Mga Magurang, Itao an mga Pangangaipo kan Saindong Pamilya

“Kun an siisay man dai nagsusustento sa mga sadiri nia, . . . sia nagpainda kan pagtubod.”​—1 TIMOTEO 5:8.

1, 2. (a) Taano ta nakakaparigon sa boot na maheling an mga pamilya na iribang nag-aatender sa Kristianong mga pagtiripon? (b) Ano an nagkapirang kadepisilan na inaatubang kan mga pamilya tanganing makaabot sa mga pagtiripon na nasa oras?

KUN mangangalagkalag kamo sa laog kan Kristianong kongregasyon bago pumoon an sarong pagtiripon, tibaad maheling nindo an malinig asin posturadong mga aki na minatukaw kataed kan saindang mga magurang. Bako daw na nakakaogmang pagmasdan an pagkamoot na risang-risa sa siring na mga pamilya​—an pagkamoot ki Jehova asin sa lambang saro? Pero, madaling malingawan kun guranong paghihingoa an ginigibo nin sarong pamilya tanganing makaabot sa mga pagtiripon na nasa oras.

² Sa kadaklan na kamugtakan, sibot-sibot an mga magurang sa bilog na aldaw, asin sa mga banggi nin pagtiripon, orog pa nganing nagigin sibot-sibot an pamilya. Kaipuhan na magluto nin kakanon, asikasohon an mga gibohon sa harong, taposon an leksion na pag-aadalan. Nasa mga magurang an pinakamagabat na pasan, na sinisierto na an gabos malinig na, napakakan na, asin preparado nang humale na nasa oras. Siempre, puedeng mangyari sa mga aki an mga dai linalaoman sa pinakabakong kombenyenteng mga oras. Napakit an pantalon kan matua mantang nagkakawat. Naula kan kangudhan an saiyang kakanon. Nagpoon na mag-iriwal an mga aki. (Talinhaga 22:15) An resulta? Puedeng maraot dawa an maingat na pagplano kan mga magurang. Pero, an pamilya haros pirmeng nasa Kingdom Hall bago magpoon an pagtiripon. Nakakaparigon nanggad sa boot na maheling sinda duman serosemana, sa laog nin dakol na taon, mantang an mga aki nagtatalubo tanganing maglingkod ki Jehova!

3. Paano niato naaaraman na pinapahalagahan na marhay ni Jehova an mga pamilya?

³ Minsan ngani kun beses depisil, mapagalon pa ngani, an saindong trabaho bilang magurang, makakasierto kamo na pinapahalagahan na marhay ni Jehova an saindong mga paghihingoa. Si Jehova an Kagtugdas kan areglo nin pamilya. Sa siring sinasabi kan saiyang Tataramon na si Jehova an “pinagkakautangan nin ngaran”​—nin mismong pag-eksister​—kan lambang pamilya. (Efeso 3:​14, 15) Kaya kun hinihingoa nindo mga magurang na otobon sa tamang paagi an saindong katongdan sa pamilya, nagtatao kamo nin onra sa Soberanong Kagurangnan kan uniberso. (1 Corinto 10:31) Bako daw na dakulang pribilehio iyan? Kun siring, angay na estudyaran niato an asignasyon na itinao ni Jehova sa mga magurang. Sa artikulong ini, isasaisip niato iyan may koneksion sa pagtao kan pangangaipo kan pamilya. Repasohon niato an tolong paagi na inaasahan nin Dios an mga magurang na magtatao kan mga pangangaipong ini.

Pagsustento sa Materyal

4. Sa pamilya, anong mga areglo an ginibo ni Jehova sa pagsustento sa mga pangangaipo kan mga aki?

⁴ Si apostol Pablo nagsurat: “Tunay na kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) Kan si Pablo magtaram digdi manongod sa “siisay man,” siisay an nasa isip nia? An payo nin pamilya, na sa parate an ama. Tinawan  man nin Dios an babae nin may dignidad na katongdan bilang katabang kan saiyang agom. (Genesis 2:18) An mga babae kan mga panahon kan Biblia sa parate nagtatabang sa saindang agom na sustentohan an pamilya. (Talinhaga 31:​13, 14, 16) Ngonyan, paorog nang paorog na nagigin ordinaryo na sana an mga pamilya na may nagsosolong magurang. * An dakol na nagsosolong magurang na Kristiano kahangahanga an ginigibong pagsustento sa saindang pamilya. Siempre, pinakamarahay na an sarong pamilya may duwang magurang, na pinapangenotan kan ama.

