Mga Hapot Hale sa mga Parabasa

Makakaapektar daw sa relasyon nin saro ki Jehova an pagkawat nin madahas na mga kawat sa komputer?

“Si Jehova mismo nagsisiyasat sa matanos saka sa maraot,” an isinurat ni Hadeng David kan suanoy na Israel, “asin an siisay man na namomoot sa kadahasan ikinakaongis nanggad kan Saiyang kalag.” (Salmo 11:5) An termino sa orihinal na lenguahe para sa “ikinakaongis” puedeng mangahulogan nin pagigin “sarong kaiwal.” Kun siring, an siisay man na namomoot sa kadahasan ginigibo an sadiri nia na kaiwal nin Dios. Kun siring, ini an hapot na kaipuhan niatong konsideraron: Makakapatalubo daw nin pagkamoot sa kadahasan an pagkawat nin nagkapirang kawat sa komputer?

An madahas na mga kawat sa komputer nagpapamuraway sa paggamit nin mga armas. Sa parate sinasanay kaiyan an nagkakawat sa teknika nin guerra. An magasin na The Economist nagsabi: “An militar kan Amerika mas nananarig na marhay sa mga kawat sa komputer bilang kasangkapan sa pagsasanay. An nagkapirang kawat na ginagamit kan militar iyo an mababakal minsan saen na bagong mga kawat sa komputer.”

Totoo na an mga nagkakawat nin madahas na mga kawat sa komputer dai nangongolog sa totoong mga tawo. Alagad ano an ipinaparisa kan pinipiling aling-alingan na ini manongod sa tibaad nangyayari sa saindang puso? (Mateo 5:​21, 22; Lucas 6:45) Ano an iisipon nindo sa sarong tawo na naoogmang manaksak, mambadil, mambaldado, asin manggadan nin bakong totoong mga tawo? Ano kun an tawong ini naggagamit nin dakol na oras kada semana sa pagpangana sa madahas na mga pantasiang iyan, na nagigin haros adikto na sa siring na mga kawat? Minsan paropaano, iisipon nindo na nagpapatalubo sia nin pagkamoot sa kadahasan, kun paanong an tawong nagdadalan nin pornograpiya nagpapatalubo nin inmoral na mga pagmawot.​—Mateo 5:27-29.

Gurano kagrabe an pagkaongis ni Jehova sa saro na namomoot sa kadahasan? Si David nagsabi na “ikinakaongis nanggad” sia ni Jehova. Kan kaaldawan ni Noe, ipinaheling ni Jehova kun gurano kagrabe an pagkaongis nia sa mga namomoot sa kadahasan. Si Jehova nagsabi ki Noe: “Nagdatong na para sa sako an katapusan kan gabos na laman, huli ta an daga pano nin kadahasan huli sa sainda; asin uya lalaglagon ko sinda kaibahan kan daga.” (Genesis 6:13) Linaglag kan tunay na Dios an bilog na kinaban nin katawohan huli sa saindang pagigin madahas. Si Noe asin an saiyang pamilya sana​—walong indibiduwal na dai namomoot sa kadahasan​—an iningatan nia.​—2 Pedro 2:5.

An mga tawo na gustong magin katood ni Jehova ‘pinupulpog an saindang mga espada na magin tarom nin arado asin an saindang mga budyak na magin mga gunting na pan-awan.’ Imbes na makanood na mamoot sa kadahasan, sinda dai na ‘nag-aadal pa sa pakilaban.’ (Isaias 2:4) Tanganing magdanay kitang katood nin Dios imbes na magin kaiwal nia, kaipuhan na ‘rumayo kita sa maraot asin gumibo kita nin marahay.’ Kaipuhan na ‘hanapon niato an katoninongan asin pagmaigotan na gibohon iyan.’​—1 Pedro 3:11.

Paano kun nagkakawat na kita nin madahas na mga kawat sa video? Kun siring, kaipuhan na magin marigon kita sa satong desisyon na paogmahon si Jehova paagi sa pagpondo sa paggibo kan ikinakaongis nia. Daing duwa-duwa na maninigo kitang mamibi para sa tabang kan banal na espiritu nin Dios tanganing mapondo niato an gibohon na ini na nakakadanyar sa espirituwal. Makakaya niatong pumondo kun totogotan niato na magkaigwa nin diosnon na impluwensia sa satong buhay an mga kualidad na siring kan katoninongan, karahayan, asin pagpopogol sa sadiri.​—Lucas 11:13; Galacia 5:​22, 23.