Estorya nin Buhay

Ikinakaogma an Sakong Kabtang sa Lakop sa Globong Pagtotokdo sa Biblia

ISINAYSAY NI ANNA MATHEAKIS

An barkong pandakit nasosolo. Kun malunod iyan, an dakulaon na barkong iyan na 171 metros an laba bubutongon ako pairarom sa tubig na iyong magigin lolobngan ko. Natatarantang luminangoy ako parayo sa peligro, na nakikipaglaban sa makosog na mga alon. An solamenteng paagi na magdanay na lataw sa tubig iyo an pagkapot nin higot sa diaket na salbabida na sulot nin saro pang babae. Namibi ako sa Dios na tawan ako nin kosog asin rigon nin boot. Iyan na sana an puede kong gibohon.

TAON 1971 kaidto, asin papuli na ako sa sakong ikatolong destino sa pagmimisyonero, an Italia. Sa pagkalunod na iyan nin barko, nawara sa sako an haros gabos na bagay na pagsasadiri ko. Alagad dai nawara sa sako an pinakamahalagang mga bagay​—an sakong buhay, an mamomoton na Kristianong kasararoan nin magturugang, asin an pribilehio na maglingkod ki Jehova. Dinara na ako kan paglilingkod na iyan sa tolong kontinente, asin an pagkalunod nin barko saro sanang pangyayari sa sakong makasaysayan na buhay.

Namundag ako kan 1922. An sakong pamilya nag-iistar kaidto sa Rām Allāh, mga 16 kilometros sa amihanan kan Jerusalem. An sakong mga magurang parehong hale sa isla nin Creta, alagad an sakong ama nagdakula sa Nazaret. Ako an kangudhan sa tolong aking lalaki asin duwang aking babae. An samong pamilya nalunosan nin grabe kan magadan an sakong tugang na lalaki na ikaduwa sa matua, na nalamos sa Salog nin Jordan mantang nasa pamamasyar na inorganisar kan eskuelahan. Pagkatapos kan trahedyang ini an sakong ina habo nang magdanay sa Rām Allāh, kaya nagbalyo kami sa Atenas, Grecia, kan ako tres anyos.

Nakaabot sa Samong Pamilya an Katotoohan sa Biblia

Dai nahaloy pagkaabot mi sa Grecia, an pinakamatuang tugang kong lalaki na si Nikos, na kaidto  22 anyos, nakamidbid an mga Estudyante sa Biblia, na apod sa Mga Saksi ni Jehova kaidto. An pagkaigwa nin kaaraman sa Biblia nagtao sa saiya nin dakulang kagayagayahan asin naglalaad na kaigotan para sa Kristianong ministeryo. Nakapaanggot ini sa sakong ama, asin pinalayas nia si Nikos sa harong. Minsan siring, kun an sakong ama nagbibiahe pasiring sa Palestina, kami kan sakong ina asin tugang na babae nag-iiba ki Nikos sa Kristianong mga pagtiripon. Garo nadadangog ko pa an sakong ina na entusiastikong nagtataram manongod sa mga bagay na nadangog nia sa mga pagtiripon na idto. Alagad dai nahaloy pagkatapos kaiyan, sia nagkaigwa nin kanser asin nagadan sa edad na 42. Durante kan depisil na panahon na iyan, an sakong tugang na si Ariadne mamomoton na inataman an samong pamilya. Apisar na sia hoben pa, sia nagin garo ina ko sa laog nin dakol na taon.

Pirme akong iiniiba kan sakong ama sa pagsimba sa Iglesia Ortodokso kun sia nasa Atenas, asin pagkagadan nia, padagos akong nagsimba, minsan ngani bihira na. Huling mayo akong naheheling na tanda nin diosnon na debosyon sa mga nagsisimba, sa kahurihurihi nagpondo ako sa pagsimba.

Pagkagadan kan sakong ama, nakakua ako nin seguradong trabaho sa ministri kan kayamanan kan gobyerno. Minsan siring, idinusay kan sakong tugang na lalaki an saiyang buhay sa paghuhulit kan Kahadean, na naglingkod nin dakol na taon sa Grecia. Kan 1934 buminalyo sia sa Chipre. Kan panahon na iyan, mayo nin bautisadong mga Saksi ni Jehova sa islang iyan, kaya nagin pribilehio nia na paoswagon an paghuhulit duman. Kan sia mag-agom na, an saiyang agom na si Galatia naglingkod man bilang bilog na panahon na ministro sa laog nin dakol na taon. * Parate kaming pinapadarahan ni Nikos nin mga libro asin magasin na basado sa Biblia, alagad haros dai mi lamang binubuksan iyan. Nagdanay sia sa Chipre sagkod na sia nagadan.

