Estorya nin Buhay

Pagtagal Bilang Soldados ni Cristo

ISINAYSAY NI YURII KAPTOLA

“Kombensido na ako ngonyan na talagang may pagtubod ka!” An mga tataramon na iyan dai linalaoman an pinaghalean​—sarong opisyal sa hukbong Sobyet​—asin nakaparigon iyan sa boot ko sa tama nanggad na panahon. Napapaatubang ako sa halawig na sentensia nin pagkabilanggo asin odok akong nakikimaherak sa tabang ni Jehova. Napapaatubang ako sa halawig na pakikipaglaban na nangangaipo nin pakatagal asin determinasyon.

NAMUNDAG ako kan Oktubre 19, 1962, asin nagdakula sa solnopan na parte kan Ucrania. Kan taon man sanang iyan, an sakong ama, na Yurii man an ngaran, nakamidbid an mga Saksi ni Jehova. Dai nahaloy sia an nagin enot na parasamba ki Jehova sa samong baryo. An saiyang aktibidad narisa kan mga opisyal na nagkokontra sa mga Saksi ni Jehova.

Minsan siring, iginagalang kan kadaklan sa samong mga kataed an sakong mga magurang huli sa saindang Kristianong mga kualidad asin pagmakolog sa iba. Inaaprobetsaran kan sakong mga magurang an lambang oportunidad na itadom sa sakong tolong tugang na babae asin sa sako an pagkamoot sa Dios poon sa pagkaaki, asin nakatabang ini sa sako na atubangon an dakol na kadepisilan sa eskuelahan. Luminataw an saro sa siring na kadepisilan kan an lambang estudyante kaipuhan na maglaag nin tsapa na nagpapamidbid sa saiya bilang saro sa Mga Aki nin Oktubre ni Lenin. Huli sa sakong neutralidad bilang Kristiano, dai ako naglaag kan tsapa asin kun siring napalaen na marhay.​—Juan 6:15; 17:16.

Paghaloyhaloy, kan ako nasa ikatolong grado, hinagad sa gabos na estudyante na mag-ayon sa organisasyon nin mga hoben na Komunista na inaapod na Hoben na mga Payunir. Sarong aldaw an samong klase dinara sa natad kan eskuelahan  para sa seremonya sa pagpalista. Kinakatakotan ko iyan, huling inaasahan ko nang pag-oolog-ologon asin aanggotan ako. An gabos apuera sa sako nagdara nin kanya-kanyang bago, pulang baliog nin Payunir, asin an mga estudyante nagtirindog sa sarong halabang raya sa atubangan kan prinsipal, mga maestra, asin mga estudyante sa mas haralangkaw na grado. Kan sabihan an mga estudyante sa mas haralangkaw na grado na ibogkos an baliog sa samong liog, duminuko ako asin humineling sa ibaba, na naglalaom na mayong makarisa sa sako.

Dinara sa Hararayong Bilanggoan

Kan ako 18 anyos, nasentensiahan akong mabilanggo nin tolong taon huli sa pagpapadanay nin Kristianong neutralidad. (Isaias 2:4) Sa enot na taon ibinilanggo ako sa banwaan nin Trudovoye, sa Distrito nin Vinnitskaya sa Ucrania. Mantang yaon duman, nakamidbid ko an mga 30 pang Saksi ni Jehova. Iinasignar kami nin manduwaduwa sa suway-suway na grupo nin mga trabahador, huli ta gustong olangon kan mga autoridad an samong pakikiasosyar sa lambang saro.

Kan Agosto 1982, kami ni Eduard​—saro pang Saksi​—ilinunad sa tren sa bilanggoan na mga bagon pasiring sa amihanan na Kabukidan kan Urales kaiba an sarong grupo nin iba pang bilanggo. Sa laog nin walong aldaw tinios mi an mainiton asin surusuan na marhay na kamugtakan sagkod na makaabot kami sa Bilanggoan nin Solikamsk, sa Distrito nin Permskaya. Kami ni Eduard ilinaag sa magkalaen na selda. Pakalihis nin duwang semana, dinara pa ako paamihanan sa Vels, sa rehion nin Krasnovishersky.

