An mga Menonita Naghanap kan Katotoohan sa Biblia

SARONG aga kan Nobyembre 2000, an nagkapirang misyonero kan Mga Saksi ni Jehova sa Bolivia nagtanaw sa bintana kan saindang sadit na istaran asin nakaheling nin sarong grupo nin mga lalaki asin babae na nakasulot nin simpleng mga gubing na ninenerbios na nakatindog sa may trangka. Kan binukasan kan mga misyonero an trangka, an enot na sinabi kan mga bisita iyo an, “Gusto ming maaraman an katotoohan sa Biblia.” An mga bisita mga Menonita. An mga lalaki nakasulot nin bado na overall, an mga babae nakasulot nin itom na tapi, asin nag-oorolay sinda sa sarong dialektong Aleman. Maheheling sa saindang mga mata an pagkatakot. Sige an kaheheling ninda kun nasundan sinda. Minsan siring, mantang pasakat pa sana sa paglaog sa harong, an saro sa mga hoben na lalaki nagsabi, “Gusto kong mamidbid an mga tawo na naggagamit kan ngaran nin Dios.”

Sa laog, an mga bisita nagpoon na mapamugtak an boot kan pinuestohan sinda nin meryenda. Hale sinda sa harayo asin napapasuway na kolonya nin mga paraoma. Duman, nakakaresibi sinda nin mga magasin na Torrengbantayan paagi sa koreo sa laog na nin anom na taon. “Nabasa mi na magkakaigwa nin paraiso sa daga. Ano totoo iyan?” an hapot ninda. Ipinaheling sa sainda kan mga Saksi an simbag kan Biblia. (Isaias 11:9; Lucas 23:43; 2 Pedro 3:​7, 13; Kapahayagan 21:​3, 4) “Sabi ko na!” an sabi nin sarong paraoma sa iba. “Totoo iyan. Magkakaigwa nin paraiso sa daga.” An iba nagpaparasabi: “Sa heling ko nanompongan na niato an katotoohan.”

Sairisay an mga Menonita? Ano an pinaniniwalaan ninda? Tanganing masimbag an mga hapot na ini, kaipuhan na balikan niato an ika-16 na siglo.

Sairisay an mga Menonita?

Kan mga taon nin 1500, an biglang paglakop nin pagtradusir asin pag-imprenta kan Biblia sa komun na lenguahe sa Europa nakapukaw sa kuminosog giraray na interes sa pag-adal kan Biblia duman. Hinaboan ni Martin Luther asin kan iba pang Repormador an dakol na katokdoan kan Iglesia Katolika. Pero, pinapagdanay kan bago pa sanang mabilog na mga iglesia nin Protestante an dakol na kaugalean na mayo sa Biblia. Halimbawa, linalaoman kan kadaklan na an lambang bagong mamundag na omboy babautismohan tanganing magin miembro kan iglesia. Minsan siring, nasabotan kan nagkapirang naghahanap kan katotoohan sa Biblia na an saro nagigin miembro sana kan Kristianong kongregasyon kun sia magibo nin may kabatidan na desisyon bago magpabautismo. (Mateo 28:​19, 20) An maigot na mga parahulit na Menonita na nagdanay sa paniniwalang ini nagpoon na magpasiring sa mga banwaan asin baryo na nagtotokdo kan Biblia  asin binabautismohan an mga nasa edad na. Huli kaini, inapod sindang mga Anabaptista, na nangangahulogan “mga nagbabautismo giraray.”

An saro na nag-asa sa mga Anabaptista sa saiyang paghanap sa katotoohan iyo si Menno Simons, sarong Katolikong padi sa baryo nin Witmarsum sa amihanan na kabtang kan Netherlands. Kan 1536 pinutol nia an gabos na koneksion nia sa iglesia asin nagin tawong hinahanting. Kan 1542 an Emperador kan Banal na Roma na si Carlos V nanuga mismo na matao nin 100 na guilder bilang premyo sa pagkaarestar ki Menno. Minsan siring, tinipon ni Menno an nagkapirang Anabaptista na magin mga kongregasyon. Dai nahaloy sia asin an saiyang mga parasunod inapod na mga Menonita.