Isinapuso Ko an Katotoohan sa Biblia

Kan 1940, si George Douras, sarong maigot na Saksi sa Atenas asin katood ni Nikos, nagbisita samo asin inimbitaran kaming makiayon sa sarong sadit na grupo sa pag-adal nin Biblia sa saiyang harong. Maogma ming inako an imbitasyon. Dai nahaloy sinasabi mi na sa iba an samong nanonodan. An pagkaigwa nin kaaraman sa Biblia nagmotibar sa samo kan tugang kong babae na idusay an samong buhay ki Jehova. Nabautismohan si Ariadne kan 1942, asin ako, kan 1943.

Kan matapos an Guerra Mundial II, inimbitaran kami ni Nikos na magpasiring sa Chipre, kaya kan 1945 buminalyo kami sa Nicosia. Bakong arog sa Grecia, an paghuhulit sa Chipre daing olang. Nakikabtang kami bako sanang sa ministeryo sa harong-harong kundi pati sa paghuhulit sa tinampo.

Pakalihis nin duwang taon, kinaipuhan na si Ariadne bumalik sa Grecia. Duman nia nakamidbid an makakaagom sa saiya, sarong kapwa nagsasamba ki Jehova, kaya nagdanay sia sa Atenas. Dai nahaloy inenkaminar ako kan sakong bayaw asin tugang na babae na bumalik sa Grecia asin maglaog sa bilog na panahon na ministeryo sa kabisera. Huling pagpapayunir an pasohan ko kaidto pa, nagbalik ako sa Atenas, kun saen mas dakula an pangangaipo.

Nabuksan an Bagong mga Pinto nin Oportunidad

Kan Nobyembre 1, 1947, nagpoon akong magpayunir, na naggagamit nin 150 oras kada bulan sa paghuhulit. Mahiwason an teritoryo kan samong kongregasyon, asin hararayo an linalakaw ko. Sa ibong kaiyan, nakamtan ko an dakol na bendisyon. Sa parate inaarestar kan mga pulis an siisay man na Saksi na nanonompongan nindang naghuhulit o nag-aatender sa Kristianong mga pagtiripon, kaya dai nahaloy inarestar man ako.

Sinahotan ako nin proselitismo, sarong magabat na kasalan kan panahon na idto. Nasentensiahan ako nin duwang bulan sa Bilanggoan nin Averof Para sa mga Babae sa Atenas. Dati nang yaon  duman an saro pang Saksing babae, asin naeksperyensiahan ming duwa an nakakaogmang marhay asin nakakapakosog na Kristianong pag-ibaiba apisar na kami nakabilanggo. Kan matapos na an sentensia sa sako, maogma akong nagpadagos sa pagpapayunir. Dakol na inadalan ko sa Biblia kaidto an sagkod ngonyan maimbod na mga lingkod ni Jehova, asin iyan nagtatao sa sako nin dakulang kagayagayahan.

Kan 1949, nakaresibi ako nin imbitasyon na mag-atender sa ika-16 na klase kan Paadalan sa Biblia kan Watchtower sa Gilead sa Estados Unidos, kun saen an bilog na panahon na mga lingkod sinasanay para sa pagmimisyonero. Kami kan sakong mga paryente naogmang marhay. Plinano kong mag-atender sa internasyonal na kombension sa Siudad nin Nueva York kan tig-init nin 1950 dangan mag-adal sa Gilead.

Pagkaabot sa Estados Unidos, nagkapribilehio akong maglingkod nin pirang bulan bilang paralinig sa pambilog na kinaban na opisina prinsipal kan Mga Saksi ni Jehova sa Siudad nin Nueva York. An palibot duman malinig, nakakaogma, asin nakakapakosog, asin napapalibotan ako nin nakahuyom na mga tugang na lalaki asin babae. Pirme kong gigirumdomon na may maboot na kapadangatan an anom na bulan na yaon ako duman. Dangan panahon nang umatender sa Paadalan nin Gilead, kun saen marikason na uminagi an limang bulan nin konsentradong marhay na pag-adal asin pagtotokdo. Naaraman ming mga estudyante na mahalagang marhay asin magayonon an kaaraman na sono sa Kasuratan, asin dinagdagan kaiyan an samong kagayagayahan asin an samong pagmawot na ipaabot sa iba an nagtatao nin buhay na kaaraman sa katotoohan.

