Bilang ni Jehova “an Mismong Buhok kan Saindong Payo”

“Mayo ni sarong [dignos] na mahuhulog sa daga na dai naaaraman kan saindong Ama. Alagad an mismong buhok kan saindong payo bilang gabos.”​—MATEO 10:​29, 30.

1, 2. (a) Taano ta an pagmate ni Job binayaan na sia nin Dios? (b) An mga tataramon daw ni Job nangangahulogan na kinakalaban nia si Jehova? Ipaliwanag.

“NAG-AARANG ako sa saimo, O Dios, alagad dai ka noarin man minasimbag; asin kun ako namimibi, dai ka nagtatao nin atension. Maringis an pagtratar mo sa sako; pinaglalamag mo ako sa bilog mong kapangyarihan.” Labi-labi an kamondoan kan tawong nagtaram kaiyan, asin bako ining makangangalas! Nawara an saiyang kabuhayan, ginadan nin sarong palaen na kalamidad an saiyang mga aki, asin ngonyan dinadamat sia nin sarong nakakapanluyang helang. Job an ngaran kan tawong iyan, asin an saiyang makologon na inagihan nakasurat sa Biblia para sa kapakinabangan niato.​—Job 30:​20, 21, Today’s English Version.

² Sa mga tataramon ni Job garo baga kinakalaban nia an Dios, alagad bakong totoo iyan. Nagtataram sana si Job gikan sa kairairaromi kan saiyang purisaw na puso. (Job 6:​2, 3) Dai nia aram na si Satanas an dahelan kan mga pagbalo sa saiya, kaya napasala sia sa pagkonklusyon na binayaan na sia nin Dios. May panahon na nakasabi pa ngani si Job ki Jehova: “Taano ta itinatago mo an saimo mismong lalauogon asin ibinibilang akong kaiwal mo?” *​—Job 13:24.

3. Kun mangyari an mga kasakitan, ano an tibaad sumabong sa isip niato?

³ Ngonyan, dakol sa banwaan ni Jehova an nag-aagi nin daing ontok na mga kasakitan bunga nin mga guerra, politikal o sosyal na grabeng kariribokan, natural na mga kalamidad, pagkagurang, helang, grabeng kadukhaan, asin mga pagprohibir nin gobyerno. Posibleng marhay na kamo nag-aagi man nin mga pagbalo. Kun beses, tibaad iniisip nindo na itinatago sa saindo ni Jehova an saiyang lalauogon. Aram nindong marhay an mga tataramon sa Juan 3:16: “An Dios namoot na gayo sa kinaban na itinao nia an saiyang Aking bugtong.” Pero, kun kamo nagdudusa na mayong naheheling na pakaginhawa, tibaad isip-isipon nindo: ‘Talaga daw na namomotan ako nin Dios? Naririsa daw nia an inaagihan ko? May pagmakolog daw sia sa sako bilang indibiduwal?’

4. Anong nagpapadagos na situwasyon an kinaipuhan na tagalan ni Pablo, asin sa anong mga paagi tibaad makaapektar sa sato an siring na situwasyon?

⁴ Estudyare an nangyari ki apostol Pablo. “Ako tinawan nin sarong tunok sa laman, sarong anghel ni Satanas, na padagos na magtampal sa sako,” an isinurat nia, na sinasabi pa: “Ako tolong beses na nakimaherak sa Kagurangnan na iyan mahale sa sako.” Dinangog ni Jehova an saiyang mga pakimaherak. Minsan siring, sinabi nia ki Pablo na dai sia mainterbenir paagi sa sarong milagrosong solusyon. Imbes, kaipuhan na si Pablo manarig sa kapangyarihan nin Dios na tabangan siang makaya an saiyang “tunok sa laman.” * (2 Corinto 12:7-9) Arog ki Pablo, tibaad nag-aagi man kamo nin sarong nagpapadagos na pagbalo. Tibaad iniisip-isip nindo, ‘An bagay daw na si Jehova garo baga mayo lamang nin ginigibo manongod sa pagbalo sa sako nangangahulogan na sia daing pakaaram sa situwasyon ko o na mayo sia nin pagmakolog sa sako?’ An simbag dai nanggad! An makosogon na pagmakolog ni Jehova sa lambang saro sa saiyang maimbod na mga lingkod idinodoon kan sinabi ni Jesus sa saiyang mga apostol dai nahaloy pakapilia nia sa  sainda. Helingon niato kun paano makakaparigon sa boot niato ngonyan an saiyang mga tataramon.

