Ipinepresentar Ninda an Saindang Sadiri
Ipinepresentar Ninda an Saindang Sadiri
“AN SAIMONG banwaan gikan sa boot na magpepresentar kan saindang sadiri.” (Salmo 110:3) An mga tataramon na iyan igwa nin espesyal na kahulogan para sa 46 na estudyante kan ika-118 klase kan Paadalan sa Biblia kan Watchtower sa Gilead. Paano ninda iinandam an sadiri ninda sa pag-atender sa paadalan na ini, na nagsasanay sa magigin mga misyonero sa pag-asikaso sa espirituwal na mga pangangaipo kan mga tawo sa ibang nasyon? Si Mike asin Stacie, na kaiba sa ika-118 klase, nagpaliwanag: “An samong desisyon na magkaigwa nin simpleng buhay nakatabang sa samo na mabawasan an mga disturbo asin mapagdanay an samong pokus sa espirituwal na mga bagay. Determinado kami na dai pagtogotan an pag-asenso niamo sa kinaban nin negosyo na maagawan nin lugar an espirituwal na mga pasohan.” Arog ni Mike asin Stacie, an ibang estudyante sa klaseng ini gikan sa boot na iprinesentar an saindang sadiri asin naglilingkod na ngonyan bilang mga parabalangibog kan Kahadean sa apat na laen-laen na kontinente.
Kan Sabado, Marso 12, 2005, an 6,843 na nag-atender risang-risa na naogmang marhay sa paghinanyog sa programa kan gradwasyon. Si Theodore Jaracz, na miembro kan Namamahalang Grupo kan Mga Saksi ni Jehova, an tsirman. Pagkatapos na maogmang akoon an mga bisita, na presente hale sa 28 laen-laen na nasyon, ipinokus nia an atension sa kahalagahan kan edukasyon sa Biblia. Kinokotar si William Lyon Phelps, sarong Amerikanong edukador, ipinahayag kan ispiker: “An gabos na igwa nin lubos na kaaraman sa Biblia puede nanggad na apodon na edukado.” Minsan ngani tibaad kapakipakinabang an sekular na edukasyon, an edukasyon sa Biblia nakakalabi. Nakakatabang iyan sa mga tawo na ikalaog sa isip an kaaraman manongod sa Dios, na minagiya pasiring sa buhay na daing katapusan. (Juan 17:3) Tinawan nin komendasyon ni Tugang na Jaracz an mga magradwar sa saindang pagigin andam na makikabtang nin orog pa sa lakop sa globong programa nin edukasyon sa Biblia na ginigibo sa labing 98,000 na kongregasyon kan Mga Saksi ni Jehova sa bilog na kinaban.
Napapanahon na Pagparigon sa Boot Para sa mga Magradwar
Pagkatapos kan pambukas na mga tataramon kan tsirman, si William Samuelson nagpahayag sa temang “Kun Paano Kamo Puedeng Magin Sarong Marambong na Poon nin Olibo sa Harong nin Dios,” na basado sa Salmo 52:8. Sinabi nia na an poon nin olibo ginagamit sa piguratibong paagi sa Biblia bilang simbolo nin pagigin mabunga, kagayonan, asin dignidad. (Jeremias 11:16) Ikinokomparar an mga estudyante sa mga poon nin olibo, an ispiker nagsabi: “Kamo ibibilang ni Jehova na magayon asin may dignidad mantang maimbod nindong inootob an saindong gibohon na paghuhulit kan Kahadean sa saindong destino sa pagmimisyonero.” Kun paanong kaipuhan kan mga poon nin olibo an mga gamot na mahiwas an sakop tanganing padagos na mabuhay sa panahon nin tigmara, kaipuhan man na pasarigon kan mga estudyante an saindang espirituwal na mga gamot tanganing matagalan an pagkaindiperente, pagtumang, o iba pang pagbalo na puedeng mapaatubang sa sainda sa paglilingkod ninda sa ibang nasyon.—Mateo 13:21; Colosas 2:6, 7.
