Si Jehova “an Parabalos sa mga Maigot na Naghahanap sa Saiya”

“An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.”​—HEBREO 11:6.

1, 2. Taano an nagkapira sa mga lingkod ni Jehova ta tibaad may linalabanan na negatibong mga saboot?

“HAROS 30 taon na akong Saksi ni Jehova, alagad nungka kong namatean na angay akong apodon nin siring,” an itinuga ni Barbara. * “Minsan ngani ako nagpayunir asin nagkaigwa nin dakol na iba pang pribilehio, mayo sa mga iyan an garo baga igo na tanganing maniwala ako sa puso ko na ako Saksi.” Nagpahayag nin kaparehong saboot si Keith. “May beses na an pagmate ko dai ako maninigo huli ta an mga lingkod ni Jehova kadakol nin dahelan na magin maogma, alagad ako bako,” an sabi nia. “Nakokonsensia ako huli kaini, na lalo sanang nagpagrabe sa situwasyon.”

² An dakol sa maimbod na lingkod ni Jehova, kan nakaagi saka ngonyan, may linabanan na kaagid na mga saboot. Iyo man daw kamo kun beses? Tibaad nagagabatan kamo sa sunod-sunod na problema, mantang an saindong mga kapagtubod garo baga masiram an buhay, mayong pinaghahaditan asin maogma. Bilang resulta, tibaad magsaboot kamo na mayo sa saindo an pag-oyon ni Jehova ni na kamo maninigo sa saiyang atension. Dai tolos-tolos magkonklusyon na totoo ini. Inaasegurar kita kan Biblia: ‘Dai isinikwal ni Jehova ni ikinarimarima nin makuri an kasakitan kan nagsasakit; asin dai nia sa saiya itinago an saiyang lalauogon, asin dinangog nia kan sia nagkurahaw sa saiya para sa tabang.’ (Salmo 22:24) An makahulang mga tataramon na iyan manongod sa Mesiyas nagpapaheling na bako sanang dinadangog  ni Jehova an mga maimbod sa saiya kundi binabalosan man sinda.

3. Taano ta dai kita libre sa mga pangigipit kan sistemang ini nin mga bagay?

³ Mayo nin siisay man na libre sa mga pangigipit kan sistemang ini nin mga bagay​—dawa an banwaan ni Jehova. Nabubuhay kita sa kinaban na pinapamahalaan kan pangenot na kaiwal ni Jehova, si Satanas na Diablo. (2 Corinto 4:4; 1 Juan 5:19) Imbes na protektado sa milagrosong paagi, an totoo an mga lingkod ni Jehova an pangenot na punteriya ni Satanas. (Job 1:7-12; Kapahayagan 2:10) Kun siring, sagkod sa itinalaan na panahon nin Dios, kaipuhan kitang ‘magtagal sa kasakitan’ asin ‘magmaigot sa pamimibi,’ na kompiado na si Jehova may pagmakolog sa sato. (Roma 12:12) Dai kita maninigong magpadaog sa kaisipan na kita dai namomotan kan satong Dios, si Jehova!

Suanoy na mga Halimbawa nin Pakatagal

4. Tumao nin nagkapirang halimbawa nin maimbod na mga lingkod ni Jehova na nagtagal nin makamomondong mga situwasyon.

⁴ An dakol na suanoy na lingkod ni Jehova kinaipuhan na magtagal nin makamomondong mga situwasyon. Halimbawa, ‘may kapaitan an kalag’ ni Ana huli ta mayo sia nin aki​—sarong kamugtakan na inisip niang garo man sana liningawan na sia nin Dios. (1 Samuel 1:9-11) Kan si Elias linalapag ni Reyna Jezabel na gusto siang gadanon, sia natakot asin namibi ki Jehova: “Igo na! Ngonyan, O Jehova, kuana an sakong kalag, huli ta mayo akong kalabihan sa sakong mga apoon.” (1 Hade 19:4) Asin siertong namatean ni apostol Pablo an biyong epekto kan saiyang pagkabakong sangkap kan admitiron nia: “Kun boot kong gibohon an tama, an maraot iyo an yaon sa sako.” Idinagdag nia: “Herak man sa sako!”​—Roma 7:21-24.

5. (a) Paano binalosan si Ana, Elias, asin Pablo? (b) Anong karangahan an makukua niato sa Tataramon nin Dios kun kita may linalabanan na negatibong mga emosyon?