“Dai Kamo Matakot”​—Taano?

5, 6. (a) Paano tinabangan ni Jesus an mga apostol na dai matakot sa mangyayari sa ngapit? (b) Paano ipinaheling ni Pablo an kompiansa sa pagmakolog ni Jehova sa saiya?

⁵ An mga apostol nag-ako nin ekstraordinaryong kapangyarihan hale ki Jesus, kabale an “autoridad sa marompot na mga espiritu, tanganing paluwason an mga ini asin paomayan an gabos na klase nin helang asin gabos na klase nin kamatean.” Pero, dai ini nangahulogan na dai na sinda makakaeksperyensia nin mga pagbalo asin kasakitan. Sa kabaliktaran, detalyadong ilinadawan ni Jesus an nagkapira sa mga bagay na mangyayari sa sainda. Minsan siring, sinadol nia sinda: “Dai kamo matakot duman sa mga minagadan kan hawak alagad dai nakakagadan kan kalag; kundi matakot kamo sa saiya na nakakalaglag kan kalag sagkod kan hawak sa Gehenna.”​—Mateo 10:​1, 16-22, 28.

⁶ Tanganing tabangan an saiyang mga apostol na masabotan kun taano ta dai sinda kaipuhan na matakot, nagtao si Jesus nin duwang ilustrasyon. Sinabi nia sa sainda: “Bakong ipinapabakal an duwang dignos nin sarong sentimo na kadikit sana an halaga? Pero mayo ni saro sa sainda na mahuhulog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring dai kamo matakot: orog kamong mahalaga kisa dakol na dignos.” (Mateo 10:29-31) Mangnoha na an dai pagkatakot kun napapaatubang sa kasakitan ikinonektar ni Jesus sa pagkompiar na si Jehova may pagmakolog sa sato personalmente. Minalataw na si apostol Pablo igwa kan siring na kompiansa. Sia nagsurat: “Kun an Dios nasa kampi niato, siisay an matumang sa sato? Sia na dai ngani ilinikay an saiya mismong Aki kundi itinao nia sia dahel sa sato gabos, ta daw ta dai man nia maboot na itatao sa sato an gabos na iba pang bagay kaiba sia?” (Roma 8:​31, 32) Ano man na mga kadepisilan an atubangon nindo, makakaseguro man kamo na si Jehova may pagmakolog sa saindo personalmente basta nagdadanay kamong maimbod sa saiya. Magigin mas risang-risa pa ngani ini mantang mas maingat niatong sinisiyasat an konseho ni Jesus sa saiyang mga apostol.

An Halaga nin Sarong Dignos

7, 8. (a) Ano an pagheling sa mga dignos kan kaaldawan ni Jesus? (b) Taano ta minalataw na ginamit sa Mateo 10:29 an porma kan termino sa Griego para sa “dignos” na nangangahulogan nin sadit-sadit?

⁷ Epektibong ilinaladawan kan mga ilustrasyon ni Jesus an pagmakolog ni Jehova sa lambang saro sa Saiyang mga lingkod. Estudyare nguna an dapit sa mga dignos. Kan kaaldawan ni Jesus, an mga dignos ginagamit na kakanon, alagad huling nandadanyar iyan sa mga pananom, sa pankagabsan ibinibilang iyan na peste. Kadakol asin kabarato kan dignos kaya an duwa mababakal nin mayo pang tres pesos sa kantidad sa presenteng panahon. An doble kan kantidad na iyan makakabakal bakong nin apat kundi nin limang dignos​—na idinadagdag an pasobrang gamgam na garo baga mayo lamang iyan nin halaga!​—Lucas 12:6.

⁸ Isipon man nindo kun gurano kadakula an ordinaryong  gamgam na ini. Kun ikokomparar sa dakol na iba pang gamgam, medyo sadit maski an dignos na lubos na an pagkadakula. Pero, an termino sa Griego na trinadusir na “dignos” sa Mateo 10:29 espesipikong nanonongod sa sadit na mga dignos. Minalataw na gusto ni Jesus na isipon kan saiyang mga apostol an sarong gamgam na pinakahababa an halaga. Siring kan sabi nin sarong reperensia, “An ginamit ni Jesus sarong sadit na gamgam pero ginamit pa ngani nia an ‘sadit-sadit’ sa pagladawan kaiyan!”

