Ipapabanaag daw Nindo an Kamurawayan nin Dios?

“Kita nagpapabanaag na siring sa mga salming kan kamurawayan ni Jehova.”​—2 CORINTO 3:18.

1. Ano an naheling ni Moises, asin ano an nangyari pakatapos kaiyan?

SARO iyan sa mga bisyon na pinakanakakapukaw nin may pagkangirhat na paggalang na naeksperyensiahan kasuarin man nin siisay man na tawo. Mantang nagsosolo sa itaas kan Bukid nin Sinai, itinao ki Moises an sarong pambihirang kahagadan. Tinogotan siang maheling an dai pa noarin man naheling nin siisay man na tawo​—an kamurawayan ni Jehova. Siempre, dai mismo naheling ni Moises si Jehova. Mamurawayon an itsura nin Dios kaya mayo nin siisay man na tawo na makakaheling sa saiya asin mabubuhay. Imbes, tinahoban ni Jehova kan saiyang “palad” si Moises bilang proteksion sagkod na makaagi Sia, na minalataw na naggagamit nin sarong representanteng anghel. Dangan tinogotan ni Jehova si Moises na maheling an tadang liwanag kan kapahayagan na ini kan kamurawayan nin Dios. Nakipag-olay man si Jehova ki Moises paagi sa anghel. Ilinaladawan kan Biblia an nangyari pagkatapos kaiyan: “Ngonyan nangyari kan si Moises maghilig hale sa Bukid nin Sinai . . . na an kublit kan saiyang lalauogon nagsisinag dahel sa pakikipag-olay nia [ki Jehova].”​—Exodo 33:18–​34:​7, 29.

2. Ano an isinurat ni apostol Pablo manongod sa kamurawayan na ipinapabanaag kan mga Kristiano?

² Imahinara na kaibanan kamo ni Moises duman sa bukid. Abaa kanakakapukaw sa boot na maheling an nakakasulang kagayonan kan Makakamhan sa Gabos asin maghinanyog sa saiyang mga tataramon! Kanigoan na pribilehio an bumaba sa Bukid nin Sinai kaibanan ni Moises, an parapangoltanan kan tipan nin Ley! Pero aram daw nindo na sa nagkapirang paagi an tunay na mga Kristiano nagpapabanaag kan kamurawayan nin Dios sa paagi na nakakalabi pa ngani sa pagkapabanaag kaiyan ni Moises? An nakakapukaw nin isip na katunayan na iyan maheheling sa sarong surat ni apostol Pablo. Nagsurat sia na an linahidan na mga Kristiano “nagpapabanaag na siring sa mga salming kan kamurawayan ni Jehova.” (2 Corinto 3:​7, 8, 18) Sa sarong sentido, an mga Kristiano na may daganon na paglaom nagpapabanaag man kan kamurawayan nin Dios.

Kun Paano Ipinapabanaag kan mga Kristiano an Kamurawayan nin Dios

3. Paano niato namidbid si Jehova sa mga paagi na dai mahihimo ni Moises?

³ Paano daw niato posibleng ikapabanaag an kamurawayan nin Dios? Dai niato naheling o nadangog si Jehova sa paagi na arog kan naeksperyensiahan ni Moises. Minsan siring, namidbid niato si Jehova sa mga paagi na dai mahihimo ni Moises. Si Jesus nagtunga bilang an Mesiyas kaidto sanang haros 1,500 nang taon pagkagadan ni Moises. Bilang resulta, dai kaidto naaraman ni Moises kun paano an Ley maootob ki Jesus, na nagadan tanganing balukaton an mga tawo sa grabeng karingisan nin kasalan asin kagadanan. (Roma 5:​20, 21; Galacia 3:19) Dugang pa, limitado sana kaidto an namasdan ni Moises sa pagigin kahangahanga kan katuyohan ni Jehova, na nakasentro sa Mesiyanikong Kahadean asin sa daganon na Paraiso na papangyayarihon kaiyan. Sa siring, namamasdan niato an kamurawayan ni Jehova, bakong paagi sa satong literal na mga mata, kundi paagi sa mga mata nin pagtubod basado sa mga katokdoan kan Biblia. Dugang pa, nadangog niato an tingog ni Jehova, bakong paagi sa anghel, kundi paagi sa Biblia, partikular na an mga Ebanghelyo, na magayonon na ilinaladawan an mga katokdoan asin ministeryo ni Jesus.

