Rinirisa daw Nindo an Tanda kan Presensia ni Jesus?

MAYO nin siisay man na gustong magkahelang nin grabe o makaeksperyensia nin kalamidad. Tanganing makalikay sa siring na mga kalamidad, minamangno nin sarong madonong na tawo an mga tanda na nagpaparisa kan peligro asin minahiro oyon dian. Ilinadawan ni Jesu-Cristo an sarong partikular na tanda na kaipuhan na risahon niato. An sinasabi niang tanda magkakaigwa nin lakop sa globong epekto asin makakaapektar sa bilog na katawohan. Kamo asin an saindong pamilya kaiba dian.

Nagtaram si Jesus manongod sa Kahadean nin Dios, na iyong mahale kan karatan asin magibo kan daga na magin sarong paraiso. An saiyang mga disipulo interesado manongod digdi asin gustong makaaram kun noarin maabot an Kahadean na iyan. Sinda naghapot: “Ano an magigin tanda kan saimong presensia asin kan pagtatapos kan sistema nin mga bagay?”​—Mateo 24:3.

Aram ni Jesus na pagkatapos siang gadanon asin buhayon liwat, malihis an dakol na siglo bago sia patukawon sa trono sa langit bilang an Mesiyanikong Hade na mamamahala sa katawohan. Mantang an pagpatukaw sa saiya sa trono dai maheheling nin mga tawo, si Jesus nagtao nin tanda na mapangyari sa saiyang mga parasunod na risahon an saiyang “presensia” saka an “pagtatapos kan sistema nin mga bagay.” An tanda na ini kompuesto nin nagkapirang kabtang, na kun pagsasararoon minabilog nin sarong nagpapamidbid na tanda, o senyal, na kompuesto nin laen-laen na kabtang​—an tanda kan presensia ni Jesus.

An simbag ni Jesus maingat na irinekord kan kada saro sa mga kagsurat kan Ebanghelyo na si Mateo, Marcos, asin Lucas. (Mateo, kapitulo 24 asin 25; Marcos, kapitulo 13; Lucas, kapitulo 21) An ibang kagsurat kan Biblia nagdagdag nin mga detalye sa tanda. (2 Timoteo 3:1-5; 2 Pedro 3:​3, 4; Kapahayagan 6:1-8; 11:18) Dai igo an espasyo sa artikulong ini tanganing masiyasat niato nin maingat an gabos na detalye, alagad totokaron niato an limang importanteng marhay na kabtang na minakompuesto sa tanda na nasambitan ni Jesus. Manonompongan nindo na makahulogan asin mahalaga ini sa saindo personalmente.​—Helingon an kahon sa pahina 6.

“Sarong Panahon nin Dakulang Pagbabago”

“An nasyon matindog tumang sa nasyon asin an kahadean tumang sa kahadean.” (Mateo 24:7)  An magasin na Der Spiegel sa Alemania nagbabareta na bago kan 1914, an mga tawo “naniniwala sa sarong marahayon na ngapit na may orog na katalingkasan, pag-oswag, asin prosperidad.” Dangan nagbago an gabos. “An guerra na nagpoon kan Agosto 1914 asin natapos kan Nobyembre 1918 sarong pambihirang pangyayari. Biglang binago kaiyan an kasaysayan, na isinusuway an nakaagi sa presente,” an sabi kan magasin na GEO. Labing 60 milyon na soldados hale sa limang kontinente an maringis na nagralabanlaban. Sa promedyo, mga 6,000 na soldados an nagagadan kada aldaw. Poon kaidto, ibinilang kan mga historyador kan kada henerasyon asin kan gabos na politikal na paniniwala “na sarong panahon nin dakulang pagbabago an mga taon nin 1914 sagkod 1918.”

Puersahan na pinangyari kan Guerra Mundial I an dai mababaliktad na mga pagbabago sa sosyedad nin tawo asin ibinugtak an katawohan sa huring mga aldaw kan sistemang ini nin mga bagay. An natatada pang kabtang kan siglong iyan namidbid sa pagkaigwa nin dugang pang guerra, armadong ralaban, asin terorismo. An mga kamugtakan dai nagrahay sa enot na mga taon kan presenteng siglo. Apuera sa guerra, naheheling an iba pang kabtang kan tanda.

