“Magdanay Kamong Mapagbantay”​—Nag-abot Na an Oras nin Paghokom!

An impormasyon sa artikulong pinag-aadalan na ini basado sa brosyur na Magdanay Kamong Mapagbantay! na ilinuwas sa mga pandistritong kombension na ginibo sa bilog na kinaban kan 2004/05.

“Magdanay kamong mapagbantay . . . huli ta dai nindo aram kun sa anong aldaw madatong an saindong Kagurangnan.”​—MATEO 24:42.

1, 2. Sa ano angay na iinagid ni Jesus an saiyang pagdatong?

ANO an gigibohon nindo kun maaraman nindong may parahabon na naghihikap, na nanalakat sa mga harong sa saindong pagtaraed? Tanganing protehiran an saindong mga namomotan asin an saindong mahahalagang bagay, magdadanay kamong listo, mapagbantay. Ini huli ta an sarong parahabon dai nagpapadara nin surat na ipinapaisi kun noarin sia madatong. Al kontraryo, minadatong sia nin patago asin bigla.

² Sa nagkapirang okasyon, ginamit ni Jesus an mga paagi nin sarong parahabon bilang ilustrasyon. (Lucas 10:30; Juan 10:10) Mapadapit sa mga mangyayari durante kan panahon kan katapusan asin bago sia magdatong tanganing lubos na gibohon an paghokom, itinao ni Jesus an patanid na ini: “Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan. Alagad sabota nindo an sarong bagay, na kun naaraman kan kagharong kun sa anong pagbantay madatong an parahabon, nagpuka kutana sia asin dai pinabayaan na salakaton an saiyang harong.” (Mateo 24:​42, 43) Kaya iinagid ni Jesus an saiyang pagdatong sa pag-abot nin sarong parahabon​—bigla.

3, 4. (a) Ano an kalabot sa paghimate sa patanid ni Jesus manongod sa saiyang pagdatong? (b) Anong mga hapot an minalataw?

³ An ilustrasyon angay, huling an eksaktong petsa kan pagdatong ni Jesus dai maaaraman. Mas naenot, sa iyo man sanang hula, sinabi ni Jesus: “May labot sa aldaw asin oras na iyan mayo nin siisay man na nakakaaram, ni an mga anghel kan kalangitan ni an Aki, kundi an Ama sana.” (Mateo 24:36) Kun siring, sinadol ni Jesus an mga naghihinanyog sa saiya: “Magin andam.” (Mateo 24:44) An mga naghihimate sa patanid ni Jesus magigin andam, na minagawe nin angay, noarin man sia magdatong bilang Parahokom ni Jehova.

⁴ Minalataw an nagkapirang mahalagang hapot: An patanid daw ni Jesus para sana sa mga tawo sa kinaban, o kaipuhan man daw na ‘magdanay na mapagbantay’ an tunay na mga Kristiano? Taano ta kaipuhan na marhay na ‘magdanay na mapagbantay,’ asin ano an kalabot digdi?

Sarong Patanid Para Kiisay?

5. Paano niato naaaraman na para sa tunay na mga Kristiano an patanid na “magdanay kamong mapagbantay”?

⁵ Totoo nanggad na an pagdatong kan Kagurangnan magigin siring sa parahabon para sa mga tawo sa kinaban, na nagbibinungog sa patanid nin nagdadangadang na kalamidad. (2 Pedro 3:3-7) Minsan siring, kumusta man an tunay na mga Kristiano? Si apostol Pablo nagsurat sa mga kapagtubod: “Kamo mismo nakakaaram na gayo na an aldaw ni Jehova madatong na kabaing na gayo nin parahabon kun banggi.” (1 Tesalonica 5:2) Mayo nin pagduda sa satong isip na “an aldaw ni Jehova madatong.” Alagad iniinaan daw kaiyan an pangangaipo na kita magdanay na mapagbantay? Mangnohon na sa saiyang mga disipulo na si Jesus nagsabi: “Sa oras na dai nindo pinaghohona, an Aki nin tawo madatong.” (Mateo 24:44) Mas naenot dian, kan sinasadol an saiyang mga disipulo na padagos na hanapon an Kahadean, si Jesus nagpatanid: “Magdanay na andam, huli ta sa oras na dai nindo  pinaghohona madatong an Aki nin tawo.” (Lucas 12:​31, 40) Bako daw na malinaw na nasa isip ni Jesus an saiyang mga parasunod kan sia magpatanid: “Magdanay kamong mapagbantay”?