9. Anong mapuersang punto an idinodoon kan ilustrasyon ni Jesus manongod sa mga dignos?

⁹ An pagbabaing ni Jesus sa mga dignos nagdodoon nin sarong mapuersang punto: An garo baga daing halaga sa mga tawo mahalaga ki Jehova Dios. Orog pang idinoon ni Jesus an katotoohan na ini paagi sa pagsabi pa na an sadit na dignos dai “mahuhulog sa daga” na dai naririsa ni Jehova. * Malinaw an leksion. Kun tinatawan ni Jehova Dios nin atension an gamgam na pinakasadit asin pinakahababa an halaga, gurano pa daw na dai sia magmakolog sa situwasyon nin sarong tawo na piniling maglingkod sa saiya!

10. Ano an boot sabihon kan mga tataramon na: “An mismong buhok kan saindong payo bilang gabos”?

¹⁰ Apuera sa saiyang ilustrasyon manongod sa mga dignos, si Jesus nagsabi: “An mismong buhok kan saindong payo bilang gabos.” (Mateo 10:30) Pinapahiwas kan halipot alagad hararom na mga tataramon na ini an punto kan ilustrasyon ni Jesus manongod sa mga dignos. Estudyare nindo: An ordinaryong payo nin tawo igwa nin mga 100,000 na buhok. Sa pankagabsan, an sarong buhok garo baga kapareho man sana kan kataed na buhok, asin mayo nin sarong buhok na garo baga maninigo sa satong partikular na pagsiyasat. Pero, an lambang buhok naririsa asin bilang ni Jehova Dios. Huling ini an kamugtakan, igwa daw nin ano man na detalye sa satong buhay na dai naaaraman ni Jehova? Sierto nanggad na nasasabotan ni Jehova an daing kaagid na naturalesa kan kada saro sa saiyang mga lingkod. Sa katunayan, “hineheling nia kun ano an puso.”​—1 Samuel 16:7.

11. Paano ipinahayag ni David an saiyang kompiansa sa pagmakolog ni Jehova sa saiya personalmente?

¹¹ Si David, na nag-agi nin dakol na kasakitan, kompiado na naririsa sia ni Jehova. “O Jehova, siniyasat mo ako, asin midbid mo ako,” an isinurat nia. “Ika mismo nakaaram kan sakong pagtukaw asin kan sakong pagtindog. Inestudyaran mo an sakong pag-isip hale sa harayo.” (Salmo 139:​1, 2) Makakasierto man kamo na midbid kamo ni Jehova personalmente. (Jeremias 17:10) Dai tolos mag-isip na kamo mayong gayong halaga tanganing marisa kan mga mata ni Jehova na heling an gabos!

“Bugtakan an Sakuyang mga Luha sa Saimong Supot na Anit”

12. Paano niato naaaraman na si Jehova may lubos na pakaaram sa mga kasakitan na inaagihan kan saiyang banwaan?

¹² Bako sanang midbid ni Jehova an saiyang mga lingkod bilang indibiduwal kundi lubos man siang may pakaaram sa mga kasakitan na inaagihan kan lambang saro. Halimbawa, kan inaapi an mga Israelita bilang mga oripon, sinabi ni Jehova ki Moises: “Daing duwa-duwa na naheling ko an makuring sakit kan sakuyang banwaan na nasa Egipto, asin nadangog ko an saindang pagtangis huli sa mga nag-aalaw sa sainda na magtrabaho; huli ta aram kong gayo an kakologan na saindang pinagdudusahan.” (Exodo 3:7) Nakakaranga nanggad na maaraman na kun kita nagtatagal nin sarong pagbalo, naheheling ni Jehova kun ano an nangyayari asin nadadangog nia an satong mga  pagtangis! Bako nanggad siang daing pakilabot sa satong pagdusa.

13. Ano an nagpapaheling na si Jehova talagang nakikisimpatiya sa saiyang mga lingkod?

¹³ An pagmakolog ni Jehova sa mga igwa nin relasyon sa saiya orog pang maheheling sa saiyang namatean para sa mga Israelita. Minsan ngani an saindang pagdusa sa parate resulta kan sainda mismong kasutilan, si Isaias nagsurat may labot ki Jehova: “Sa bilog na panahon kan saindang kasakitan sia nasakitan man.” (Isaias 63:9) Kun siring, bilang maimbod na lingkod ni Jehova makakaseguro kamo na kun kamo nakokolgan, nakokolgan man si Jehova. Bako daw na itinutulod kamo kaiyan na daing takot na atubangon an kasakitan asin padagos na gibohon an saindong pinakamakakaya na paglingkodan sia?​—1 Pedro 5:​6, 7.