An Enot Kong Destino sa Pagmimisyonero

Sa Paadalan nin Gilead, tinogotan kaming pumili kan samong magigin mga kapartner bago mi resibihon an samong destino sa pagmimisyonero. Si Ruth Hemmig (na ngonyan Bosshard), sarong pambihirang tugang na babae, an sakong kapartner. Labi-labi an kagayagayahan mi ni Ruth kan maresibi mi an samong destino sa Istanbul, Turkiya​—lugar kun saen nagtatagboan an Asia asin Europa! Aram mi na an paghuhulit dai pa rinerekonoser sa nasyon na iyan, alagad mayo kami nin pagduwaduwa na tatabangan kami ni Jehova.

An Istanbul sarong magayon na siudad na kosmopolitano. Nanompongan niamo duman an mga basar na pano-pano nin paninda asin tawo, pinakamasisiram na putahe hale sa manlaenlaen na parte kan kinaban, interesanteng mga museo, kawiliwiling marhay na mga pagtaraed, asin pangpang na pirmeng nakakaakit na gayo. Mas mahalaga, nakanompong kami nin sinserong mga tawo na gustong makanood manongod sa Dios. An sadit na grupo nin mga Saksi sa Istanbul prinsipalmenteng kompuesto nin mga Armeniano, Griego, asin Judio. Minsan siring, igwa nin dakol na iba pang nasyonalidad, asin kapakipakinabang na makataram nin kadikit kan laen-laen na lenguahe, pati Turko. Biyo ming ikinaogma na makamidbid an mga tawo na laen-laen an nasyonalidad na napapaha sa katotoohan. Dakol sa mga ini an padagos na naglilingkod ki Jehova nin maimbod.

An makamomondo ta nagin imposible ki Ruth na makakua nin ekstension kan saiyang permisong mag-istar, asin naobligar siang humale sa nasyon. Ipinadagos nia an saiyang bilog na panahon na paglilingkod sa Switzerland. Sagkod ngonyan minsan dakol nang taon an nakalihis, hinahanaphanap ko pa man giraray an saiyang nakakaogma asin nakakapakosog na pakiibaiba.

Pagbalyo sa Ibong kan Kinaban

Kan 1963 dai na ako tinawan nin ekstension kan sakong permisong mag-istar sa Turkiya. Depisil nanggad na bayaan an mga kapwa Kristiano na naheling kong nag-ooswag sa espirituwal mantang sinda maigot na naghihingoang pangganahan an dakol na kasakitan. Tanganing lingaon ako, may kabootan na binayadan kan sakong mga paryente an sakong pasahe pasiring sa Siudad nin Nueva York tanganing makaatender ako sa sarong kombension  duman. Dai ko pa nareresibi an masunod na destino ko.

Pagkatapos kan kombension, idinestino ako sa Lima, Peru. Kaiba an sarong hoben na tugang na babae na magigin kapartner ko, nagderetso ako hale sa Nueva York pasiring sa sakong bagong destino. Nakanood akong mag-Kastila asin nag-istar ako sa erokan nin mga misyonero na yaon sa itaas kan sangang opisina kan Mga Saksi ni Jehova. Nakakaogma nanggad na maghulit duman asin makamidbid an lokal na mga tugang na lalaki asin babae.

Saro na Naman na Destino, Saro na Naman na Lenguahe

Pag-abot nin panahon, nagpoon na maeksperyensiahan kan sakong mga paryente sa Grecia an mga epekto nin pagkagurang asin nagluluyang salud. Nungka ninda akong inenkaminar na magpondo sa sakong bilog na panahon na paglilingkod asin magbalik sa normal daang buhay tanganing tabangan sinda. Minsan siring, pagkatapos nin dakol na paghorophorop asin pamibi, narealisar ko na mas marahay kun maglilingkod ako sa lugar na mas harani sa sakong pamilya. An mga tugang na may katongdan mamomoton na tuminogot asin idinestino ako sa Italia, asin nag-alok an sakong mga paryente na bayadan an mga gastos sa pagbalyong iyan. Idto palan, dakula an pangangaipo para sa mga paraebanghelyo sa Italia.