6. Taano ta kaipuhan kitang ‘magdanay na mapagbantay’?

⁶ Taano ta kaipuhan kitang ‘magdanay na mapagbantay’ asin “magdanay na andam”? Ipinaliwanag ni Jesus: “An duwa katawo masasa oma: an saro kukuanon asin an saro iwawalat; duwang babae an maggigiling sa gilingan: an saro kukuanon asin an saro iwawalat.” (Mateo 24:​40, 41) An mga andam “kukuanon,” o ililigtas, kun laglagon na an bakong diosnon na kinaban. An iba “iwawalat” sa kalaglagan huli ta sadiri sana nindang intereses an pinagparaasikaso ninda. Posibleng kaiba digdi an mga indibiduwal na dating naliwanagan alagad dai nagdanay na mapagbantay.

7. Ano an puede niatong gibohon huli sa dai pakaaram kun noarin madatong an katapusan?

⁷ An dai pakaaram kan eksaktong aldaw kan katapusan kan daan na sistemang ini nagtatao sa sato kan oportunidad na ipaheling na naglilingkod kita sa Dios na may dalisay na motibo. Taano man? Tibaad garo baga haloyon na mag-abot an katapusan. Makamomondo, tinogotan kan nagkapirang Kristiano na may arog kaining saboot na mawara an saindang kaigotan sa paglilingkod ki Jehova. Pero, paagi sa satong pagdusay, iprinesentar niato an satong sadiri ki Jehova na maglingkod sa saiya na mayo nin kondisyon. Aram kan mga nakakamidbid ki Jehova na an ultima orang pagpaheling nin kaigotan daing epekto sa saiya. Naheheling nia an nasa puso.​—1 Samuel 16:7.

8. Paano kita pinapahiro kan pagkamoot ki Jehova na magdanay na mapagbantay?

⁸ Huling namomotan talaga niato si Jehova, namamatean niato an nakakalabi sa gabos na kaogmahan sa paggibo kan saiyang kabotan. (Salmo 40:8; Mateo 26:39) Asin gusto niatong paglingkodan si Jehova sagkod lamang. An esperansang iyan dai naiinaan an halaga huli sana ta kaipuhan kitang maghalat nin mas halawig nin kadikit kisa tibaad inasahan niato. Orog sa gabos, kita nagdadanay na mapagbantay huli ta galaga kitang nag-aantisipar sa magigin kahulogan kan aldaw ni Jehova sa pagkahaman kan saiyang katuyohan. An satong sinserong pagmawot na paogmahon an Dios nagpapahiro sa sato na iaplikar an konseho sa saiyang Tataramon asin enoton sa satong buhay an saiyang Kahadean. (Mateo 6:33; 1 Juan 5:3) Estudyaran niato kun paano maninigong makaimpluwensia sa satong mga pagdedesisyon asin sa satong pangaroaldaw na pamumuhay an pagdanay na mapagbantay.

Pasaen daw an Saindong Buhay?

9. Taano ta may apretadong pangangaipo na an mga tawo sa kinaban magimata sa kahulogan kan satong mga panahon?

⁹ Naririsa kan dakol na tawo ngonyan na nagin ordinaryo na sana an grabeng mga problema asin nakakakubhan na mga pangyayari, asin tibaad dai sinda naoogma sa nagigin direksion kan saindang buhay. Minsan siring, aram daw ninda an tunay na kahulogan kan mga kamugtakan sa kinaban? Narerealisar daw ninda na kita nabubuhay sa “pagtatapos kan sistema nin mga bagay”? (Mateo 24:3) Inaako daw ninda na an pagigin lakop nin maimot, madahas, bakong diosnon pa nganing mga aktitud tanda na an mga panahon na ini iyo an “huring mga aldaw”? (2 Timoteo 3:1-5) May apretadong pangangaipo na sinda magimata sa kahulogan kan gabos na ini asin pensaron kun pasaen an saindang buhay.

