Togotan an “Sinabi” ni Jehova na Ingatan Kamo

KAN 490 B.C.E. sa makasaysayan na ralaban nin Maraton, inatubang kan poon sa 10 ribo sagkod sa 20 ribong taga Atenas an mas dakulang marhay na hukbo nin Persia. An sarong mahalagang bagay sa taktika kan mga Griego iyo an phalanx​—sarong grupo nin mga soldados na taraedtaed na nagmamartsa. An saindang mga kalasag nagigin garo lanob na pangalasag, lanob na pano nin tarom nin budyak. An phalanx nagtao sa mga taga Atenas nin bantog na kapangganahan tumang sa mas dakulang marhay na hukbo kan mga Persiano.

An tunay na mga Kristiano nakikikabtang sa espirituwal na pakikilaban. Nakikipaglaban sinda sa makapangyarihan na mga kalaban​—an dai naheheling na mga namamahala sa presenteng maraot na sistema, na ilinaladawan sa Biblia bilang “mga namamahala sa kinaban sa kadikloman na ini, . . . maraot na mga puersang espiritu sa langitnon na mga lugar.” (Efeso 6:12; 1 Juan 5:19) An banwaan nin Dios padagos na nagigin mapanggana​—alagad bakong huli sa sadiri nindang kosog. An gabos na kredito ki Jehova, na nag-iingat asin nagtotokdo sa sainda, arog kan sinasabi sa Salmo 18:30: “An sinabi ni Jehova dalisay. Saro siang kalasag para sa gabos na nagpapaili sa saiya.”

Iyo, paagi sa saiyang dalisay na “sinabi,” na yaon sa Sagradong Kasuratan, iniingatan ni Jehova an saiyang maimbod na mga lingkod sa espirituwal na kapahamakan. (Salmo 19:7-11; 119:93) May labot sa kadonongan na nahayag sa Tataramon nin Dios, si Salomon nagsurat: “Dai mo iyan pagbayaan, asin aatamanon ka kaiyan. Mamotan mo iyan, asin iingatan ka kaiyan.” (Talinhaga 4:6; Eclesiastes 7:12) Paano kita iniingatan kan kadonongan nin Dios tumang sa kapahamakan? Isipon an halimbawa kan suanoy na Israel.

Sarong Banwaan na Iningatan kan Diosnon na Kadonongan

Prinotehiran asin giniyahan kan Ley ni Jehova an mga Israelita sa gabos na aspekto nin buhay. Halimbawa, an mga regulasyon sa pagkakan, kalinigan, asin kuarentena ilinikay sinda sa dakol na helang na nandanyar na marhay sa ibang mga nasyon. Pagkatapos sanang madiskobre an bakterya kan ika-19 siglo na an siensia nakaabot sa pamantayan na kapareho  kan Ley nin Dios. An mga ley sa pagsadiri nin daga, pagbalukat, pagkabutas sa utang, asin pagpatubo nagbunga nin mga pakinabang sa banwaan nin Israel paagi sa pagsuportar sa sarong masarig na sosyedad asin makatanosan na ekonomiya. (Deuteronomio 7:​12, 15; 15:​4, 5) An Ley ni Jehova nagtabang pa ngani na mapagdanay na balunbon an daga kan Israel! (Exodo 23:​10, 11) Iningatan an banwaan sa espirituwal na paagi kan mga togon tumang sa falsong pagsamba, na pinoprotehiran sinda sa panriringis kan mga demonyo, pag-atang nin aki, asin dakol na iba pang karatan, apuera pa sa nakakapamenos na gibo nin mga tawo na pagduko sa atubangan nin daing buhay na mga idolo.​—Exodo 20:3-5; Salmo 115:4-8.

Malinaw nanggad, an “sinabi” ni Jehova nagin “bakong tataramon na daing halaga” para sa Israel; imbes, iyan nangahulogan nin buhay asin halawig na mga aldaw para sa gabos na naghimate kaiyan. (Deuteronomio 32:47) Totoo man iyan ngonyan para sa mga nagsusunod sa madonong na mga sinabi ni Jehova, minsan ngani an mga Kristiano mayo na sa irarom kan tipan nin Ley. (Galacia 3:​24, 25; Hebreo 8:8) Sa katunayan, imbes na sarong kodigo nin mga ley, an mga Kristiano igwa nin dakol na manlaenlaen na prinsipyo sa Biblia na magiya asin maingat sa sainda.

