Mga Hapot Hale sa mga Parabasa

An termino daw na “tibaad” sa Sofonias 2:3 nangangahulogan na an mga lingkod nin Dios dai nakakaseguro na maako sinda nin buhay na daing sagkod?

An tekstong ini nagsasabi: “Hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” Taano ta an bersikulong ini nagsasabi nin “tibaad”?

Tanganing masabotan kun ano an gigibohon ni Jehova sa mga maimbod sa saiya sa Armagedon, makakatabang na girumdomon an itinotokdo kan Biblia may labot sa gigibohon nin Dios para sa mga nagagadan bago an panahon nin paghokom. May mga makakaeksperyensia nin pagkabuhay liwat sa inmortal na buhay bilang espiritung mga linalang sa kalangitan, mantang an iba bubuhayon liwat sa daga na may esperansang mabuhay sagkod lamang sa Paraiso. (Juan 5:​28, 29; 1 Corinto 15:​53, 54) Kun ginigirumdom asin binabalosan ni Jehova an mga maimbod sa saiya na nagagadan bago an Armagedon, seguradong iyo man an gigibohon nia sa saiyang mga lingkod na aabotan na buhay kan aldaw kan saiyang kaanggotan.

Nakakaparigon man sa boot an ipinasabong na mga tataramon ni apostol Pedro. Isinurat nia: “Ilinigtas [nin Dios] si Noe, sarong parahulit nin katanosan, kaibanan nin pito pa kan papangyarihon nia an delubyo sa sarong kinaban nin mga tawong bakong diosnon; asin sa paggibo sa siudad nin Sodoma asin Gomorra na magin abo sinilotan nia sinda, . . . asin ilinigtas nia an matanos na si Lot . . . Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong bakong matanos para sa aldaw nin paghokom tanganing gadanon.” (2 Pedro 2:5-9) Minsan ngani linaglag ni Jehova an mga maraot sa nakaaging mga panahon, iningatan niang buhay si Noe sagkod si Lot, na maimbod na naglingkod sa saiya. Ililigtas man ni Jehova an mga tawong may diosnon na debosyon kun laglagon na nia an mga maraot sa Armagedon. “Sarong dakulang kadaklan” nin mga matanos an maliligtas.​—Kapahayagan 7:​9, 14.

Kun siring, garo baga dai ginamit an “tibaad” sa Sofonias 2:3 huli sa ano man na pagkabakong sierto kan kakayahan nin Dios na iligtas an mga inooyonan nia. Imbes, an pagigin natatago nin saro sa aldaw kan kaanggotan ni Jehova saro sanang probabilidad pagpinonan na niang hanapon an katanosan asin kahoyoan. An pagkaligtas madepende sa saiyang padagos na paghanap nin kahoyoan asin katanosan.​—Sofonias 2:3.

[Ritrato sa pahina 31]

“Si Jehova tataong magligtas sa mga tawong may diosnon na debosyon hale sa pagbalo”