Sarong Seryosong Bagay an Pagsabot sa mga Tanda!

“Kan primero an paghona ko makolog sana an payo kan samong aking lalaki na si Andreas. Alagad nawaran sia nin ganang magkakan asin halangkaw an kalintura nia. Gruminabe an kolog nin payo, asin nahadit na ako. Kan pumuli an sakong agom, dinara mi si Andreas sa doktor. Siniyasat kaini an mga sintoma asin ipinadara tolos si Andreas sa ospital. An problema mas grabe kisa sa kolog nin payo. Si Andreas may mininghitis. Sia binolong asin dai nahaloy sia naomayan na.”​—Si Gertrud, sarong ina sa Alemania.

AN EKSPERYENSIA ni Gertrud tibaad pamilyar sa dakol na magurang. Naheheling ninda an mga tanda na nag-iindikar na an saindang aki tibaad may helang. Minsan ngani bakong gabos na helang seryoso, dai puedeng palimanlimanan nin mga magurang an mga sintoma nin helang sa saindang mga aki. An pag-obserbar sa mga tanda asin paggibo nin tamang aksion puedeng magkaigwa nin dakulang epekto sa situwasyon. Iyan sarong seryosong bagay.

Totoo man ini dawa sa ibang bagay apuera sa salud. An sarong angay na halimbawa iyo an kalamidad nin tsunami kan Disyembre 2004 sa mga lugar na nasa palibot kan Dagat Indio. Naaraman kan mga ahensia nin gobyerno sa mga lugar na arog kan Australia asin Hawaii an makosogon na linog sa amihanan na Sumatra asin naheling antes pa an potensial na peligro kan epekto kaiyan. Pero, mayo nin paagi tanganing an mga tawo na yaon sa namemeligrong mga lugar makaresibi nin o makaresponder sa ano man na patanid. Bilang resulta, labing 220,000 an nagadan.

Mga Tanda na May Mas Dakulang Marhay na Importansia

Kan si Jesu-Cristo yaon sa daga, tinawan nia an mga naghihinanyog sa saiya nin sarong leksion sa pag-obserbar sa mga tanda asin paghiro oyon dian. Sia nagtataram manongod sa sarong bagay na may dakulaon na importansia. An Biblia nagbabareta: “An mga Fariseo asin Saduceo nagdorolok sa saiya asin, sa pagsugot sa saiya, sinda naghagad sa saiya na pahelingan sinda nin sarong tanda hale sa langit. Bilang simbag sia nagsabi sa sainda: ‘Kun banggi na pinagkatodan na nindong sabihon, “Magkakaigwa nin marahay na panahon, ta an langit arog kapula sa kalayo”; asin kun aga, “Ngonyan magkakaigwa nin malipot, maoran na panahon, ta an langit arog kapula sa kalayo,  alagad madampog.” Tatao kamong magsabot kan itsura kan langit, alagad dai kamo nakakasabot sa mga tanda kan mga panahon.’”​—Mateo 16:1-3.

Sa pagsambit sa “mga tanda kan mga panahon,” ipinaparisa ni Jesus na an mga Judio kan enot na siglo na naghihinanyog sa saiya maninigo kutanang nakakaaram kan pagkaapurado kan mga panahon na kinabubuhayan ninda. An Judiong sistema nin mga bagay madali nang makaeksperyensia nin sarong kalamidad na makakaapektar sa sainda gabos. Pira na sanang aldaw bago sia magadan, si Jesus nakipag-olay sa saiyang mga disipulo manongod sa saro pang tanda​—an tanda kan saiyang presensia. An sinabi nia sa okasyon na iyan may importansia nanggad para sa gabos ngonyan.