Sarong Banwaan na Pinoprotehiran nin mga Prinsipyo

An mga Ley tibaad may limitadong aplikasyon asin tibaad temporaryo sana. Minsan siring, an mga prinsipyo sa Biblia, huling pundamental na mga katotoohan, sa parate mahiwas an sakop asin permanente an aplikasyon. Halimbawa, isipon an prinsipyo na yaon sa Santiago 3:​17, na nagsasabi sa sarong kabtang: “An kadonongan hale sa itaas enot sa gabos mabini, dangan toninong.” Paanong an pundamental na katotoohan na iyan puedeng magserbing pangalasag para sa banwaan nin Dios ngonyan?

An pagigin mabini nangangahulogan na pagigin malinig sa moral. Huli kaini, an mga nagpapahalaga sa kabinian nagmamaigot na lumikay bako sanang sa inmoralidad kundi dawa sa mga bagay na minasagkod dian, kaiba an pag-imahinar nin seksuwal na mga bagay asin pornograpiya. (Mateo 5:28) Siring man, an mga magkailusyon na isinasapuso an prinsipyo sa Santiago 3:17 naglilikay na magin sobra kadayupot na puedeng sumagkod sa pagkawara nin pagpopogol sa sadiri. Huling ginigiyahan nin prinsipyo, dai sinda naaakit na tumalikod sa kabinian, na tibaad nagsasaboot na sagkod na dai ninda aktuwal na binabalga an ley nin Dios, an saindang gawe-gawe ooyonan ni Jehova. Aram ninda na ‘naheheling ni Jehova kun ano an puso’ asin minahiro sinda oyon dian. (1 Samuel 16:7; 2 Cronica 16:9) An mga madonong na siring kaiyan iniingatan an saindang hawak sa dakol na helang na ikinakaolakit paagi sa pagdodorog na lakop ngonyan saka napapagdanay an saindang mental asin emosyonal na ikakarahay.

An diosnon na kadonongan “toninong” man, an sabi kan Santiago 3:17. Aram niato na nagmamaigot si Satanas na parayoon an boot niato ki Jehova paagi sa pagtanom nin espiritu nin kadahasan sa satong puso, sa sarong kabtang paagi sa kuestionableng mga babasahon, pelikula, musika, asin kawat sa komputer​—na an nagkapira kaiyan dinadagka an mga nagkakawat na arogon an dai maimahinar na kabangisan asin garadanan! (Salmo 11:5) Risang-risa na nagigin mapanggana si Satanas ta nagdadakol an madahas na krimen. May labot sa arog kaiyan na krimen, kaidtong nagkapirang taon na an nakaagi kinotar kan peryodiko sa Australia na The Sydney Morning Herald si Robert Ressler, an enot na naggamit kan termino sa Ingles na “serial killer” (saro na nangagadan nin sunod-sunod). Sinabi ni Ressler na an mga paragadan na ininterbio nia kan dekada nin 1970 napukaw an boot nin bako pang gayong malaswang pornograpikong materyales “kun ikokomparar sa pornograpikong materyales ngonyan.” Huli kaini, si Ressler nagpahayag nin “makamomondong paglaom sa ngapit​—sarong bagong siglo kun saen nagdadakol an nangagadan nin dakol.”

Sa katunayan, pira sanang bulan pagkaluwas kan baretang iyan, ginadan nin sarong lalaking may badil an 16 na aki asin an saindang maestra sa sarong kindergarten sa Dunblane, Scotland, dangan sia naghugot. Kan sumunod na bulan lagdoan na ginadan nin saro pang buang may badil an 32 katawo sa toninong na banwaan nin Port Arthur, sa Tasmania, Australia. Kaini pa sanang nakaaging mga taon an Estados Unidos natanyog nin dakol na lagdoan na pangadan sa eskuelahan, kaya an mga Amerikano naghahapot, Taano? Kan Hunyo 2001, an Hapon nagin pangenot na bareta sa kinaban kan an sarong raot an isip na lalaki lumaog sa eskuelahan asin sinaraksak nin kutsilyo sagkod na magadan an 8 aki na nasa enot asin ikaduwang grado asin linaslas an 15 pang tawo. Daing duwa-duwa na an dahelan kan  siring na mga karatan laen-laen, alagad paorog nang paorog na naheheling na an kadahasan sa media sarong nakakakontribwir na dahelan. “Kun an 60 segundos na anunsio kayang palangkawon nin bigla an benta,” an isinurat kan Australianong kolumnista na si Phillip Adams, “dai mo pagsabihon sako na an duwang oras na pelikula na nagganar nin milyon-milyon dai nakakaimpluwensia sa aktitud.” Interesante nanggad, sa harong kan nambadil sa Port Arthur, nakompiskar kan mga pulis an 2,000 na madahas asin pornograpikong video.