Sa giraray, kaipuhan na ako makanood nin bagong lenguahe​—an Italiano. An enot na destino ko iyo an siudad nin Foggia. Kan huri, ibinalyo ako sa Napoli, kun saen mas dakula an pangangaipo. An sakong teritoryo iyo an Posilipo, saro sa pinakamagayon na lugar sa Napoli. Mahiwas an sakop kaiyan, asin sasaro sana an parahayag kan Kahadean. Ikinaogma kong marhay an paglilingkod duman, asin tinabangan ako ni Jehova na makapoon nin dakol na pag-adal sa Biblia. Pag-abot nin panahon, nagkaigwa nin sarong dakulang kongregasyon duman.

Kabilang sa enot na mga taga duman na inadalan ko sa Biblia an sarong ina asin an apat niang aki. Sia asin an saiyang duwang aking babae Saksi ni Jehova sagkod ngonyan. Inadalan ko man sa Biblia an sarong mag-agom na may sadit na aking babae. An bilog na pamilya nag-oswag sa katotoohan asin sinimbolisaran an saindang pagdusay paagi sa bautismo sa tubig. Ngonyan an aking babae naagom nin sarong maimbod na lingkod ni Jehova, asin magkaibanan sindang naglilingkod sa Dios nin maigot. Mantang inaadalan sa Biblia an sarong dakulang pamilya, napahanga ako sa puersa kan Tataramon nin Dios. Kan mabasa mi an nagkapirang teksto na nagpapaheling na dai inooyonan nin Dios an pagsamba na naggagamit nin mga imahen, an ina dai na ngani naghalat na matapos an pag-adal. Tolos-tolos niang hinale an gabos na imahen sa saiyang harong!

Sa mga Pag-alaman sa Dagat

Kun nagbibiahe nin ida y buelta sa Italia asin Grecia, pirme akong nagsasakay sa barko. Sa parate an pagbiahe nakakagayagaya. Alagad an sarong pagbiahe kan tig-init nin 1971 laen nanggad. Pabalik na ako sa Italia sakay kan barkong pandakit na Heleanna. Kan amay na aga nin Agosto 28, nagkasolo sa kusina kan barko. Luminakop an kalayo asin nagkatararanta man an mga pasahero. Nagkakadirismayo an mga babae, naghihiribi an mga aki, nagrereklamo asin nanhuhuma an mga lalaki. An mga tawo nagdaralagan pasiring sa mga lantsa-salbabida sa man-ibong-ibong na gilid kan kubyerta. Minsan siring, kulang na marhay an mga diaket na salbabida, asin may diperensia an mekanismo na nagtotonton sa dagat kan mga lantsa-salbabida. Mayo ako nin diaket na salbabida, alagad an kalayo nagpaparadakula, kaya an rasonable sanang gibohon iyo an tumalon sa dagat.

Kan nasa tubig na ako, nakaheling ako nin babae na nakasulot nin diaket na salbabida na naglalatawlataw harani sako. Garo baga dai sia makalangoy, kaya kinaptan ko sia sa takyag tanganing butongon sia parayo sa nalulunod na barko.  Nagkokosog an alon sa dagat, asin pagal-pagal na ako sa pagmamaigot na magdanay na lataw. Garo baga mayo na nin paglaom an sakong kamugtakan, alagad padagos akong nakimaherak ki Jehova para sa kosog nin boot, asin nagtao ini sa sako nin kosog. Nagirumdoman ko an pagkabagbag nin barko na naeksperyensiahan ni apostol Pablo.​—Gibo, kapitulo 27.

