Mga Hapot Hale sa mga Parabasa

Mantang si Hadeng Salomon kan suanoy na Israel nagin bakong maimbod sa Dios kan sia gurang na, puede daw kitang magkonklusyon na dai sia bubuhayon liwat?​—1 Hade 11:3-9.

Minsan ngani nakalista sa Biblia an ngaran kan nagkapirang lalaki asin babaeng may pagtubod na daing duwa-duwa na bubuhayon liwat, mayo iyan nin espesipikong sinasabi kun baga may esperansang buhayon liwat an lambang indibiduwal na nginangaranan kaiyan. (Hebreo 11:1-40) Minsan siring, sa kaso ni Salomon, may makukua kitang ideya dapit sa paghokom nin Dios paagi sa pagkomparar kan nangyari sa saiya kan sia magadan asin kan nangyari sa nagkapirang maimbod kan sinda magadan.

An Kasuratan nagtataram dapit sa duwa sanang posibilidad para sa mga gadan​—an temporaryong kamugtakan nin dai pag-eksister asin an kamugtakan nin daing sagkod na kagadanan. An mga hinohokoman na dai maninigo sa pagkabuhay liwat iinaapon sa “Gehenna,” o “danaw nin kalayo.” (Mateo 5:22; Marcos 9:​47, 48; Kapahayagan 20:14) Kabilang sa mga ini an enot na tawong mag-agom, si Adan asin Eva, an parapasaloib na si Judas Iscariote, asin an mga nagadan kan sinda hokoman nin Dios, arog kan mga tawo kan kaaldawan ni Noe asin kan mga nag-eerok sa Sodoma asin Gomorra. * Pagkagadan, an mga tatawan nin pagkabuhay liwat napapaduman sa pankagabsan na lolobngan nin katawohan​—an Sheol, o Hades. Sa pagtaram dapit sa saindang ngapit, an Biblia nagsasabi: “Itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian, asin an lambang saro hinokoman segun sa saindang mga gibo.”​—Kapahayagan 20:13.

Kun siring, an mga maimbod na nasambitan sa Hebreo kapitulo 11 yaon sa Sheol, o Hades, na naghahalat kan pagbuhay liwat. Kabale sa mga ini an maimbod na mga lingkod nin Dios na si Abraham, Moises, asin David. Ngonyan estudyare kun ano an sinasabi kan Biblia manongod sa sainda kun dapit sa pagkagadan ninda. “Kun manongod sa saimo,” an sabi ni Jehova ki Abraham, “ika maduman sa saimong mga apoon sa katoninongan; ika ilolobong na gurang nang marhay.” (Genesis 15:15) Sinabi ni Jehova ki Moises: “Uya! Ika mahigda kaiba kan saimong mga apoon.” (Deuteronomio 31:16) Mapadapit sa ama ni Salomon, si David, an Biblia nagsasabi: “Si David huminigda kaiba kan saiyang mga apoon asin ilinobong sa Siudad ni David.” (1 Hade 2:10) Sa siring, an pananaram na ‘paghigda kaiba kan mga apoon’ saro pang paagi nin pagsabi na an saro nagduman sa Sheol.

Ano an nangyari ki Salomon kan sia magadan? An Biblia minasimbag: “An mga aldaw na si Salomon naghade sa Jerusalem sa bilog na Israel apat na polong taon. Dangan si Salomon naghigda kaiba kan saiyang mga apoon, asin ilinobong sa Siudad ni David na saiyang ama.” (1 Hade 11:​42, 43) Huli kaini, garo baga rasonableng magkonklusyon na si Salomon nasa Sheol, o Hades, na hale dian sia bubuhayon liwat.

An konklusyon na ini nagpaparisa na an posibilidad na buhayon liwat bukas sa iba pa na may labot sa sainda an Kasuratan espesipikong nagsasabi, ‘sinda naghigda kaiba kan saindang mga apoon.’ Sa katunayan, arog man kaini an sinasabi dapit sa dakol na hade na suminalida ki Salomon, minsan ngani bakong maimbod. Bako ining masakit na isipon, huling “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Siempre, pakatapos na buhayon na “an gabos na nasa mga lolobngan na girumdoman,” saka sana niato masisierto kun siisay an tinawan nin pagkabuhay liwat. (Juan 5:​28, 29) Kaya imbes na magin dogmatiko manongod sa pagkabuhay liwat nin siisay man na partikular na indibiduwal kan suanoy, maghalat kita, na nagtitiwala sa sangkap na desisyon ni Jehova.

[Nota sa Ibaba]