14. Ano an mga kamugtakan kan isurat an Salmo 56?

¹⁴ An pananarig ni Hadeng David na si Jehova may pagmakolog sa saiya asin nakikisimpatiya sa saiya maririsa sa Salmo 56, na isinurat ni David mantang nagdudulag ki Hadeng Saul na gusto siang gadanon. Nagdulag si David pasiring sa Gat, alagad natakot siang madakop kan mamidbid sia kan mga Filisteo. Sia nagsurat: “An sakong mga kaiwal padagos na nananakab sa bilog na aldaw, huli ta dakol an nakikipaglaban tumang sa sako na may kapalangkawan.” Dahel sa saiyang peligrosong situwasyon, si David nag-arang ki Jehova. “Sa bilog na aldaw padagos nindang dinadanyaran an sakong personal na mga gibo-gibo,” an sabi nia. “An gabos na kaisipan ninda tumang sa sako sa ikakaraot.”​—Salmo 56:​2, 5.

15. (a) Ano an boot sabihon ni David kan ipabugtak nia ki Jehova an saiyang mga luha sa sarong supot na anit o sa sarong libro? (b) Kun may tinatagalan kitang pagbalo sa satong pagtubod, sa ano kita makakasierto?

¹⁵ Dangan, siring kan nakarekord sa Salmo 56:​8, ini an nakakapukaw nin interes na sinabi ni David: “An sakuyang pagigin dulag ika mismo an nagbareta. Bugtakan an sakuyang mga luha sa saimong supot na anit. Bako daw na iyan yaon sa saimong libro?” Kanigoan kanakakapukaw sa boot na paglaladawan kan mamomoton na pagmakolog ni Jehova! Kun kita nagsasakit, tibaad mag-agrangay kita ki Jehova na may mga luha. Nangyari iyan dawa sa sangkap na tawong si Jesus. (Hebreo 5:7) Kombensido si David na sia pinagmamasdan ni Jehova asin gigirumdomon nia an saiyang labi-labing kasakitan, na garo baga iniingatan an saiyang mga luha sa sarong supot na anit o isinusurat iyan sa sarong libro. * Tibaad sa pagmate nindo dakulang kabtang kan supot na anit na iyan o dakol na pahina kan siring na libro an mapapano kan mga luha nindo. Kun siring kaiyan an kamugtakan, maranga kamo. Inaasegurar kita kan Biblia: “Si Jehova harani sa mga nalugadan an puso; asin an mga nasasakitan an espiritu saiyang iliniligtas.”​—Salmo 34:18.

Pagigin Dayupot na Kaibaiba nin Dios

16, 17. (a) Paano niato naaaraman na si Jehova bakong daing pakilabot sa mga problemang inaatubang kan saiyang banwaan? (b) Ano an ginibo ni Jehova tanganing makapakidayupot sa saiya an mga tawo?

¹⁶ An bagay na bilang ni Jehova ‘an mismong buhok kan satong payo’ nagtatao sa sato nin ideya kan klase nin mapagmasid asin mapagmakolog na Dios na pribilehio niatong sambahon. Minsan ngani kaipuhan kitang maghalat sagkod sa ipinanugang bagong kinaban tanganing mawara an gabos na kolog asin pagdusa, may makangangalas na ginigibo si Jehova para sa saiyang banwaan ngonyan mismo. Si David nagsurat: “An pakikidayupot ki Jehova para sa mga natatakot sa saiya, patin sa saiyang tipan, tanganing ipaaram iyan sa sainda.”​—Salmo 25:14.

¹⁷ “Pakikidayupot ki Jehova.” Tara, an mismong ideyang iyan garo baga dai kayang saboton nin bakong sangkap na mga tawo! Pero, iniimbitaran ni Jehova an mga natatakot sa saiya na magin bisita sa saiyang tolda. (Salmo 15:1-5) Asin ano an ginigibo ni Jehova para sa saiyang mga bisita? Ipinapaaram nia sa sainda an saiyang tipan, segun ki David. Nagsasabi si Jehova nin mga hilom sa sainda, na ihinahayag an saiyang “kompidensial na bagay” sa mga propeta, tangani na maaraman ninda kun ano an saiyang mga katuyohan asin kun ano an dapat nindang gibohon tanganing makapamuhay kaoyon kaiyan.​—Amos 3:7.