Uminabot an samong linulunadan sa kamatangaan nin banggi, asin madiklom na marhay. Apisar na madiklomon, pinagbotan nin sarong opisyal an samong grupo na magbalyo sa salog sakay nin baroto. Dai mi naheheling an salog ni an baroto! Pero, nagkapkap kami sagkod na manompongan mi an baroto asin, minsan ngani natatakot, nahimo ming makabalyo sa salog. Kan yaon na kami sa ibong na pangpang, sinusog mi an liwanag na naheling mi sa kaharaning bulod, kun saen nakakua kami nin pira sanang tolda. Ini an samong magigin bagong istaran. Nag-istar ako sa medyo dakulang tolda kaiba an mga 30 pang bilanggo. Kun tiglipot, tinitios mi an temperatura na kun beses biglang minababa sagkod sa -40 grado Celsio, asin an tolda daing gayo nakakatao nin kaginhawahan. An pangenot na trabaho kan mga preso pagpalod nin mga kahoy, alagad an trabaho ko pagtogdok nin mga payag-payag para sa mga bilanggo.

Nakaabot an Espirituwal na Kakanon sa Samong Harayoon na Kolonya

Ako sana an Saksi sa kolonyang iyan; pero dai ako pinabayaan ni Jehova. Sarong aldaw uminabot an sarong padara hale sa sakong ina, na kaidto nag-iistar pa man giraray sa solnopan na Ucrania. Kan bukasan kan guardia an padara, an enot na naheling nia iyo an sarong sadit na Biblia. Kinua nia iyan asin binuklat an mga pahina. Nag-isip ako kan sakong sasabihon tanganing dai kompiskaron an espirituwal na kayamanan na ini. “Ano ini?” an biglang ihinapot kan guardia. Bago pa ako makaisip nin isisimbag, an inspektor na nagtitindog sa harani suminimbag: “Ay! Diksionaryo iyan.” Dai na ako naggirong. (Eclesiastes 3:7) Rinekisa kan inspektor an iba pang laog kan padara asin itinao iyan sa sako kaiba an mahalagang marhay na Biblia. Ogmahon akong marhay kaya tinawan ko sia nin dikit na nuwes na hale sa padara sa sako. Kan maresibi ko an padarang ini, aram ko na dai ako nalingawan ni Jehova. Buka an palad na tinatabangan nia ako asin inaasikaso an sakong espirituwal na mga pangangaipo.​—Hebreo 13:5.

Paghuhulit nin Daing Ontok

Pakalihis nin pira sanang bulan, nasorpresa ako na makaresibi nin surat hale sa sarong Kristianong tugang na nabibilanggo mga 400 kilometros an rayo. Hinagad nia sa sako na hanapon ko an sarong lalaki na nagpaheling nin interes asin tibaad nasa kampo ko ngonyan. Bakong madonong an paggibo nin siring kahayag na surat, huli ta sinesensor an samong mga surat. Bakong makangangalas, ipinaapod ako kan saro sa mga opisyal sa saiyang opisina asin marigon nia akong pinatanidan na dai maghulit. Dangan pinagbotan nia akong magpirma sa sarong dokumento na nagsasabi na mapondo na ako sa pagsabi sa iba kan sakong mga paniniwala. Suminimbag ako na dai ko masabotan kun taano ta  maninigo akong pumirma sa siring na deklarasyon, mantang aram na kan gabos na saro ako sa Mga Saksi ni Jehova. Sinambit ko na gustong maaraman kan ibang bilanggo kun taano ta nabilanggo ako. Ano an sasabihon ko sa sainda? (Gibo 4:20) Narealisar kan opisyal na dai nia ako kayang takoton, kaya nagdesisyon siang ibalyo ako. Ipinadara ako sa saro pang kampo.

