“Puede Kutana Sindang Makatalingkas Tolos-Tolos”

SI Geneviève de Gaulle, an sobrina ni Charles de Gaulle, na dating presidente kan Pransia, personal na nakamidbid an mga Saksi ni Jehova sa kampo de konsentrasyon na Nazi sa Ravensbrück, amihanan na Alemania. Isinurat nia an mga tataramon sa itaas sa sarong surat kan Agosto 1945.

An kampo de konsentrasyon sa Auschwitz, Polandia, pinatalingkas kan Enero 27, 1945. Poon kan 1996, an petsang ini nagin aldaw nin paggirumdom sa Alemania para sa mga biktima kan Ikatolong Reich ni Hitler.

Durante kan sarong opisyal na diskurso sa paggirumdom kan Enero 27, 2003, an presidente kan Parlamento kan Estado nin Baden-Württemberg, si Peter Straub, nagkomento: “An gabos na nagdusa nin paglamag huli sa saindang relihioso asin politikal na mga paniniwala patin andam na akoon an kagadanan imbes na magpasakop maninigo sa dakula niatong paggalang, paggalang na masakit na ipahayag sa tataramon. An Mga Saksi ni Jehova sana an relihion na biyong nagsayumang umoyon sa mga kahagadan kan rehimen ni Hitler: Dai sinda nag-itaas kan saindang kamot sa pagsaludo ki Hitler. Nagsayuma sindang manumpa nin pagsuportar ‘ki Hitler asin sa Estado,’ kun paanong nagsayuma sindang magserbisyo sa militar asin sa patrabaho kan gobyerno. Asin an saindang mga aki dai nakiayon sa Mobimientong Hobenes ni Hitler.”

Si Jesu-Cristo nagsabi manongod sa saiyang mga parasunod: “Sinda bakong kabtang kan kinaban, kun paanong ako bakong kabtang kan kinaban.” (Juan 17:16) Huli kaini, an paninindogan kan Mga Saksi ni Jehova daing ibang basehan kundi relihion. Si Straub nagpapadagos: “An mga Saksi ni Jehova, na kinaipuhan na magbugtak nin lilang triangulo sa saindang gubing bilang mga bilanggo sa kampo de konsentrasyon, an solamenteng mga bilanggo na puede kutanang taposon an saindang pagkabilanggo asin makalikay sa pagkagadan bilang martir. An pagpirma sa sarong deklarasyon na dinedeharan ninda an saindang pagtubod supisyente na.”

Para sa dakulang mayoriya kan mga Saksi, an pagdehar sa saindang pagtubod biyong dai puede. Huli kaini, mga 1,200 sa sainda an nagadan durante kan panahon na Nazi. Dos sientos setenta an ginadan bilang mga habong magsoldados huli sa konsensia. Dai sana ninda itinaram kundi ginibo talaga ninda an mga tataramon na: “Dapat na kuyogon niamo an Dios bilang namamahala imbes na mga tawo.”​—Gibo 5:29.

An mga Saksi ni Jehova bakong ekstraordinaryong mga tawo, siring kan sinabi ni Ulrich Schmidt, presidente kan Parlamento kan Estado nin North Rhine-Westphalia. Sinasambit an saiyang pahayag, an brosyur na Landtag Intern inaapod sinda na “ordinaryong mga tawo na, sa pagsunod sa saindang konsensia, marigon na nanindogan para sa saindang relihiosong mga paniniwala, nagpaheling nin kosog nin boot bilang siudadano, asin nagkontra sa ideolohiya huli sa Kristianong kombiksion.” Makakasierto kita na si Jehova Dios naggagayagaya sa gabos na nagdadanay na maimbod sa saiya sa irarom nin depisil na mga kamugtakan. Sa Talinhaga 27:​11, mababasa niato: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”

[Picture Credit Line sa pahina 30]

Sa karahayan nin boot kan United States Holocaust Memorial Museum