Tiggutom, Peste, Asin mga Linog

“Magkakaigwa nin mga kakulangan nin kakanon.” (Mateo 24:7) Pinasakitan nin pagkagutom an Europa durante kan enot na guerra mundial, asin poon kaidto dinamat na nin tiggutom an katawohan. Isinurat kan historyador na si Alan Bullock na sa Rusya asin Ucrania kan 1933, “kadakol kan nagugutom an naglalagawlagaw sa bilog na lugar sa probinsia . . . An mga bangkay nakatambak sa gilid kan mga tinampo.” Kan 1943 naheling kan peryodistang si T. H. White an tiggutom sa probinsia nin Henan sa Tsina. Sia nagsurat: “Kun tiggutom, haros gabos na bagay nakakakan asin puedeng gilingon, kakanon asin magin enerhiya kan hawak nin tawo. Alagad huli sa grabeng takot sa kagadanan naiisip nin saro na kumakan nin mga bagay na dati dai kinakakan.” Makamomondo ta an tiggutom sa Aprika nagin haros ordinaryo na sana durante kan nakaagi pa sanang mga dekada. Minsan ngani an daga nagpoprodusir nin igong kakanon para sa gabos, kinakalkulo kan Food and Agriculture Organization kan N.U. na 840 milyon katawo sa bilog na kinaban an kadikiton an kakanon.

“Sa surunodsunod na lugar mga peste.” (Lucas 21:11) “Kinakalkulo na an trangkaso Española guminadan nin nasa pag-oltanan nin 20 milyon asin 50 milyon katawo kan 1918, na labi pa kisa sa damat o sa enot na guerra mundial,” an bareta kan Süddeutsche Zeitung. Poon kaidto, dai mabilang na tawo an nagkaigwa kan mga helang na arog kan malaria, poko, tisis, polio, asin kolera. Asin an kinaban nakukubhanan mantang daing ontok na naglalakop an AIDS. Kita ngonyan natataranta ta yaon pa man giraray an dai nawawarang helang maski ngani may makangangalas na pag-oswag sa medisina. An masakit paniwalaan pero totoong nangyayaring ini,  na dati dai aram kan katawohan, nakakatabang na mamidbid an satong ekstraordinaryong mga panahon.

“Mga linog.” (Mateo 24:7) Durante kan nakaaging 100 na taon, an mga linog guminadan na nin ginatos na ribong tawo. Oyon sa sarong reperensia, an mga linog na may puersang gumaba nin mga edipisyo asin baakon an daga igwa nin promedyong 18 beses kada taon magpoon kan 1914. May mas nakakagadan na mga linog na igo an kosog tanganing gabaon an mga edipisyo na nangyayari nin mga sarong beses kada taon. Sa ibong kan mga pag-oswag sa teknolohiya, kadakol pa man giraray an nagagadan huli ta dakol na siudad na marikas an pagdakula an yaon sa ibabaw kan mga gaak kan daga na nagigin dahelan nin linog.

Nakakaogmang Bareta!

An kadaklan sa mga kabtang kan tanda kan huring mga aldaw makamomondo. Alagad may sinabi man si Jesus na nakakaogmang bareta.

“An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon.” (Mateo 24:14) An gibohon na pinonan mismo ni Jesus​—an paghuhulit kan maogmang bareta kan Kahadean—​makakaabot sa kulminasyon durante kan huring mga aldaw. Ini talagang nangyayari. An Mga Saksi ni Jehova naghuhulit kan mensahe kan Biblia asin tinotokdoan ninda an mga tawong gusto kaiyan na iaplikar an saindang nanonodan sa pan-aroaldaw na buhay. Sa presente, labing anom na milyon na Saksi an naghuhulit sa 235 nasyon asin sa labing 400 na lenguahe.

Mangnohon na dai sinabi ni Jesus na an gabos na aktibidad sa buhay mapopondo huli sa makamomondong mga kamugtakan sa kinaban. Dai man nia sinabi na an bilog na kinaban masasanop nin saro sanang kabtang kan tanda. Alagad talagang naghula sia nin kadakol na pangyayari na kun pagsasararoon magigin sarong tanda na mamimidbid saen man na lugar sa daga.

Imbes na magkonsentrar sa sasarong pangyayari o partikular na mga insidente, naheheling daw nindo an sarong dalagan nin mga pangyayari, sarong tanda na kompuesto nin laen-laen na kabtang na may pambilog na globong importansia? An nangyayari nakakaapektar sa saindo asin sa saindong  pamilya. Alagad taano, an tibaad ihapot niato, ta kadikiton an nagririsa kaiyan?

Naeenot an Sadiring Intereses

“Bawal Maglangoy,” “Halangkaw na Boltahe,” “Inaan an Rikas.” Ini an nagkapira sa mga karatula (signs) asin patanid na naheheling niato alagad sa parate dai iniintindi. Taano man? Madali kitang madara kan iniisip niato na pinakamarahay para sa sato. Halimbawa, tibaad isipon niato na kaipuhan na magmaneho kita nin mas marikas kisa sa itinotogot kan ley, o tibaad gustohon niatong maglangoy sa lugar na ipinagbabawal iyan. Alagad bakong madonong an dai pag-intindi sa mga karatula.

Halimbawa, an mga pagtupas sa kabukidan nin Alpes sa Austria, Pransia, Italia, asin Switzerland kun beses ikinakagadan nin mga turista na dai nag-iintindi sa mga patanid na nagsasadol sa sainda na mag-ski o mag-snowboard sa ligtas na mga agihan sana. Oyon sa Süddeutsche Zeitung, an dakol na turista na dai nag-iintindi sa siring na mga patanid sinusunod an kasabihan na, Kun mayong peligro, mayong kaogmahan. Makamomondo, an dai pag-intindi sa mga patanid puedeng magbunga nin makaturotristeng mga resulta.