Ibinalyo ako sa baryo nin Vaya, na 200 kilometros an rayo. Iginalang kan mga superbisor duman an sakong Kristianong paninindogan asin iinasignar ako sa trabahong bakong sa militar​—enot bilang karpintero, dangan bilang sarong elektrisista. Alagad may mga kadepisilan man sa mga trabahong ini. Sa sarong pangyayari, sinabihan ako na kuanon ko an sakong mga kasangkapan asin magpasiring sa tiripontiponan kan baryo. Pag-abot ko, naogma an mga soldados na yaon duman kan maheling ako. Dai ninda mapakarhay an mga ilaw na nag-aadorno sa manlaenlaen na emblema sa militar. Gusto nindang tabangan ko sindang hirahayon an mga iyan huli ta nag-aandam sinda para sa taonan na selebrasyon kan Red Army Day. Pakatapos nin mapagngayongayong pag-isip-isip kun ano an gigibohon ko, sinabihan ko sinda na dai ko puedeng gibohon an siring na trabaho. Itinao ko sa sainda an sakong mga kasangkapan asin huminale na ako. Isinumbong ako sa katabang na direktor, asin nasorpresa ako huli ta dinangog nia an mga reklamo tumang sa sako asin suminimbag: “Iginagalang ko sia huli kaiyan. Sia tawong may prinsipyo.”

Pagparigon sa Boot na Dai Linalaoman an Pinaghalean

Pinaluwas ako kan Hunyo 8, 1984, pakalihis nin eksaktong tolong taon nin pagkabilanggo. Pagkabalik ko sa Ucrania, kinaipuhan kong magparehistro sa milisya bilang sarong dating bilanggo. Sinabihan ako kan mga opisyal na bibistahon giraray ako pakalihis nin anom na bulan asin mas makakarahay sa sako na humale na sa distritong iyan. Kaya huminale ako sa Ucrania asin sa kahurihurihi nakakua ako nin trabaho sa Latvia. Sa kadikit na panahon nahimo kong maghulit asin makiasosyar sa sadit na grupo nin mga Saksi na nag-iistar sa laog asin sa palibot nin Riga, an kabisera. Minsan siring, pakalihis sana nin sangtaon, inapodan giraray ako para sa serbisyo militar. Sa opisina sa paglaog sa militar, sinabihan ko an opisyal na nagsayuma na akong magsoldados kan nakaagi. Bilang simbag, sia kuminurahaw: “Ano aram mo talaga kun ano an ginigibo mo? Helingon niato kun ano an sasabihon mo sa tenyente koronel!”

Inibanan nia ako sa sarong kuarto sa ikaduwang iskalon kun saen an tenyente koronel yaon sa saiyang halabang lamesa. Maingat siang naghinanyog sa sako mantang ipinapaliwanag ko an sakong paninindogan dangan sinabihan nia ako na igwa pa ako nin panahon na horophoropon giraray an sakong desisyon bago ako umatubang sa komite sa paglaog sa militar. Sa paghale mi sa opisina kan tenyente koronel, an opisyal na naanggot sa sako kan primero nagsabi: “Kombensido na ako ngonyan na talagang may pagtubod ka!” Kan umatubang ako sa sarong komite militar, inotro ko an sakong neutral na paninindogan, asin pinabayaan nguna ninda akong maghale kaidto.

Durante kan panahon na iyan, nag-iistar ako sa sarong dagosan. Sarong banggi, nakadangog ako nin maluway na tuktok sa pinto. Binukasan ko iyan asin yaon an sarong lalaking nakaamerikana  asin may darang portpolyo. Nagpamidbid sia, na nagsasabi: “Hale ako sa Komite sa Seguridad kan Estado. Aram ko na igwa ka nin mga problema asin ika bibistahon sa korte.” “Iyo, tama iyan,” an simbag ko. An lalaki nagpadagos: “Matatabangan mi ika kun matogot kang makikooperar sa samo.” “Dai ko magigibo iyan,” an sabi ko. “Magdadanay akong maimbod sa sakong Kristianong mga tinutubod.” Sia huminale na dai na naghingoa pang kombensiron ako.

