Mga Hapot Hale sa mga Parabasa

Sa suanoy na Israel, ano an kahulogan kan milagrosong liwanag na inaapod kun beses na Shechinah na naheheling sa Kabanalbanale kan tabernakulo asin kan templo?

Si Jehova, an mamomoton na Ama asin Protektor kan saiyang banwaan, pinapangyaring malinaw na maheling kan Israel an saiyang presensia. An sarong paagi na ginibo nia iyan iyo an paggamit nin sarong makinang na panganoron na konektadong marhay sa lugar nin pagsamba sa saiya.

An nakakaapod nin atension na liwanag na iyan nagrerepresentar sa dai naheheling na presensia ni Jehova. Iyan naheling sa Kabanalbanale kan tabernakulo sagkod kan templo na itinogdok ni Salomon. An milagrosong liwanag na iyan dai nangangahulogan na si Jehova pisikal na presente duman. An Dios dai magkakaigo sa arin man na edipisyo na ginibo nin mga tawo. (2 Cronica 6:18; Gibo 17:24) An liwanag na ini na lihis sa natural duman sa santuaryo nin Dios puedeng magtao nin kompiansa sa halangkaw na saserdote asin paagi sa saiya sa gabos na Israelita na an nagpoprotehir na presensia ni Jehova inaasikaso sinda asin an saindang mga pangangaipo.

Sa Aramaiko kaidtong pakalihis kan panahon kan Biblia, an liwanag na ini inaapod na Shechinah (shekhi·nahʹ), sarong termino na nangangahulogan “an saro na nag-eerok” o “an erokan.” An terminong ini mayo sa Biblia alagad manonompongan sa Aramaikong mga traduksion kan Hebreong Kasuratan, na midbid man bilang mga Targum.

Kan nagtatao nin mga instruksion para sa pagtogdok kan tabernakulo, sinabi ni Jehova ki Moises: “Ibubugtak mo an takop sa ibabaw kan Kaban, asin sa laog kan Kaban ibubugtak mo an pagpatotoo na itatao ko sa saimo. Asin duman ako maatubang sa saimo asin makikipag-olay sa saimo hale sa ibabaw kan takop, hale sa pag-oltanan kan duwang kerubin na yaon sa ibabaw kan kaban.” (Exodo 25:​21, 22) An nasambitan na Kaban napapatos nin bulawan asin yaon sa Kabanalbanale. Igwa nin duwang bulawan na kerubin sa takop kan Kaban.

Hale saen na makikipag-olay si Jehova? Sia an nagtao kan simbag kan sinabi nia ki Moises: “Mapaheling ako sa sarong panganoron sa ibabaw kan takop.” (Levitico 16:2) An panganoron na ini nakapirme sa ibabaw kan sagradong Kaban sa pag-oltanan kan duwang kerubin na bulawan. Dai ihinahayag kan Biblia kun gurano kalangkaw an panganoron na iyan o kun sagkod saen an naaabot kaiyan sa ibabaw kan mga kerubin.

Iniilawan kan maliwanag na panganoron na ini an Kabanalbanale. Sa katunayan, iyan sana an pinaghahalean nin liwanag sa kuartong iyan. An halangkaw na saserdote nakikinabang sa liwanag kun minalaog sia sa kalaoglaoging kuartong iyan sa Aldaw nin Pagbayad sa Kasalan. Sia nagtitindog sa atubangan kan presensia ni Jehova.

Igwa daw nin ano man na kahulogan para sa mga Kristiano an milagrosong liwanag na ini? Naheling ni apostol Juan sa bisyon an sarong siudad kun saen “mayo dian nin banggi.” An siudad iyo an Bagong Jerusalem, na kompuesto nin linahidan na mga Kristiano na binuhay liwat tanganing mamahala kaiba ni Jesus. An liwanag kan simbolikong siudad na ini bakong hale sa saldang o bulan. An kamurawayan ni Jehova Dios direktang nagtatao nin liwanag sa organisasyon na ini, kun paanong pinapagliwanag kan panganoron na Shechinah an Kabanalbanale. Siring man, an Kordero, si Jesu-Cristo, iyo an “ilaw” kan siudad. Dangan, an siudad na ini nagpapasirang kan espirituwal na liwanag asin pabor kaiyan sa binalukat na mga tawo hale sa gabos na nasyon tanganing giyahan sinda.​—Kapahayagan 21:22-25.

Huling inaako ninda an siring kaabundang bendisyon hale sa itaas, an mga parasamba ki Jehova makakasierto na si Jehova an saindang nagpoprotehir na Pastor asin mamomoton na Ama.