⁵ Siempre, aram niato na si Ana, Elias, asin Pablo gabos nagtagal mantang naglilingkod ki Jehova, asin binalosan Nia sinda nin igo. (1 Samuel 1:20; 2:21; 1 Hade 19:5-18; 2 Timoteo 4:8) Pero, linabanan ninda an gabos na klase nin emosyon nin tawo, kabale an kamondoan, pagkadesesperar, asin takot. Kun siring, dai niato maninigong ipagngalas na kun beses igwa kita nin negatibong mga saboot. Pero ano an magigibo nindo kun an mga kahaditan sa buhay nagigin dahelan na mag-isip-isip kamo kun baga talagang namomotan kamo ni Jehova? Makakakua kamo nin karangahan sa Tataramon nin Dios. Halimbawa, sa sinundan na artikulo, pinag-olayan niato an sinabi ni Jesus na bilang ni Jehova “an mismong buhok kan saindong payo.” (Mateo 10:30) An nakakaparigon sa boot na mga tataramon na iyan nagpaparisa na si Jehova odok na interesado sa lambang saro sa saiyang mga lingkod. Girumdoma man an ilustrasyon ni Jesus manongod sa mga dignos. Kun mayo ni saro kan saradit na gamgam na iyan na nahuhulog sa daga na dai naririsa ni Jehova, ta daw ta magbubutabutahan sia sa saindong mamondong kamugtakan?

6. Paano puedeng magin ginigikanan nin karangahan an Biblia para sa mga may linalabanan na negatibong mga saboot?

⁶ Talaga daw na posible na kitang bakong sangkap na mga tawo magin mahalagang marhay sa pagheling kan makapangyarihan sa gabos na Kaglalang, si Jehova Dios? Iyo! Sa katunayan, dakol an teksto sa Biblia na nag-aasegurar sa sato kaini. Paagi sa pagsapuso kaini, ikakapahayag man niato an mga tataramon kan salmista na nagsabi: “Kan an sakuyang nakakaribok na mga kaisipan duminakol sa sakong boot, an saimong mga panranga naghapiyap sa sakong kalag.” (Salmo 94:19) Estudyaran niato an nagkapira sa nakakarangang mga tataramon na ini sa Tataramon nin Dios na makakatabang sa sato na mas lubos na masabotan na kita pinapahalagahan nin Dios asin na babalosan nia kita mantang padagos niatong ginigibo an saiyang kabotan.

“Espesyal na Rogaring” ni Jehova

7. Anong nakakaparigon sa boot na hula an itinao ni Jehova sa maraot na nasyon paagi ki Malaquias?

⁷ Nagin makamomondong marhay an situwasyon kan mga Judio durante kan ikalimang siglo B.C.E. An mga saserdote nag-aako nin mga hayop na bakong angay asin iinaatang an mga ini sa altar ni Jehova. An mga hokom may pagpaorog. Lakop an panraratak, pagputik, pandadaya, asin pagsambay. (Malaquias 1:8; 2:9; 3:5) Sa hayag an karatan na nasyon na ini, si Malaquias  nagpahayag nin nakakabiglang hula. Pag-abot nin panahon, ibabalik ni Jehova an saiyang banwaan sa inooyonan na kamugtakan. Mababasa niato: “‘Sinda magigin nanggad sadiri ko,’ sabi ni Jehova nin mga hukbo, ‘sa aldaw na ako naggigibo nin espesyal na rogaring. Asin ako mapaheling nin pagmalasakit sa sainda, kun paanong an sarong tawo nagpapaheling nin pagmalasakit sa saiyang aki na naglilingkod sa saiya.’”​—Malaquias 3:17.

8. Taano ta sa pundamental ikakaaplikar sa dakulang kadaklan an Malaquias 3:17?

⁸ An hula ni Malaquias igwa nin kaotoban sa presenteng aldaw may koneksion sa linahidan nin espiritung mga Kristiano, na sarong espirituwal na nasyon na kompuesto nin 144,000. An nasyon na iyan tunay nanggad na sarong “espesyal na rogaring,” o sarong “banwaan para sa espesyal na pagkasadiri,” para ki Jehova. (1 Pedro 2:9) An hula ni Malaquias puede man na makaparigon sa boot kan “dakulang kadaklan,” na “nagtitindog sa atubangan kan trono asin sa atubangan kan Kordero, na nagugubingan nin maputing mga gubing.” (Kapahayagan 7:​4, 9) An mga ini nagigin sarong aripompon kaiba kan mga linahidan, sakop nin sarong Pastor, si Jesu-Cristo.​—Juan 10:16.