4. (a) Paano ipinapabanaag kan linahidan na mga Kristiano an kamurawayan nin Dios? (b) Sa anong mga paagi ikakapabanaag kan mga may daganon na paglaom an kamurawayan nin Dios?

⁴ Minsan ngani dai ipinapabanaag kan mga Kristiano an kamurawayan nin Dios paagi sa mga sinag sa saindang lalauogon, an saindang lalauogon garo nagsisinag mantang sinasabi ninda sa iba an manongod sa mamuraway na personalidad asin mga katuyohan ni Jehova. May labot sa satong kaaldawan, ihinula  ni propeta Isaias na an banwaan nin Dios ‘magsasabi nanggad kan manongod sa kamurawayan ni Jehova sa tahaw kan mga nasyon.’ (Isaias 66:19) Dugang pa, sa 2 Corinto 4:​1, 2, mababasa niato: “Mantang igwa kami kan ministeryong ini . . . , isinikwal niamo an rirong na mga bagay na maninigong ikasupog, na dai naglalakaw na may katusohan, ni sinasalakan man an tataramon nin Dios, kundi paagi sa paghayag kan katotoohan nagrerekomendar kan samong sadiri sa lambang konsensia nin tawo sa pagheling nin Dios.” Si Pablo nagtataram partikularmente manongod sa linahidan na mga Kristiano, na “mga ministro nin sarong bagong tipan.” (2 Corinto 3:6) Alagad an saindang ministeryo nagkaigwa nin epekto sa kadakol na tawo na nagkamit nin paglaom na buhay na daing katapusan digdi sa daga. Kaiba sa ministeryo kan duwang grupong iyan an pagpabanaag kan kamurawayan ni Jehova bako sanang sa saindang itinotokdo kundi pati sa kun paano sinda namumuhay. Paninimbagan niato asin pribilehio niato na ipabanaag an kamurawayan kan Kaharohalangkaweng Dios!

5. Ebidensia nin ano an satong espirituwal na prosperidad?

⁵ Ngonyan, an mamuraway na maogmang bareta kan Kahadean nin Dios ihinuhulit sa bilog na ineerokan na daga, siring kan ihinula ni Jesus. (Mateo 24:14) An mga indibiduwal sa gabos na nasyon, tribo, banwaan, asin tataramon entusiastikong naghimate sa maogmang bareta asin binago an saindang buhay tangani na gibohon an kabotan nin Dios. (Roma 12:2; Kapahayagan 7:9) Arog kan enot na mga Kristiano, dai ninda magibong pumondo sa pagtaram manongod sa mga bagay na saindang naheling asin nadangog. (Gibo 4:20) Labing anom na milyon katawo, na mas dakol kisa arin man na ibang panahon sa kasaysayan nin tawo, an nagpapabanaag kan kamurawayan nin Dios ngonyan. Kabilang daw kamo sa sainda? An espirituwal na prosperidad kan banwaan nin Dios sarong nakakakombensir na ebidensia kan bendisyon asin proteksion ni Jehova. An bagay na yaon sa sato an espiritu ni Jehova lalo pang risang-risa huli ta igwang makapangyarihan na mga puersa na nakapuesto laban sa sato. Helingon niato ngonyan kun taano ta totoo iyan.

