Dai Kamo Babayaan ni Jehova sa Ano Man na Paagi

AN MGA Kristiano sa Judea nakakaeksperyensia kaidto nin madahas na pagtumang, asin kaipuhan nindang labanan an materyalistikong pagmansay nin mga tawo na nasa palibot ninda. Tanganing parigonon an saindang boot, kinotar ni apostol Pablo an mga tataramon ni Jehova sa mga Israelita mantang sinda palaog sa Dagang Panuga. Si Pablo nagsurat: “Sa ano man na paagi dai taka babayaan ni sa ano man na paagi papabayaan taka.” (Hebreo 13:5; Deuteronomio 31:6) An panugang ini daing duda na nagpakosog sa mga Hebreong Kristiano kan enot na siglo.

An panugang iyan puede man na magparigon sa sato na atubangon an mga kahaditan na gikan sa pamumuhay sa “delikadong mga panahon na masakit pakibagayan.” (2 Timoteo 3:1) Kun kita magtitiwala ki Jehova asin magawe kaoyon kaiyan, sususteniran nia kita dawa sa pinakadepisil na mga kamugtakan. Tanganing maaraman kun paano puedeng otobon ni Jehova an panugang ini, estudyaran niato an halimbawa nin biglang pagkawara kan pagbuhay nin saro.

Pag-atubang sa Dai Linalaoman

Nagdadakol an kabilangan nin mayong trabaho sa bilog na kinaban. Oyon sa sarong magasin na Polaco, an kawaran nin trabaho ibinibilang na “saro sa pinakadepisil na sosyoekonomikong problema.” Minsan an industriyalisadong mga nasyon bakong libre sa problema. Halimbawa, dawa sa mga miembro kan Organisasyon Para sa Ekonomikong Kooperasyon Asin Progreso, kan taon 2004 an kawaran nin trabaho “luminangkaw nin labi sa 32 milyones, na mas halangkaw pa kisa kaidtong Grabeng Krisis kan dekada nin 1930.” Sa Polandia, an Sentral na Opisina nin Estadistika may tres milyones na mayong trabaho sa saindang rekord kan Disyembre 2003, na “18 porsiento kan mga sibilyan na naghahanap-buhay.” An sarong reperensia nagsabi na an proporsion kan mga Aprikanong mayong trabaho sa Aprika del Sur uminabot sa 47.8 porsiento kan 2002!

An biglang pagkawara nin trabaho asin dai linalaoman na mga pagsisante totoong mga peligro sa dakol, kabilang na an mga lingkod ni Jehova. “An panahon asin pagkanorongod” nangyayari sa kiisay man. (Eclesiastes 9:11) Tibaad masabi man niato an mga tataramon kan salmistang si David: “An mga kasakitan kan sakuyang puso nagdakol.” (Salmo 25:17) Makakaya daw nindo na atubangon an siring na bakong paborableng mga kamugtakan? Puedeng maapektaran kaiyan an saindong emosyonal, espirituwal, asin materyal na ikakarahay. Kun mayong trabaho, mahihimo daw nindo na makabawi giraray?

 Pag-atubang sa Emosyonal na Kagabatan

“Mas nadadanyaran an mga lalaki kan pagkawara nin trabaho,” huli ta sinda an kaidto pa minamansay na iyong nagbubuhay sa pamilya, an paliwanag kan sikologong si Janusz Wietrzyński. Sinabi nia na iyan puedeng magin dahelan na an sarong lalaki “biglang magpabarobago an grabeng mga emosyon,” magpoon sa kaanggotan sagkod sa pagsuko. An sarong ama na nasisante sa trabaho tibaad mawaran kan saiyang paggalang sa sadiri asin magpoon na “makipag-iwal sa saiyang pamilya.”

Ipinaliwanag ni Adam, sarong Kristianong ama na may duwang aki, an saiyang namatean kan mawaran sia nin trabaho: “Madali akong mapurisaw kaidto; an gabos na bagay nakakairitar sa sako. Dawa sa banggi an sakong mga pangatorogan gabos manongod sa trabaho asin kun paano ko susustentohan an sakong mga aki asin agom, na nasisante man nin bigla sa trabaho.” Kan si Ryszard asin Mariola, sarong mag-agom na may sarong aki, mawaran kan saindang ginaganar, igwa sinda nin dakula, dai pa nababayadan na utang sa bangko. Isinaysay kan agom na babae: “Napupurisaw ako nin daing ontok, na an sakong konsensia nagsasabi na sala na nag-utang kami. Pirme kong iniisip na iyan sala ko gabos.” Kun kita mapaatubang sa siring na mga situwasyon, posibleng marhay na kita maanggot, mahadit, o makamate nin makuring karaotan nin boot, asin kita madadaog na kan satong emosyon. Kun siring, paano niato makokontrol an negatibong mga emosyon na tibaad mamatean niato?

An Biblia nagtatao nin epektibong sadol sa kun paano papagdadanayon an positibong aktitud. “Dai kamo maghadit sa ano man na bagay,” an sadol ni apostol Pablo, “kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) An pagdolok ki Jehova sa pamibi matao sa sato nin “katoninongan nin Dios,” na kalmadong kamugtakan nin isip basado sa satong pagtubod sa saiya. Si Irena, na agom ni Adam, nagsabi: “Sa samong mga pamibi, sinabi niamo ki Jehova an situwasyon mi asin kun paano mi orog na gigibohon na simple an samong buhay. An sakong agom, na sa parate madaling mahadit, nagpoon nang maniwala na magkakaigwa nin solusyon.”