9. Taano an banwaan ni Jehova ta sarong “espesyal na rogaring” para sa saiya?

⁹ Ano an pagheling ni Jehova sa mga pinipiling maglingkod sa saiya? Siring kan sinabi sa Malaquias 3:​17, an pagheling nia sa sainda kapareho kan pagheling nin sarong mamomoton na ama sa saiyang aki. Asin mangnoha an mainomaw na mga termino na ginamit nia sa paglaladawan sa saiyang banwaan​—sarong “espesyal na rogaring.” An ibang traduksion trinadusir an fraseng iyan na “an sadiri ko nanggad,” “an pinakamahal kong rogaring,” asin “an sakuyang mga mutya.” Taano ta siring kaiyan kaespesyal an pagheling ni Jehova sa mga naglilingkod sa saiya? Sarong bagay, sia sarong mapag-apresyar na Dios. (Hebreo 6:10) Minarani sia asin espesyal an pagheling nia sa mga naglilingkod sa saiya gikan sa puso.

10. Paano pinoprotehiran ni Jehova an saiyang banwaan?

¹⁰ May naiisip daw kamong sarong mamahalon na personal na gamit na ibinibilang nindo na espesyal na rogaring? Bako daw na naggigibo kamo nin mga paagi na maingatan iyan? Iyan man an ginigibo ni Jehova sa saiyang “espesyal na rogaring.” Totoo, dai nia pinoprotehiran an saiyang banwaan sa gabos na kasakitan asin trahedya sa buhay. (Eclesiastes 9:11) Alagad kaya ni Jehova asin talagang poprotehiran nia an saiyang maimbod na mga lingkod sa espirituwal na paagi. Itinatao nia sa sainda an kosog na kaipuhan ninda tanganing matagalan an ano man na pagbalo. (1 Corinto 10:13) Huli kaini, sinabihan ni Moises an suanoy na banwaan nin Dios, an mga Israelita: “Magmakosog an boot asin magpakakosog kamo. . . . Si Jehova na saimong Dios iyo an naglalakaw kaiba mo. Dai ka nia babayaan ni papabayaan ka man nin biyo.” (Deuteronomio 31:6) Tinatawan ni Jehova nin balos an saiyang banwaan. Para sa saiya, sinda sarong “espesyal na rogaring.”

Si Jehova “an Parabalos”

11, 12. Paano an pagmidbid ki Jehova sa saiyang papel bilang Parabalos sa sato makakatabang sa sato na labanan an mga pakamate nin pagduda?

¹¹ An saro pang ebidensia na pinapahalagahan ni Jehova an saiyang mga lingkod iyo na binabalosan nia sinda. Sinabihan nia an mga Israelita: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” (Malaquias 3:10) Siempre, sa katapustapusi babalosan ni Jehova an saiyang mga lingkod nin buhay na daing katapusan. (Juan 5:24; Kapahayagan 21:4) An balos na ini na daing kaagid sa halaga naghahayag kun gurano an pagkamoot asin pagkabuka kan palad ni Jehova. Ipinapaheling man kaiyan na talagang pinapahalagahan  nia an mga piniling maglingkod sa saiya. An pakanood na ibilang si Jehova na sarong buka an palad na Parabalos makakatabang sa sato na labanan an ano man na mga pagduda manongod sa satong kamugtakan sa atubangan nin Dios. Sa katunayan, sinasadol kita ni Jehova na ibilang siang sarong Parabalos! Si Pablo nagsurat: “An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.”​—Hebreo 11:6.

¹² Siempre, naglilingkod kita ki Jehova huli ta namomotan ta sia​—bako sanang huli ta nanunuga sia na babalosan kita. Pero, bakong sala o kaimotan kun satong iingatan sa puso niato an paglaom sa sarong balos. (Colosas 3:​23, 24) Huli sa pagkamoot nia sa sainda asin sa halangkaw na pagpahalaga nia sa sainda, si Jehova an enot na minahiro asin binabalosan an mga maigot na naghahanap sa saiya.

13. Taano an probisyon kan pantubos ta iyo an nangongorog na ebidensia kan pagkamoot ni Jehova sa sato?

¹³ An nangongorog na nagpaparisa kan potensial na halaga nin katawohan sa pagheling ni Jehova iyo an probisyon kan pantubos. Si apostol Juan nagsurat: “An Dios namoot na gayo sa kinaban na itinao nia an saiyang Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) An probisyon kan atang na pantubos ni Jesu-Cristo sarongat sa ideya na kita daing halaga o dai maninigong kamotan sa pagheling ni Jehova. Tunay nanggad, kun halangkawon an halaga na ibinayad ni Jehova para sa sato​—an pagtao kan saiyang bugtong na Aki​—segurado nanggad na namomotan nia kita nin odok.