Si John E. Barr, saro sa tolong miembro kan Namamahalang Grupo na may kabtang sa programa, nagpahayag sa temang “Kamo Iyo an Asin kan Daga.” (Mateo 5:13) Idinoon nia na kun paanong pinepreserbar kan literal na asin an kakanon tanganing dai malapa, an mga misyonero na naghuhulit manongod sa Kahadean nin Dios magkakaigwa man nin nagliligtas-buhay na epekto sa mga naghihinanyog, na pinoprotehiran sinda sa moral asin espirituwal na pagkalapa. Dangan sa tono na garo ama, sinadol ni Tugang na Barr an mga magradwar na “papagdanayon an katoninongan” sa iba. (Marcos 9:50) “Kultibaron an mga bunga kan espiritu, asin seguradohon na an saindong gawe-gawe asin pagtaram pirmeng maboot asin makonsiderasyon,” an sadol kan ispiker.
“Magdanay sa Barko sa Hararom na Katubigan” an temang itinampok ni Wallace Liverance, saro sa mga instruktor sa Gilead. Kun paanong an sarong barko na naglalayag sa hararom na katubigan puedeng maniobrahon sa tamang direksion, an pakasabot sa “hararom na mga bagay nin Dios”—mga katotoohan may labot sa katuyohan nin Dios asin kun paano iyan isasagibo—puede man na makatabang sa saro na umoswag sa espirituwal. (1 Corinto 2:10) An pagdadanay sana sa hababaw na espirituwal na katubigan paagi sa pagigin kontento sa “pundamental na mga bagay kan sagradong mga kapahayagan nin Dios” nakakapogol sa satong pag-oswag asin puede pa nganing magresulta sa “pagkabagbag may labot sa [satong] pagtubod.” (Hebreo 5:12, 13; 1 Timoteo 1:19) “Togotan nindo ‘an rarom kan mga kayamanan asin kadonongan patin kaaraman nin Dios’ na susteniran kamo sa saindong destino sa pagmimisyonero,” an ikinonklusyon ni Tugang na Liverance.—Roma 11:33.
Si Mark Noumair, saro pang instruktor sa Gilead, nagpahayag sa temang “Magawe daw Kamo Sono sa Saindong Mana?” Sa laog nin labing 60 taon, an Paadalan sa Biblia kan Watchtower sa Gilead nagkaigwa nin kredibilidad asin marahayon na reputasyon huli sa ‘kadakol na marahay na patotoo’ kan mga naggradwar sa paadalan. (Genesis 31:48) An manang ini kan Gilead ibinalyo sa mga estudyante kan ika-118 klase. Inenkaminar ni Tugang na Noumair an mga estudyante na arogon an suanoy na mga taga Tekoa kan kaaldawan ni Nehemias asin mapakumbabang makikooperar sa lokal na kongregasyon asin mga kapwa misyonero. Sinadol sinda na likayan an aktitud kan mapalangkaw na “mga mamuraway” na naunabihan ni Nehemias asin imbes magin andam na magtrabaho nin toninong na dai nagkukua nin atension kan mga tawo.—Nehemias 3:5.
Nakakapagtokdong mga Eksperyensia Asin Interbio
An sunod na kabtang kan programa may titulong “An Tataramon nin Dios Padagos na Nagtalubo.” (Gibo 6:7) Sa pangengenot kan instruktor sa Gilead na si Lawrence Bowen, iinakto kan mga estudyante an mga naeksperyensiahan ninda sa ministeryo sa langtad mantang nag-aadal sa paadalan. Ipinaheling kan mga eksperyensia na maigot na ibinalangibog kan mga estudyante an Tataramon nin Dios asin na abundang binendisyonan ni Jehova an saindang mga paghihingoa.
