Tabang sa Satong Emosyon

KAMO daw kun beses garo kontrolado nin negatibong mga emosyon? Madalion daw kamong maaburido, maanggot, o madesganar? Nagagabatan na daw kamo sa mga kahaditan sa buhay? Ano daw an makakatabang?

An emosyonal na mga reaksion natural na sa tawo. Kun nakokontrol iyan nin tama, nagpapasiram iyan sa buhay. Pero inaadmitir kan Biblia na “an pan-aapi puedeng makaparungaw sa sarong madonong.” (Eclesiastes 7:7) Sa kinaban na lakop na marhay an kadahasan asin aksidente, siisay baga an dai apektado sa emosyon huli sa nangyayari sa palibot nia? Minsan siring, an Kasuratan nagsasabi man: “Mayo na nin orog karahay kundi na an tawo maggayagaya sa saiyang mga gibo.” (Eclesiastes 3:22) Tanganing magin mas nakakagayagaya an buhay, kaipuhan niato kun siring na makanood na maggayagaya paagi sa pagkultibar nin positibong mga emosyon. Paano niato mapapatalubo an kapakipakinabang na mga emosyon asin mapopogolan an nakakadanyar na mga emosyon?

Sa parate an paggibo nin praktikal na mga paagi nakakaina sa satong negatibong mga emosyon. Halimbawa, kun nahahadit kita sa mga bagay na dai niato kontrolado, bako daw na mas marahay na bagohon niato an satong rutina o kamugtakan imbes na magparahadit? An paglakawlakaw nin luway-luway, pagdangog nin nakakapakalmang musika, pag-ehersisyo nin mapuersa, o paggibo nin kabootan sa sarong nangangaipo puedeng magtao minsan paano nin ginhawa asin kaogmahan sa sato.​—Gibo 20:35.

Minsan siring, an pinakamarahay na paagi nin paghale sa negatibong mga kaisipan iyo an satong pagsarig sa Kaglalang. Kun dai nahahale an negatibong mga kaisipan, kaipuhan niatong ‘ibugtak an gabos niatong kahaditan sa Dios’ paagi sa pamibi. (1 Pedro 5:​6, 7) Inaasegurar kita kan Biblia: “Si Jehova harani sa mga nalugadan an puso . . . Dakol an kalamidad kan matanos, alagad sa gabos na iyan iliniligtas sia ni Jehova.” (Salmo 34:​18, 19) Paano kita makakakompiar na an Dios puedeng magin “tabang asin an Paratao nin dudulagan” sa sato? (Salmo 40:17) Magigibo niato iyan paagi sa pag-adal kan Biblia asin paghorophorop sa buhay na marhay na mga halimbawa nin personal na interes nin Dios sa ikakarahay kan saiyang mga lingkod.