14. Ano an nagpapaheling kun paano minansay ni Pablo an pantubos?

¹⁴ Huli kaini, kun magkaigwa kamo nin negatibong mga saboot, horophoropon an pantubos. Iyo, mansayon an balaog na ini bilang sarong personal na probisyon hale ki Jehova. Iyan an ginibo ni apostol Pablo. Girumdoma na sinabi nia: “Herak man sa sako!” Alagad ta padagos niang sinabi: “Salamat sa Dios paagi ki Jesu-Cristo na satong Kagurangnan,” na, sabi ni Pablo, “namoot sa sako asin itinao an saiyang sadiri para sa sako.” (Roma 7:​24, 25; Galacia 2:20) Sa pagsabi kaini, si Pablo bakong sobra an pagtao nin importansia sa sadiri. Igwa sana sia nin kompiansa na pinapahalagahan sia ni Jehova bilang indibiduwal. Arog ki Pablo, maninigo man nindong mansayon an pantubos bilang sarong personal na balaog hale sa Dios. Si Jehova bako sanang makapangyarihan na Paraligtas kundi mamomoton man na Parabalos.

Magmaan sa ‘mga Katusohan’ ni Satanas

15-17. (a) Paano inaaprobetsaran kan Diablo an negatibong mga saboot? (b) Anong pagparigon sa boot an makukua niato sa inagihan ni Job?

¹⁵ Pero, tibaad madepisilan kamong paniwalaan na talagang aplikado sa saindo an ipinasabong na mga karangahan na yaon sa Tataramon nin Dios. Tibaad magsaboot kamo na an balos na mabuhay sagkod lamang sa bagong kinaban nin Dios sarong bagay na puedeng kamtan nin iba, alagad kamo bako talagang maninigo dian. Kun arog kaini an saboot nindo, ano an puede nindong gibohon?

¹⁶ Daing duwa-duwa na pamilyar kamo sa konseho ni Pablo sa mga taga Efeso: “Isulog nindo an bilog na pangalasag hale sa Dios tanganing kamo marigon na makapanindogan tumang sa mga pakana [“mga katusohan,” nota sa ibaba] kan Diablo.” (Efeso 6:11) Kun iniisip niato an mga estratehiya ni Satanas, an mga bagay na arog kan materyalismo asin inmoralidad tibaad sumabong tolos sa isip asin tama man. Dakol sa banwaan nin Dios an nasiod kan mga sugot na ini kan suanoy na mga panahon saka sa satong kaaldawan. Minsan siring, dai niato maninigong lingawan an saro pang katusohan ni Satanas​—an saiyang paghihingoa na kombensiron an mga tawo na sinda dai namomotan ni Jehova Dios.

¹⁷ Eksperto an Diablo sa pag-aprobetsar sa siring na mga saboot sa saiyang pagprobar na italikod sa Dios an mga tawo. Girumdoma an sinabi ni Bildad ki Job: “Paano magigin tama an magagadanon na tawo sa atubangan nin Dios, o paano magigin malinig an saro na ipinangaki nin sarong babae? Uya! Yaon ngani an bulan, asin bako iyan na maliwanag; asin an mga bitoon mismo bakong malinig sa saiyang pagheling. Gurano pa daw an magagadanon na tawo, na sarong alimon, asin an aki nin tawo, na sarong ulod!” (Job 25:4-6; Juan 8:44) Naiimahinar daw nindo kun gurano  seguradong nakakapanluya sa boot an mga tataramon na iyan? Kaya dai pagtogotan na paluyahon ni Satanas an boot nindo. Sa ibong na lado, magmaan sa mga pakana ni Satanas tangani na magkaigwa kamo kan kosog nin boot asin pakatagal na lumaban nin orog pa sa paggibo kan tama. (2 Corinto 2:11) Kun dapit ki Job, minsan ngani kinaipuhan siang ikorehir, binalosan ni Jehova an saiyang pakatagal paagi sa pagbalik sa saiya nin doble kan gabos na nawara sa saiya.​—Job 42:10.

Si Jehova “Orog Kadakula Kisa Satong Puso”

18, 19. Paanong an Dios “orog kadakula kisa satong puso,” asin sa anong paagi na sia “nakakaaram kan gabos na bagay”?