Ininterbio ni Richard Ashe an mga miembro kan pamilyang Bethel na an trabaho konektadong marhay sa paadalan. Marororop sa saindang mga komento an suporta na itinatao kan pamilyang Bethel tanganing tabangan an mga estudyante sa Gilead na makinabang nin lubos sa saindang pag-adal. Dangan, nakipag-olay si Geoffrey Jackson sa nagkapirang naggradwar kan nakaagi sa Gilead. Itinampok ninda an balakid na oportunidad na iinaalok kan pagigin misyonero sa pagtao nin kaomawan asin onra ki Jehova. An saro nagkomento: “Inoobserbaran kan mga tawo an gabos na ginigibo mo bilang sarong misyonero. Nagdadangog sinda, nagheheling sinda, asin nagigirumdoman ninda iyan.” Huli kaini, inenkaminar an mga estudyante na magin mapagrisa sa pagpaheling nin marahay na halimbawa sa gabos na panahon. An marahay na sadol na ini daing duwa-duwa na magigin mahalagang marhay sa maabot na mga aldaw.
Itinao ni Stephen Lett, miembro kan Namamahalang Grupo, an pantapos na pahayag, na may titulong “Paduman Kamo Bilang mga Paradara nin ‘Tubig na Buhay.’” (Juan 7:38) Sinabi nia na sa nakaaging limang bulan, an mga estudyante nakinabang nanggad paagi sa pagsiyasat nin hararom sa Tataramon nin Dios nin katotoohan. Alagad ano an gigibohon kan bagong mga misyonero sa nakua nindang impormasyon? Sinadol ni Tugang na Lett an mga magradwar na daing kaimotan na ihiras an espirituwal na tubig na ini tanganing an iba magkaigwa man sa sainda mismo nin “burabod nin tubig na nagbuburokbusok tanganing magtao nin buhay na daing katapusan.” (Juan 4:14) Sinabi pa kan ispiker: “Dai noarin man paglingawan na itao ki Jehova, ‘an burabod nin tubig na buhay,’ an onra asin kamurawayan na maninigo sa saiya. Magin mapasensia kun tinotokdoan an mga luminuwas sa alang na Dakulang Babilonya.” (Jeremias 2:13) Si Tugang na Lett nagkonklusyon paagi sa pag-enkaminar sa mga magradwar na arogon na may entusiasmo an espiritu asin an nobya patin padagos na magsabi: “‘Madia!’ Asin an siisay man na napapaha dumolok; an siisay man na boot kumua kan tubig nin buhay na daing bayad.”—Kapahayagan 22:17.
Tinapos ni Tugang na Jaracz an programa paagi sa pagpaabot kan mga pataratara na naresibi hale sa manlaenlaen na nasyon. Sinundan ini kan pagbasa sa surat nin pagpasalamat kan saro sa naggradwar sa klase.
Puede daw nindong ipresentar an saindong sadiri na maglingkod kun saen mas dakula an pangangaipo? Kun iyo, pagmaigotan na maabot an espirituwal na mga pasohan, arog kan ginibo kan naggradwar na mga estudyanteng ini. Anihon an kagayagayahan asin satispaksion na nakukua kun an saro masinggayang ipinepresentar nin gikan sa boot an saiyang sadiri sa paglilingkod sa Dios—baga man bilang misyonero sa ibang nasyon o bilang ministro na harani sa sadiring lugar.
[Kahon sa pahina 13]
ESTADISTIKA KAN KLASE
Bilang nin mga nasyon na irinepresentar: 8
Bilang nin mga nasyon na inasignaran: 19
Bilang nin mga estudyante: 46
Promedyong edad: 33.0
Promedyong taon sa katotoohan: 16.5
Promedyong taon sa bilog na panahon na ministeryo: 12.9
[Ritrato sa pahina 15]
Ika-118 Naggradwar na Klase kan Paadalan sa Biblia kan Watchtower sa Gilead
Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.