Ipinapabanaag kan mga Kristiano an Kamurawayan ni Jehova

“Maogma an saindong mga mata huling an mga iyan nakakaheling, asin an saindong mga talinga huling an mga iyan nakakadangog.”​—MATEO 13:16.

1. Anong hapot an minasabong sa isip may labot sa nagin reaksion kan mga Israelita ki Moises sa Bukid nin Sinai?

AN MGA Israelita na tiripon sa Bukid nin Sinai igwa nanggad nin dahelan na rumani ki Jehova. Total, kinalda nia sinda sa Egipto paagi sa makakamhan na kamot. Inasikaso nia an saindang mga pangangaipo, na nagtao nin kakanon asin tubig sa kaawagan. Sunod, pinapanggana nia sinda laban sa nananalakay na hukbo nin mga Amalequita. (Exodo 14:26-31; 16:2–​17:13) Mantang sinda nagkakampo sa kaawagan sa atubangan kan Bukid nin Sinai, an banwaan nakubhanan na marhay sa mga dagoldol asin kikilat kaya tinarakigan sinda. Kan huri, naheling ninda si Moises na nagbaba sa Bukid nin Sinai, na an saiyang lalauogon nagpapabanaag kan kamurawayan ni Jehova. Pero, imbes na humirong may pagngalas asin pag-apresyar, sinda ruminayo. “Sinda nagkatarakot na rumani [ki Moises].” (Exodo 19:10-19; 34:30) Taano ta natakot sindang makaheling kan banaag kan kamurawayan ni Jehova, an saro na kadakol kan ginibo para sa sainda?

2. Taano daw ta natakot an mga Israelita kan maheling an kamurawayan nin Dios na ipinabanaag ni Moises?

² Posibleng marhay na an pagkatakot kan mga Israelita sa okasyon na ini igwa nin koneksion sa nangyari bago kaiyan. Kan tuyo sindang makisuway ki Jehova paagi sa paggibo nin bulawan na ogbon na baka, dinisiplina nia sinda. (Exodo 32:​4, 35) Nagkaleksion daw sinda sa disiplina ni Jehova asin inapresyar iyan? An kadaklan dai. Sa paghinanapos kan saiyang buhay, ginirumdom ni Moises an pangyayari may labot sa bulawan na ogbon  na baka kabale an iba pang kaso nin pakisuway kan mga Israelita. Sinabi nia sa banwaan: “Guminawe kamo nin may pagrebelde tumang sa pagboot ni Jehova na saindong Dios, asin dai kamo nagtubod sa saiya asin dai kamo naghinanyog sa saiyang tingog. Kamo nagin rebelde sa paggawe ki Jehova poon kan aldaw na namidbid ko kamo.”​—Deuteronomio 9:15-24.

3. Ano an ginibo ni Moises kun dapit sa pagtahob sa lalauogon nia?

³ Isipa nindo an nagin reaksion ni Moises sa pagkatakot kan mga Israelita. An pagkasaysay nagsasabi: “Pagkatapos na magtaram ni Moises sa sainda, tinatahoban nia an saiyang lalauogon. Alagad kun minalaog si Moises duman [sa tabernakulo] sa atubangan ni Jehova tanganing makipag-olay sa saiya, hinahale nia an tahob sagkod sa pagluwas nia. Asin minaluwas sia asin itinataram sa mga aki ni Israel kun ano an ipinagboot sa saiya. Asin naheheling kan mga aki ni Israel an lalauogon ni Moises, na an kublit kan lalauogon ni Moises nagsisinag; asin ibinabalik ni Moises an tahob sa saiyang lalauogon sagkod na lumaog sia tanganing makipag-olay [ki Jehova].” (Exodo 34:33-35) Taano ta kun beses tinatahoban ni Moises an saiyang lalauogon? Ano an manonodan niato digdi? An simbag sa mga hapot na ini makakatabang sa sato na ebalwaron an sato mismong relasyon ki Jehova.

