An Iniisip nin Iba Manongod sa Sato—Mahalaga daw Iyan?

HAROS gabos gustong omawon. An mga pag-omaw nakakapaogma sa sato, na nagtatao sa sato nin pakamate na may nagibo kita. An pag-oyon nin iba mapangyari pa ngani sa sato na mawoton na pakarhayon an satong ginigibo. Kabaliktaran an mamamatean niato kun maaraman niato na dai kita inooyonan nin iba. An indiperenteng reaksion o mapagkritikang komento puedeng biyong makapaluya sa satong determinasyon. An iniisip nin iba manongod sa sato puedeng magkaigwa nin dakulang epekto sa pagmansay niato sa satong sadiri.

Sala nanggad na dai pag-intindihon an pagheling nin iba manongod sa sato. An totoo makikinabang kita kun ipapasiyasat niato sa iba an satong gawe-gawe. Kun an opinyon nin iba basado sa halangkaw na mga prinsipyo sa moral, puede iyan na magin kapakipakinabang, na magmomotibar sa sato na magin tanos. (1 Corinto 10:31-33) Minsan siring, an opinyon kan publiko sa parate bako nanggad na makatanosan. Isipon nindo an biribid na pagmansay kan mga poon na saserdote asin kan iba pa manongod ki Jesu-Cristo kan ‘magpoon sindang magkurahaw, na nagsasabi: “Ipako sa harigi! Ipako sia sa harigi!”’ (Lucas 23:​13, 21-25) An mga punto de vista na nakabasar sa putik na impormasyon o naiimpluwensiahan nin pagkauri o daing binabasaran na pagkaanggot kaipuhan na dai na sana pag-intindihon. Huli kaini, kaipuhan niatong gamiton an marahay na paghusgar asin humiro na may kadonongan sono sa opinyon nin iba.

Kiisay na Opinyon an Mahalaga?

Gusto niato na oyonan kita kan mga dayupot sa sato sa tunay na pagsamba. Kaiba digdi an mga kapamilya na kapagtubod man niato asin an satong Kristianong mga tugang na lalaki asin babae. (Roma 15:2; Colosas 3:18-21) An pagkamoot asin paggalang kan mga kapagtubod patin an “pagparinigonan nin boot” sa tahaw ninda mahalagang marhay para sa sato. (Roma 1:​11, 12) Huling may ‘kababaan nin pag-isip, ibinibilang niato an iba na mas halangkaw kisa sato.’ (Filipos 2:2-4) Dugang pa, hinihingoa niatong makamtan asin pinapahalagahan niato an pag-oyon kan “mga nangengenot” sa tahaw niato​—an kamagurangan sa kongregasyon.​—Hebreo 13:17.

Kawiliwili man an “marahay na patotoo hale sa mga tawo sa luwas.” (1 Timoteo 3:7) Marahayon nanggad kun iginagalang kita kan daing pagtubod na mga paryente, katrabaho, asin kataed! Asin bako daw na nagmamaigot kitang magwalat nin marahay na impresyon sa mga tawong hinuhulitan niato tanganing maghimate sinda sa mensahe kan Kahadean? Nagtatao nin kamurawayan sa Dios an pagkaigwa niato nin reputasyon sa komunidad bilang mga tawong malinig sa moral, tanos, asin onesto. (1 Pedro 2:12) Minsan siring, nungka niatong ikokompromiso an mga prinsipyo sa Biblia tanganing makua an pag-oyon nin iba; ni magsasaginsagin kita tanganing pahangaon sinda. Kaipuhan na rekonoseron niato na imposibleng mapaogma niato an gabos. Si Jesus nagsabi: “Kun kamo kabtang kan kinaban, mamahalon kan kinaban an sadiri kaiyan. Ngonyan huling kamo bakong kabtang kan kinaban, kundi pinili ko kamo hale sa kinaban, huli kaini an kinaban naoongis sa saindo.” (Juan 15:19) May magigibo daw kita tanganing makamit an paggalang kan mga nagkokontra sa sato?

Pagkamit kan Paggalang kan mga Nagkokontra

“Ikakaongis kamo nin gabos na tawo huli sa ngaran ko,” an patanid ni Jesus, “alagad an makatagal sagkod sa katapusan iyo an maliligtas.” (Mateo  10:22) An pagkaongis na ini kun beses nagbubunga nin madahas na mga akusasyon. An may kinakampihan na mga opisyal nin gobyerno tibaad apodon kitang “sedisyoso” o “subersibo.” An prangkang mga nagkokontra tibaad magsahot na kita sarong nakakaraot na sekta na kaipuhan na pogolon. (Gibo 28:22) An putik na mga akusasyon na ini kun beses puedeng kontrahon. Paano? Paagi sa pagsunod sa hatol ni apostol Pedro: “[Magin] andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) Dugang pa, maninigong gumamit kita nin “nakakarahay na pananaram na dai makokondenar; tangani na an tawo na tumang mapasupog, na mayo nin ano man na marigsok na masasabi manongod sa sato.”​—Tito 2:8.

Mantang nagmamaigot kita na dai magkaigwa nin katuyawan an satong ngaran, dai kita kaipuhan na madesganar o malunosan kun kita pinapakaraot nin daing katanosan. Sinahotan si Jesus, an sangkap na Aki nin Dios, nin paglanghad, sedisyon, asin espiritismo pa ngani. (Mateo 9:3; Marcos 3:22; Juan 19:12) Si apostol Pablo pinaglibak. (1 Corinto 4:13) Dai inintindi ni Jesus sagkod ni Pablo an siring na pagkritika asin nagdanay na sibot sa saindang gibohon. (Mateo 15:14) Aram ninda na dai ninda noarin man makukua an pag-oyon kan saindang mga kaiwal, huling “an bilog na kinaban namumugtak sa kapangyarihan kan maraot.” (1 Juan 5:19) Ngonyan, napapaatubang kita sa kaparehong angat. Dai kita kaipuhan na matakot kun an maongison na mga nagkokontra magpalakop nin kaputikan manongod sa sato.​—Mateo 5:11.

Mga Opinyon na Talagang Mahalaga

Nagkakalaenlaen na marhay an opinyon nin iba manongod sa sato, depende sa saindang mga motibo asin kun ano an nadangog ninda manongod sa sato. An nagkapira inoomaw asin tinatawan kita nin onra, an iba minumuda asin ikinakaongis kita. Minsan siring, sagkod na ginigiyahan kita kan mga prinsipyo sa Biblia, igwa kita kan gabos na dahelan na magin maogma asin magkaigwa nin matoninong na relasyon sa iba.

Si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.” (2 Timoteo 3:​16, 17) Makakamit niato an pag-oyon ni Jehova Dios asin kan saiyang Aki, si Jesu-Cristo, paagi sa mapagpasalamat na pag-ako sa Tataramon nin Dios bilang giya niato sa gabos na bagay. Total, an opinyon ni Jehova asin kan saiyang Aki an pinakaimportante sa gabos. An iniisip ninda manongod sa sato an naghahayag kan tunay niatong halaga. Sa katapustapusi, an satong buhay nakadepende sa pag-oyon ninda.​—Juan 5:27; Santiago 1:12.

[Blurb sa pahina 30]

“Sinusupog ako nin pag-omaw, huli ta hinahagad ko iyan sa hilom.”​—INDIAN NA POETANG SI RABINDRANATH TAGORE

[Mga Ritrato sa pahina 31]

Mahalaga an opinyon kan satong mga kapagtubod

[Picture Credit Line sa pahina 30]

Culver Pictures