“Dai Sinda Nakikompromiso”

MAOGMA kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako,” an sabi ni Jesu-Cristo sa saiyang mga disipulo. (Mateo 5:11) An Mga Saksi ni Jehova ngonyan maogma huli ta, kaoyon kan katokdoan asin halimbawa ni Cristo, nagdadanay sindang “bakong kabtang kan kinaban” asin estriktong nagdadanay na neutral sa politika patin pinapagdanay an integridad sa Dios sa irarom nin gabos na klase nin sirkonstansia.​—Juan 17:14; Mateo 4:8-10.

May labot sa dai nakikikompromisong paninindogan kan mga Saksi ni Jehova sa dating Unyon Sobyet, kaiba an mga nasa Estonia, an Luteranong teologo asin paratradusir sa Biblia na si Toomas Paul nagsurat sa saiyang librong Kirik keset küla (An Simbahan sa Tahaw kan Baryo): “Kakadikit sana an nakaaram kan nangyari kan amay na aga nin Abril 1, 1951. Plinano an sarong kampanya na pahaleon an mga Saksi ni Jehova asin an gabos na nagsusuportar sa sainda​—279 katawo gabos an dinakop asin idineportar sa Siberia . . . Tinawan sinda nin oportunidad na magpirma sa sarong imprentadong porma na nagsasabing tinatalikdan ninda an saindang pagtubod tanganing dai sinda ideportar o mapreso. . . . Kaiba an mga naenot na inarestar, igwa nin 353 na ibinilanggo, pati an kisuerra 171 katawo na nakikiasosyar sana sa saindang mga kongregasyon. Dai sinda nakikompromiso​—dawa sa Siberia. . . . Pipira sana sa mga miembro kan Iglesia [Luterano kan Estonia] an may pagtubod na kapareho kan sa mga Saksi ni Jehova.”

An mga Saksi ni Jehova sa bilog na kinaban nagtitiwala sa Dios na tatabangan sindang magdanay na maimbod asin makinuyog sa saiya sa ibong nin paglamag. Naggagayagaya sinda sa pakaaram na dakula an balos sa saindang kaimbodan.​—Mateo 5:12.