5, 6. (a) Ano an nagkapira sa mga kadepisilan na napapaatubang sa mga naghihingoang sustentohan sa materyal an mga sadiri ninda? (b) An pagpapadanay nin anong pagmansay dapit sa sekular na trabaho an makakatabang sa Kristianong mga parasustento na makayanan iyan?

⁵ Sa 1 Timoteo 5:​8, anong pagsustento an nasa isip ni Pablo? Isinusuherir kan konteksto na sia direktamenteng nagtataram manongod sa materyal na mga pangangaipo kan pamilya. Sa kinaban ngonyan, an payo nin pamilya tibaad mapaatubang sa kadakol na olang tanganing makapagsustento sa paaging iyan. An kasakitan sa pagbuhay ordinaryo na sana sa bilog na kinaban, na kapareho kan mga pagsisante, halangkaw na kabilangan nin mga daing trabaho, asin naglalangkaw na presyo nin mga barakalon. Ano an makakatabang sa sarong parasustento na makayanan an siring na inaatubang na mga kasakitan?

⁶ Maninigong girumdomon nin parasustento na inootob nia an sarong asignasyon hale ki Jehova. Ipinapaheling kan ipinasabong na mga tataramon ni Pablo na an sarong lalaki na may kakayahan na kuyogon an pagboot na ini alagad nagsasayumang gibohon iyan ikakaagid sa saro na “nagpainda kan pagtubod.” Gigibohon nin sarong Kristiano an saiyang pinakamakakaya tanganing malikayan an siring na kamugtakan sa atubangan kan saiyang Dios. Pero, makamomondo na an dakol na tawo sa kinaban ngonyan “dai nin natural na kapadangatan.” (2 Timoteo 3:​1, 3) Sa katunayan, dai mabilang na mga ama an naglilikay sa saindang paninimbagan, na pinapabayaan an saindang pamilya na daing suporta. An Kristianong mga agom na lalaki mayo kan siring na matagas an puso asin bakong seryosong pagmansay dapit sa pagsustento sa mga sadiri ninda. Bakong arog kan dakol sa saindang mga katrabaho, dawa an pinakahababang trabaho minamansay kan Kristianong mga parasustento bilang may dignidad asin mahalaga, sarong paagi tanganing mapaogma si Jehova Dios, huling pinapangyari kaiyan na masustentohan ninda an saindang mga namomotan.

7. Taano ta angay na horophoropon kan mga magurang an halimbawa ni Jesus?

⁷ Puedeng manompongan man nin mga payo nin pamilya na nakakatabang an paghorophorop sa sangkap na halimbawa ni Jesus. Girumdomon, si Jesus makahulang nasasambitan kan Biblia bilang satuyang “Amang Daing Sagkod.” (Isaias 9:​6, 7) Bilang “an huring Adan,” epektibong sinalidahan ni Jesus “an enot na tawong si Adan” bilang an ama kan mga kabilang sa katawohan na nagtutubod. (1 Corinto 15:45) Bakong arog ni Adan, na nagin ama na maimot asin sadiring pangangaipo sana an iniintindi, si Jesus an arogan na ama. An Biblia nagsasabi manongod sa saiya: “Paagi kaini namidbid niato an pagkamoot, huli ta an sarong iyan nagtao kan saiyang kalag para sa sato.” (1 Juan 3:16) Iyo, gikan sa boot na idinolot ni Jesus an sadiri niang buhay para sa iba. Minsan siring, sa aroaldaw inenot man nia an mga pangangaipo nin iba kisa sa sadiri niang mga pangangaipo dawa sa saradit na paagi. Marahay man na arogon nindo mga magurang an espiritung iyan nin pagsasakripisyo.

8, 9. (a) Ano an puedeng manodan kan mga magurang sa mga gamgam manongod sa daing kaimotan na pagtao kan pangangaipo kan saindang mga siyo? (b) Paano ipinapaheling kan dakol na Kristianong magurang an espiritu nin pagsasakripisyo?