An mga nangangapot nin higot sa mga prinsipyo kan Biblia iniingatan an saindang isip asin puso sa gabos na klase nin aling-alingan na nagpapatalubo nin makosog na pagmawot sa kadahasan. Huli kaini, dai ninda tinotogotan “an espiritu kan kinaban” na makaapektar sa saindang kaisipan asin kamawotan. Imbes, sinda ‘tinotokdoan kan espiritu nin Dios,’ asin nagmamaigot sindang kultibaron an pagkamoot sa mga bunga kaiyan, na kaiba an katoninongan. (1 Corinto 2:​12, 13; Galacia 5:​22, 23) Ginigibo ninda ini paagi sa regular na pag-adal kan Biblia, pagpamibi, asin nakakapakosog na paghorophorop. Linilikayan man nindang makiasosyar sa mga indibiduwal na may inklinasyon na magin madahas, kundi imbes pinipili nindang makiasosyar sa mga arog ninda na hinihimuyawot an matoninong na bagong kinaban ni Jehova. (Salmo 1:1-3; Talinhaga 16:29) Iyo, nagtatao nanggad nin proteksion an diosnon na kadonongan!

Togotan an “Sinabi” ni Jehova na Ingatan an Saindong Puso

Kan sugotan sia sa kapatagan, pinatunayan ni Jesus na falso an sinasabi ni Satanas paagi sa daing kasalasalang pagkotar sa Tataramon nin Dios. (Lucas 4:1-13) Minsan siring, dai sia nakipag-olay sa Diablo tangani sanang ipaheling kun siisay an nakakalabi sa intelihensia. Sa paggamit kan Kasuratan bilang basehan para sa pagdepensa, si Jesus nagtaram hale sa puso, asin iyan an dahelan kaya an estratehiya kan Diablo, na nagin mapangganang marhay sa Eden, dai nagin mapanggana ki Jesus. An mga pakana ni Satanas dai man magigin mapanggana sa sato kun papanoon niato an satong puso kan mga sinabi ni Jehova. Mayo na nin mas mahalaga pa dian, huli ta “gikan [sa puso] an mga burabod nin buhay.”​—Talinhaga 4:23.

Apuera kaini, kaipuhan na padagos niatong ingatan an satong puso, na nungkang magpabaya. Huling dai nagin mapanggana sa kapatagan, si Satanas dai nagpondo sa pagbalo ki Jesus. (Lucas 4:13) Dai man nia kita popondohan, na pinoprobaran an laen-laen na estratehiya tanganing raoton an satong integridad. (Kapahayagan 12:17) Huli kaini, arogon niato si Jesus paagi sa pagkultibar nin hararom na pagkamoot sa Tataramon nin Dios, mantang kita namimibi nin daing ontok para sa banal na espiritu asin kadonongan. (1 Tesalonica 5:17; Hebreo 5:7) Kun para man ki Jehova, sia nanunuga sa gabos na nagpapaili sa saiya na dai sinda madadanyaran sa espirituwal.​—Salmo 91:1-10; Talinhaga 1:33.

Iniingatan kan Tataramon nin Dios an Kongregasyon

Dai kayang olangon ni Satanas an pagkaligtas kan ihinulang “dakulang kadaklan” sa dakulang kahorasaan. (Kapahayagan 7:​9, 14) Minsan siring, nagmamaigot pa man giraray siang marhay na raoton an mga Kristiano tanganing minsan paano mawara kan nagkapirang indibiduwal an pabor ni Jehova. An estratehiyang iyan nagin mapanggana sa suanoy na Israel asin nagbunga kan pagkagadan nin 24,000 kaidto mismong palaog na sinda sa Dagang Panuga. (Bilang 25:1-9) Siempre, an napapasalang mga Kristiano na nagpapaheling nin tunay na pagsolsol nag-aako nin mamomoton na tabang tanganing ikabalik sa espirituwal. Alagad an habong magsolsol na mga parakasala, arog ni Zimri kan suanoy, isinasapeligro an moral asin espirituwal na ikakarahay kan iba. (Bilang 25:14) Arog nin mga soldados sa sarong phalanx na iinapon an saindang mga kalasag, bako sanang sadiri ninda an isinasapeligro ninda kundi pati an saindang kairiba.