Ano an mga dahelan nin mga tawo sa dai ninda pag-intindi sa tanda na ilinadawan ni Jesus? Tibaad sinda binuta kan pagmawot sa kayamanan, binagol kan pagkaindiperente, pinaralisar kan dai pakapagdesisyon, naguot sa rutina, o pinangibabawan kan takot na mawaran nin prestihio. Puede daw na an arin man sa mga ini an dahelan kaya dai nindo iniintindi an tanda kan presensia ni Jesus? Bako daw na mas madonong na risahon an tanda asin humiro oyon dian?

Buhay sa Sarong Paraisong Daga

Nagdadakol an mga tawong naghihimate sa tanda kan presensia ni Jesus. Si Kristian, sarong hoben pang may agom na lalaki sa Alemania, nagsurat: “Ini an mga panahon na makamomondo. Daing duda na nabubuhay na kita sa ‘huring mga aldaw.’” Ginagamit nindang mag-agom an dakol na panahon sa pakikipag-olay sa iba manongod sa Mesiyanikong Kahadean. Si Frank nag-iistar sa iyo man sanang nasyon. Pinaparigon nindang mag-agom an iba paagi sa maogmang bareta hale sa Biblia. Si Frank nagsabi: “Huli kan situwasyon sa kinaban, dakol na tawo ngonyan an nahahadit manongod sa ngapit. Nagmamaigot kaming parigonon an saindang boot paagi sa mga hula sa Biblia manongod sa sarong paraisong daga.” Sa siring na paagi, si Kristian asin Frank nagtatabang sa pag-otob kan sarong kabtang kan tanda ni Jesus​—an paghuhulit kan maogmang bareta kan Kahadean.​—Mateo 24:14.

Pag-abot kan huring mga aldaw sa kulminasyon kaiyan, paparaon ni Jesus an daan na sistemang ini asin an mga tawo na nagsusuportar dian. Sa panahon na iyan, an Mesiyanikong Kahadean an mamamahala sa mga aktibidad sa daga, na ihinulang magigin Paraiso. An katawohan magigin talingkas na sa helang asin kagadanan, asin an mga gadan bubuhayon liwat sa buhay digdi sa daga. Ini an nakakaogmang marhay na mga oportunidad na naghahalat sa mga nagririsa sa tanda kan mga panahon. Bako daw na madonong na pag-adalan nin orog pa an manongod sa tanda asin kun ano an dapat na gibohon nin saro tanganing maligtas sa katapusan kan sistemang ini? Daing duwa-duwa na ini an maninigo na apurado nanggad na gibohon kan gabos.​—Juan 17:3.

[Blurb sa pahina 4]

Si Jesus naghula nin kadakol na pangyayari na kun pagsasararoon magigin sarong tanda na mamimidbid saen man na lugar sa daga

[Blurb sa pahina 6]

Naheheling daw nindo an sarong dalagan nin mga pangyayari, sarong tanda na kompuesto nin laen-laen na kabtang na may pambilog na globong importansia?

[Kahon/Mga Ritrato sa pahina 6]

NAGPAPAMIDBID NA TANDA KAN HURING MGA ALDAW

Daing kaagid na mga guerra.​—Mateo 24:7; Kapahayagan 6:4

Tiggutom.​—Mateo 24:7; Kapahayagan 6:​5, 6, 8

Mga Peste.​—Lucas 21:11; Kapahayagan 6:8

Nag-oorog na katampalasanan.​—Mateo 24:12

Mga Linog.​—Mateo 24:7

Delikadong mga panahon na masakit pakibagayan.​—2 Timoteo 3:1

Labi-labing pagkamoot sa kuarta.​—2 Timoteo 3:2

Pagigin masumbikal sa mga magurang.​—2 Timoteo 3:2

Kawaran nin natural na kapadangatan.​—2 Timoteo 3:3

Namomoot sa kasingawan imbes na sa Dios.​—2 Timoteo 3:4.

Kawaran nin pagpopogol sa sadiri.​—2 Timoteo 3:3

Mayo nin pagkamoot sa karahayan.​—2 Timoteo 3:3

Dai pagmangno sa nagdadangadang na peligro.​—Mateo 24:39

Mga paraolog-olog na habong maniwala sa prueba kan huring mga aldaw.​—2 Pedro 3:​3, 4

Lakop sa globong paghuhulit kan Kahadean nin Dios.​—Mateo 24:14

[Picture Credit Lines sa pahina 5]

Mga soldados kan Guerra Mundial I: Hale sa librong The World War​—A Pictorial History, 1919; dukhang pamilya: AP Photo/Aijaz Rahi; biktima nin polio: © WHO/P. Virot