10. Ano an dapat niatong gibohon tanganing masegurado na nagdadanay kitang mapagbantay?

¹⁰ Kumusta man kita? Aroaldaw kita napapaatubang sa mga pagdedesisyon may koneksion sa satong trabaho, sa satong salud, sa satong pamilya, asin sa satong pagsamba. Aram niato an sinasabi kan Biblia, asin naghihingoa kitang iaplikar iyan. Kun siring, maninigo na hapoton niato an satong sadiri: ‘Tinotogotan ko daw na madisturbo ako kan mga kahaditan sa buhay? Tinotogotan ko daw na an mga pilosopiya kan kinaban, an kaisipan kaiyan, iyong magdikta sa sakong mga pagpili?’ (Lucas 21:34-36; Colosas 2:8) Kaipuhan na padagos niatong ipaheling na nagtitiwala kita ki Jehova sa bilog niatong puso asin dai kita manarig sa satong sadiring pakasabot. (Talinhaga 3:5) Sa paaging iyan, kita danay na ‘makakapangapot nin marigon sa tunay na buhay’​—buhay na daing sagkod sa bagong kinaban nin Dios.​—1 Timoteo 6:​12, 19.

11-13. Ano an manonodan niato sa mga halimbawa kan nangyari (a) kan kaaldawan ni Noe? (b) kan kaaldawan ni Lot?

¹¹ An Biblia igwa nin dakol na nagpapatanid na  halimbawa na makakatabang sa sato na magdanay na mapagbantay. Estudyare an nangyari kan kaaldawan ni Noe. Haloy pa, sinegurado na nin Dios na ikatao an patanid. Alagad apuera ki Noe asin sa saiyang pamilya, an mga tawo dai nagmangno. (2 Pedro 2:5) Mapadapit digdi, si Jesus nagsabi: “Kun paano kan mga aldaw ni Noe, siring man an presensia kan Aki nin tawo. Huli ta kun paano sinda kan mga aldaw na idto bago kan baha, nagkakarakan asin nag-iirinom, an mga lalaki nag-aaragom asin an mga babae nagpapaaragom, sagkod kan aldaw na si Noe naglaog sa dahong; asin dai sinda nagmangno sagkod na dumatong an baha asin iinanod sinda gabos, magigin siring man kaiyan an presensia kan Aki nin tawo.” (Mateo 24:37-39) Ano an manonodan niato dian? Kun tinotogotan kan siisay man sa sato na agawan nin lugar kan ordinaryong mga bagay​—dawa kan normal na mga aktibidad sa buhay​—an espirituwal na mga aktibidad na isinasadol nin Dios na enoton niato, kaipuhan na pakaisipon niato an satong situwasyon.​—Roma 14:17.

¹² Isipon man an manongod sa kaaldawan ni Lot. An siudad nin Sodoma, na duman nag-erok si Lot asin an saiyang pamilya, asensado sa materyal alagad mayong-mayo pag-abot sa moral. Sinugo ni Jehova an saiyang mga anghel tanganing laglagon iyan. Sinadol kan mga anghel si Lot asin an saiyang pamilya na dumulag hale sa Sodoma asin dai magsalingoy. Sa pag-enkaminar kan mga anghel, naghale sinda sa siudad. Minsan siring, minalataw na dai makaya kan agom ni Lot na lingawan an saiyang harong sa Sodoma. Masinuway siang nagsalingoy, asin huli kaini buhay nia an nawara. (Genesis 19:15-26) Si Jesus nagpatanid manongod sa satong ngapit: “Girumdoma an agom na babae ni Lot.” Minagawe daw kita kaoyon kan patanid na iyan?​—Lucas 17:32.

¹³ An mga naghimate sa mga patanid nin Dios nakaligtas. Totoo iyan ki Noe asin sa saiyang pamilya saka ki Lot asin sa saiyang mga aking babae. (2 Pedro 2:9) Mantang isinasapuso niato an patanid sa mga halimbawang ini, napaparigon man an satong boot kan mensahe kaiyan nin pagliligtas para sa mga namomoot sa katanosan. Huli kaiyan an satong puso napapano nin seguradong paglaom sa kaotoban kan panuga nin Dios na “bagong kalangitan asin sarong bagong daga” na duman “magdadanay an katanosan.”​—2 Pedro 3:13.

‘Nag-abot Na an Oras kan Paghokom’!

14, 15. (a) Ano an kaiba sa “oras” nin paghokom? (b) Ano an kalabot sa ‘pagkatakot sa Dios asin pagpamuraway sa saiya?’