¹⁸ Totoo, puedeng depisil haleon an mga pakamate nin panluluya nin boot kun hararom an pakagamot kaini. Pero, an espiritu ni Jehova makakatabang sa saindo na gradwal na ‘itumba an mga bagay na marigonon an pundasyon na pinapatindog tumang sa kaaraman nin Dios.’ (2 Corinto 10:​4, 5) Kun garo baga dadaogon kamo nin negatibong mga kaisipan, pensaron an mga tataramon ni apostol Juan: “Paagi kaini makakaaram kita na kita nasa katotoohan, asin tatawan niato nin kasiertohan an satong puso sa atubangan nia kun mapadapit sa kun sa ano man kita kondenaron kan satong puso, huli ta an Dios orog kadakula kisa satong puso asin nakakaaram kan gabos na bagay.”​—1 Juan 3:​19, 20.

¹⁹ Ano an boot sabihon kan frase na “an Dios orog kadakula kisa satong puso”? Kun beses, tibaad kondenaron kita kan satong puso, nangorogna kun narerealisar na marhay niato an satong mga pagkabakong sangkap asin pagkukulang. O tibaad huli sa satong pinaghalean, igwa kita nin labi-labing tendensia na mag-isip nin negatibo dapit sa satong sadiri, na garo mayo kitang ginigibo na maaako ni Jehova. An mga tataramon ni apostol Juan nag-aasegurar sa sato na si Jehova orog kadakula kisa dian! Sia nagheheling nin lampas sa mga sala niato asin hineheling an totoong potensial niato. Aram man nia an satong mga motibo asin intension. Si David nagsurat: “Sia mismo nakakaaram na gayo kan pagkaporma sa sato, na ginigirumdom na kita kabokabo.” (Salmo 103:14) Iyo, an pakamidbid sa sato ni Jehova orog kisa pakamidbid niato sa satong sadiri!

“Korona nin Kagayonan” Asin “sa Hadeng Turbante”

20. Ano an ihinahayag kan hula ni Isaias na pagbabalik sa dati manongod sa kun ano an pagheling ni Jehova sa saiyang mga lingkod?

²⁰ Paagi ki propeta Isaias, tinawan ni Jehova an saiyang suanoy na banwaan kan paglaom na makabalik sa dati. Huling sinda madidistiero sa Babilonya, an karangahan asin pag-asegurar na ini an kakaipuhanon nanggad kan mga nawaran na ini nin paglaom! Sa pagtanaw sa panahon na sinda ibabalik sa saindang dagang tinuboan, si Jehova nagsabi: “Ika magigin korona nin kagayonan sa kamot ni Jehova, asin sarong sa hadeng turbante sa palad kan saimong Dios.” (Isaias 62:3) Paagi sa mga tataramon na ini, ginubingan ni Jehova nin dignidad asin kagayonan an saiyang banwaan. Iyan man an ginibo nia sa saiyang nasyon nin espirituwal na Israel ngonyan. Garo man sana iinitaas nia sinda tanganing hangaan kan gabos.

21. Paano kamo magkakaigwa nin kompiansa na babalosan ni Jehova an saindong maimbod na pakatagal?

²¹ Minsan ngani an hulang ini pangenot na naootob sa mga linahidan, ipinapaheling kaiyan an dignidad na itinatao ni Jehova sa gabos na naglilingkod sa saiya. Huli kaini, kun nakakamate nin pagduda, girumdomon na minsan ngani bakong sangkap, puede kamong magin siring kahalaga nin “korona nin kagayonan” asin “sa hadeng turbante” para ki Jehova. Kaya padagos na pagayagayahon an saiyang puso paagi sa maigot na paghihingoang gibohon an saiyang kabotan. (Talinhaga 27:11) Sa paggibo kaiyan, makakakompiar kamo na babalosan ni Jehova an saindong maimbod na pakatagal!

[Nota sa Ibaba]

Nagigirumdoman daw Nindo?

• Paanong kita sarong “espesyal na rogaring” para ki Jehova?

• Taano ta mahalaga na mansayon si Jehova bilang an Parabalos?

• Sa anong ‘mga katusohan’ ni Satanas dapat kitang magmaan?

• Sa anong paagi na an Dios “orog kadakula kisa satong puso”?

[Mga Hapot Para sa Pag-adal]

[Ritrato sa pahina 26]

Si Pablo

[Ritrato sa pahina 26]

Si Elias

[Ritrato sa pahina 26]

Si Ana

[Ritrato sa pahina 28]

Kadakol nin nakakarangang kaisipan sa Tataramon nin Dios