Matatabangan Kamo kan Biblia na Makanompong nin Kagayagayahan

MINSAN ngani bakong manwal sa medisina, an Biblia nagkokomento manongod sa puedeng magin epekto kan emosyon​—positibo o negatibo​—sa mental asin pisikal na salud nin saro. “An puso na magayagaya nakakaomay,” an sabi kan Biblia, “alagad an espiritung nagmomondo nakakapaalang sa mga tolang.” Dugang pa, mababasa niato: “Ika daw nanluya an boot sa aldaw nin kasakitan? An saimong kosog magigin kadikit.” (Talinhaga 17:22; 24:10) An panluluya kan boot puedeng makaubos kan satong kosog, na nagpapaluya sa sato asin ginigibo kita na madaling madanyaran patin mayo nin pagmawot na magbago o humagad nin tabang.

An panluluya kan boot puede man na makaapekto sa espirituwalidad nin saro. An mga tawong nakakamate na sinda daing halaga parateng nagsasaboot na sinda dai noarin man magkakamit nin marahay na relasyon sa Dios asin maako kan saiyang bendisyon. Si Simone, na nasambitan sa naenot na artikulo, nagduduwaduwa kun baga sia “an klase nin tawo na ooyonan nin Dios.” Minsan siring, kun sisiyasaton niato an Tataramon nin Dios, an Biblia, maheheling niato na positibo an pagheling nin Dios sa mga naghihingoang paogmahon sia.

An Dios Tunay na May Pagmakolog

Sinasabi sa sato kan Biblia na “si Jehova harani sa mga nalugadan an puso; asin an mga nasasakitan an espiritu saiyang iliniligtas.” Dai dinuduhagi nin Dios “an pusong nalugadan asin ronot,” alagad sia nanunuga na “buhayon an espiritu kan mga may kababaan asin . . . buhayon an puso kan mga biyong nanluluya.”​—Salmo 34:18; 51:17; Isaias 57:15.

Sa sarong pangyayari naheling kan Aki nin Dios, si Jesus, na kaipuhan na ipaliwanag sa saiyang mga disipulo an katunayan na naheheling nin Dios an marahay sa Saiyang mga lingkod. Paagi sa sarong  ilustrasyon, sinabi nia na naririsa nin Dios kun may mahulog na dignos sa daga​—bagay na dai ibibilang na importante kan kadaklan na tawo. Itinampok man nia na aram nin Dios an kasaditsaditing detalye manongod sa mga tawo, dawa an bilang kan buhok sa saindang payo. Tinapos ni Jesus an saiyang ilustrasyon sa pagsabing: “Kun siring dai kamo matakot: orog kamong mahalaga kisa dakol na dignos.” (Mateo 10:29-31) * Ipinaparisa ni Jesus na ano man an tibaad saboot nin mga indibiduwal sa sadiri ninda, an mga tawong may pagtubod talagang mahalaga sa pagheling nin Dios. Sa katunayan, ipinapagirumdom sa sato ni apostol Pedro na “an Dios daing ipinapaorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.”​—Gibo 10:​34, 35.

Papagdanayon an Timbang na Kaisipan

Sinasadol kita kan Tataramon nin Dios na magin timbang sa pagheling niato sa satong sadiri. Paagi sa pasabong si apostol Pablo nagsurat: “Paagi sa dai na kutana maninigong kabootan na itinao sa sako sinasabihan ko an lambang saro dian sa saindo na dai mag-isip dapit sa saiyang sadiri nin orog kisa maninigong isipon; kundi na mag-isip tanganing magkaigwa nin toltol na kaisipan, an balang saro siring sa sokol nin pagtubod na itinao nin Dios sa saiya.”​—Roma 12:3.