⁸ Dakol an manonodan kan mga magurang manongod sa daing kaimotan na pagkamoot basado sa mga tataramon ni Jesus sa sumbikalan na banwaan nin Dios: “Makapirang binoot kong tiriponon an saimong mga aki, siring kan pagtipon kan guna sa saiyang mga siyo sa irarom kan saiyang mga pakpak!” (Mateo 23:37) Si Jesus nagtataram digdi nin malinaw na ilustrasyon nin sarong guna na linilipodan an saiyang mga siyo paagi sa saiyang mga pakpak. Tunay nanggad, an mga magurang puedeng makanood nanggad sa naturalesang magprotehir kan inang gamgam, na andam na isapeligro an saiyang sadiri tanganing protehiran sa danyos an saiyang mga siyo. Pero, makangangalas man na maheling an  ginigibo kan mga magurang na gamgam sa aroaldaw. Sinda pabalikbalik na naglalayog sa paghanap ninda nin kakanon. Dawa kun haros dai nang kosog, ihinuhulog ninda an kakanon sa nakangangang mga tuka kan saindang mga siyo, na hinahamil iyan asin sa parate nagpaparasiyap sa paghagad nin dagdag pa. An dakol sa mga linalang ni Jehova “natural na madonong” sa paagi nin pag-asikaso ninda sa mga pangangaipo kan saindang mga ogbon.​—Talinhaga 30:24.

⁹ Sa kaagid na paagi, an Kristianong mga magurang sa bilog na kinaban nagpapaheling nin kahangahangang espiritu nin pagsasakripisyo. Mas gugustohon pa nindong kamo an makolgan kisa togotan na makolgan an saindong mga aki. Dugang pa, gikan sa boot kamong nagsasakripisyo aroaldaw tanganing sustentohan an mga sadiri nindo. An dakol sa saindo minabangon nin amay tanganing maggibo nin biyong nakakapagal na mga trabaho. Nagpapagal kamo tanganing matawan nin masustansiang pagkakan an saindong pamilya. Maigot kamong naghihingoa tanganing siertohon na may malinig na gubing, angay na istaran, asin igong edukasyon an saindong mga aki. Asin ginigibo nindo iyan aroaldaw, sa dakol na taon. Siertong nakakapaogma ki Jehova an siring na pagsakripisyo kan sadiri asin pakatagal! (Hebreo 13:16) Pero kadungan kaiyan, ginigirumdom nindo na may mas mahalaga pang mga paagi nin pagsustento sa mga sadiri nindo.

Pagtao kan Pangangaipo sa Espirituwal

10, 11. Ano an pinakamahalaga sa mga pangangaipo nin tawo, asin ano nguna an dapat gibohon nin Kristianong mga magurang tanganing mapanigoan an mga pangangaipong ini kan saindang mga aki?

¹⁰ Mas mahalaga pa ngani kisa pagsustento sa materyal an pagtao kan pangangaipo sa espirituwal. Sinabi ni Jesus: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4; 5:3) Ano an puede nindong gibohon mga magurang tanganing ikatao an pangangaipo sa espirituwal?

¹¹ Sa temang ini, mayo na gayod nin mas parateng kinokotar na teksto sa Biblia kisa sa Deuteronomio 6:5-7. Buksan tabi nindo an saindong Biblia asin basahon an mga bersikulong iyan. Mangnohon na sinasabihan an mga magurang na iyo nguna an magkultibar kan sadiri nindang espirituwalidad, na pinapakosog an saindang pagkamoot ki Jehova asin isinasapuso an saiyang mga tataramon. Iyo, kaipuhan na kamo magin seryosong estudyante kan Tataramon nin Dios, na binabasa nin regular an Biblia asin naghohorophorop dian tangani na mapatalubo nindo an tunay na pakasabot asin pagkamoot sa mga dalan, prinsipyo, asin ley ni Jehova. Bilang resulta, an saindong puso mapapano nin kawiliwiling mga katotoohan sa Biblia na mapahiro sa saindo na mamatean an kagayagayahan, may pagkangirhat na paggalang, asin pagkamoot ki Jehova. Magkakaigwa kamo nin kadakol na marahay na bagay na ikakatao nindo sa saindong mga aki.​—Lucas 6:45.

