Sarong Ley nin Pagkamoot na Nasa mga Puso
Sarong Ley nin Pagkamoot na Nasa mga Puso
“Ibubugtak ko sa laog ninda an sakong ley, asin sa saindang puso iyan isusurat ko.”—JEREMIAS 31:33.
1, 2. (a) Ano an pag-oolayan niato ngonyan? (b) Paano ihinayag ni Jehova an saiyang sadiri sa Bukid nin Sinai?
SA NAENOT na duwang artikulo, naaraman niato na kan magbaba si Moises hale sa Bukid nin Sinai, an saiyang lalauogon nagsinag nin banaag kan kamurawayan ni Jehova. Pinag-olayan man niato an tahob na ginamit ni Moises. Pag-olayan niato ngonyan an sarong konektadong bagay na may kahulogan para sa mga Kristiano ngonyan.
2 Kan si Moises yaon sa itaas kan bukid, nag-ako sia nin mga instruksion hale ki Jehova. Mantang tiripon sa atubangan kan Bukid nin Sinai, an mga Israelita nakaheling nin kahangahangang pagkahayag kan Dios mismo. “Nagpoon na umabot an mga dagoldol asin kikilat, asin an mahibog na panganoron sa alitoktok kan bukid patin makosogon na tanog nin amodyong, kaya an gabos na yaon sa kampo pinagtakigan. . . . Asin nag-aso an bilog na Bukid nin Sinai, huli ta si Jehova huminilig dian sa kalayo; asin an aso kaiyan padagos na nag-iitaas siring sa aso nin horno, asin an bilog na bukid natatanyog nin labi-labi.”—Exodo 19:16-18.
3. Paagi sa ano itinao ni Jehova sa Israel an Sampulong Togon, asin ano an nasabotan kan nasyon na iyan?
3 Nagtaram si Jehova sa banwaan paagi sa sarong anghel, na itinao an inapod na Sampulong Togon. (Exodo 20:1-17) Huli kaini, daing duda na gikan sa Makakamhan sa Gabos an mga ley na ini. Isinurat ni Jehova an mga togon na ini sa mga tabla nin gapo na pinasa ni Moises kan maheling nia an mga Israelita na nagsasaramba sa bulawan na ogbon na baka. Isinurat giraray ni Jehova sa gapo an mga togon na iyan. Sa panahon na iyan, pagbaba ni Moises dara an mga tabla nin gapo, an saiyang lalauogon nagsisinag. Kaidto, masasabotan na kan gabos na an mga ley na iyan igwa nin dakulaon na kahulogan.—Exodo 32:15-19; 34:1, 4, 29, 30.
4. Taano ta may dakulang importansia an Sampulong Togon?
4 An duwang tabla nin gapo na nasusuratan kan Sampulong Togon ibinugtak sa laog kan kaban kan tipan na yaon sa laog kan kuartong Kabanalbanale
kan tabernakulo asin kan huri, kan templo. Sinasabi kan mga ley na nakasurat dian an mga pinakaprinsipyo kan tipan kan Ley ni Moises asin iyan an nagin basehan para sa teokratikong pag-administrar sa sarong nasyonal na gobyerno. Ebidensia iyan na si Jehova igwa nin relasyon sa sarong espesipikong banwaan, sarong piniling banwaan.5. Sa anong mga paagi ipinabanaag kan mga ley nin Dios sa Israel an saiyang pagkamoot?
5 Dakol an ihinahayag kan mga ley na iyan manongod ki Jehova, partikular na an pagkamoot nia sa saiyang banwaan. Iyan nagin nanggad mahalagang marhay na balaog para sa mga nagkukuyog dian! Sarong nag-espesyalisar an nagsurat: “Mayo nin sistema sa moral na ginibo noarin man nin mga tawo bago o poon kaidto . . . na makakapareho, asin lalo nang dai makakapantay, o makakalabi, sa sampulong togon na ini nin Dios.” May labot sa Ley ni Moises sa kabilogan, si Jehova nagsabi: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan, huli ta sadiri ko an bilog na daga. Asin kamo mismo magigin kahadean nin mga saserdote asin banal na nasyon para sa sako.”—Exodo 19:5, 6.