Dai Mapapasilensio an Banwaan nin Dios

6. Taano ta kaipuhan an pagtubod asin kosog nin boot tanganing makapanindogan apabor ki Jehova?

⁶ Halimbawang inapod kamo na magpatotoo sa korte laban sa sarong daing herak na kriminal. Aram nindo na an kriminal igwa nin mapuersang organisasyon asin gigibohon nia an gabos na medyos tanganing olangon kamo sa pagbuyagyag sa saiya. Tanganing makapagpatotoo kamo laban sa siring na kriminal, kaipuhan an kosog nin boot saka kompiansa na poprotehiran kamo kan mga autoridad laban sa saiya. Kapareho kaiyan an kamugtakan niato. Sa pagpapatotoo ki Jehova asin sa saiyang mga katuyohan, kita nagpapatotoo laban ki Satanas na Diablo, na ibinubuyagyag sia bilang paragadan asin putikon na nanlalagalag sa bilog na ineerokan na daga. (Juan 8:44; Kapahayagan 12:9) Tanganing makapanindogan kamo apabor ki Jehova asin laban sa Diablo, kaipuhan an pagtubod sagkod kosog nin boot.

7. Gurano kamaimpluwensia si Satanas, asin ano an hinihingoa niang gibohon?

⁷ Siempre, si Jehova an Supremo. Nakakalabing marhay an saiyang kapangyarihan kisa kan ki Satanas. Makakasegurado kita na si Jehova bako sanang may kakayahan kundi gustong-gusto man na protehiran kita mantang kita maimbod na naglilingkod sa saiya. (2 Cronica 16:9) Minsan siring, si Satanas an namamahala sa mga demonyo sagkod sa kinaban nin katawohan na siblag sa Dios. (Mateo 12:​24, 26; Juan 14:30) Mantang nalalaom sa palibot kan daga asin pano nin “dakulang kaanggotan,” makuring kinokontra ni Satanas an mga lingkod ni Jehova  asin ginagamit an kinaban na nasa saiyang kontrol sa paghingoang tikomon an ngoso kan gabos na naghuhulit kan maogmang bareta. (Kapahayagan 12:7-9, 12, 17) Paano nia ini ginigibo? Sa kisuerra tolong paagi.

8, 9. Paano ginagamit ni Satanas an napasalang pagkamoot, asin taano ta maninigo niatong maingat na pilion an satong kairiba?

⁸ An sarong paagi na hinihingoa ni Satanas na irayo an satong atension iyo an mga asikasohon sa buhay. An mga tawo sa huring mga aldaw na ini mamomoton sa kuarta, mamomoton sa sainda man sana, asin mamomoton sa kasingawan. Bako sindang mamomoton sa Dios. (2 Timoteo 3:1-4) Huling sibot-sibot sa pangaroaldaw na bagay-bagay sa buhay, an kadaklan na tawo ‘dai nagmamangno’ sa maogmang bareta na ipinapaabot niato sa sainda. Bako talaga sindang interesado na makanood kan katotoohan sa Biblia. (Mateo 24:37-39) An siring na aktitud puedeng makaolakit, na pinapatungka kita sa espirituwal. Kun papabayaan ta an satong sadiri na mamoot sa materyal na mga bagay asin sa mga kasingawan sa buhay, an satong pagkamoot sa Dios malipot.​—Mateo 24:12.

⁹ Sa dahelan na ini, maingat na pinipili kan mga Kristiano an kairibaiba ninda. “Sia na naglalakaw na kaiba nin mga madonong magigin madonong,” an isinurat ni Hadeng Salomon, “alagad sia na nakikiiba sa mga mangmang maraot an aabotan.” (Talinhaga 13:20) Logod na ‘maglakaw’ kita kaiba kan mga nagpapabanaag kan kamurawayan nin Dios. Abaa karahay na gibohon iyan! Mantang kita nakikipagtipon sa satong espirituwal na mga tugang sa satong mga pagtiripon asin sa iba pang mga panahon, napaparigon an satong boot sa saindang pagkamoot, sa saindang pagtubod, sa saindang kagayagayahan, asin sa saindang kadonongan. An siring na nakakarahay na pag-iribaiba nagpapakosog sa satong determinasyon na magmaigot sa satong ministeryo.

