Trabaho—Sarong Bendisyon o Sarong Sumpa?

‘Mayo nin mas marahay sa tawo kundi na sia makaheling nin karahayan huli sa saiyang kahigosan.’​—Eclesiastes 2:24.

“PAGAL-PAGAL pakatapos kan aldaw nin trabaho.” Sa sarong dai pa sana nahahaloy na surbey, iyan an pagkaladawan nin 1 sa 3 empleyado sa parateng marhay na namamatean ninda. Bako ining makangangalas sa mga kamugtakan kun saen natetension an mga tawo; nagtatrabaho sinda nin mas halawig asin dinadara an mas dakol na trabaho sa harong​—na sa gabos na panahon an mga among ninda bibihirang magtao nin tataramon nin pag-apresyar.

An pagtunga nin pagprodusir nin lagduan paagi sa makina nagpangyari na an dakol na trabahador makamate na garo sana sinda mga ngipon sa rueda nin sarong dakulaon, impersonal na makina. An inspirasyon asin pagigin may nahahaman sa parate napopogolan. Naturalmente, nakakaapekto ini sa aktitud sa trabaho kan mga tawo. An motibasyon na magkaigwa nin personal na interes sa  trabaho nin saro madaling mawara. Tibaad mawara an pagmawot na magin ekselente sa paggibo nin mga bagay na gibo nin kamot. An siring na epekto puedeng magbunga nin pagkauyam sa trabaho mismo, na tibaad pinapangyaring maongis an saro sa saiyang trabaho.

Pagsiyasat sa Satong Aktitud

Totoo, dai niato pirmeng mababago an satong mga kamugtakan. Minsan siring, bako daw na maoyon kamo na puede niatong bagohon an satong aktitud? Kun manompongan nindo na medyo naiimpluwensiahan man kamo kan negatibong aktitud sa trabaho, marahay na isipon an punto de vista asin mga prinsipyo nin Dios na may koneksion sa temang ini. (Eclesiastes 5:18) Nanompongan nin dakol na an pag-isip kan mga ini nagtao sa sainda nin sarong sokol nin kaogmahan asin pagkakontento sa saindang trabaho.

An Dios an Supremong Trabahador. An Dios sarong trabahador. Tibaad dai niato sia naisip sa paaging iyan, alagad siring kaiyan an enot na pagkaintrodusir nia sa saiyang sadiri sa Biblia. An pagkasaysay sa Genesis nagpopoon sa paglalang ni Jehova sa kalangitan asin sa daga. (Genesis 1:1) Isipon nindo an kadakoldakol na nagin papel nin Dios kan magpoon siang maglalang​—kagdisenyo, organisador, inhenyero, eksperto sa arte, espesyalista sa materyales na gagamiton, paragibo nin proyekto, kemiko, biologo, soologo, programer, linguista, sa pagsambit sana sa nagkapira.​—Talinhaga 8:​12, 22-31.

Ano an kualidad kan trabaho nin Dios? An rekord kan Biblia nagsasabi na iyan “marahay,” “marahayon.” (Genesis 1:​4, 31) Tunay nanggad, an mga linalang “nagpapahayag kan kamurawayan nin Dios,” asin maninigo na omawon man niato sia!​—Salmo 19:1; 148:1.

Minsan siring, an trabaho nin Dios dai natapos sa paglalang kan pisikal na kalangitan asin kan daga patin kan enot na tawong mag-agom. An Aki ni Jehova, si Jesu-Cristo, nagsabi: “An sakong Ama sagkod ngonyan padagos na naggigibo.” (Juan 5:17) Iyo, si Jehova padagos na nagtatrabaho paagi sa pagsustenir sa saiyang mga linalang asin pagligtas sa saiyang maimbod na mga parasamba. (Nehemias 9:6; Salmo 36:6; 145:​15, 16) Naggagamit ngani sia nin mga tawo, “mga kapwa trabahador nin Dios,” tanganing tumabang sa paghaman kan nagkapirang trabaho.​—1 Corinto 3:9.