Nagkakapot sa sakong kaiba, nakipaglaban ako sa mga alon sa laog nin apat na oras, na naglalangoy kun may kosog ako na gibohon iyan asin naghahagad nin tabang ki Jehova. Sa katapustapusi, nakaheling ako nin sarong baroto na nagdadangadang. Nasapod ako, alagad an kaiba ko gadan na. Kan makaabot kami sa banwaan nin Bari, Italia, dinara ako sa ospital, kun saen tinawan ako nin pan-emerhensiang remedyo. Kinaipuhan akong magdanay sa ospital nin pirang aldaw, asin dakol na Saksi an nagbisita sa sako, na may kabootan na nagtao kan gabos na kaipuhan ko. An Kristianong pagkamoot na ipinaheling ninda nakapahangang marhay sa iba na yaon duman sa ospital. *

Pagkatapos na lubos na makabawi kan sakong kosog, idinestino ako sa Roma. Hinagad sa sako na maghulit sa komersial na teritoryo sa sentro kan siudad, na ginibo ko sa laog nin limang taon, sa tabang ni Jehova. Sa laog nin 20 taon, ikinaogma ko an ministeryo sa Italia, asin namotan ko an mga Italiano.

Pagbalik Kun Saen Ako Nagpoon

Pag-abot nin panahon, luminuya an salud ni Ariadne asin kan saiyang agom. Narealisar ko na kun maistar ako sa lugar na mas harani sa sainda, mababayadan ko nin kadikit an gabos na mamomoton na ginibo ninda para sa sako. Inaadmitir ko na makologon sa boot na bayaan an Italia. Minsan siring, itinao kan mga tugang na may katongdan an saindang permiso, asin poon kan tig-init nin 1985, nagpapayunir na ako sa Atenas, kun saen ako nagpoon na maglingkod nin bilog na panahon kaidto pang 1947.

Naghulit ako sa teritoryo na iinasignar sa sako mismong kongregasyon, asin hinapot ko an mga tugang sa sangang opisina kun puede man akong maghulit sa komersial na teritoryo sa sentro kan siudad. Ginibo ko ini sa laog nin tolong taon kaiba an sarong kapartner na payunir. Lubos kaming nakapagpatotoo sa mga tawo na bihirang manompongan sa harong.

Pero sa pag-agi nin panahon, an sakong pagmawot na maglingkod daing ontok na nagkokosog alagad an sakong pisikal na kosog dai. Nagtorog na ngonyan sa kagadanan an sakong bayaw. Si Ariadne, na nagin garo ina ko, dai na nakakaheling. Kun dapit sa sako, marahay an sakong salud kan mga taon na yaon ako sa bilog na panahon na paglilingkod. Minsan siring, kasuarin pa sana, nagbarobalintong ako sa sarong hagyan na marmol asin nabari an sakong toong takyag. Dangan buminagsak ako asin nabarian an sakong piad. Kinaipuhan na operaran ako asin nakahigda ako sa laog nin halawig na panahon. Ngonyan dai na ako makahiro nin suelto. Naggagamit ako nin sogkod asin nakakaluwas sana ako kun may maiba sa sako. Minsan siring, ginigibo ko an sakong pinakamakakaya, na naglalaom na an sakong pisikal na kamugtakan marahay. An pakikikabtang sa gibohon na pagtotokdo sa Biblia, dawa sa limitadong paagi, padagos na nagigin pangenot na gikanan kan sakong kaogmahan asin satispaksion.

Kun ginigirumdom ko an maogmang mga taon na ginamit ko sa bilog na panahon na ministeryo, an sakong puso nagsosopay sa pagpasalamat ki Jehova. Sia asin an daganon na kabtang kan saiyang organisasyon pirmeng nagtatao nin marahay na paggiya asin mahalagang marhay na tabang, na nagpapangyaring magamit ko nin lubos an sakong abilidad mantang ginagamit ko an sakong buhay sa paglilingkod sa saiya. An sakong odok sa pusong pagmawot iyo na tawan logod ako ni Jehova nin kosog na makapadagos sa paglilingkod sa saiya. Ikinakaogma ko an sakong sadit na kabtang sa lakop sa globong pagtotokdo sa Biblia na dinidirehiran nia.​—Malaquias 3:10.

[Mga Nota sa Ibaba]

[Ritrato sa pahina 9]

Kaiba an sakong tugang, si Ariadne, asin an saiyang agom, si Michalis, kan ako mapasiring na sa Gilead

[Ritrato sa pahina 10]

Kami ni Ruth Hemmig idinestino sa Istanbul, Turkiya

[Ritrato sa pahina 11]

Sa Italia, kan enot na mga taon nin 1970

[Ritrato sa pahina 12]

Ngonyan, kaiba an sakong tugang na si Ariadne