12. Paano puedeng arogon kan mga magurang an halimbawa ni Jesus mapadapit sa pagtadom kan mga katotoohan sa Biblia sa saindang mga aki?

¹² An mga magurang na makosog sa espirituwal andam na iaplikar an konseho na yaon sa Deuteronomio 6:​7, na “itadom”  an mga tataramon ni Jehova sa saindang mga aki sa lambang oportunidad. An ‘pagtadom’ nangangahulogan nin pagtokdo asin pagtudok sa isip paagi sa pag-otro. Aram na marhay ni Jehova na kita gabos​—partikularmente an mga aki​—nangangaipo nin pag-otro tanganing makanood. Sa siring, si Jesus naggamit nin pag-otro sa saiyang ministeryo. Halimbawa, kan tinotokdoan an saiyang mga disipulo na magin mapakumbaba imbes na mapalangkaw asin nakikipagdaogan, naghanap sia nin laen-laen na paagi tanganing otrohon an iyo man sanang prinsipyo. Nagtokdo sia paagi sa pangangatanosan, paagi sa pag-ilustrar, paagi pa ngani sa pagdemonstrar. (Mateo 18:1-4; 20:25-27; Juan 13:12-15) Pero pambihira nanggad, si Jesus nungkang nagpaheling nin kadaihan nin pasensia. Kaagid kaiyan, an mga magurang kaipuhan na maghanap nin mga paagi tanganing ikatokdo an pundamental na mga katotoohan sa saindang mga aki, na pasensiosong inoorootro an mga prinsipyo ni Jehova sagkod na masabotan asin iaplikar iyan kan mga aki.

13, 14. Ano an nagkapirang okasyon na puedeng itadom kan mga magurang sa saindang mga aki an mga katotoohan sa Biblia, na ginagamit an anong mga pantabang?

¹³ An mga sesyon nin pampamilyang pag-adal marahayon na panahon para sa siring na pagtotokdo. Tunay nanggad, an regular, nakakapakosog asin maogmang pampamilyang pag-adal sa Biblia sarong mayor na suporta sa espirituwalidad nin pamilya. Ikinakaogmang marhay kan Kristianong mga pamilya sa bilog na kinaban an siring na mga pag-adal, na ginagamit an mga literatura na itinatao paagi sa organisasyon ni Jehova asin ibinabagay an pag-adal sa mga pangangaipo kan mga aki. An librong Makanood sa Dakulang Paratokdo sarong pambihirang bendisyon sa bagay na ini, siring man an librong Questions Young People Ask​—Answers That Work. * Minsan siring, an pampamilyang pag-adal bako sanang an solamenteng panahon na tokdoan an mga aki.

¹⁴ Mga magurang, siring kan ipinapaheling kan Deuteronomio 6:​7, dakol na okasyon na puede nindong ipakipag-olay sa saindong mga aki an espirituwal na mga bagay. Baga man iribang nagbibiahe, iribang naggigibo nin mga gibohon sa harong, o iribang nagpapahorohayahay, puede kamong makanompong nin mga oportunidad na itao an espirituwal na mga pangangaipo kan saindong mga aki. Siempre, dai nindo kaipuhan na “sermonan” nin daing ontok an saindong mga aki manongod sa mga katotoohan sa Biblia. Imbes, maghingoang papagdanayon na nakakapakosog asin espirituwal an pag-orolay kan pamilya. Halimbawa, an magasin na Awake! igwa nin dakol na artikulo manongod sa kadakol na laen-laen na tema. An siring na mga artikulo puedeng magin basehan kan mga pag-orolay manongod sa mga linalang na hayop ni Jehova, mga lugar na may natural na kagayonan sa palibot kan kinaban, asin makangangalas na pagkalaenlaen nin mga kultura asin mga paagi nin pamumuhay nin mga tawo. An siring na mga pag-orolay tibaad makapahiro sa mga aki na orog pang basahon an mga literatura na itinatao kan grupong maimbod asin  mapagmansay na oripon.​—Mateo 24:45-47.

15. Paano puedeng tabangan kan mga magurang an saindang mga aki na mansayon an Kristianong ministeryo na interesante asin nakakakontento?