10. Sa anong mga paagi ginagamit ni Satanas an pag-olog-olog tumang sa mga nagpapabanaag kan kamurawayan nin Dios?

¹⁰ An ikaduwang paagi na hinihingoa ni Satanas na papondohon an gabos na Kristiano sa pagpabanaag kan kamurawayan nin Dios iyo an pag-olog-olog. Dai niato maninigong ipagngalas an taktikang ini. Durante kan saiyang ministeryo sa daga, si Jesu-Cristo pinag-olog-olog​—pinagngisihan, kinusmodan, pinagkalwagan, trinatar nin daing galang, asin linutaban pa ngani. (Marcos 5:40; Lucas 16:14; 18:32) An enot na mga Kristiano pinagtuya man. (Gibo 2:13; 17:32) An mga lingkod ni Jehova sa presenteng aldaw napapaatubang sa kaagid na pagmaltrato. Segun ki apostol Pedro, garo man sana sinda babansagan na “falsong mga propeta.” “Sa huring mga aldaw,” an ihinula ni Pedro, “an mga paraolog-olog madatong na may pag-olog-olog, na naglalakaw segun sa saindang sadiring mga mawot asin nagsasarabi: ‘Haen man ining ipinanugang presensia nia? Tara, . . . an gabos na bagay pareho man sana poon kan kapinonan nin paglalang.’” (2 Pedro 3:​3, 4) An banwaan nin Dios pinag-oolog-olog na mga bako daang realistiko. An moral na mga pamantayan kan Biblia lihis na daa sa uso. Para sa dakol, kalolongan an mensaheng ihinuhulit niato. (1 Corinto 1:​18, 19) Bilang mga Kristiano, tibaad mapaatubang kita sa pag-olog-olog sa eskuelahan, sa trabaho, asin kun minsan pati sa laog kan pamilya. Huling dai nadedesganar, padagos niatong ipinapabanaag an kamurawayan nin Dios paagi sa satong paghuhulit, na nakakaaram arog ni Jesus na an Tataramon nin Dios katotoohan.​—Juan 17:17.

11. Paano ginamit ni Satanas an paglamag sa paghingoang pasilensiohon an mga Kristiano?

¹¹ An ikatolong taktika na ginagamit kan Diablo sa  pagprobar na pasilensiohon kita iyo an pagtumang o paglamag. Sinabi ni Jesus sa saiyang mga parasunod: “Dadarahon kamo nin mga tawo sa kahorasaan asin gagadanon kamo, asin ikakaongis kamo kan gabos na nasyon huli sa ngaran ko.” (Mateo 24:9) Tunay nanggad, bilang mga Saksi ni Jehova, napaatubang kita sa madahas na paglamag sa dakol na parte kan daga. Aram niato na kaidto pa ihinula ni Jehova na magkakaigwa nin pagkaongis, o pag-iiwal, sa pag-oltanan kan mga naglilingkod sa Dios asin kan mga naglilingkod ki Satanas na Diablo. (Genesis 3:15) Aram man niato na paagi sa pagpapadanay nin integridad kun may pagbalo, kita nagpapatotoo sa pagkamakatanosan kan unibersal na soberaniya ni Jehova. An pakaaram kaini puedeng magpakosog sa sato dawa sa pinakamasakit na mga kamugtakan. Mayong paglamag na permanenteng makakapasilensio sa sato noarin man kun magdadanay kitang determinado na ipabanaag an kamurawayan nin Dios.

