Mga Hapot Hale sa mga Parabasa

An Deuteronomio 14:21 nagsasabi: “Dai kamo magkakan nin ano man na hayop na gadan na.” May kontradiksion daw iyan sa Levitico 11:​40, na nagsasabi: “An magkakan nin ano man na kabtang kan bangkay kaiyan maglalaba kan saiyang mga gubing, asin sia magigin maati sagkod sa banggi”?

Mayo nin kontradiksion sa duwang bersikulong ini. Inootro kan enot na teksto an pangangalad sa pagkakan nin hayop na nakuang gadan, na tibaad ginadan nin mabangis na mga hayop. (Exodo 22:31; Levitico 22:8) An ikaduwa nagpapaliwanag kan puedeng gibohon nin sarong Israelita kun nabalga nia an pangangalad na iyan, na tibaad dai man tinutuyo.

An bagay na may ipinapangalad an Ley dai nangahulogan na dai maiignoro an pangangalad na iyan kun beses. Halimbawa, may mga ley tumang sa paghabon, paggadan, pagpatotoo nin putik, asin iba pa. Kadungan kaiyan, may mga penalidad sa pagbalga kan mga ley na iyan na itinao nin Dios. An mga penalidad na iyan nagtao nin puersa sa mga ley asin nagpaheling kun gurano iyan kaseryoso.

An saro na naglapas kan pangangalad sa pagkakan kan karne nin hayop na nakuang gadan magigin maati sa pagheling ni Jehova asin kaipuhan na gumibo kan tamang prosedimiento sa paglinig. Kun dai nia malinig nin tama an saiyang sadiri, “maninimbag sia sa saiyang sala.”​—Levitico 17:​15, 16.