Sarong Ley na Nakasurat sa Puso
6. Anong ley an may orog na halaga kisa mga ley na nakasurat sa gapo?
6 Iyo, an mga ley na idto nin Dios igwa nin dakulang halaga. Pero aram daw nindo na an linahidan na mga Kristiano igwa nin sarong bagay na orog nanggad na mahalaga kisa mga ley na nakasurat sa gapo? Ihinula ni Jehova an paggibo nin sarong bagong tipan na bakong arog kan tipan nin Ley na ipinakipagtipan sa nasyon nin Israel. “Ibubugtak ko sa laog ninda an sakong ley, asin sa saindang puso iyan isusurat ko.” (Jeremias 31:31-34) Si Jesus, an Parapangoltanan kan bagong tipan, dai personal na nagtao nin nasusurat na kodigo nin ley sa saiyang mga parasunod. Itinadom nia an mga ley ni Jehova sa isip asin puso kan saiyang mga disipulo paagi sa mga bagay na saiyang sinabi asin ginibo.
7. Kiisay enot na itinao “an ley kan Cristo,” asin siisay kan huri an maogmang nag-ako kaiyan?
7 An ley na ini inaapod na “ley kan Cristo.” Iyan enot na itinao, bakong sa nasyon kan natural na Israel, na mga gikan ni Jacob, kundi sa sarong espirituwal na nasyon, an “Israel nin Dios.” (Galacia 6:2, 16; Roma 2:28, 29) An Israel nin Dios kompuesto kan mga Kristiano na linahidan nin espiritu. Pag-abot nin panahon, inibanan sinda nin “sarong dakulang kadaklan” hale sa gabos na nasyon na naghihingoa man na sambahon si Jehova. (Kapahayagan 7:9, 10; Zacarias 8:23) Bilang “sarong aripompon” na sakop nin “sarong pastor,” maogmang inaako kan duwang grupong iyan “an ley kan Cristo,” na tinotogotan iyan na maggiya sa gabos nindang ginigibo.—Juan 10:16.
8. Ano an sarong pagkakalaen kan Ley ni Moises asin kan ley kan Cristo?
8 Bakong arog kan natural na mga Israelita, na obligadong kuyogon an Ley ni Moises huli sa pagkamundag bilang Israelita, an mga Kristiano nagdadanay na sakop kan ley kan Cristo huling
iyan pinili ninda, asin an mga bagay na arog kan rasa asin lugar na namundagan mayo na nin halaga. Pinag-aadalan ninda an manongod ki Jehova asin sa saiyang mga dalan patin naghihimuyawot sindang gibohon an saiyang kabotan. Huling nasa “laog ninda” an ley nin Dios, na garo baga nakasurat “sa saindang puso,” an pagkuyog kan linahidan na mga Kristiano sa Dios bakong dahel sana ta kaya niang kastigohon an mga nakikisuway; ni kinukuyog sia ninda huli sana sa pakamate nin obligasyon. An saindang pagkuyog nakagamot sa sarong bagay na mas pundamental asin orog nanggad na mapuersa, asin an mga kabilang sa ibang karnero makinuyog man huli ta an ley nin Dios yaon sa puso ninda.Mga Ley na Nakabasar sa Pagkamoot
9. Paano ipinaheling ni Jesus na an pagkamoot an pinakaubod kan mga ley ni Jehova?
9 An pinakaubod kan gabos na ley asin regulasyon ni Jehova puedeng sumaryohon sa sarong tataramon: pagkamoot. Iyan nagin asin magigin pirmeng mahalagang marhay na kabtang kan dalisay na pagsamba. Kan hapoton kun arin an nangongorog sa gabos na togon sa Ley, si Jesus nagsimbag: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” An ikaduwa: “Kamotan mo an saimong kapwa nin siring sa saimo man sana.” Dangan sinabi nia: “Sa duwang togon na ini nasasarig an bilog na Ley, asin an Mga Propeta.” (Mateo 22:35-40) Sa siring, ipinaheling ni Jesus na nakabasar sa pagkamoot, bako sanang an Ley saka an Sampulong Togon, kundi an bilog na Hebreong Kasuratan.