An trabaho puedeng magin sarong bendisyon. Bako daw na sinasabi kan Biblia na an trabaho sarong sumpa? An Genesis 3:17-19 tibaad garo baga magparisa na pinadusahan nin Dios si Adan asin Eva sa saindang pagrebelde paagi sa pagtao sa sainda nin pagabat na trabaho. Kan kinokondenar an enot na mga tawong iyan, sinabi nin Dios ki Adan: “Sa ganot kan saimong lalauogon makakan ka nin tinapay sagkod na ika bumalik sa daga.” Iyan daw sarong pankagabsan na pagkondenar sa trabaho?

Bako. Imbes, huli sa pagigin bakong maimbod ni Adan asin Eva, an paghiwas kan Edenikong Paraiso dai mangyayari ora mismo. An daga sinumpa nin Dios. Kaipuhan na magganot asin magpagal tanganing an saro makakua nin ikabubuhay sa daga.​—Roma 8:​20, 21.

Imbes na sabihon na an trabaho sarong sumpa, ipinapaheling kan Biblia na iyan sarong bendisyon na dapat pakamahalon. Siring kan nasambitan sa enotan, an Dios mismo mahigos na trabahador. Huling linalang an mga tawo sa saiyang ladawan, tinawan sinda ni Jehova nin kakayahan asin autoridad na pamahalaan an saiyang mga linalang sa daga. (Genesis 1:​26, 28; 2:15) Itinao an asignasyon na trabahong iyan bago isinabi nin Dios an mga tataramon na nakasurat sa Genesis 3:19. Kun an trabaho sarong sumpa asin maraot, nungkang eenkaminaron ni Jehova an mga tawo na magtrabaho. Si Noe asin an saiyang pamilya kadakol nin gigibohon bago asin pagkatapos kan Baha. Sa kapanahonan kan mga Kristiano, an mga disipulo ni Jesus sinadol man na magtrabaho.​—1 Tesalonica 4:11.

Pero, aram niato gabos na an trabaho puedeng magin nakakapagabat ngonyan na mga aldaw. An tension, mga peligro, pagkalangkag, pagkadesganar, pakikompetensia, panloloko, asin inhustisya pira sana sa “mga tonok saka binit” na konektado dian ngonyan. Alagad an trabaho mismo bakong sarong sumpa. Sa Eclesiastes 3:​13, inaapod kan Biblia an trabaho asin an mga bunga kaiyan na regalo hale sa Dios.​—Helingon an kahon na “Pag-atubang sa Tension na Konektado sa Trabaho.”

Puede nindong pamurawayon an Dios paagi sa saindong trabaho. An kualidad asin pagigin ekselente sa lugar nin trabaho inoomaw kaidto pa. An kualidad saro sa mahalagang marhay na mga aspekto sa pagkaigwa nin oyon sa Biblia na pagmansay sa trabaho. An Dios mismo ginigibo an saiyang trabaho sa ekselenteng paagi. Tinawan nia kita nin mga  talento asin abilidad, asin gusto niang gamiton niato an satong mga abilidad sa marahay na katuyohan. Halimbawa, kan itinotogdok an tabernakulo sa suanoy na Israel, pinano ni Jehova nin kadonongan, pakasabot, asin kaaraman an mga tawo na arog ni Bezalel asin Oholiab, na pinapangyaring magibo ninda an espisipikong artistiko asin praktikal na mga trabaho. (Exodo 31:1-11) Ipinapaheling kaini na interesadong marhay an Dios sa katuyohan, pagkagibo, disenyo, asin iba pang detalye kan saindang trabaho.

