa buhay bigla asin risang marhay na nagluluya,” an bareta kan semanal na publikasyon sa Polandia na Polityka. Sa Estados Unidos, kinakalkulo na an mga mag-agom sais minutos na sana kada aldaw na nag-oolay-olay sa makahulogan na paagi. Naniniwala an nagkapirang eksperto na kabanga kan gabos na pagbubulag asin diborsio bunga kan pagrurong ini.

Kumusta man an pag-oolay nin mga magurang asin mga aki? Sa kadaklan na kaso, “iyan nagigin, bakong pag-oolay, kundi pag-usisa: Kumusta sa eskuelahan? Kumusta man an mga katood mo?” an komento kan report na nasa enotan. “Paano makakanood an mga aki niato na magkaigwa nin emosyonal na relasyon?” an hapot kaiyan.

Huling an marahay na abilidad sa komunikasyon dai basta na sana nangyayari, paano niato mapapaoswag an satong abilidad sa pakikipag-olay? An Kristianong disipulo na si Santiago tinawan kita nin importanteng sadol: “An gabos na tawo kaipuhan na magin listo kun dapit sa pagdangog, maluway kun dapit sa pagtaram, maluway kun dapit sa grabeng kaanggotan.” (Santiago 1:19) Iyo, tanganing magkaigwa nin nakakaparigon na pag-oolay, kaipuhan kitang maghinanyog nin atento asin dai magtumoy dahel sa pagkadaing pasensia o basta na sana magkonklusyon. Likayan an pagkritika huli ta iyan madaling makakapaontok sa pag-oolay. Dugang pa, si Jesus naggamit nin mataktikang mga hapot, bakong tanganing mag-usisa, kundi tanganing enganyaron an kaolay nia na ipahayag an nasa puso nia asin tanganing pakosogon an bogkos kan relasyon ninda.​—Talinhaga 20:5; Mateo 16:13-​17; 17:24-​27.

Sa pag-aplikar kan marahayon na mga prinsipyo na yaon sa Biblia, gumibo nin inisyatiba na makipag-olay asin makikomunikar sa saindong mga mahal sa buhay. Iyan puedeng magbunga nin maogmang relasyon na papakamahalon sa laog nin dakol na taon​—sa bilog na buhay pa ngani.