Huli kaini, an Biblia nagboboot: “Umontok sa pakikiiba sa siisay man na inaapod na tugang na parapakisaro o tawong mahanab o parasamba sa idolo o paramuda o paraburat o parakikil, na dai ngani magkakan kaiba nin siring na tawo. . . . Haleon nindo an maraot na tawo dian sa tahaw nindo.” (1 Corinto 5:​11, 13) Dai daw kamo minaoyon na an madonong na “sinabing” ini nakakatabang na maingatan an moral asin espirituwal na kadalisayan kan Kristianong kongregasyon?

Sa kabaliktaran na marhay, an dakol na iglesia kan Kakristianohan saka an mga apostata minamansay na lihis na sa uso an mga kabtang kan Biblia na kontra sa moderno asin liberal na pagmansay  sa moralidad. Huli kaini, ipinapangatanosan ninda an gabos na porma nin grabeng kasalan, dawa sa tahaw nin mga klero. (2 Timoteo 4:​3, 4) Minsan siring, mangnohon na an Talinhaga 30:​5, na nagtataram man manongod sa garo kalasag na “sinabi” ni Jehova, sinusundan kan pagboot sa bersikulo 6: ‘Dai ka magdagdag sa mga tataramon nin Dios, tanganing dai ka nia sagweon, asin tanganing dai ka mapatunayan na sarong putikon.’ Iyo, an mga nakikiaram sa Biblia sa katunayan mga putikon sa espirituwal​—an pinakakulpable sa gabos na putikon! (Mateo 15:6-9) Kun siring, kita magpasalamat nanggad na kita kabtang nin sarong organisasyon na may hararom na paggalang sa Tataramon nin Dios.

Iniingatan nin “Mahamot na Parong”

Huling an banwaan nin Dios nangangapot sa Biblia asin ipinapaabot sa iba an nakakarangang mensahe kaiyan, nagpapaluwas sinda nin garo insensong “mahamot na parong” nin buhay na nagtatao nin kawilihan ki Jehova. Alagad sa bakong matanos na mga indibiduwal, an mga nagdadara kan mensaheng iyan nagpapaluwas nin “nakakagadan na parong nin kalaglagan,” oyon sa traduksion kan J. B. Phillips. Iyo, an piguratibong pamarong kan mga maraot rinaot nang marhay kan sistema nin mga bagay ni Satanas kaya sinda dai mapamugtak o nagigin antipatiko pa ngani kun kaatubang an mga nagpapaluwas kan “mahamot na parong ni Cristo.” Sa ibong na lado, an mga maigot na nagpapalakop kan maogmang bareta nagigin “mahamot na parong ni Cristo sa tahaw kan mga naliligtas.” (2 Corinto 2:14-16) An siring na mga sadiosan an puso parateng nababalde sa pagsaginsagin asin relihiosong mga kaputikan na nagpapamidbid sa falsong relihion. Huli kaini, kun binubuklat niato an Tataramon nin Dios asin sinasabi sa sainda an mensahe kan Kahadean, napaparani an boot ninda ki Cristo asin gusto nindang makanood nin orog pa.​—Juan 6:44.

Kaya dai kamo madesganar kun may mga dai naghihimate sa mensahe kan Kahadean. Imbes, mansayon an “mahamot na parong ni Cristo” bilang sarong espirituwal na proteksion na nakakaalaw sa dakol na indibiduwal na puedeng makadanyar na rumayo sa espirituwal na daga kan banwaan nin Dios, mantang inaakit an mga may marahay na puso.​—Isaias 35:​8, 9.

Huling an mga soldados na Griego sa Maraton taraedtaed na nagmamartsa asin bilog na kosog na kinakapotan an saindang kalasag, sinda nanggana sa ibong nin dakulaon na disbentaha. Kaagid kaiyan, an maimbod na mga Saksi ni Jehova nakakaseguro sa lubos na kapangganahan sa saindang espirituwal na pakikilaban, huli ta iyan an saindang “rogaring na panonondon.” (Isaias 54:17) Huli kaini, logod na an lambang saro sa sato padagos na magpaili ki Jehova paagi sa pagdanay “na marigon na nangangapot sa tataramon nin buhay.”​—Filipos 2:16.

[Mga Ritrato sa pahina 31]

‘An kadonongan hale sa itaas mabini, dangan toninong’