18. Paano niato naaaraman na boot ni Jehova na kita magkaigwa nin dayupot na relasyon sa saiya?

¹⁸ Totoo nanggad, nakakaogmang maaraman  na kita na bakong sangkap na mga tawo puedeng magin dayupot na mga kaibaiba kan Kaharohalangkawe, si Jehova Dios. Sa katunayan, sinasadol nia kita na iyan mismo an gibohon. “Rumani kamo sa Dios, asin sia marani sa saindo,” an sabi kan Biblia. (Santiago 4:8) Boot ni Jehova na kita magkaigwa nin dayupot na relasyon sa saiya. Sa katunayan, may ginibo na siang mga paagi tangani na magin posible an siring na relasyon. An atang na pantubos ni Jesus an nagpangyari na kita magkaigwa nin pakikikatood sa Makakamhan sa Gabos na Dios. An Biblia nagsasabi: “Kun para sa sato, kita namomoot, huli ta sia an enot na namoot sa sato.”​—1 Juan 4:19.

19. Paano mapapakosog kan pakatagal an satong relasyon ki Jehova?

¹⁹ An dayupot na relasyon na iyan napapakosog kun kita nagtatagal sa masakit na mga kamugtakan. Si disipulo Santiago nagsurat: “Togotan nindo na malubos kan pakatagal an gibo kaiyan, tanganing kamo magin lubos asin marigon sa gabos na bagay, na dai nagkukulang nin ano man.” (Santiago 1:4) Anong “gibo” an nahahaman paagi sa pagtagal sa kasakitan? Girumdoma an “tunok sa laman” ni Pablo. Sa kamugtakan nia, ano an nahaman kan pakatagal? Ini an sinabi ni Pablo manongod sa mga pagbalo sa saiya: “Kun siring, ogmahon pa akong maghambog kun dapit sa sakong mga kaluyahan, tanganing an kapangyarihan kan Cristo magdanay sa ibabaw ko na siring sa sarong tolda. Kun siring ako nag-oogma sa mga kaluyahan, sa mga pagtuya, sa mga pangangaipo, sa mga paglamag asin kasakitan, dahel ki Cristo. Huli ta kun noarin ako maluya, saka man ako mapuersa.” (2 Corinto 12:​9, 10) Naeksperyensiahan ni Pablo na itatao ni Jehova an puersa na kaipuhan​—“an puersa na labi sa ordinaryo” kun kaipuhan​—tangani na sia makatagal. Dangan, orog man siang irinani kaiyan ki Cristo asin ki Jehova Dios.​—2 Corinto 4:7; Filipos 4:11-13.

20. Paano kita makakaseguro na susuportaran asin rarangahon kita ni Jehova kun napapaatubang kita sa kasakitan?

²⁰ Tibaad itinotogot ni Jehova na magpadagos an mga pagbalo sa saindo. Kun iyo, isapuso an saiyang panuga sa mga natatakot sa saiya: “Sa ano man na paagi dai taka babayaan ni sa ano man na paagi papabayaan taka.” (Hebreo 13:5) Puede nindong maeksperyensiahan an siring na suporta asin karangahan. Bilang ni Jehova “an mismong buhok kan saindong payo.” Naheheling nia an saindong pakatagal. Namamatean nia an kakologan na namamatean nindo. Sia may tunay na pagmakolog sa saindo. Asin nungka niang ‘lilingawan an saindong ginibo asin an pagkamoot na saindong ipinaheling para sa saiyang ngaran.’​—Hebreo 6:10.

[Mga Nota sa Ibaba]

Nagigirumdoman daw Nindo?

• Anong mga bagay an puedeng magin dahelan na isipon nin saro na sia binayaan na nin Dios?

• Anong leksion an manonodan niato sa mga ilustrasyon ni Jesus manongod sa mga dignos asin sa pagigin bilang kan buhok sa satong payo?

• Ano an boot sabihon kan pagbugtak kan mga luha nin saro sa “supot na anit” ni Jehova o sa saiyang “libro”?

• Paano kita magkakaigwa nin “pakikidayupot ki Jehova”?

[Mga Hapot Para sa Pag-adal]

[Ritrato sa pahina 22]

Taano ta dai hinale ni Jehova an “tunok sa laman” ni Pablo?

[Ritrato sa pahina 23]

Ano an manonodan niato sa ilustrasyon ni Jesus manongod sa mga dignos?

[Credit Line]

© J. Heidecker/VIREO

[Ritrato sa pahina 25]

Paagi sa regular na pagbasa kan Biblia, maaasegurar kita na an Dios may pagmakolog sa sato personalmente