12. Taano ta maninigo kitang maggayagaya mantang kita nagdadanay na maimbod sa ibong kan pagtumang ni Satanas?

¹² Linalabanan daw nindo an pan-akit kan kinaban asin maimbod daw kamo sa ibong nin pag-olog-olog asin pagtumang? Kun siring igwa kamong dahelan na maggayagaya. Inasegurar ni Jesus an mga masunod sa saiya: “Maogma kamo kun an mga tawo pinag-oolog-olog kamo asin pinaglalamag kamo patin putik na nagtataram nin lambang klase nin maraot na bagay tumang sa saindo dahel sa sako. Maggayagaya kamo asin lumukso kamo huli sa kagayagayahan, huli ta dakula an saindong balos sa kalangitan; huli ta sa paaging iyan pinaglamag ninda an mga propeta na naenot sa saindo.” (Mateo 5:​11, 12) An saindong pakatagal ebidensia na nasa saindo an makapangyarihan na banal na espiritu ni Jehova, na tinatawan kamo nin puersa na ipabanaag an saiyang kamurawayan.​—2 Corinto 12:9.

An Pakatagal Naggigikan ki Jehova

13. Ano an sarong prinsipal na dahelan kun taano ta nagtatagal kita sa satong Kristianong ministeryo?

¹³ An sarong prinsipal na dahelan kun taano ta nagtatagal kita sa ministeryo iyo na namomotan niato si Jehova asin ikinakaogma niatong marhay na ipabanaag an saiyang kamurawayan. Tendensia nin tawo na arogon an mga namomotan asin iginagalang ninda, asin mayo nin siisay man na orog na maninigong arogon kisa ki Jehova Dios. Huli sa saiya mismong dakulang pagkamoot, isinugo nia an saiyang Aki sa daga tanganing magpatotoo sa katotoohan asin balukaton an makinuyog na katawohan. (Juan 3:16; 18:37) Arog nin Dios, mawot niato na an gabos na klase nin tawo makapagsolsol asin maligtas; iyan an dahelan na kita naghuhulit sa sainda. (2 Pedro 3:9) An kamawotan na ini, kaiba an satong determinasyon na arogon an Dios, nagpapahiro sa sato na magmaigot sa pagpabanaag kan saiyang kamurawayan paagi sa satong ministeryo.

14. Paano kita pinapakosog ni Jehova na makatagal sa satong ministeryo?

¹⁴ Pero, sa pundamental, an satong kosog na magtagal sa Kristianong ministeryo naggigikan ki Jehova. Sinususteniran asin pinapasarig nia kita paagi sa saiyang espiritu, sa saiyang organisasyon, asin sa  saiyang Tataramon, an Biblia. Si Jehova “nagtatao nin pakatagal” sa mga andam na ipabanaag an saiyang kamurawayan. Sinisimbag nia an satong mga pamibi asin tinatawan kita kan kadonongan na maatubang an mga pagbalo. (Roma 15:5; Santiago 1:5) Dugang pa, dai itotogot ni Jehova na mag-agi kita nin ano man na pagbalo na imposibleng matagalan. Kun kita nagtitiwala ki Jehova, matao sia nin luluwasan tangani na padagos niatong ikapabanaag an saiyang kamurawayan.​—1 Corinto 10:13.

15. Ano an nagtatabang sa sato na makatagal?

¹⁵ An pakatagal sa satong ministeryo ebidensia na nasa sato an espiritu nin Dios. Sa pag-ilustrar: Halimbawang may nagpapadistribwir sa saindo nin sarong klase nin tinapay sa harong-harong, na daing bayad. Ininstruksionan kamo na gibohon ini sa sadiri nindong gastos asin sa sadiri nindong oras. Dugang pa, dai nahaloy naaraman nindo na kakadikit na tawo an talagang gusto kan tinapay nindo; kokontrahon pa ngani nin nagkapira an saindong paghihingoa na idistribwir iyan. Sa paghona daw nindo dagos-dagos nindong gigibohon an trabahong iyan? Dai gayod. Pero, tibaad naghihingoa kamo sa pagpahayag kan maogmang bareta sa sadiri nindong oras asin sa sadiri nindong gastos sa laog na nin dakol na taon, dekada pa ngani. Taano? Bako daw na huli ta namomotan nindo si Jehova asin binendisyonan nia paagi sa saiyang espiritu an saindong paghihingoa paagi sa pagtabang sa saindo na makatagal? Iyo nanggad!

