Inapresyar an Interes sa Biblia

SI Marianna, saro sa Mga Saksi ni Jehova sa timog kan Italia, 18 anyos asin nasa huring taon na nia sa haiskul. Nag-aadal sia sa eskuelahan na may nagkapirang iba pang hoben na Saksi.

“Sa laog nin pirang taon na ngonyan,” an isinurat ni Marianna, “an nagkapira sa samo nagbabasa kan teksto sa Biblia kan aldaw hale sa Pagsiyasat sa Kasuratan Aroaldaw durante kan samong pahingalo sa klase. An solamenteng lugar na magigibo mi iyan iyo an saro sa mga pasilyo harani sa kuarto kan mga maestro. Bako nanggad na toninong an lugar na iyan. Naheheling kami kan kadaklan na maestro kun minaagi sinda, asin minapondo an nagkapira tanganing helingon kun ano an ginigibo mi. Sa parate nagtatao ini samo nin oportunidad na simbagon an saindang mga hapot. Sa promedyo, sarong maestro an minapondo sa kada aldaw. Nagkapira an nagdadanay tanganing maghinanyog sa samong pagtokar kan teksto sa Biblia asin nagpapahayag nin pag-apresyar sa samong interes bilang mga Saksi sa espirituwal na mga bagay. Sarong beses, inimbitaran kami kan katabang na prinsipal na gibohon an samong pag-orolay sa kuarto kan mga maestro.

“Kan maheling kun saen mi pinag-oolayan an teksto, hinagad kan sakong maestro sa prinsipal kun puede niamong pag-orolayan iyan sa saro sa mga kuarto kan klase, na magigin mas toninong. Tinawan kami nin permiso kan prinsipal, asin inomaw kami kan sakong maestro sa atubangan kan bilog na klase huli sa marahay na halimbawa na ipinapaheling niamo. Maogmahon kami gabos huli sa dakulang pribilehio na itinao sa samo ni Jehova.”