Tunay nanggad, habo niatong magin halangkawon an pagheling niato sa satong sadiri sagkod sa punto na kita nagigin nang mapalangkaw; ni gugustohon man niato na magin hababaon na an pagheling sa satong sadiri asin magsaboot na kita daing halaga. Imbes, an satong obheto maninigo na magkaigwa nin rasonableng pagheling sa satong sadiri, na kinokonsiderar an satong mga kakosogan saka an satong mga limitasyon. Arog kaini an pagkasabi nin sarong Kristiana: “Bako man akong demonyo; pero bako man akong anghel. Igwa ako nin marahay na mga kualidad sagkod bakong marahay na mga kualidad, arog man kan gabos na iba pa.”

Siempre, an pagkaigwa nin siring na timbang na pagmansay mas pasil na sabihon kisa gibohon. Tibaad kinakaipuhan an dakulang paghihingoa tanganing haleon an sobra kanegatibong pagheling sa satong sadiri na tibaad yaon sa sato sa laog nin dakol na taon. Minsan siring, sa tabang nin Dios mababago niato an satong personalidad siring man an satong pananaw sa buhay. Sa katunayan, sinasadol kita kan Tataramon nin Dios na gibohon ini. Mababasa niato: “Haleon an daan na personalidad na komporme sa dati nindong paggawe asin na nararaot segun sa saiyang mapandayang mga mawot; kundi . . . maninigo kamong magin bago sa puersa na nagpapahiro sa saindong isip, asin maninigong magsolog kan bagong personalidad na linalang segun sa kabotan nin Dios sa tunay na katanosan asin kaimbodan.”​—Efeso 4:22-24.

Paagi sa paghihingoa na liwaton an ‘puersa na nagpapahiro sa satong isip,’ an boot sabihon, an nangingibabaw na inklinasyon kan satong isip, mababago niato an satong personalidad hale sa pagigin sobra kanegatibo pasiring sa pagigin positibo. Narealisar ni Lena, na nasambitan sa naenot na artikulo, na sagkod na dai nia hinahale an kaisipan na mayo nin siisay man na puedeng mamoot sa saiya o magtabang sa saiya, mayo nin mapabago o makakapabago sa saiyang saboot manongod sa sadiri nia. Anong praktikal na hatol sa Biblia an  nakatabang ki Lena, Simone, asin iba pa na gumibo nin siring na pagbabago?

Mga Prinsipyo sa Biblia na Nagpapaoswag nin Kagayagayahan

“Tawan ki Jehova mismo an pagabat sa saimo, asin sia mismo matabang sa saimo.” (Salmo 55:22) Enot sa gabos, an pamibi puedeng makatabang sa sato na makanompong nin tunay na kagayagayahan. Si Simone nagsasabi: “Kun nanluluya an sakong boot, minadolok ako ki Jehova asin hinahagad an saiyang tabang. Nungkang namugtak ako sa sarong situwasyon na dai ko namatean an saiyang kosog asin an saiyang paggiya.” Kan sinasadol kita kan salmista na itao an satong pagabat ki Jehova, garo man sana ipinapagirumdom nia sa sato na si Jehova bako sanang nagmamakolog sa sato kundi minamansay man kita bilang mga indibiduwal na maninigo niang tabangan asin suportaran. Kan banggi kan Paskua 33 C.E., an mga disipulo ni Jesus nagmomondo huli sa sinabi ni Jesus manongod sa nagdadangadang na paghale nia. Sinadol sinda ni Jesus na mamibi sa Ama, dangan idinugang nia: “Humagad kamo asin kamo mag-aako, tanganing an saindong kagayagayahan malubos.”​—Juan 16:​23, 24.