¹⁵ An nakakapakosog na mga pakikipag-olay sa saindong mga aki makakatabang sa saindo na panigoan an saro pang espirituwal na pangangaipo. Kaipuhan na manodan kan Kristianong mga aki na isabi sa iba an saindang pagtubod sa epektibong paagi. Mantang nakikipag-olay kamo manongod sa sarong interesanteng punto sa An Torrengbantayan o Awake! puede kamong humanap nin mga oportunidad na ikonektar sa ministeryo an artikulong iyan. Halimbawa, puede kamong maghapot: “Bako daw na marahayon kun mas dakol na tawo an nakakaaram kan bagay na ini manongod ki Jehova? Sa heling mo, paano daw niato mapupukaw an interes nin saro sa temang ini?” An siring na orolay puedeng makatabang sa mga aki na mapatalubo an orog na interes sa pagsabi sa iba kan saindang nanonodan. Dangan, kun an saindong mga aki minaiba sa saindo sa ministeryo, naheheling ninda an buhay na halimbawa nin pag-aplikar kan siring na mga pag-orolay. Puede man nindang manodan na an ministeryo sarong interesante asin maogmang gibohon, na nagbubunga nin dakulang satispaksion asin kagayagayahan.​—Gibo 20:35.

16. Ano an puedeng manodan kan mga aki paagi sa paghinanyog sa mga pamibi kan saindang mga magurang?

¹⁶ Itinatao man kan mga magurang an espirituwal na mga pangangaipo kan saindang mga aki kun sinda namimibi. Tinokdoan ni Jesus an saiyang mga disipulo kun paano mamibi, asin sia namibi kaiba ninda sa dakol na okasyon. (Lucas 11:1-13) Isip-isipa na sana an nanodan ninda paagi sa pag-ayon sa pamibi kan Aki mismo ni Jehova! Kaagid kaiyan, dakol an manonodan kan saindong mga aki sa saindong mga pamibi. Halimbawa, puede nindang manodan na gusto ni Jehova na kita sueltong makipag-olay sa saiya nin gikan sa puso, na sinasabi sa saiya an ano man na tibaad problema niato. Iyo, an saindong mga pamibi puedeng makatabang sa saindong mga aki na manodan an sarong mahalagang marhay na espirituwal na katotoohan: Puede sindang magkaigwa nin relasyon sa saindang langitnon na Ama.​—1 Pedro 5:7.

Pagtao kan Pangangaipo sa Emosyonal na Paagi

17, 18. (a) Paano ihinahayag kan Biblia an importansia nin pagpaheling nin pagkamoot sa mga aki? (b) Paano maninigong arogon kan mga ama si Jehova sa pagpahayag nin pagkamoot sa saindang mga aki?

¹⁷ Siempre, an mga aki igwa man nin importanteng marhay na emosyonal na mga pangangaipo. Sinasabi kan Tataramon nin Dios sa mga magurang kun gurano kaimportante an pagtao kan pangangaipong ini. Halimbawa, an hoben pang mga babae sinasadol na “mamoot sa saindang mga aki.” An paggibo ninda kaiyan konektado sa pagpabalik sa “toltol na isip” kan hoben pang mga ina. (Tito 2:4) Tunay nanggad, kadonongan an pagpaheling nin pagkamoot sa aki. Ini nagtotokdo sa aki na mamoot asin nagtatao nin mga pakinabang sa bilog na buhay. Sa ibong na lado, pagkadaing isip an dai pagpaheling nin pagkamoot sa aki. Iyan nagbubunga nin grabeng kakologan sa boot asin tanda nin dai pag-arog ki Jehova, na nagpapaheling sa sato nin dakulaon na pagkamoot sa ibong kan satong mga pagkabakong sangkap.​—Salmo 103:8-14.