May hararom ining implikasyon sa satong pagmansay sa personal na mga abilidad asin ugale sa trabaho. Nakakatabang ini sa sato na mansayon iyan sa sarong kabtang bilang regalo na hale sa Dios, na dai dapat ipasipara. Huli kaini, sinasadol an mga Kristiano na gibohon an saindang trabaho na garo baga rinerepaso mismo nin Dios an saindang naginibo: “Ano man an saindong ginigibo, gibohon iyan nin bilog na kalag na siring baga kun para ki Jehova, asin bakong para sa mga tawo.” (Colosas 3:23) Pinagbobotan an mga lingkod nin Dios na pakarhayon an  trabaho, na sa siring nagpapangyari sa Kristianong mensahe na magin orog na nakakaakit sa mga katrabaho asin sa iba pa.​—Helingon an kahon na “Pag-aplikar kan mga Prinsipyo sa Biblia sa Lugar nin Trabaho.”

Kun kokonsideraron ini, marahay na hapoton niato an satong sadiri kun anong klaseng kualidad asin kahigosan an itinatao niato sa satong trabaho. Maoogma daw an Dios sa satong nagigibo? Kita daw lubos na kontento sa kun paano niato ginigibo an iinasignar sa sato na mga trabaho? Kun dai, mapapaoswag pa iyan.​— Talinhaga 10:4; 22:29.

Balansehon an trabaho asin espirituwalidad. Minsan ngani kaomaw-omaw an mahigos na pagtrabaho, may saro pang importanteng marhay na aspekto tanganing makua an satispaksion sa trabaho asin sa buhay. Iyan an espirituwalidad. Si Hadeng Salomon, na mahigos na nagtrabaho asin nakamtan an gabos na kayamanan asin kaginhawahan na iinaalok nin buhay, nagkonklusyon nin arog kaini: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”​—Eclesiastes 12:13.

Malinaw nanggad, kaipuhan na konsideraron niato an kabotan nin Dios sa ano man na gigibohon niato. An ginigibo daw niato kaoyon kan saiyang kabotan, o kontra daw dian an tibaad ginigibo niato? Naghihingoa daw kitang paogmahon an Dios, o nagmamaigot sana kitang paogmahon an satong sadiri? Kun dai niato ginigibo an kabotan nin Dios,  mamamatean niato sa kahurihurihi an kolog nin pagkadesesperar, kapungawan, asin pagmate na dai nang halaga an buhay.

Si Steven Berglas nagsuherir na an mga ehekutibo na nakakamate nin labi-labing kapagalan sa trabaho ‘maghanap nin kapakipakinabang na gibohon na kinakahiligan ninda asin gibohon iyan na kabtang kan saindang buhay.’ Mayo na nin ibang kapakipakinabang na gibohon kisa paglilingkod sa Saro na nagtao sa sato kan mga abilidad asin kakayahan tanganing makagibo nin makahulogan na trabaho. An paggibo nin trabaho na nasosonoan kan satong Kaglalang dai matao sato nin pagkadeskontento. Para ki Jesus, an trabaho na iinasignar sa saiya ni Jehova masustansia, nakakakontento, asin nakakaginhawa na arog nin kakanon. (Juan 4:34; 5:36) Asin tandaan na iniimbitaran kita nin Dios, an Supremong Trabahador, na magin “mga kapwa trabahador” nia.​—1 Corinto 3:9.

An pagsamba sa Dios asin pagtalubo sa espirituwal nag-aandam sa sato para sa kapakipakinabang na trabaho asin paninimbagan. Mantang sa parate an lugar nin trabaho pano nin mga pangigipit, iriwal, asin hinahagad sa sato, an satong hararom an pagkagamot na pagtubod asin espirituwalidad puedeng magtao sa sato nin kinakaipuhan na marhay na kosog mantang nagmamaigot kitang magin mas marahay na mga empleyado o among. Sa ibong na lado, an totoong mga nangyayari sa buhay sa maraot na kinaban na ini puedeng magparealisar sa sato kan mga bagay na kaipuhan niatong tumalubo sa pagtubod.​—1 Corinto 16:​13, 14.

An Panahon na an Trabaho Magigin Saro Nang Bendisyon

An mga mahigos na naghihingoang maglingkod sa Dios ngonyan makakaasa sa panahon na ibabalik nia sa dati an Paraiso asin an bilog na daga mapapano nin kapakipakinabang na trabaho. Si Isaias, na sarong propeta ni Jehova, naghula mapadapit sa buhay sa panahon na iyan: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. . . . An ginibo kan saindang mga kamot lubos na gagamiton kan sakuyang mga pinili.”​—Isaias 65:21-23.

