Mga Hapot Hale sa mga Parabasa

Ano an basehan sa pagsabi na an mga frase na siring kan “an saro na solamenteng daing kagadanan” asin an saro “na mayo ni saro sa mga tawo an nakaheling o makakaheling” nanonongod ki Jesus imbes na ki Jehova Dios?

Si apostol Pablo nagsurat: “An pagkahayag na ini ipapaheling sa itinalaan na kapanahonan kaiyan kan maogma asin iyo sanang Paraboot, sia an Hade kan mga namamahala bilang mga hade asin Kagurangnan kan mga namamahala bilang mga kagurangnan, an saro na solamenteng daing kagadanan, na nag-eerok sa dai maranihan na liwanag, na mayo ni saro sa mga tawo an nakaheling o makakaheling.”​—1 Timoteo 6:​15, 16.

An mga komentarista sa Biblia nangangatanosan sa pankagabsan: ‘Paanong an mga frase na siring kan “an saro na solamenteng daing kagadanan,” an “iyo sanang Paraboot,” asin an saro “na mayo ni saro sa mga tawo an nakaheling o makakaheling” daing ibang itinotokdo kundi an Makakamhan sa Gabos?’ Totoo, an siring na mga termino puedeng gamiton tanganing iladawan si Jehova. Minsan siring, ipinaparisa kan konteksto na sa 1 Timoteo 6:​15, 16, an espesipikong pinapanongdan ni Pablo iyo si Jesus.

Sa katapusan kan bersikulo 14, nasambitan ni Pablo an ‘pagkahayag kan satong Kagurangnan na Jesu-Cristo.’ (1 Timoteo 6:14) Huli kaini, kan magsurat si Pablo sa bersikulo 15 na “an pagkahayag na ini ipapaheling sa itinalaan na kapanahonan kaiyan kan maogma asin iyo sanang Paraboot,” nagtataram sia manongod sa pagkahayag ni Jesus, bakong ni Jehova Dios. Kun siring, siisay an “iyo sanang Paraboot”? Garo baga rasonableng magkonklusyon na si Jesus iyo an Paraboot na sinasambit ni Pablo. Taano man? Sa konteksto malinaw na ikinokomparar ni Pablo si Jesus sa mga tawong namamahala. Siring kan isinurat ni Pablo, si Jesus talaga an “Hade kan mga [tawong] namamahala bilang mga hade asin Kagurangnan kan mga [tawong] namamahala bilang mga kagurangnan.” * Iyo, kun ikokomparar sa sainda, si Jesus an “iyo sanang Paraboot.” Itinao ki Jesus an “pamamahala asin dignidad patin kahadean, tanganing an mga banwaan, mga grupo nasyonal asin mga lenguahe gabos maglingkod sa saiya.” (Daniel 7:14) Mayo nin tawong paraboot na makakapaghingako nin arog kaiyan!

Kumusta man an fraseng “an saro na solamenteng daing kagadanan”? Sa giraray, ginigibo an pagkomparar ki Jesus asin sa mga tawong hade. Mayo nin mga namamahala sa daga na makakapaghingako na sinda tinawan nin pagkadaing kagadanan, alagad si Jesus iyo. Si Pablo nagsurat: “Aram niato na si Cristo, ngonyan na binuhay na sia liwat hale sa mga gadan, dai na magagadan; an kagadanan dai na makakadaog sa saiya.” (Roma 6:9) Huli kaini, si Jesus an enot na ilinadawan sa Biblia na nag-ako nin balaog na pagkadaing kagadanan. Sa katunayan, sa panahon kan pagsurat kaiyan ni Pablo, si Jesus sana an tinawan nin buhay na dai malalaglag.

Maninigo man na girumdomon na magigin sala kun sasabihon ni Pablo na si Jehova Dios an solamenteng daing kagadanan, huling si Jesus mayo man nin kagadanan kan isurat ni Pablo an mga tataramon na iyan. Alagad puedeng sabihon ni Pablo na si Jesus an solamenteng daing kagadanan kun ikokomparar sa mga namamahala sa daga.

Dugang pa, totoo nanggad na pagkatapos na si Jesus buhayon liwat asin sumakat sa langit, puede siang iladawan bilang saro “na mayo ni saro sa mga tawo an nakaheling o makakaheling.” Totoo, maheheling si Jesus kan saiyang linahidan na mga disipulo pagkagadan mismo ninda dangan pagkabuhay liwat sa langit bilang espiritung mga linalang. (Juan 17:24) Alagad mayong tawo sa daga na makakaheling ki Jesus sa saiyang pinamuraway na kamugtakan. Huli kaini, puede talagang sabihon na poon kan pagkabuhay liwat asin pagsakat ni Jesus, “mayo ni saro sa mga tawo” an aktuwal na nakaheling ki Jesus.

Totoo, sa primero, garo baga an deskripsion sa 1 Timoteo 6:​15, 16 puedeng umaplikar sa Dios. Alagad an konteksto kan mga tataramon ni Pablo​—kaiba an suporta kan iba pang teksto​—nagpapaheling na an pinapanongdan ni Pablo iyo si Jesus.

[Nota sa Ibaba]