An Tabang sa Sako Gikan ki Jehova

Kadakoldakol kan Nag-aako kan Pagsamba ki Jehova

AN MGA hula sa Biblia may labot sa satong kaaldawan nagsasabi na an mga tawo hale sa gabos na nasyon maburunyog sa halangkaw na pagsamba ki Jehova. Halimbawa, paagi sa propetang si Haggeo, si Jehova Dios nagsabi: “Yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.” (Haggeo 2:7) Si Isaias sagkod si Miqueas naghula na sa panahon niato​—sa “huring kabtang kan mga aldaw”​—an mga nasyon asin banwaan masamba ki Jehova sa inaakong paagi.​—Isaias 2:2-4; Miqueas 4:1-4.

Talaga daw na naootob ngonyan an siring na mga hula? Bayaan niato na an mga katunayan mismo an magsabi. Kan nakaaging sampulong taon sana, labing 3,110,000 na bagohan an nagdusay kan saindang sadiri ki Jehova sa labing 230 nasyon. Tunay nanggad, 6 sa kada 10 Saksi ni Jehova na naglilingkod sa bilog na kinaban sa presente an nabautismohan durante kan nakaaging dekada. Kan 2004, sa promedyo, sarong bagohan na nagdusay na lingkod nin Dios an nadadagdag sa Kristianong kongregasyon kada duwang minuto! *

Arog kan enot na siglo, ‘dakol an nagturubod asin nagbalik sa Kagurangnan’ ngonyan. Minsan ngani an pag-aumento sa numero bako mismong prueba kan bendisyon nin Dios, iyan talagang nagtatao nin ebidensia na “an kamot ni Jehova” nasa banwaan nia. (Gibo 11:21) Ano an nagmotibar sa minilyon pasiring sa pagsamba ki Jehova? Asin paano kamo personal na naaapektaran kan pag-oswag na ini?

Naaakit an mga Tawong Tama an Kamugtakan nin Puso

Sa direktang marhay na pananaram, si Jesus nagsabi: “Dai nin makakadolok sa sako kun dai sia dagkahon kan Ama na nagsugo sa sako.” (Juan 6:44) Sa katapustapusi, kun siring, si Jehova an responsable sa pagdagka sa mga tawo na “may tamang tendensia sa buhay na daing katapusan.” (Gibo 13:48) Puedeng pukawon kan espiritu nin Dios an mga tawo na makamate kan saindang espirituwal na pangangaipo. (Mateo 5:3) An pagkaribok nin konsensia, desesperadong paghanap nin paglaom, o grabeng krisis puedeng magmotibar sa nagkapira na hanapon an Dios asin sa siring makanood manongod sa saiyang katuyohan para sa katawohan.​—Marcos 7:26-30; Lucas 19:2-10.

Dakol na indibiduwal an naaakit sa pagsamba ki Jehova huli ta an programa nin pagtotokdo sa Biblia kan Kristianong kongregasyon nakakatabang sa sainda na makua an simbag sa mga hapot na nakakapurisaw sa sainda.

“Kun igwa nin Dios, taano ta padagos na nakakaeksperyensia nin inhustisya an mga tawo?” Iyan an hapot na nakapurisaw ki Davide, sarong negosyante nin droga sa Italia. Dai man talaga sia interesado sa relihion, kaya ginagamit nia an mapan-angat na hapot na ini tangani sanang makipag-argumento. “Dai ako naghohona na makakakua ako nin rasonable asin nakakakombensir na simbag,” an sabi nia. “Alagad an Saksi na nakipag-olay sa sako mapasensiang marhay asin sinuportaran nin mga teksto sa Biblia an sinasabi nia. An pag-oolay na iyan nagkaigwa nin hararom na epekto sa sako.” Ngonyan, itinanos na ni Davide an saiyang buhay asin naglilingkod na sia ki Jehova.

