An Paghanap nin Katoninongan nin Isip

SI Albert maogma bilang lalaking may agom asin may duwang nakakaogmang marhay na aki. Alagad an pagmate nia may kulang sa buhay nia. Kan panahon na sia nasasakitan sa paghanap nin trabaho, naimbuelto sia sa politika asin inako nia an sosyalismo. Sia nagin pa ngani na aktibong miembro kan lokal na partido Komunista.

Minsan siring, dai nahaloy nadesganar si Albert sa Komunismo. Pinutol nia an saiyang koneksion sa politika asin biyong idinusay an sadiri sa saiyang pamilya. An nagin katuyohan nia sa buhay iyo na seguradohon na maogma sinda. Minsan siring, yaon pa man giraray ki Albert an dai nahahaleng pagmate na may kulang sa buhay nia; padagos na dai nia makamtan an totoong katoninongan nin isip.

Dai nanggad nasosolo an eksperyensia ni Albert. Tanganing manompongan an may kahulogan na katuyohan sa buhay, minilyon an nag-eksperimento sa manlaenlaen na ideolohiya, pilosopiya, asin relihion. Sa Solnopan, an mobimientong hippie kan mga taon nin 1960 pagrebelde sa moral asin sosyal na mga prinsipyo sa buhay na tradisyonal. An mga hoben partikularmente naghanap kaidto nin kaogmahan asin kahulogan sa buhay paagi sa droga na nakakaapektar sa isip asin sa mga pilosopiya kan mga guru asin espirituwal na mga namomoon daa kan mobimiento. Minsan siring, an mobimientong hippie dai nakatao nin tunay na kaogmahan. Imbes, nakakontribwir iyan sa pagkaigwa nin mga adikto sa droga asin mga hoben na nakikidorog minsan kiisay, na nagparikas sa pagruro kan sosyedad pasiring sa karibarawan sa moral.

Sa laog nin dakol na siglo, dakol an naghanap nin kaogmahan paagi sa kayamanan, kapangyarihan, o edukasyon. Sa katapustapusi an mga dalan na ini nagbubunga nin pagkadesganar. “Dawa kun an sarong tawo abunda,” an sabi ni Jesus, “an  saiyang buhay dai minagikan sa mga bagay na saiyang nasasadirihan.” (Lucas 12:15) Imbes, an desididong pagmamaigot na kamtan an kayamanan sa parate nagbubunga nin kamondoan. An Biblia nagsasabi: “Idtong mga determinadong yumaman nahuhulog sa sugot asin sa siod patin sa dakol na daing isip asin nakakaraot na mawot, na nagdadara sa mga tawo sa kalaglagan asin kapahamakan. Huli ta an pagkamoot sa kuarta gamot nin gabos na klase nin nakakadanyar na bagay, asin sa pag-aabot sa pagkamoot na ini an nagkapira . . . sinaksak an bilog nindang sadiri nin dakol na kakologan.”​—1 Timoteo 6:​9, 10.

Kun siring, paano manonompongan nin saro an katoninongan nin isip asin an katuyohan sa buhay? An kaipuhan sana daw magpatibasang, na arog nin pagpana sa diklom sa sarong depisil madakop na target? Marahay sana ta bako. Siring sa maaaraman niato sa masunod na artikulo, an solusyon iyo an pagpanigo sa sarong pangangaipo na mahalagang marhay asin, sa katunayan, mga tawo sana an igwa kaiyan.

[Ritrato sa pahina 3]

An pagmamaigot daw na kamtan an kayamanan, kapangyarihan, o edukasyon makakatabang sa saindo na manompongan an katoninongan nin isip?