¹⁸ Si Jehova iyo na ngani an nag-enot na kamotan an saiyang daganon na mga aki. Siring kan sinasabi sa 1 Juan 4:​19, “sia an enot na namoot sa sato.” Partikularmente kamong mga ama, maninigo nindong arogon an halimbawa ni Jehova, na mag-enot sa pagpatalubo sa mamomoton na bogkos sa saindong mga aki. Sinasadol kan Biblia an mga ama na likayan na pagpaanggoton an saindang mga aki, “tanganing dai sinda panluyahan nin boot.” (Colosas 3:21) Pira sanang bagay an mas nakakapaanggot sa mga aki kisa pagkaigwa nin impresyon na dai sinda namomotan o pinapahalagahan nin magurang. Marahay na girumdomon kan mga ama na pinopogolan na ipahayag an saindang saboot an halimbawa ni Jehova. Si Jehova nagtaram pa ngani hale sa langit tanganing ipahayag an saiyang pag-oyon asin pagkamoot  sa saiyang Aki. (Mateo 3:17; 17:5) Siertong naparigon nanggad kaiyan an boot ni Jesus! Kaagid kaiyan, an mga aki napaparigon asin napapakosog an boot huli sa onestong mga kapahayagan nin pagkamoot asin pag-oyon kan saindang mga magurang.

19. Taano ta mahalaga an disiplina, asin anong pagkabalanse an pinagmamaigotan na gibohon nin Kristianong mga magurang?

¹⁹ Siempre, an pagkamoot nin magurang bakong sa tataramon sana. An pagkamoot sa pangenot ipinapahayag paagi sa gibo. An pagtao kan pangangaipo sa materyal asin sa espirituwal puedeng magin kapahayagan nin pagkamoot nin magurang, nangorogna kun iyan ginigibo kan mga magurang sa paagi na nagpaparisa na an pagkamoot an pangenot na motibasyon. Dugang pa, an disiplina sarong mahalagang marhay na kapahayagan nin pagkamoot nin magurang. Tunay nanggad, “an namomotan ni Jehova saiyang dinidisiplina.” (Hebreo 12:6) Sa ibong na lado, an dai pagdisiplina kapahayagan nin pagkaongis nin magurang! (Talinhaga 13:24) Si Jehova pirmeng balanse sana, na nagdidisiplina “sa tamang sokol.” (Jeremias 46:28) An siring na pagkabalanse bako pirmeng pasil para sa bakong sangkap na mga magurang. Pero, sulit nanggad an gabos nindong paghihingoa na magin balanse. An marigon asin mamomoton na disiplina nakakatabang sa aki na dumakula na maogma asin mabunga. (Talinhaga 22:6) Bako daw na iyan an gusto kan lambang Kristianong magurang para sa saiyang aki?

20. Paano ikakatao kan mga magurang sa saindang mga aki an pinakamarahay na posibleng oportunidad na ‘pilion an buhay’?

²⁰ Kun ginigibo nindo mga magurang an mahalagang gibohon na iinasignar sa saindo ni Jehova​—pagtao kan materyal, espirituwal, asin emosyonal na mga pangangaipo kan saindong mga aki​—dakula an mga balos. Paagi kaiyan itinatao nindo sa saindong mga aki an pinakamarahay na posibleng oportunidad na ‘pilion an buhay’ asin pakatapos kaiyan ‘padagos na mabuhay.’ (Deuteronomio 30:19) An mga aki na pinili an maglingkod ki Jehova asin magdanay sa dalan pasiring sa buhay mientras na sinda nagdadakula nagtatao nin dakulaon na kagayagayahan sa saindang mga magurang. (Salmo 127:3-5) An siring na kagayagayahan magpapadagos sagkod lamang! Pero, paano maoomaw ngonyan kan mga hoben si Jehova? Totokaron kan sunod na artikulo an temang iyan.

[Mga Nota sa Ibaba]

Ano an Isisimbag Nindo?

Ano an magigibo kan mga magurang tanganing ikatao an mga pangangaipo kan saindang mga aki

• sa materyal?

• sa espirituwal?

• sa emosyonal na paagi?

[Mga Hapot Para sa Pag-adal]

[Ritrato sa pahina 18]

An dakol na gamgam daing kapagalan na nagtatrabaho tanganing mapakakan an saindang mga siyo

[Ritrato sa pahina 20]

Dapat ngunang kultibaron kan mga magurang an sadiri nindang espirituwalidad

[Mga Ritrato sa pahina 20, 21]

An mga magurang puedeng makanompong nin dakol na okasyon tanganing tokdoan an saindang mga aki manongod sa Kaglalang

[Ritrato sa pahina 22]

An mga aki napapakosog asin napaparigon an boot huli sa pag-oyon kan magurang