10. Paano niato naaaraman na an pagkamoot prinsipal na kabtang kan ley kan Cristo?
10 Prinsipal na kabtang man daw kan ley na nasa puso kan mga Kristiano an pagkamoot sa Dios asin sa kapwa? Iyo nanggad! Kalabot sa ley kan Cristo an odok sa pusong pagkamoot sa Dios Juan 13:34, 35; 15:12, 13) Pinagbotan pa ngani sinda ni Jesus na kamotan an saindang mga kaiwal.—Mateo 5:44.
asin kabale an sarong bagong pagboot—an mga Kristiano dapat na magkaigwa nin mapagsakripisyong pagkamoot sa lambang saro. Dapat sindang mamoot nin arog kan pagkamoot ni Jesus, asin gikan sa boot niang itinao an saiyang buhay para sa saiyang mga katood. Tinokdoan nia an saiyang mga disipulo na kamotan an Dios asin kamotan an lambang saro, siring kan pagkamoot nia sa sainda. An pambihirang pagkamoot na ipinapaheling ninda sa lambang saro iyo an pangenot na kualidad na nagpapamidbid sa tunay na mga Kristiano. (11. Paano ipinaheling ni Jesus an pagkamoot sa Dios sagkod sa katawohan?
11 Itinao ni Jesus an sangkap na halimbawa sa pagpaheling nin pagkamoot. Bilang makakamhan na espiritung linalang sa langit, maogma niang inako an oportunidad na paoswagon an intereses kan saiyang Ama digdi sa daga. Apuera sa pagtao kan saiyang buhay bilang tawo tangani na an iba mabuhay nin daing sagkod, tinokdoan nia an mga tawo kun paano sinda maninigo na mamuhay. Sia mapakumbaba, maboot, asin makonsiderasyon, na tinatabangan an mga nagagabatan asin inaapi. Nagtao man sia nin “mga tataramon nin buhay na daing katapusan,” na daing kapagalan na tinabangan an iba na mamidbid si Jehova.—Juan 6:68.
12. Taano ta masasabi na magkakonektar na marhay an pagkamoot sa Dios asin sa kapwa?
12 An totoo, an pagkamoot sa Dios asin sa kapwa magkakonektar na marhay. Si apostol Juan nagsabi: “An pagkamoot gikan sa Dios . . . Kun an siisay man nagsasabi: ‘Namomoot ako sa Dios,’ pero naoongis sia sa saiyang tugang, sia putikon. Huli ta an dai namomoot sa saiyang tugang, na saiyang naheheling, dai puede na namomoot sa Dios, na dai nia naheheling.” (1 Juan 4:7, 20) Si Jehova an gikanan sagkod an pinakapersonipikasyon nin pagkamoot. An gabos niang ginigibo impluwensiado nin pagkamoot. Kita namomoot huli ta kita ginibo sa saiyang ladawan. (Genesis 1:27) Paagi sa pagpaheling nin pagkamoot sa satong kapwa, ipinapaheling niato an satong pagkamoot sa Dios.
An Pagkamoot Nangangahulogan nin Pagkuyog
13. Tanganing mamotan niato an Dios, ano an dapat na enot niatong gibohon?
13 Paano niato mamomotan an Dios, na dai niato naheheling? An importanteng enot na lakdang iyo an mamidbid sia. Dai talaga kita puedeng mamoot o magtiwala sa dai kamidbid. Sa siring, ineenkaminar kita kan Tataramon nin Dios na mamidbid an Dios paagi sa pagbasa kan Biblia, paagi sa pamimibi, asin paagi sa pakikiasosyar sa mga nakakamidbid na asin namomoot na sa saiya. (Salmo 1:1, 2; Filipos 4:6; Hebreo 10:25) Espesyalmenteng mahalaga an apat na Ebanghelyo, ta ihinahayag kaiyan an personalidad ni Jehova na nababanaag sa buhay asin ministeryo ni Jesu-Cristo. An satong pagmawot na kuyogon an Dios asin arogon an saiyang personalidad lalong nagkokosog mantang namimidbid niato sia asin inaapresyar an pagkamoot na ipinaheling nia sa sato. Iyo, an pagkamoot sa Dios nangangahulogan nin pagkuyog.