Buminalik sa Bilanggoan, Buminalik sa Paghuhulit

Kan Agosto 26, 1986, sinentensiahan ako kan Korte Nasyonal nin Riga nin apat na taon na puersahan na pagtrabaho, asin dinara ako sa Bilanggoan Sentral nin Riga. Ilinaag ninda ako sa sarong dakulang selda kaiba nin 40 pang bilanggo, asin pinagmaigotan kong maghulit sa lambang bilanggo sa seldang iyan. May mga naghihingako na sinda naniniwala sa Dios; an iba nanunuya sana. Narisa ko na an mga lalaki naggugrupogrupo, asin pakalihis nin duwang semana sinabihan ako kan mga namomoon sa mga grupong ini na dai ako puedeng maghulit, huling dai ako nagsusunod sa saindang berbal na mga susundon. Ipinaliwanag ko na ibinilanggo ako huli sa mismong dahelan na iyan​—laen na mga ley an sinusunod ko.

Maingat akong nagpadagos sa paghuhulit, asin kan makanompong ako nin nagkapira na may espirituwal na kaisipan, nahimo kong adalan sa Biblia an apat sa sainda. Durante kan samong pag-orolay, isinusurat ninda sa sarong kuaderno an pundamental na mga katokdoan sa Biblia. Pakalihis nin nagkapirang bulan, ipinadara ako sa sarong guardiadong marhay na kampo sa Valmiera, kun saen nagtrabaho ako bilang elektrisista. Duman nahimo kong adalan sa Biblia an saro pang elektrisista na nagin saro sa Mga Saksi ni Jehova pakalihis nin apat na taon.

Kan Marso 24, 1988, ibinalyo ako hale sa guardiadong marhay na kampo pasiring sa kaharaning kolonyang kampo. Ini totoong sarong bendisyon, huling nagtao iyan sa sako nin orog na katalingkasan. Iinasignar akong magtrabaho sa manlaenlaen na lugar nin pagtogdok, asin daing ontok na ako naghanap nin mga oportunidad na maghulit. Sa parate, mayo ako sa kampo, na naghuhulit sagkod na banggi na, alagad nungka akong nagkaigwa nin ano man na problema kun minabalik ako sa kolonya.

Binendisyonan ni Jehova an sakong mga paghihingoa. May nagkapirang Saksi na nag-iistar sa harani, alagad sa banwaan mismo igwa sana nin saro, si Vilma Krūmin̗a​—sarong may edad nang tugang na babae. Nakapoon kaming duwa ni Tugang na Krūmin̗a nin dakol na pag-adal sa Biblia sa mga hoben. Kun minsan, may mga tugang na lalaki asin babae na nagbibiahe hale sa Riga tanganing makiiba sa samo sa ministeryo, asin may nagkapirang regular payunir na hale pa ngani sa Leningrad (St. Petersburg na ngonyan). Sa tabang ni Jehova, nakapoon kami nin nagkapirang pag-adal sa Biblia, asin dai nahaloy naglaog ako sa pagpayunir, na nagdudusay nin 90 oras kada bulan sa paghuhulit.

Kan Abril 7, 1990, an sakong kaso nakatalaan na siyasaton giraray sa Korte kan Banwaan sa Valmiera. Kan magpoon an pagbista, namidbid ko an piskal. Sia hoben na lalaki na nakaolay ko kaidto manongod sa Biblia! Namidbid nia ako asin sia huminuyom alagad dai guminirong. Nagigirumdoman ko pa an sinabi sa sako kan huwes sa pagbista kan aldaw na iyan: “Yurii, ilegal an desisyon na ibilanggo ka kaidtong nakaaging apat na taon. Dai ka kutana dapat na sinentensiahan ninda.” Bigla na sana, ako talingkas na!

Soldados ni Cristo

Kan Hunyo 1990, kaipuhan ko giraray na magparehistro sa opisina sa paglaog sa militar tanganing makakua nin permisong mag-istar sa Riga. Naglaog ako sa iyo man sanang opisina na may halabang lamesa kun saen kaidtong apat na taon na an nakaagi sinabi ko sa tenyente koronel na dai ako masoldados. Ngonyan, sia tuminindog tanganing taratarahon ako, inabrasa ako, asin nagsabi: “Makasusupog nanggad ta kinaipuhan mong agihan an gabos na ini. Namomondo ako ta siring kaiyan an nangyari.”

