Binalosan an Halawig na Pagbiahe

HALE sa Republika Demokratika nin Congo an report manongod sa duwang magtugang na babae na nagdesisyon na magbiahe nin halawig sa lugar na nababanga huli sa guerra tanganing mag-atender sa “Pamurawayon an Dios” na Pandistritong Kombension sa Lisala. Apuera sa espirituwal na pagtotokdo asin Kristianong pakikiasosyar na inaasahan nindang akoon sa kombension, inaantisipar man nindang mamidbid an mga representante hale sa sangang opisina kan Mga Saksi ni Jehova sa Kinshasa. Huli kan guerra sibil sa nasyon, dakol nang taon na mayo sindang naheling na siisay man hale sa sangang opisina, asin gusto nindang aprobetsaran an oportunidad na ini na gibohon iyan.

Sakay nin pirogue, o bangka, an magtugang na babae nagbiahe hale sa sadiring lugar na Basankusu pasiring sa Lisala, pagbiahe nin mga 300 kilometros sa kadlagan asin duwang salog. Inabot sinda nin tolong semana sa pagbiahe. Mantang pareho sindang nasa bilog na panahon na ministeryo, an saro naglingkod na nin 3 taon asin an saro pa nin 19 taon, inaprobetsaran ninda an oportunidad sa saindang pagbiahe na ipalakop an maogmang bareta kan Kahadean. Nakagamit sinda nin mga 110 na oras sa paghuhulit sa mga nanunuparan ninda sa dalan, na nakapasakamot nin 200 na pulyeto asin 30 magasin.

Sa pagbiahe sa salog, kaipuhan nindang mag-agi sa tahaw nin mga hipopotamo asin buaya na ordinaryo na sa rehion na iyan. Dai sinda puedeng magbiahe sa salog sa banggi​—dai makakanabigar kun madiklom na! Nag-agi man sinda sa dakol na lugar na may nag-iinspeksion na militar.

Minsan ngani halawig asin mapagal na marhay an pagbiaheng ini, maogmang ginibo kan magtugang an paghihingoang iyan. Pareho sindang pano nin apresasyon asin kagayagayahan sa pagigin presente sa kombension sa Lisala. An saindang puso naglalaad sa entusiasmo para sa katotoohan, asin naparigon an saindang boot na makaibanan an 7,000 na tugang na lalaki asin babae na nag-atender. Pagkatapos kan kombension, napaatubang giraray sinda sa iyo man sanang kadepisilan sa pagbiahe ninda papuli, kun saen naabotan ninda an saindang pamilya na ligtas asin buhay.