Nawarang mga Oportunidad

4. Anong kahulogan an ihinayag ni apostol Pablo manongod sa paglaag ni Moises kan tahob?

⁴ Ipinaliwanag ni apostol Pablo na an paglaag ni Moises kan tahob igwa nin koneksion sa isip asin kamugtakan nin puso kan mga Israelita mismo. Si Pablo nagsurat: “An mga aki ni Israel dai makaturuhok sa lalauogon ni Moises huli sa kamurawayan kan saiyang lalauogon . . . Nguminurol an saindang mga kakayahan nin pag-isip.” (2 Corinto 3:​7, 14) Abaa kamakamomondong situwasyon! An mga Israelita an piniling banwaan ni Jehova, asin boot nia na sinda rumani sa saiya. (Exodo 19:4-6) Pero, nag-alangan sinda na magturuhok sa banaag kan kamurawayan nin Dios. Imbes na ikiling an saindang puso asin isip ki Jehova bilang pagpaheling nin mamomoton na debosyon, garo man sana sia tinalikdan ninda.

5, 6. (a) An mga Israelita kan kaaldawan ni Moises igwa nin anong kaagid kan enot na siglo? (b) Ano an kalaenan kan mga naghinanyog ki Jesus asin kan mga dai naghinanyog?

⁵ Digdi, may maheheling kitang pagkakaagid kan enot na siglo C.E. Kan panahon na si Pablo makombertir sa Kristianismo, an tipan nin Ley sinalidahan na kan bagong tipan na an parapangoltanan iyo si Jesu-Cristo, an Moises na Orog na Dakula. Sa tataramon sagkod gibo, ipinabanaag ni Jesus sa sangkap na paagi an kamurawayan ni Jehova. Nagsurat si Pablo may labot sa binuhay liwat na si Jesus: “Sia an banaag kan . . . kamurawayan [nin Dios] asin an eksaktong ladawan kan saiya mismong naturalesa.” (Hebreo 1:3) Kahangahanga nanggad kan nagin oportunidad kan mga Judio! Makakapaghinanyog sinda kan mga tataramon nin buhay na daing katapusan sa Aki nin Dios mismo! Makamomondo, an kadaklan sa mga hinulitan ni Jesus dai naghinanyog. May labot sa sainda, kinotar ni Jesus an hula ni Jehova paagi ki Isaias: “An puso kan banwaan na ini nagin dai nag-aako, asin sa saindang mga talinga sinda nagdangog na daing paghimate, asin pinirong ninda an saindang mga mata; tangani na sinda dai noarin man makaheling paagi sa saindang mga mata asin makadangog paagi sa saindang mga talinga asin makua kan saindang mga puso an kahulogan kaiyan patin bumalik, asin paomayan ko sinda.”​—Mateo 13:15; Isaias 6:​9, 10.

⁶ Risang marhay an kalaenan kan mga Judio asin kan mga disipulo ni Jesus, na dapit sa sainda sinabi ni Jesus: “Maogma an saindong mga mata huling an mga iyan nakakaheling, asin an saindong mga talinga huling iyan nakakadangog.” (Mateo 13:16) An tunay na mga Kristiano naghihimuyawot na mamidbid asin paglingkodan si Jehova. Ikinakaogma nindang marhay na gibohon an saiyang kabotan na ihinahayag sa Biblia. Bilang resulta, ipinapabanaag kan linahidan na mga Kristiano an kamurawayan ni Jehova sa saindang ministeryo sa bagong tipan, asin iyan man an ginigibo kan ibang karnero.​—2 Corinto 3:​6, 18.

 Kun Taano ta Natatahoban an Maogmang Bareta

7. Taano ta bakong makangangalas na an kadaklan habo sa maogmang bareta?

⁷ Siring kan naheling niato, kan kaaldawan ni Jesus saka kan kaaldawan ni Moises, sinayumahan kan kadaklan na Israelita an daing kaagid na oportunidad na bukas sa sainda. Pareho man sa panahon niato. Sinasayumahan kan kadaklan na tawo an maogmang bareta na ihinuhulit niato. Dai niato ini ipinagngangalas. Si Pablo nagsurat: “Kun, ngonyan, an maogmang bareta na samong ipinapahayag sa katunayan natatahoban, iyan natatahoban sa mga mapapahamak, na dian sa sainda binuta kan dios kan sistemang ini nin mga bagay an isip kan mga dai nagtutubod.” (2 Corinto 4:​3, 4) Apuera sa mga paghihingoa ni Satanas na itago an maogmang bareta, an dakol na tawo tinatahoban an sainda mismong mga lalauogon huli ta habo nindang makaheling.