“Igwang orog na kaogmahan sa pagtao kisa pag-ako.” (Gibo 20:35) Siring kan itinokdo ni Jesus, an pagtao sarong liabe sa pakanompong sa tunay na kagayagayahan sa buhay. An pag-aplikar sa katotoohan na ini sa Biblia nagpapangyari sa sato na magkonsentrar sa mga pangangaipo kan iba imbes na sa sadiri niatong kadaihan nin kakayahan na atubangon an buhay. Kun tinatabangan niato an iba asin naheheling an saindang pag-apresyar, mas marahay an pagmate niato sa satong sadiri. Kombensido si Lena na an regular na paghiras kan maogmang bareta hale sa Biblia sa saiyang mga kataed nakakatabang sa saiya sa duwang paagi. “Enot, itinatao kaiyan sa sako an klase nin kaogmahan asin satispaksion na isinabi ni Jesus,” an sabi nia. “Ikaduwa, nakakaresibi ako nin dakol na paborableng reaksion hale sa iba, na nakakatabang sa sako na makanompong nin kagayagayahan.” Paagi sa buka an palad na pagtao kan satong panahon asin kosog para sa iba, maeeksperyensiahan niato an pagigin totoo kan Talinhaga 11:25: “An saro na sueltong nagbabaribi sa iba mismo man na sueltong mababaribian.”

“An gabos na aldaw kan nasasakitan anan maraot; alagad an saro na marahay an puso danay na may kapiestahan.” (Talinhaga 15:15) Gabos kita puedeng pumili kun paano niato mamansayon an satong sadiri asin an satong mga kamugtakan. Puede kitang magin arog nin saro na negatibo an pagheling sa gabos na bagay asin nagsasaboot na sia nasasakitan, o puede niatong pilion na mag-isip nin positibo, makamate na “marahay an puso,” asin magin magayagaya na garo kita nasa kapiestahan. An sabi ni Simone: “Pinagmamaigotan kong magdanay na positibo sagkod sa mapupuede. Pinapagdadanay kong sibot ako sa personal na pag-adal asin sa ministeryo, asin nagmamaigot ako sa pamimibi. Pinagmamaigotan ko man na makiibaiba sa mga tawong positibo, asin pinagmamaigotan kong tabangan an iba.” An siring na kamugtakan nin puso nagbubunga nin tunay na kagayagayahan, arog kan isinasadol sa sato kan Biblia: “Maggayagaya ki Jehova asin magin magayagaya, kamong mga matanos; asin kumurahaw sa kagayagayahan, kamo gabos na tanos an puso.”​—Salmo 32:11.

“An tunay na kaibaiba mamomoton sa gabos na panahon, asin tugang na namundag manongod sa panahon nin kasakitan.” (Talinhaga 17:17) An pagkompiar sa sarong namomotan o sa tinitiwalaan na parakonseho puedeng makatabang sa sato na mapaglabanan  an negatibong mga saboot asin mahale iyan bago kita pangibabawan kaiyan. An pakikipag-olay sa iba makakatabang sa sato na helingon an mga bagay sa timbang, positibong punto de vista. “Nakakatabang na marhay kun ipinapakipag-olay ko an sakong mga namamatean,” an pag-admitir ni Simone. “Kaipuhan na may masabihan kamo kun ano an namamatean nindo. Sa parate kaipuhan sanang may masabihan.” An paggibo kaiyan makakatabang saindo na maeksperyensiahan an pagigin totoo kan talinhaga na nagsasabing: “An kahaditan sa puso nin tawo iyo an mapaduko dian, alagad an marahay na tataramon iyo an nagpapagayagaya dian.”​—Talinhaga 12:25.

Kun Ano an Magigibo Nindo

Tinokar niato an pira sana sa dakol na marahayon asin praktikal na prinsipyo hale sa Biblia na makakatabang sa sato na pangganahan an negatibong mga saboot asin makanompong nin tunay na kagayagayahan. Kun kabilang kamo sa mga nakikipaglaban sa mga pakamate nin kadaihan nin kakayahan na atubangon an buhay, ineenkaminar niamo kamo na siyasaton na marhay an Tataramon nin Dios, an Biblia. Makanood na magkaigwa nin realistiko asin timbang na saboot manongod sa sadiri nindo asin manongod sa relasyon nindo sa Dios. Sinsero kaming naglalaom na sa paggiya na gikan sa Tataramon nin Dios, makakanompong kamo nin tunay na kagayagayahan sa gabos na ginigibo nindo.

[Nota sa Ibaba]

[Ritrato sa pahina 7]

Nagpapaoswag sa kagayagayahan an pamumuhay sono sa mga prinsipyo kan Biblia