An mga Menonita Ngonyan

Sa pag-agi nin panahon, dahel sa paglamag an rinibong Menonita nagharale sa Solnopan na Europa asin nagpasiring sa Amerika del Norte. Duman nagkaoportunidad sindang ipadagos an saindang paghanap sa katotoohan asin ipalakop an saindang mensahe sa dakol na iba pa. Alagad an naglalaad na kaigotan kan saindang mga apoon para sa progresibong pag-adal kan Biblia asin pampublikong paghuhulit nawara na sa kadaklan. An kadaklan nangangapot sa nagkapirang katokdoan na kontra sa Biblia, arog kan Trinidad, inmortalidad kan kalag nin tawo, asin kalayo sa impierno. (Eclesiastes 9:5; Ezequiel 18:4; Marcos 12:29) Ngonyan, an pagmimisyonero kan mga Menonita mas nakakonsentrar sa medikal asin sosyal na mga serbisyo kisa sa pag-ebanghelyo.

Kinakalkulo na igwa ngonyan nin mga 1,300,000 na Menonita na nag-iistar sa 65 nasyon. Pero, an mga Menonita sa presenteng panahon nagmomondo sa kawaran ninda nin pagkasararo, na ikinamondo man ni Menno Simons kaidtong dakol na siglo na an nakaagi. Kan Guerra Mundial I, an mga pagkakalaen sa opinyon manongod sa mga guerra sa kinaban nagin dahelan nin darakulang pagkabaranga. Dakol sa Amerika del Norte an nagsayumang magsoldados sa dahelan na basado sa Biblia. Alagad an An Introduction to Mennonite History nagsasabi: “Kan 1914 an dai pagsoldados sa pangenot ginibo sana kan mga iglesia nin Menonita sa Solnopan na Europa kan nakaagi.” Ngonyan, may mga grupo nin Menonita na mas dakol o mas dikit an sinunod na modernong mga paagi. An iba itinatakod pa man giraray an saindang mga gubing paagi sa mga hook and eye imbes na mga butones asin naniniwala na an mga lalaki dai maninigong mag-aris kan saindang mga barabas.

Ibinalyo nin nagkapirang grupo nin Menonita, na determinadong magin siblag sa modernong kinaban, an saindang mga komunidad sa mga lugar kun saen tinotogotan sinda kan lokal na mga gobyerno na mamuhay na mayo nin interbension. Halimbawa sa Bolivia, kinakalkulo na 38,000 na Menonita an nag-iistar sa dakol na harayong kolonya, na an kada saro may laen na mga susundon nin paggawe. May mga kolonya na ibinabawal an mga lunadan na de makina, na mga kabayo asin karetela sana an tinotogotan. May nagkapirang kolonya na ibinabawal an radyo, TV, asin musika. May mga nagbabawal pa ngani na mag-adal kan lenguahe kan nasyon na iniistaran ninda. “Tanganing magdanay kami sa irarom kan kontrol ninda, an mga parahulit na Menonita dai kami tinotogotan na mag-adal nin Kastila,” an komento nin sarong residente sa kolonya. An pagmate nin dakol inaapi sinda asin natatakot na marhay na papahaleon sinda sa komunidad​—sarong teribleng posibilidad para sa saro na nungkang nakaeksperyensia nin buhay sa luwas.

Kun Paanong Ikinasabwag an Sarong Banhi nin Katotoohan

Sa arog kaining kamugtakan na an sarong Menonitang paraoma na an ngaran Johann nakaheling nin sarong kopya kan magasin na Torrengbantayan sa harong kan saiyang kataed. An pamilya ni Johann nag-imigrar hale sa Canada pasiring sa Mejico asin kan huri sa Bolivia. Alagad kaidto pa nagmamawot na si Johann na may magtabang sa saiya sa paghanap kan katotoohan sa Biblia. Nakiolay sia na sublion an magasin.

Paghaloyhaloy, mantang yaon sa siudad tanganing magpabakal kan mga produkto nia sa oma, dinolok  ni Johann an sarong Saksi na nag-aalok nin An Torrengbantayan sa saod. Itinokdo sia kaini sa sarong misyonero na an tataramon Aleman, asin dai nahaloy nakakaresibi na si Johann nin An Torrengbantayan sa Aleman paagi sa koreo. Maingat na pinag-aadalan asin ipinapasapasa sa kada pamilya sa saiyang kolonya an kada isyu sagkod na maluma an magasin. Kun beses an mga pamilya nagtitiripon asin pinag-aadalan an sarong magasin na Torrengbantayan sagkod sa matangang banggi, na hineheling an sitadong mga teksto sa Biblia. Nakombensir si Johann na an Mga Saksi ni Jehova seguradong iyo an mga tawo na nagkakasararo sa paggibo kan kabotan nin Dios sa bilog na daga. Bago sia magadan, sinabihan ni Johann an saiyang agom asin mga aki: “Dapat na pirme nindong basahon An Torrengbantayan. Matatabangan kamo kaiyan na masabotan an Biblia.”