8. Sa anong paagi nabubuta huli sa kadaihan nin aram an dakol na tawo, asin paano kita makakalikay na maapektaran man nin siring?

⁸ An piguratibong mga mata kan dakol nabuta huli sa kadaihan nin aram. An Biblia nagsasabi na an mga nasyon “nasa kadikloman sa isip, asin siblag sa buhay na gikan sa Dios, huli sa saindang kadaihan nin aram.” (Efeso 4:18) Bago sia nagin Kristiano, si Pablo, sarong tawo na tatao sa Ley, nabutang marhay huli sa kadaihan nin aram kaya pinaglamag nia an kongregasyon nin Dios. (1 Corinto 15:9) Pero, ihinayag sa saiya ni Jehova an katotoohan. Si Pablo nagpaliwanag: “An dahelan na ako naherakan iyo na tanganing paagi sa sako bilang an nangongorog na halimbawa ikapahayag ni Cristo Jesus an gabos niang pakatios bilang arogan kaidtong matubod sa saiya manongod sa buhay na daing katapusan.” (1 Timoteo 1:16) Arog ki Pablo, an dakol na dati kontra sa katotoohan nin Dios naglilingkod na sa Saiya ngonyan. Marahay na dahelan ini na magpadagos sa pagpatotoo dawa sa mga nagkokontra sa sato. Mientras tanto, paagi sa regular na pag-adal sa Tataramon nin Dios asin pagsabot sa kahulogan kaiyan, kita napoprotehiran na makagibo nin sala huli sa kadaihan nin aram na ikakaanggot ni Jehova.

9, 10. (a) Paano ipinaheling kan mga Judio kan enot na siglo na sinda habong matokdoan asin matagas sa saindang mga punto de vista? (b) May pagkakaagid daw sa Kakristianohan ngonyan? Ipaliwanag.

⁹ Dakol an dai nakakaheling sa espirituwal na mga bagay huli ta sinda habong matokdoan asin matagas sa saindang mga punto de vista. Dakol na Judio an nagsayuma ki Jesus asin sa saiyang mga katokdoan huli ta sinda matagas na nangangapot sa Ley ni Moises. Siempre, may mga eksepsion. Halimbawa, pagkabuhay liwat ni Jesus, sarong “dakulang kadaklan nin mga saserdote [an] nagpoon na magin makinuyog sa pagtubod.” (Gibo 6:7) Minsan siring, may labot sa mayoriya kan mga Judio, si Pablo nagsurat: “Sagkod ngonyan kun binabasa si Moises, may tahob an saindang mga puso.” (2 Corinto 3:15) Posibleng marhay na aram ni Pablo an sinabi kaidto ni Jesus sa Judiong mga namomoon sa relihion: “Sinisiyasat nindo an Kasuratan, huli ta naghohona kamo na paagi kaiyan magkakaigwa kamo nin buhay na daing katapusan; asin an mga ini  mismo an nagpapatotoo dapit sa sako.” (Juan 5:39) An Kasuratan na maingat na marhay nindang siniyasat maninigo kutanang nakatabang sa sainda na makamansay na si Jesus an Mesiyas. Minsan siring, an mga Judio may sadiri man na mga ideya, asin maski an Aki nin Dios na naggigibo nin mga milagro dai sinda makombensir na magbago.

¹⁰ Totoo man iyan sa dakol sa Kakristianohan ngonyan. Arog kan mga Judio kan enot na siglo, “igwa sinda nin kaigotan para sa Dios; alagad bakong oyon sa tamang kaaraman.” (Roma 10:2) Minsan ngani may mga nag-aadal sa Biblia, habo nindang tubodon an sinasabi kaiyan. Habo nindang maniwala na tinotokdoan ni Jehova an saiyang banwaan paagi sa saiyang grupong maimbod asin mapagmansay na oripon na kompuesto nin linahidan na mga Kristiano. (Mateo 24:45) Pero nasasabotan niato na tinotokdoan ni Jehova an saiyang banwaan asin na an pakasabot sa katotoohan nin Dios kaidto pa pirmeng progresibo. (Talinhaga 4:18) Paagi sa pagpatokdo niato ki Jehova, biniyayaan kita nin kaaraman dapit sa saiyang kabotan asin katuyohan.