14. Taano ta masasabi na an mga ley nin Dios dai nakakapagabat?
14 Kun may namomotan kitang mga tawo, aram ta an saindang mga gusto asin dai gusto, asin minagawe kita kaoyon kaiyan. Habo niatong mapaanggot an mga namomotan niato. “Ini iyo an boot sabihon kan pagkamoot sa Dios,” an isinurat ni apostol Juan, “na kuyogon niato an saiyang mga togon; pero an saiyang mga togon dai nakakapagabat.” (1 Juan 5:3) Dai iyan nakakapagabat, ni kadakol man iyan. An pagkamoot an naggigiya sa satong ginigibo. Dai niato kaipuhan na magtuom nin kadakol na susundon na magiya sa gabos niatong paghiro; an pagkamoot niato sa Dios an naggigiya sa sato. Kun namomotan niato an Dios, sarong kaogmahan na gibohon an saiyang kabotan. Sa siring, nakakamit niato an pag-oyon nin Dios, asin pinapakinabang niato an satong sadiri, ta an saiyang paggiya pirmeng para sa satong ikakarahay.—Isaias 48:17.
15. Ano an mapahiro sa sato na arogon si Jehova? Ipaliwanag.
15 An pagkamoot sa Dios nagpapahiro sa sato na arogon an saiyang mga kualidad. Kun namomotan niato an sarong tawo, naghahanga kita sa saiyang mga kualidad asin naghihingoa na Juan 14:9) Mantang kita nagkakaigwa nin kaaraman asin apresasyon ki Jehova asin sa saiyang Aki, napapahiro kita na magin arog ninda. An pagkamoot niato ki Jehova, kaiba an tabang kan saiyang banal na espiritu, mapangyari sa sato na ‘hubaon an daan na personalidad kaiba an mga gibo kaini, asin isulog an bagong personalidad.’—Colosas 3:9, 10; Galacia 5:22, 23.
magin arog nia. Isipon nindo an relasyon ni Jehova asin ni Jesus. Tibaad binilyon na taon sindang nagkaibanan sa langit. Hararom asin dalisay an pagkaminootan ninda. Sangkap na gayong naarog ni Jesus an saiyang langitnon na Ama kaya nasabi nia sa saiyang mga disipulo: “Sia na nakaheling sa sako nakaheling man sa Ama.” (Pagkamoot na Ginigibo
16. Paano ipinapaheling kan satong paghuhulit asin pagtotokdo an pagkamoot sa Dios asin sa kapwa?
16 Bilang mga Kristiano, tinotogotan niato an satong pagkamoot sa Dios asin sa kapwa na motibaron kitang makikabtang sa paghuhulit kan Kahadean asin paggibo nin disipulo. Sa paggibo kaiyan, pinapaogma niato si Jehova Dios, “na an kabotan iyo na an gabos na klase nin tawo makaligtas asin makaabot sa tamang kaaraman sa katotoohan.” (1 Timoteo 2:3, 4) Sa siring, makakanompong kita nin kagayagayahan sa pagtabang sa iba na ikasurat sa saindang puso an ley kan Cristo. Asin naoogma kitang marhay na pagmasdan mantang nababago an saindang personalidad tanganing ikapabanaag an mga kualidad ni Jehova. (2 Corinto 3:18) An totoo, an pagtabang sa iba na mamidbid an Dios an pinakamahalagang regalo na ikakatao niato sa sainda. An mga inaako an pakikikatood ni Jehova magkakamit kaiyan sa bilog na panahon na daing sagkod.
17. Taano ta madonong na pataluboon an pagkamoot sa Dios asin sa kapwa imbes na sa materyal na mga bagay?
17 Nabubuhay kita sa sarong kinaban na an materyal na mga bagay tinatawan nin dakulang halaga, namomotan pa ngani. Pero, an materyal na mga bagay bakong daing katapusan. Iyan puedeng Mateo 6:19) An Biblia nagpapatanid sa sato: “An kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:16, 17) Iyo, si Jehova magdadanay sagkod lamang, asin siring man an mga namomoot asin naglilingkod sa saiya. Bilang resulta, bako daw na mas madonong na pataluboon an pagkamoot sa Dios asin sa mga tawo kisa pagmaigotan na kamtan an mga bagay kan kinaban, na temporaryo man sana dawa sa pinakamarahay na kamugtakan?
habonon o malapa. (18. Paano ipinaheling nin sarong misyonera an mapagsakripisyong pagkamoot?