An iba naaakit sa daganon na kabtang kan organisasyon ni Jehova bilang resulta kan saindang paghanap  nin kahulogan asin katuyohan sa buhay. Huling naghahanap nin terapi para sa sadiri niang emosyonal na mga problema, dinalaw nin sarong espesyalista sa helang sa isip sa Zagreb, Croatia, an bantog na panyero nia. Nasorpresa sia ta itinao sa saiya kan doktor an numero kan telepono kan sangang opisina kan Mga Saksi ni Jehova sa Zagreb, saka an ngaran nin sarong Saksi na kamidbid kaini. “Aram mo,” an sabi nia, “sa heling ko matatabangan ka kan mga tawong ini. Kun papadumanon taka sa simbahan, an maheheling mo sana duman daing buhay na mga estatuwa​—mayo kang makakaolay, asin dai ka makakakua nin kaliwanagan duman. Sa heling ko dai ka matatabangan kan simbahan. May pinaduman na akong ibang mga pasyente sa mga Saksi ni Jehova, asin sa heling ko iyan man an pinakamarahay para sa saimo.” Gikan sa boot na dinalaw sia kan mga Saksi asin dai nahaloy naponan sia nin pag-adal sa Biblia. Pakalihis nin pira sanang semana, an espesyalistang iyan sa helang sa isip magayagayang nagsabi na an kaaraman manongod sa katuyohan nin Dios nagtao nin kahulogan sa saiyang buhay.​—Eclesiastes 12:13.

Kun may minaabot na personal na krisis, nanonompongan nin dakol na an katotoohan sana sa Biblia an puedeng makatao nin tunay na karangahan. Sa Grecia, sarong siete anyos na aking lalaki an nahulog hale sa atop kan saiyang eskuelahan asin nagadan. Pakalihis nin pirang bulan, nakamidbid nin duwang Saksi an ina kan aki asin pinagmaigotan na rangahon sia paagi sa pakikipag-olay sa saiya manongod sa paglaom na pagkabuhay liwat. (Juan 5:​28, 29) Sa puntong iyan, an babae nagparahibi. An mga tugang na babae naghapot: “Kun gusto mong makanood nin orog pa manongod sa Biblia, noarin mi ika puedeng dalawon?” “Ngonyan na,” an simbag nia. Iniba sinda kan babae sa harong kaini, asin naponan an sarong pag-adal sa Biblia. Ngonyan, an bilog na pamilya nia naglilingkod na ki Jehova.

Igwa daw Kamo nin Kabtang?

An arog kaiyan na mga eksperyensia tipikong nangyayari sa bilog na kinaban. Tinitipon asin sinasanay ni Jehova an sarong dakulang multinasyonal na kadaklan nin tunay na mga parasamba. An internasyonal na grupong ini igwa nin maogmang oportunidad na makaligtas sa nagdadangadang na katapusan kan maraot na sistemang ini nin mga bagay asin mabuhay sa sarong matanos na bagong kinaban.​—2 Pedro 3:13.

Bilang resulta kan bendisyon ni Jehova, an daing kaagid na pagtipon na ini nagpapadagos na dai mapogolan pasiring sa mapangganang pagkaotob kaiyan. (Isaias 55:​10, 11; Mateo 24:​3, 14) Kamo daw maigot na nakikikabtang sa aktibidad na ini na paghuhulit kan Kahadean? Kun iyo, makakakompiar kamo na susuportaran kamo nin Dios asin puede nindong otrohon an mga tataramon na ini kan salmista: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

“Dai nin makakadolok sa sako kun dai sia dagkahon kan Ama na nagsugo sa sako.”​—JUAN 6:44

[Kahon sa pahina 8]

SIISAY AN NASA LIKOD KAN PAGDAKOL NA INI?

“Sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.”​—Salmo 127:1.

“An Dios iyo an padagos na nagpapatubo kaiyan; kaya ni an nagtatanom daing halaga ni an nagbabaribi, kundi an Dios na nagpapatubo kaiyan.”​—1 Corinto 3:​6, 7.