11. Paano natago an katotoohan huli sa paniniwala nin saro sa gusto sana niang paniwalaan?

¹¹ An iba nabubuta huli ta naniniwala sana sinda sa gusto nindang paniwalaan. Ihinula na may mga mag-oolog-olog sa banwaan nin Dios asin sa mensaheng ibinabalangibog ninda may labot sa presensia ni Jesus. Si apostol Pedro nagsurat: “Oyon sa saindang kabotan, an katotoohan na ini dai ninda namamangno,” iyo na ngani na an Dios nagpaabot nin delubyo sa kinaban kan panahon ni Noe. (2 Pedro 3:3-6) Kaagid kaiyan, daing pag-alangan na rinerekonoser kan dakol na naghihingakong Kristiano na si Jehova nagpapaheling nin pagkaherak, kabootan, asin pagpatawad; pero iniignoro o sinasayumahan ninda an bagay na dai sia nagpapalibre sa pagpadusa. (Exodo 34:​6, 7) An tunay na mga Kristiano maingat na naghihingoang saboton an talagang itinotokdo kan Biblia.

12. Paano binuta nin tradisyon an mga tawo?

¹² An dakol na nagsisimba binubuta nin tradisyon. Sa mga namomoon sa relihion kan saiyang kaaldawan, si Jesus nagsabi: “Hinalean nindo nin halaga an tataramon nin Dios huli sa saindong tradisyon.” (Mateo 15:6) May kaigotan na ibinalik kan mga Judio an dalisay na pagsamba pagkabalik ninda hale sa pagkadistiero sa Babilonya, pero an mga saserdote mismo nagin mapalangkaw asin nagpapakangmatanos. An mga kapiestahan sa relihion nagin pormalidad sana, na mayo nin tunay na reberensia sa Dios. (Malaquias 1:6-8) Pag-abot kan panahon ni Jesus, dinagdagan na kan mga eskriba asin Fariseo nin dai mabilang na mga tradisyon an Ley ni Moises. Ibinuyagyag ni Jesus an mga tawong idto bilang mga parasaginsagin huli ta liningawan na ninda an matanos na mga prinsipyo na pinagbasaran kan Ley. (Mateo 23:​23, 24) An tunay na mga Kristiano dapat na mag-ingat na dai pagtogotan an mga tradisyon na gibo nin tawo na irayo sinda sa dalisay na pagsamba.

‘Pakaheling sa Saro na Dai Naheheling’

13. Sa anong duwang paagi nakaheling nin kamurawayan nin Dios si Moises?

¹³ Nakiolay si Moises na maheling an kamurawayan nin Dios duman sa bukid, asin talagang naheling nia an tadang liwanag kan kamurawayan ni Jehova. Kun minaduman sia sa tabernakulo, dai sia naglalaag nin tahob. Si Moises tawong may hararom na pagtubod na an mawot gibohon an kabotan nin Dios. Minsan ngani biniyayaan sia na makaheling nin kamurawayan ni Jehova paagi sa bisyon, sa sarong sentido naheling na nia an Dios paagi sa mga mata nin pagtubod. Sinasabi kan Biblia na si Moises “nagpadagos na marigon na garo baga nakakaheling kan Saro na dai naheheling.” (Hebreo 11:27; Exodo 34:5-7)  Asin ipinabanaag nia an kamurawayan nin Dios bako sanang paagi sa mga sinag na idto sa saiyang lalauogon sa laog nin kadikit na panahon kundi paagi man sa saiyang mga paghihingoa na tabangan an mga Israelita na mamidbid asin paglingkodan si Jehova.

14. Paano naheling ni Jesus an kamurawayan nin Dios, asin ano an ikinaogma niang marhay?

¹⁴ Sa langit, naheling mismo ni Jesus an kamurawayan nin Dios sa laog nin dai mabilang na lawig nin panahon, poon pa ngani kaidtong bago lalangon an uniberso. (Talinhaga 8:​22, 30) Durante kan bilog na panahon na idto, nagkaigwa sinda nin hararom na pagkamoot asin pagpadangat sa balang saro. Ipinahayag ni Jehova Dios an pinakaodok na pagkamoot asin kapadangatan sa panganay na ini sa gabos na linalang. Ipinahayag man ni Jesus an saiyang hararom na pagkamoot asin kapadangatan sa Dios na Paratao nin Buhay sa saiya. (Juan 14:31; 17:24) Sangkap an pagkaminootan ninda bilang mag-ama. Arog ki Moises, ikinaogmang marhay ni Jesus an pagpabanaag kan kamurawayan ni Jehova sa mga bagay na itinotokdo nia.

