“Pinaglamag Huli sa Saiyang Pagtubod”
“Pinaglamag Huli sa Saiyang Pagtubod”
AN BANWAAN nin Cernobbio sa amihanan nin Italia nag-establisar nin sarong monumento sa sarong lokal na parke para sa paggirumdom sa mga biktima nin pagbalga sa mga deretso nin tawo. An saro kan mga plake na ihinayag para sa paggirumdom sa sainda idinedikar ki Narciso Riet. Namundag sa Alemania na Italiano an mga magurang, si Riet nagin saro sa Mga Saksi ni Jehova kan mga taon nin 1930. Durante kan rehimen ni Hitler, an mga Saksi ni Jehova pinaglamag huli ta nagsayuma sindang ipaorog si Hitler sa tunay na Dios, si Jehova.
Kan maaraman kan Gestapo na si Riet imbuelto sa pagdara nin mga kopya kan An Torrengbantayan sa mga kampo de konsentrasyon, duminulag sia pasiring sa Cernobbio. Duman pinapagtradusir sia kan An Torrengbantayan sa Italiano asin pinapagdistribwir kaiyan sa saiyang mga kapagtubod sa kaharaning lugar. Nadiskobre an saiyang mabagsik na mga aktibidad. Sinakyada kan sarong opisyal nin SS asin kan saiyang mga tawohan an harong ni Riet, inarestar sia, asin kinompiskar an ebidensia sa “krimen”—duwang Biblia asin nagkapirang surat! Idineportar si Riet sa Alemania, ikinarsel sa kampo de konsentrasyon sa Dachau, asin ginadan dai nahaloy bago matapos an Guerra Mundial II. Sia “pinaglamag huli sa saiyang pagtubod,” an sabi sa plake sa Cernobbio.
An pagtubod ni Narciso Riet asin kan ginatos na iba pang Saksi na nagin biktima nin paglamag kan Nazi sarong pamparigon sa boot kan mga Kristiano ngonyan na magdanay na maimbod ki Jehova, an solamenteng Personahe sa uniberso na maninigo sa saindang pagsamba. (Kapahayagan 4:11) Si Jesus nagsabi: “Maogma idtong mga pinaglamag huli sa katanosan.” Gigirumdomon nin Dios an saindang mga ginibo asin bebendisyonan sinda sa saindang kosog nin boot.—Mateo 5:10; Hebreo 6:10.