Magigin bendisyon nanggad an trabaho sa panahon na iyan! Paagi sa pag-adal kun ano an kabotan nin Dios para sa saindo asin paghiro kaoyon kaiyan, logod na kamo magin kabilang sa mga bebendisyonan ni Jehova asin pirmeng ‘makakaheling nin karahayan para sa gabos nindong kahigosan.’​—Eclesiastes 3:13.

[Blurb sa pahina 8]

An Dios an Supremong Trabahador: Genesis 1:​1, 4, 31; Juan 5:17

[Blurb sa pahina 8]

An trabaho puedeng magin sarong bendisyon: Genesis 1:28; 2:15; 1 Tesalonica 4:11

[Blurb sa pahina 8]

Puede nindong pamurawayon an Dios paagi sa saindong trabaho: Exodo 31:1-11; Colosas 3:23

[Blurb sa pahina 8]

Balansehon an trabaho asin espirituwalidad: Eclesiastes 12:13; 1 Corinto 3:9

[Kahon/Ritrato sa pahina 6]

PAG-ATUBANG SA TENSION NA KONEKTADO SA TRABAHO

An mga propesyonal sa langtad nin medisina klinasipikar an tension sa trabaho bilang sarong peligro sa trabaho. Puede iyan na magin causa nin ulser asin depresyon patin puedeng sumagkod ngani sa paghugot. An mga Hapon igwa nin termino para dian​—karoshi, “pagkagadan huli sa sobrang pagtrabaho.”

Manlaenlaen na bagay na konektado sa trabaho an puedeng magin dahelan nin tension. Kaiba sa mga ini an pagliliwat sa oras kan o mga kamugtakan sa trabaho, problema sa mga among, pagliliwat sa mga paninimbagan o klase nin trabaho, pagretiro, asin pagkahale sa trabaho. Bilang reaksion sa siring na tension, an nagkapira nagpoprobar na makadulag paagi sa pagliwat nin trabaho o mga kamugtakan. An iba naghihingoang pogolon an siring na tension, tangani sanang manompongan na iyan nakakaapekto sa ibang kabtang nin buhay, na parateng sa pamilya. May mga tawo na naaapektaran pa ngani sa emosyon, na nagigin depresyon asin pagkadesesperar.

An mga Kristiano andam na marhay sa pag-atubang sa tension na konektado sa trabaho. An Biblia nagtatao nin kadakol na pundamental na prinsipyo na puedeng makasustenir sa sato sa depisil na mga panahon na may positibong epekto sa satong espirituwal asin emosyonal na ikakarahay. Halimbawa, si Jesus nagsabi: “Dai kamo noarin man maghadit dapit sa masunod na aldaw, huli ta an masunod na aldaw magkakaigwa kan sadiring mga kahaditan kaiyan. Igo na para sa kada aldaw an sadiring karatan kaiyan.” An pagparigon digdi iyo na magkonsentrar sa mga problema sa aldaw na iyan, bakong sa mga problema sa aga. Sa siring, malilikayan niato na padakulaon an satong mga problema, na makakadagdag sana sa tension.​—Mateo 6:25-34.

Mahalagang marhay na an mga Kristiano magsarig sa kosog nin Dios, bakong sa sadiri nindang kosog. Kun an pagmate niato nakaabot na kita sa puntong dai na niato kaya, puede kitang tawan nin Dios nin katoninongan asin kagayagayahan sa satong puso saka nin kadonongan tanganing maatubang an ano man na kasakitan. “Padagos kamong magkaigwa nin kosog sa Kagurangnan asin sa kapangyarihan kan saiyang kosog,” an isinurat ni apostol Pablo.​—Efeso 6:10; Filipos 4:7.