An nagkapira sa pamilya ni Johann nagpoon na makipag-olay sa saindang mga kataed manongod sa mga bagay na nanonodan ninda sa Biblia. “An daga dai malalaglag. Imbes, gigibohon iyan nin Dios na paraiso,” an sabi ninda. “Asin dai pinapasakitan nin Dios an mga tawo sa impierno.” Dai nahaloy an mga pag-orolay na ini naaraman kan mga parahulit kan iglesia, na naghuma sa pamilya ni Johann na hahaleon sinda sa pagkamiembro kun dai sinda mapondo. Paghaloyhaloy, durante nin sarong pag-orolay kan pamilya manongod sa pangigipit sa sainda kan mga namomoon na Menonita, nagtaram an sarong hoben na lalaki. “Dai ko aram kun taano ta nagrereklamo kita manongod sa mga namomoon sa satong iglesia,” an sabi nia. “Aram niato gabos kun arin an tunay na relihion, asin mayo kitang ginigibong ano man manongod kaiyan.” An mga tataramon na ini nakapahiro sa puso kan ama kan hoben na lalaking ini. Dai nahaloy, sampulo sa pamilya an nagplanong magbiahe nin sekreto tanganing hanapon an mga Saksi ni Jehova asin sa katapustapusi nakaabot sa istaran kan mga misyonero, siring kan nasambitan sa kapinonan.

Kan sumunod na aldaw, dinalaw kan mga misyonero an saindang bagong mga katood sa kolonya. An lunadan na de makina kan mga misyonero an solamenteng yaon sa tinampo. Mantang luway-luway sindang nagmamaneho na inaagihan an mga karetela na ginuguyod nin kabayo, may pagngalas na nakaheling sinda sa mga residente duman na may pagngalas man na nakaheling sa sainda. Dai nahaloy nakatukaw na sinda sa sarong lamesa kaiba an sampulong Menonita, na nagrerepresentar sa duwang pamilya.

Kan aldaw na idto, nag-apat na oras an pag-adal sa kapitulo 1 kan librong Kaaraman na Minagiya Pasiring sa Buhay na Daing Katapusan. * Sa kada parapo, naghahanap an mga paraoma nin dugang pang mga teksto sa Biblia asin gusto nindang maaraman kun ikinakaaplikar ninda nin tama an mga teksto. An kada hapot sa pag-adal sinusundan nin nagkapirang minutong pagpondo nguna, mantang an mga paraoma nag-oorolay-olay sa dialektong Aleman na inaapod na Low German, bago sumimbag sa katapustapusi an sarong parataram para sa grupo sa Kastila. Iyan sarong memorableng aldaw, alagad may paglamag na nagdadangadang. Mapapaatubang sinda sa mga pagbalo, arog kan nangyari ki Menno Simons kan pinonan nia an paghanap kan katotoohan sa Biblia haros limang siglo na an nakaagi.

Pag-atubang sa mga Pagbalo Para sa Katotoohan

Pakalihis nin pira sanang aldaw, an mga namomoon kan iglesia nagpasiring sa harong kan pamilya ni Johann na tinatawan nin ultimatum an mga interesado: “Naaraman mi na dinalaw kamo kan mga Saksi ni Jehova. Kaipuhan na pagbawalan nindo sindang bumalik, asin kun dai nindo itatao samo an saindang mga babasahon tanganing soloon, kamo hahaleon sa pagkamiembro.” Sarong beses pa sana sindang nakipag-adal kan Biblia sa mga Saksi, kaya ini masakit na pagbalo.

“Dai mi puedeng gibohon an hinahagad nindo,” an simbag kan saro sa mga payo kan pamilya. “An mga tawong idto nagdigdi tanganing tokdoan kami  sa Biblia.” Ano an nagin reaksion kan mga namomoon? Hinale sinda sa pagkamiembro huli sa pag-adal kan Biblia! Maringis nanggad ini. An kareta kan pabrika nin keso sa kolonya linampasan an harong kan sarong pamilya na dai kinokolekta an saindang gatas, na hinahale sa sainda an solamenteng pagbuhay ninda. An sarong payo nin pamilya hinale sa saiyang trabaho. An saro pa dai pinabakalan nin mga suplay sa tindahan kan kolonya, asin an saiyang dies anyos na aking babae pinahale sa eskuelahan. Pinalibotan nin mga kataed an sarong harong tanganing kuanon an agom na babae kan saro sa hoben na lalaki, na iiniinsistir ninda na dai sia puedeng magdanay na kaiba kan agom na lalaki na hinale sa pagkamiembro. Sa ibong kan gabos na ini, an mga pamilya na nag-aadal kan Biblia dai uminontok sa saindang paghanap kan katotoohan.

