Pag-omaw ki Jehova sa Eskuelahan

SA BILOG na kinaban, an hoben na mga Saksi ni Jehova naghahanap nin mga paagi na omawon an Dios sa eskuelahan​—paagi sa saindang pagtaram sagkod sa saindang paggawe. Mangnoha an nagkapirang eksperyensia na nagpapaheling kan saindang kaigotan nin pagkahoben.

An sarong hoben na Saksi sa Grecia naasignaran na magsurat nin sarong report dapit sa polusyon sa atmospera kan daga. Pakakonsulta sa Watch Tower Publications Index, nakakua sia nin magagamit na artikulo sa magasin na Awake!, na pinapasalamatan iyan bilang saiyang reperensia sa konklusyon kan saiyang komposisyon. Sinabi saiya kan saiyang maestra na iyan an saro sa pinakamagayon na komposisyon na nabasa nia kasuarin man. Kan huri ginamit kan maestra an impormasyon na iyan sa sarong seminar, na may mararahay na resulta. Sa siring nagdesisyon an hoben na tugang na babae na tawan an maestra nin dugang pang mga isyu kan Awake! kabale an nagtatampok kan seryeng “Teachers​—What Would We Do Without Them?” Kan huri inomaw kan maestra an magasin na Awake! sa klase, asin may nagkapirang iba pang estudyante na nagpoon na maghagad nin kopya. Kinaipuhan kan tugang na babae na magdara sa eskuelahan nin mga kopya kan magasin tanganing mabasa ninda an iba pang isyu.

Sa Benin, Aprika, an sarong daragitang Kristiana napaatubang sa sarong napapalaen na klase nin pangigipit. Oyon sa kinaugalean, an mga magurang nin dakol na estudyante sa saiyang eskuelahan nagkaoroyon na magbayad nin mga paratokdo para sa depisil na mga leksion tanganing andamon an mga hoben para sa eksaminasyon. Minsan siring, an Sabado nin aga an pinili kan mga paratokdo para sa mga sesyon. Nagsayuma an hoben na Saksi: “An Sabado nin aga iyo po an panahon na an bilog na kongregasyon naghuhulit na magkairibanan. Iyan an pinakamaogmang panahon kan semana para sa sako, asin dai ko po iyan iriribay sa ano pa man!” An saiyang ama, na nagsosolong magurang asin Saksi man, nag-oyon asin naghingoa na kombensiron an sarong grupo nin mga magurang asin paratokdo na liwaton an iskedyul. Minsan siring, nagsayuma sinda gabos. An daragita nagdesisyon na dai na magpatokdo. Naghulit na lang sia kaiba kan saiyang kongregasyon. Pinag-olog-olog sia kan mga kaklase nia, na pinipirit siang bayaan an saiyang paghuhulit saka an saiyang Dios. Biyo sindang nakakasegurado na dai sia makakapasar sa eksaminasyon. Pero an nangyari, an grupong idto nin mga estudyante na tinokdoan dai puminasar, mantang an satong hoben na tugang na babae pasado. Dai na sabihon pa, puminondo an panunuya. Ngonyan an sinasabi saiya kan mga estudyante, “Maninigo mong padagos na paglingkodan an saimong Dios.”

Sa Republikang Czech, an sarong 12 anyos na aking babae kaipuhan na gumibo nin sarong report basado sa sarong libro. Sinadol sia kan saiyang ina na gamiton an librong The Greatest Man Who Ever Lived. Pinonan nia an saiyang report paagi sa mga hapot na: “Ano sa paghona nindo? Siisay daw an pinakadakulang tawo na nabuhay kasuarin man?” Isinaysay nia an manongod ki Jesus, an saiyang buhay digdi sa daga, asin an saiyang mga katokdoan. Dangan ipinaliwanag nia an kapitulo na may titulong “A Lesson in Forgiveness.” An maestra nia nagkagsing, “Iyan an pinakamagayon na report na nadangog ko kasuarin man saimo!” asin mapagpasalamat na inako an sarong kopya kan libro. An nagkapirang kapwa estudyante gusto man na magkaigwa nin kopya. Kan sumunod na aldaw, an aking babae ogmahon na makawaras nin 18 kopya.

An siring na mga hoben nakakaeksperyensia nin dakulang kagayagayahan sa pag-omaw ki Jehova sa eskuelahan. Marahay na arogon niato gabos an saindang kaigotan nin pagkahoben.