18 An mga nagmamaigot na gibohon an pagkamoot nagtatao nin kaomawan ki Jehova. Isipon nindo si Sonia, sarong misyonera sa Senegal. Tinokdoan nia sa Biblia an sarong babae na an ngaran Heidi, na naolakitan nin HIV kan agom nia na daing pagtubod. Pagkagadan kan agom nia, nabautismohan si Heidi, alagad dai nahaloy luminuya an saiyang salud, asin naospital sia dahel sa AIDS. Si Sonia nag-estorya: “Ginibo kan mga tawohan sa ospital an saindang pinakamakakaya, alagad dikit sinda. An mga boluntaryo hale sa kongregasyon an pinaasikaso kan saiyang mga pangangaipo sa ospital. Kan ikaduwang banggi, nagtorog ako sa banig kataed kan saiyang kama asin nagtabang ako sa pag-asikaso sa saiya sagkod na sia magadan. An doktor na namamahala nagsabi: ‘An pinakadakulang problema niamo iyo na maski an mga paryente parateng binabayaan an mga kapamilya kun maaraman ninda na an mga ini igwa nin AIDS. Taano ika, na bako man na paryente, bakong taga digdi, bako pa nganing kakolor, ta minaoyon na ibugtak sa peligro an saimong sadiri?’ Ipinaliwanag ko na para sa sako, si Heidi tunay ko nang tugang, na kadayupot na marhay na garo man sana saro an samong ina asin ama. Huling sia garo ko naman sana tugang, naogma ako na asikasohon sia.” Kulibat palan, si Sonia dai man naolakitan sa saiyang mamomoton na paghihingoa na asikasohon si Heidi.
19. Huling nasa puso niato an ley nin Dios, ano an maninigo na aprobetsaran niato?
19 Dakol na halimbawa nin mapagsakripisyong pagkamoot an maheheling sa mga lingkod ni Jehova. Daing nasusurat na kodigo nin ley na nagpapamidbid sa banwaan nin Dios ngonyan. Imbes, naheheling niato an kaotoban kan nakasurat sa Hebreo 8:10: “‘Iyo ini an tipan na ipapakipagtipan ko sa harong ni Israel pakalihis kan mga aldaw na idto,’ an sabi ni Jehova. ‘Ibubugtak ko an sakong mga ley sa saindang isip, asin sa saindang puso isusurat ko iyan. Asin ako magigin Dios ninda, asin sinda magigin sakong banwaan.’” Logod na pirme niatong pakamahalon an ley nin pagkamoot na isinurat ni Jehova sa satong puso, na inaaprobetsaran an lambang oportunidad na ipaheling an pagkamoot.
20. Taano an ley kan Cristo ta sarong rogaring na daing kaagid sa halaga?
20 Kanigoan na kagayagayahan na maglingkod sa Dios kaiba nin sarong pambilog na kinaban na kasararoan nin magturugang na nagpapaheling nin siring na pagkamoot! An mga nasa saindang puso an ley kan Cristo igwa nin daing kaagid sa halagang rogaring sa daing pagkamoot na kinaban na ini. Bako sanang nasa sainda an pagkamoot ni Jehova kundi ikinakaogma man nindang marhay an makosog na bogkos nin pagkamoot sa kasararoan nin magturugang. “Uya! Kanigoan karahay asin kanigoan kaogma na an magturugang mag-ontok na sararo!” Minsan ngani an mga Saksi ni Jehova nag-eerok sa dakol na nasyon, nagtataram nin dakol na lenguahe, asin nagrerepresentar sa dakol na kultura, igwa sinda nin pagkasararo sa relihion na mayo nin kapareho. An pagkasararong ini nagbubunga kan pabor ni Jehova. Nagsurat an salmista: “Dian [sa tahaw nin sarong banwaan na nagkakasararo sa pagkamoot] ipinagboot ni Jehova na mamugtak an bendisyon, an buhay pa ngani sagkod sa daing talaan na panahon.”—Salmo 133:1-3.
Masisimbag daw Nindo?
• Gurano kaimportante an Sampulong Togon?
• Ano an ley na nakasurat sa mga puso?
• Ano an kabtang nin pagkamoot sa “ley kan Cristo”?
• Sa anong mga paagi niato ikakapaheling an satong pagkamoot sa Dios asin sa kapwa?
[Mga Hapot Para sa Pag-adal]
[Ritrato sa pahina 25]
An mga ley kan mga Israelita nakasurat sa mga tabla nin gapo
[Mga Ritrato sa pahina 26]
Nasa puso kan mga Kristiano an ley nin Dios
[Ritrato sa pahina 28]
Si Sonia kaiba an sarong aking babae na taga Senegal sa pandistritong kombension kan 2004