Suminimbag ako: “Soldados ako ni Cristo, asin kaipuhan na otobon ko an sugo sa sako. Sa tabang  kan Biblia, puede man nindong kamtan an ipinanuga ni Cristo sa saiyang mga parasunod​—sarong maogmang buhay asin daing sagkod na ngapit.” (2 Timoteo 2:​3, 4) An koronel nagsimbag: “Dai pa sana nahahaloy nagbakal ako nin Biblia, asin binabasa ko na iyan ngonyan.” Dara ko an librong Puwede Kamong Mabuhay Sagkod Lamang sa Paraiso Digdi sa Daga. * Binuksan ko iyan sa kapitulo na tinotokar an tanda kan huring mga aldaw asin ipinaheling ko sa saiya kun paanong an hula sa Biblia konektado sa satong panahon. May hararom na pag-apresyar, inabrasa giraray ako kan koronel asin nagsabi sia na logod magin mapanggana an sakong gibohon.

Sa panahon na ini an oma talagang maputi na para sa pag-ani sa Latvia. (Juan 4:35) Kan 1991, nagpoon akong maglingkod bilang magurang sa kongregasyon. Duwa sana an ninombrahan na magurang sa kongregasyon sa bilog na nasyon! Pakalihis nin sangtaon, an sasaro sanang kongregasyon sa Latvia nagin duwa​—an saro Latviano an tataramon asin an saro pa Ruso an tataramon. Nagkapribilehio akong maglingkod sa kongregasyon na Ruso. An pag-oswag marikas na marhay kaya kan sumunod na taon an samong kongregasyon nagin tolo! Kun ginigirumdom ko an nakaagi, malinaw na si Jehova mismo an naggigiya sa saiyang mga karnero pasiring sa saiyang organisasyon.

Kan 1998, ninombrahan akong maglingkod bilang espesyal payunir sa Jelgava, sarong banwaan na 40 kilometros an distansia sa timog-solnopan nin Riga. Kan taon man sanang iyan, saro ako sa primerong naimbitaran hale sa Latvia na mag-atender sa Paadalan sa Ministeryal na Pagsasanay na ginibo sa lenguaheng Ruso sa Solnechnoye, harani sa St. Petersburg, Rusya. Mantang nasa paadalan, nasabotan ko kun gurano kaimportante an pagkaigwa nin mamomoton na aktitud sa mga tawo tanganing magin mapanggana sa ministeryo. An espesyalmenteng nakapahanga sa sako, na orog nanggad kisa sa mga bagay na itinokdo sa samo sa paadalan, iyo an pagkamoot asin pag-asikaso na ipinaheling sa samo kan pamilyang Bethel asin kan mga instruktor sa paadalan.

May saro pang makahulogan na pangyayari sa sakong buhay kan 2001 kan pakasalan ko si Karina, sarong magayon na Kristiana. Inibanan ako ni Karina sa espesyal na paglilingkod nin bilog na panahon, asin aroaldaw napaparigon an sakong boot kun naheheling ko an sakong agom na maogmahon na minapuli hale sa paglilingkod sa langtad. Tunay nanggad na dakulaon an kagayagayahan sa paglilingkod ki Jehova. An masakit na mga eksperyensia sa irarom kan Komunistang rehimen nagtokdo sa sako na biyong magtiwala sa saiya. Mayo nin pagsasakripisyo na sobra kadakula para sa saro na nagmamawot na papagdanayon an pakikikatood ki Jehova asin suportaran an saiyang soberaniya. Nagkaigwa nin katuyohan an sakong buhay huli sa pagtabang sa iba na makanood manongod ki Jehova. Makangangalas nanggad na onra para sa sako an maglingkod ki Jehova “bilang marahay na soldados ni Cristo.”​—2 Timoteo 2:3.

[Nota sa Ibaba]

[Ritrato sa pahina 10]

Nasentensiahan ako nin puersahan na pagtrabaho sa laog nin apat na taon asin nabilanggo ako sa Bilanggoan Sentral nin Riga

[Ritrato sa pahina 12]

Kaiba ko si Karina sa ministeryo