¹⁴ Mantang kita nagdadanay na mapagbantay, ano an malalaoman niato? Sinasabi kan libro nin Kapahayagan an sunod-sunod na mangyayari tanganing maotob an katuyohan nin Dios. An pag-aplikar kan sinasabi kaiyan mahalagang marhay tanganing kita magin andam. Buhay na buhay na ilinaladawan kan hula an mga mangyayari sa “aldaw kan Kagurangnan,” na nagpoon kan si Cristo patukawon sa trono sa langit kan 1914. (Kapahayagan 1:10) Dinadara kan Kapahayagan an satong atension sa sarong anghel na pinaniwalaan nin “daing katapusan na maogmang bareta na ipapahayag.” Ibinabalangibog nia sa makosog na tingog: “Matakot kamo sa Dios asin pamurawayon sia, huli ta nag-abot na an oras kan saiyang paghokom.” (Kapahayagan 14:​6, 7) An “oras” na iyan kan paghokom halipot na panahon; kaiba dian an pagpahayag sagkod an pag-implementar kan mga paghokom na ilinaladawan sa hulang iyan. Nabubuhay na kita ngonyan sa panahon na iyan.

¹⁵ Ngonyan, bago matapos an oras nin paghokom, kita sinasadol: “Matakot kamo sa Dios asin pamurawayon sia.” Ano an kalabot digdi? An tamang pagkatakot sa Dios maninigong magpahiro sa sato na talikdan an karatan. (Talinhaga 8:13) Kun tinatawan niato nin onra an Dios,  maghihinanyog kita sa saiya na may dakulang paggalang. Dai kita magigin sibot-sibot kaya dai na niato nababasa nin regular an saiyang Tataramon, an Biblia. Dai niato ibibilang na bakong mahalaga an saiyang konseho na mag-atender sa Kristianong mga pagtiripon. (Hebreo 10:​24, 25) Mamahalon niato an pribilehio na ibalangibog an maogmang bareta kan Mesiyanikong Kahadean nin Dios asin gigibohon iyan na may kaigotan. Magtitiwala kita ki Jehova sa gabos na panahon asin sa bilog niatong puso. (Salmo 62:8) Huling rinerekonoser niato na si Jehova an Unibersal na Soberano, tinatawan niato sia nin onra paagi sa pagpasakop sa saiya nin gikan sa boot bilang an Soberano sa satong buhay. Talaga daw na natatakot kamo sa Dios asin nagpapamuraway sa saiya sa gabos na paaging iyan?

16. Taano ta masasabi niato na an paghokom tumang sa Dakulang Babilonya na sinabi sa Kapahayagan 14:8 naotob na?

¹⁶ Ilinaladawan pa kan Kapahayagan kapitulo 14 an mga mangyayari sa oras nin paghokom. Enot na nasambitan an Dakulang Babilonya, an pambilog na kinaban na imperyo nin falsong relihion: “An saro pa, an ikaduwang anghel, suminunod, na nagsasabi: ‘Sia buminagsak na! An Dakulang Babilonya buminagsak na!’” (Kapahayagan 14:8) Iyo, sa punto de vista nin Dios, buminagsak na an Dakulang Babilonya. Kan 1919, an linahidan na mga lingkod ni Jehova pinatalingkas sa kaoripnan sa Babilonikong mga doktrina asin kaugalean, na nagdominar sa mga tawo asin nasyon sa laog nin dakol na milenyo. (Kapahayagan 17:​1, 15) Poon kan panahon na iyan puede na nindang idusay an saindang sadiri sa pagpalakop kan tunay na pagsamba. An lakop sa globong paghuhulit kan maogmang bareta kan Kahadean nin Dios nangyari poon kan panahon na idto.​—Mateo 24:14.

17. Ano an kalabot sa pagluwas sa Dakulang Babilonya?

¹⁷ Dai dian natatapos an paghokom nin Dios tumang sa Dakulang Babilonya. An pinal na paglaglag sa saiya madali nang mangyari. (Kapahayagan 18:21) May marahay na dahelan, sinasadol kan Biblia an mga tawo sa gabos na lugar: “Lumuwas kamo sa saiya [sa Dakulang Babilonya] . . . kun habo nindong makikabtang sa saiyang mga kasalan.” (Kapahayagan 18:​4, 5) Paano kita minaluwas sa Dakulang Babilonya? An kalabot digdi bako sanang pagputol kan satong pakikiasosyar sa falsong relihion. An Babilonikong impluwensia yaon sa dakol na popular na selebrasyon asin kostumbre, sa pagkonsinte kan kinaban sa seksuwal na inmoralidad, sa nag-oorog na popularidad nin aling-alingan na may koneksion sa espiritismo, asin dakol pang iba. Tanganing magdanay na mapagbantay, mahalagang marhay na sa satong mga gawe-gawe sagkod sa mga kamawotan kan satong puso, pinapatunayan niato na kita siblag talaga sa Dakulang Babilonya sa gabos na paagi.