Sarong Gibohon na Marurumdoman

16. An pakatagal sa satong ministeryo nangangahulogan nin ano para sa sato asin para sa mga naghihinanyog sa sato?

¹⁶ An ministeryo sa bagong tipan sarong balaog na daing kapareho. (2 Corinto 4:7) Kaagid kaiyan, sarong kayamanan an Kristianong ministeryo na ginigibo kan ibang karnero sa bilog na globo. Mantang padagos kamong nagtatagal sa saindong ministeryo, ‘ikakaligtas nindo,’ arog kan isinurat ni Pablo ki Timoteo, ‘an saindo man sana sagkod idtong naghihinanyog sa saindo.’ (1 Timoteo 4:16) Isipa nindo an kahulogan kaiyan. An maogmang bareta na ihinuhulit nindo nagtatao sa iba kan oportunidad na mabuhay sagkod lamang. Makakagibo kamo nin makosog na bogkos nin pagkakatood sa mga tinatabangan nindo sa espirituwal. Imahinara kun magigin gurano kagayagaya an mabuhay nin daing sagkod sa Paraiso kaiba kan mga natabangan nindo na makanood manongod sa Dios! Segurado na dai ninda noarin man malilingawan an saindong mga paghihingoa na tabangan sinda. Saro nanggad ining dahelan nin pagkakontento!

17. Taano an panahon niato ta sarong daing kaagid na panahon sa kasaysayan nin tawo?

¹⁷ Nabubuhay kamo sa sarong daing kaagid na panahon sa kasaysayan nin tawo. An maogmang bareta nungka giraray na ihuhulit sa tahaw nin sarong kinaban na siblag sa Dios. Si Noe nabuhay sa siring na kinaban, asin naheling nia iyan na napara. Siertong naggayagaya sia na maaraman na may kaimbodan niang ginibo an kabotan nin Dios sa paggibo nin dahong, na nagresulta sa pagkaligtas nindang pamilya! (Hebreo 11:7) Mapapasaindo man an siring na kagayagayahan. Isipa kun ano an mamamatean nindo sa bagong kinaban mantang ginigirumdom nindo an saindong aktibidad durante kan huring mga aldaw na ini, sa pakaaram na ginibo nindo an saindong makakaya na palakopon an intereses kan Kahadean.

18. Anong pag-asegurar asin pagparigon sa boot an itinatao ni Jehova sa saiyang mga lingkod?

¹⁸ Kun siring, padagos na ipabanaag niato an kamurawayan nin Dios. An paggibo niato kaiyan magigin sarong bagay na marurumdoman niato sagkod lamang. Ginigirumdom man ni Jehova an satong mga gibo. An Biblia nagtatao kan pagparigon na ini sa boot: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod. Alagad minamawot niamo na an lambang saro sa saindo magpaheling kan kaparehong kahigosan tanganing magkaigwa kan lubos na kasiertohan kan paglaom sagkod sa katapusan, tanganing dai kamo magin mga hugakon, kundi magin mga paraarog kan mga nagmamana sa mga panuga paagi sa pagtubod asin pasensia.”​—Hebreo 6:10-12.

Ikakapaliwanag daw Nindo?

• Paano ipinapabanaag kan mga Kristiano an kamurawayan nin Dios?

• Ano an nagkapirang taktika na ginagamit ni Satanas sa saiyang paghihingoa na pasilensiohon an banwaan nin Dios?

• Ano an ebidensia na nasa sato an espiritu nin Dios?

[Mga Hapot Para sa Pag-adal]

[Ritrato sa pahina 15]

An lalauogon ni Moises nagpabanaag nin kamurawayan

[Mga Ritrato sa pahina 16, 17]

Ipinapabanaag niato an kamurawayan nin Dios sa satong ministeryo