15. Sa anong paagi hinohorophorop kan mga Kristiano an kamurawayan nin Dios?

¹⁵ Arog ni Moises asin ni Jesus, an mga Saksi nin Dios sa daga sa presenteng aldaw gustong-gustong horophoropon an kamurawayan ni Jehova. Dai ninda tinalikdan an mamuraway na maogmang bareta. Si apostol Pablo nagsurat: “Kun may pagdolok ki Jehova [tanganing gibohon an saiyang kabotan], an tahob nahahale.” (2 Corinto 3:16) Pinag-aadalan niato an Kasuratan huli ta boot niatong gibohon an kabotan nin Dios. Naghahanga kita sa kamurawayan na nababanaag sa lalauogon kan Aki asin linahidan na Hade ni Jehova, si Jesu-Cristo, asin inaarog niato an saiyang halimbawa. Arog ki Moises asin arog ki Jesus, biniyayaan kita nin ministeryo, na tinotokdoan an iba manongod sa mamuraway na Dios na satong sinasamba.

16. Taano ta biyaya sa sato an pakaaram kan katotoohan?

¹⁶ Namibi si Jesus: “Hayag takang inoomaw, Ama, . . . huli ta itinago mo an mga bagay na ini sa mga madonong asin may inadalan asin ipinahayag mo iyan sa mga aking sadit.” (Mateo 11:25) Ipinapasabot ni Jehova an saiyang mga katuyohan asin personalidad sa mga sinsero asin mapakumbaba an puso. (1 Corinto 1:26-28) Nakakamtan ta an saiyang nagpoprotehir na pangangataman, asin tinotokdoan nia kita na pakinabangon an satong sadiri​—na kamtan an lubos na pakinabang sa satong buhay. Logod na aprobetsaran niato an lambang oportunidad na rumani ki Jehova, na inaapresyar an dakol  niang probisyon na mamidbid sia nin mas dayupot.

17. Paano niato naaaraman nin mas lubos an mga kualidad ni Jehova?

¹⁷ Nagsurat si Pablo sa linahidan na mga Kristiano: “Kita nagpapabanaag na siring sa mga salming kan kamurawayan ni Jehova paagi sa mga lalauogon na daing tahob [asin] nagkakariliwat sa parehong ladawan hale sa kamurawayan pasiring sa kamurawayan.” (2 Corinto 3:18) Langitnon man o daganon an satong paglaom, mientras na orog niatong namimidbid si Jehova​—an saiyang mga kualidad asin personalidad na ihinayag sa Biblia—​orog man kitang nagigin arog nia. Kun may pag-apresyar na hinohorophorop niato an buhay, an ministeryo, asin an mga katokdoan ni Jesu-Cristo, ikakapabanaag niato nin mas lubos an mga kualidad ni Jehova. Abaang kagayagayahan na maaraman na kita nakakatao nin kaomawan sa satong Dios, na an kamurawayan hinihingoa niato na ipabanaag!

Nagigirumdoman daw Nindo?

• Taano ta natakot an mga Israelita na helingon an kamurawayan nin Dios na ipinabanaag ni Moises?

• Sa anong mga paagi “natatahoban” an maogmang bareta kaidtong enot na siglo? sa satong kaaldawan?

• Paano niato ipinapabanaag an kamurawayan nin Dios?

[Mga Hapot Para sa Pag-adal]

[Ritrato sa pahina 19]

An mga Israelita dai makaturuhok sa lalauogon ni Moises

[Mga Ritrato sa pahina 21]

Arog ki Pablo, an dakol na dati kontra sa katotoohan nin Dios naglilingkod na ngonyan sa Saiya

[Mga Ritrato sa pahina 23]

Ikinakaogmang marhay kan mga lingkod ni Jehova na ipabanaag an kamurawayan nin Dios