18. Huli sa ilinaladawan sa Kapahayagan 14:​9, 10, ano an mapagmaan na linilikayan kan mapagbantay na mga Kristiano?

¹⁸ Sa Kapahayagan 14:​9, 10, ilinaladawan an saro pang aspekto kan ‘oras nin paghokom.’ An saro pang anghel nagsasabi: “Kun an siisay man nagsasamba sa mabangis na hayop asin sa ladawan kaiyan, asin nag-aako nin tanda sa saiyang angog o sa saiyang kamot, sia man mainom sa arak kan kaanggotan nin Dios.” Taano? An ‘mabangis na hayop asin an ladawan kaiyan’ mga simbolo kan pamamahala nin tawo, na dai nagrerekonoser sa soberaniya ni Jehova. An mapagbantay na mga Kristiano nagmamaan na dai magtogot na sinda maimpluwensiahan o magkaigwa kan tanda, magsalang paagi sa aktitud o aksion, bilang oripon kan mga nagsasayumang rekonoseron  an supremong soberaniya kan tunay na Dios, si Jehova. Aram kan mga Kristiano na naestablisar na sa langit an Kahadean nin Dios, na iyan an matapos sa gabos na pamamahala nin tawo, asin na iyan magdadanay sagkod lamang.​—Daniel 2:44.

Dai Kamo Mawaran kan Saindong Pakamate nin Pag-apura!

19, 20. (a) Mantang kita parani nang parani sa katapusan kan huring mga aldaw, ano an masisierto niato na hihingoahon na gibohon ni Satanas? (b) Maninigo na kita magin determinadong gibohon an ano?

¹⁹ Mantang kita parani nang parani sa katapusan kan huring mga aldaw, orog sanang magrabe an mga sakit asin sugot. Sagkod na nabubuhay kita sa daan na sistemang ini asin dinadamat kan sadiri niatong pagkabakong sangkap, apektado kita kan mga bagay na siring baga nin maluyang salud, pagkagurang, pagkagadan nin mga namomotan, nakolgan na boot, pagkadesganar kun kita napapaatubang sa pagkaindiperente sa satong mga paghihingoa na ihulit an Tataramon nin Dios, asin dakol pang iba. Nungkang paglingawan na si Satanas gustohon nanggad na aprobetsaran an mga sakit na napapaatubang sa sato tanganing pasukoon kita​—na pumondo na kita sa paghuhulit kan maogmang bareta o sa pamumuhay sono sa mga pamantayan nin Dios. (Efeso 6:11-13) Bako ini an panahon na mawaran kita kan satong pakamate nin pag-apura mapadapit sa mga panahon na kinabubuhayan niato!

²⁰ Aram ni Jesus na kita mapapaatubang sa grabeng pangigipit na sumuko, kaya tinawan nia kita nin konseho: “Magdanay kamong mapagbantay . . . huli ta dai nindo aram kun sa anong aldaw madatong an saindong Kagurangnan.” (Mateo 24:42) Kun siring, magdanay kitang mapagbantay sa kun haen na kita sa sulog nin panahon. Magmaan kita sa mga pakana ni Satanas na puedeng makapaluway o makapapondo sa sato. Magin desidido kitang ihulit an maogmang bareta kan Kahadean nin Dios na may paorog nang paorog na kaigotan asin determinasyon. Tunay nanggad, papagdanayon niato an satong pakamate nin pag-apura mantang hinihimate niato an patanid ni Jesus: “Magdanay kamong mapagbantay.” Huli sa paggibo kaiyan, matatawan niato nin onra si Jehova asin mapapabilang kita sa mga tatawan kan saiyang daing sagkod na mga bendisyon.

Ano an Isisimbag Nindo?

• Paano niato naaaraman na aplikado sa tunay na mga Kristiano an patanid ni Jesus na ‘magdanay na mapagbantay’?

• Anong nagpapatanid na mga halimbawa sa Biblia an makakatabang sa sato na ‘magdanay na mapagbantay’?

• Ano an oras nin paghokom, asin ano an isinasadol na gibohon niato bago iyan matapos?

[Mga Hapot Para sa Pag-adal]

[Ritrato sa pahina 23]

Iinagid ni Jesus an saiyang pagdatong sa pag-abot nin sarong parahabon

[Ritrato sa pahina 24]

Harani na an pagkalaglag kan Dakulang Babilonya

[Mga Ritrato sa pahina 25]

Magin determinado kitang maghulit na may orog pang kaigotan asin determinasyon