An mga misyonero padagos na nagmamaneho nin halawig serosemana tanganing gibohon an pag-adal sa Biblia. Nanompongan kan mga pamilya na nakakapakosog nanggad an mga pag-adal na idto! An nagkapirang miembro kan pamilya nagbibiahe nin duwang oras paagi sa kabayo asin karetela tanganing magin presente. Nakakapukaw nanggad sa boot na okasyon kan primerong imbitaran kan mga pamilya an saro sa mga misyonero na mamibi. Sa mga kolonyang ini an mga Menonita dai noarin man namimibi nin makosog, kaya dai pa lamang sinda nakadangog nin siisay man na namibi para sa sainda. Napaluha an mga lalaki. Asin maiimahinar daw nindo an saindang pag-usyoso kan an mga misyonero magdara nin sarong tape recorder? An musika nungkang tinotogotan sa saindang kolonya. Sinda naogmang marhay sa magagayon na Kingdom Melodies kaya nagdesisyon sinda na magkanta nin mga awit na pan-Kahadean pagkatapos kan kada pag-adal! Minsan siring, nagdadanay an hapot na, Paano sinda mabubuhay sa bago nindang kamugtakan?

Pakanompong nin Mamomoton na Kasararoan nin Magturugang

Huling putol na an koneksion sa saindang komunidad, an mga pamilya nagpoon na gumibo kan sadiri nindang keso. Tinabangan sinda kan mga misyonero na makakua nin mga parabakal. Naaraman nin sarong haloy nang Saksi sa Amerika del Norte na nagdakula sa sarong kolonya nin mga Menonita sa Amerika del Sur an mamondong kamugtakan kan mga pamilyang iyan. Nagkaigwa sia nin espesyal na pagmawot na tumabang. Mayo pang sarong semana, nag-eroplano sia pasiring sa Bolivia tanganing dalawon sinda. Apuera sa pagtao nin dakol na espirituwal na pagparigon sa boot, tinabangan nia an mga pamilya na bumakal nin sadiri nindang pik-ap tanganing makapasiring sinda sa mga pagtiripon sa Kingdom Hall asin madara man sa saod an mga produkto ninda sa oma.

“Depisil an buhay pagkatapos na isikwal kami sa komunidad. Minapasiring kami sa Kingdom Hall na mamondo an lalauogon,” an paggirumdom kan sarong miembro kan pamilya, “alagad minapuli kaming magayagaya.” Tunay nanggad, huminiro an lokal na mga Saksi asin nagtao nin pagsuportar. May mga nag-adal nin Aleman, asin an nagkapirang Saksi na an tataramon Aleman nagpasiring sa Bolivia hale sa Europa tanganing tumabang sa pamamayo sa Kristianong mga pagtiripon sa Aleman. Dai nahaloy, 14 hale sa komunidad nin mga Menonita an naghuhulit na kan maogmang bareta kan Kahadean sa iba.

Kan Oktubre 12, 2001, mayo pang sangtaon pakalihis kan enot na pagbisitang iyan sa istaran kan mga misyonero, 11 sa dating mga Anabaptistang ini an nabautismohan giraray, ngonyan bilang simbolo kan saindang pagdusay ki Jehova. Poon kaidto, dakol pa an nagpabautismo. Kan huri nagkomento an saro: “Poon kan manodan mi an katotoohan na hale sa Biblia, an pagmate mi garo kami mga oripon na nakatalingkas.” An saro pa nagsabi: “Dakol na Menonita an nagrereklamo sa kawaran nin pagkamoot sa saindang komunidad. Alagad an mga Saksi ni Jehova interesado sa lambang saro. Ligtas an pagmate ko kun kaibahan ninda.” Kun gusto nindong magkaigwa nin mas marahay na pakasabot sa katotoohan na hale sa Biblia, tibaad mapaatubang man kamo sa masakit na mga kamugtakan. Alagad kun hahagadon nindo an tabang ni Jehova asin ipapaheling an pagtubod asin kosog nin boot arog kan ginibo kan mga pamilyang ini, kamo man magigin mapanggana asin makakanompong nin kaogmahan.

[Nota sa Ibaba]

[Ritrato sa pahina 25]

Maogmang reaksion sa pakaresibi nin mga babasahon sa Biblia sa Aleman

[Ritrato sa pahina 26]

Minsan ngani kaidto pa ibinabawal an musika, sinda nagkakanta na ngonyan pagkatapos kan kada pag-adal sa Biblia