Sa katapustapusi, dawa an nakakatension na mga kamugtakan puedeng magbunga nin positibong mga resulta. An mga pagbalo puedeng magpangyaring dumolok kita ki Jehova, hanapon sia asin magtiwala sa saiya. Puede man na magpahiro iyan sa sato na padagos na kultibaron an Kristianong personalidad asin an abilidad na magpadagos sa irarom nin pangigipit. Sinasadol kita ni Pablo: “Mag-ogma kita mantang nasa mga kahorasaan, mantang aram niato na an kahorasaan nagbubunga nin pakatagal; dangan, an pakatagal, nin pagkainooyonan; dangan, an pagkainooyonan, nin paglaom.”​—Roma 5:​3, 4.

Sa siring, dawa an tension puedeng magin panmotibar para sa espirituwal na pagtalubo imbes na magin gikanan nin pagkadesesperar asin kamondoan.

[Kahon/Ritrato sa pahina 7]

PAG-APLIKAR KAN MGA PRINSIPYO SA BIBLIA SA LUGAR NIN TRABAHO

An aktitud asin gawe-gawe nin sarong Kristiano sa trabaho puedeng gibohon na nakakaakit an mensahe kan Biblia sa mga katrabaho asin sa iba. Sa saiyang surat ki Tito, sinasadol ni apostol Pablo an mga nasa situwasyon na kapareho kan mga empleyado na “magpasakop sa mga [superbisor ninda] sa gabos na bagay, asin panigoan sindang marhay, na bakong masinimbag, na dai naghahabon, kundi nagpapaheling nin marahay na bilog na kaimbodan, tanganing masamnohan ninda an katokdoan kan satong Paraligtas, an Dios, sa gabos na bagay.”​—Tito 2:​9, 10.

Halimbawa, estudyare an isinurat nin sarong negosyante sa opisina prinsipal kan Mga Saksi ni Jehova: “Nagsurat ako tanganing humagad nin permiso na magkua nin mga trabahador na mga Saksi ni Jehova. Gusto kong kuanon sinda huli ta aram ko nanggad na sinda onesto, sinsero, asin mapagtitiwalaan, saka dai ka ninda dadayaon. Mga Saksi ni Jehova sana an mga tawo na talagang pinagtitiwalaan ko. Tabangi tabi nindo ako.”

Si Kyle sarong Kristiana na nagtatrabaho bilang resepsionista sa sarong pribadong eskuelahan. Bilang resulta nin dai pagkasinabotan, an sarong katrabaho nia nagraway sa saiya sa atubangan kan nagkapirang estudyante. “Kinaipuhan kong mag-ingat na dai makatao nin kasusupgan sa ngaran ni Jehova,” an nagigirumdoman ni Kyle. Sa suminunod na limang aldaw, inisip-isip ni Kyle kun paano nia ikakaaplikar an mga prinsipyo sa Biblia. An saro kaiyan manonompongan sa Roma 12:18: “Kun mahihimo, sagkod na iyan nasa saindo, makipagkatoninongan sa gabos na tawo.” Nagpadara sia nin e-mail sa saiyang katrabaho asin naghagad nin dispensasyon huli sa tension sa pag-oltanan ninda. Inimbitaran ni Kyle an saiyang katrabaho na magpawalat pagkatapos nin trabaho tanganing mag-olay sinda asin resolberan an problema. Kan ginibo ninda iyan, an katrabaho ni Kyle luminomoy asin pinasalamatan an madonong na ginibo ni Kyle. Sia nagsabi ki Kyle, “Ini siertong may koneksion sa saimong relihion” asin mainit siang kinugos kaini kan sinda magsuwayan. An konklusyon ni Kyle? “An pirmeng tama na gibohon iyo an iaplikar niato an mga prinsipyo sa Biblia.”

[Ritrato sa pahina 4]

Dakol na trabahador an nakakamate na sinda garo mga ngipon sa sarong impersonal na makina

[Credit Line]

Japan Information Center, Consulate General of Japan in NY

[Picture Credit Line sa pahina 8]

Globo: Retrato nin NASA