Kun kamo napapaatubang sa dai linalaoman na pagkawara kan saindong trabaho, yaon sa saindo an oportunidad na iaplikar an konseho ni Jesu-Cristo sa Sermon sa Bukid: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon. . . . Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:​25, 33) Iinaplikar ni Ryszard asin Mariola an hatol na ini sa pag-atubang sa saindang mga emosyon. “An sakong agom pirme akong rinaranga asin idinodoon na dai kami babayaan ni Jehova,” an pagrumdom ni Mariola. Idinugang pa kan agom nia: “Paagi sa daing ontok na pamimibi na magkaibanan, kami mas naparani sa Dios asin sa balang saro, asin iyan nagtao kan kinakaipuhan na pagranga.”

An banal na espiritu nin Dios matabang man sa sato na makayanan an problema. An pagpopogol sa sadiri, na puedeng paluwason sa sato kan espiritu, makakatabang sa sato na magdanay na kalmado. (Galacia 5:​22, 23) Tibaad iyan bakong pasil, alagad iyan posible, huli ta si Jesus nanuga na ‘an Ama sa langit matao nin banal na espiritu sa mga naghahagad sa saiya.’​—Lucas 11:13; 1 Juan 5:​14, 15.

 Dai Pagpabayaan an Saindong Espirituwal na mga Pangangaipo

An dai linalaoman na pagkahale sa trabaho tibaad makadesganar sa primero dawa sa timbang na marhay na Kristiano, alagad maninigo na dai niato pagpabayaan an satong espirituwal na mga pangangaipo. Kuanon tang halimbawa an 40 anyos na si Moises, na nagbago an bilog na buhay kan sia mawaran kan saiyang posisyon sa pamilya kan hade asin nagin pastor, sarong trabaho na pinagmenos kan mga Egipcio. (Genesis 46:34) Si Moises kinaipuhan na mag-adaptar sa saiyang bagong mga kamugtakan. Sa suminunod na 40 taon, tinogotan nia na moldehon asin andamon sia ni Jehova para sa bagong mga gibohon sa ngapit. (Exodo 2:​11-​22; Gibo 7:​29, 30; Hebreo 11:24-​26) Sa ibong kan pag-atubang nin mga kadepisilan, si Moises nakapokus sa espirituwal na mga bagay, na andam na mag-ako kan pagsasanay ni Jehova. Nungka man logod niatong togotan na an bakong paborableng mga kamugtakan makabawas sa satong pagpapahalaga sa espirituwal na mga bagay!

Minsan ngani an biglang pagkawara nin trabaho tibaad makolog na pangyayari, iyan marahay na panahon na pakosogon niato an satong relasyon ki Jehova Dios asin sa saiyang banwaan. Iyan an namatean ni Adam, na nasambitan kasubago. Sinabi nia: “Kan kaming mag-agom parehong mawaran nin trabaho, nungkang nagsabong sa isip niamo an ideya na dai na mag-atender sa Kristianong mga pagtiripon o inaan na an samong kabtang sa gibohon na pag-ebanghelyo. An punto de vistang iyan an nagprotehir sa samo na dai mahadit nin labi-labi manongod sa ngapit.” Si Ryszard may kaagid na saboot: “Kun bakong huli sa mga pagtiripon asin sa ministeryo, nungka kutana na iyan nakaya niamo; biyo na kutana kaming napano nin kahaditan. Nakakarahay an espirituwal na mga pakikipag-olay sa iba, huli ta an samong atension napapaduman sa mga pangangaipo ninda imbes na sa mga pangangaipo niamo.”​—Filipos 2:4.

 Iyo, imbes na mahadit manongod sa trabaho, hingoahon na gamiton an ekstrang panahon para sa espirituwal na mga aktibidad, na nagkakaigwa nin personal na pag-adal, nakikikabtang sa mga aktibidad kan kongregasyon, o nagpapahiwas kan saindong ministeryo. Imbes na mayong ginigibo arog kan mga mayong trabaho, magkakaigwa kamo nin ‘dakol na gigibohon sa gibohon kan Kagurangnan’​—na magpapagayagaya sa saindo sagkod sa siisay man na sinserong maghihimate sa mensahe kan Kahadean na saindong ihinuhulit.​—1 Corinto 15:58.

An Pagsustento sa Materyal sa Saindong Pamilya

Minsan siring, dai man makakabasog sa tulak an espirituwal na kakanon. Marahay na tandaan niato an minasunod na prinsipyo: “Tunay na kun an siisay man dai nagsusustento sa mga sadiri nia, asin orog na sa kasararo nia sa harong, sia nagpainda kan pagtubod asin orog pa karaot sa tawong dai nin pagtubod.” (1 Timoteo 5:8) “Dawa ngani an mga tugang sa kongregasyon andam tolos na asikasohon an satong pisikal na mga pangangaipo,” inadmitir ni Adam, “bilang mga Kristiano, igwa kita nin obligasyon na maghingoa na maghanap nin trabaho.” Makakalaom kita sa suporta ni Jehova asin kan saiyang banwaan, alagad nungka na lingawan niato na kinakaipuhan kitang gumibo nin inisyatiba na maghanap nin trabaho.

Anong inisyatiba? “Dai ka sana basta maghalat sa Dios na iyo an maghiro, na naglalaom sa sarong milagro,” an paliwanag ni Adam. “Kun ika naghahanap nin trabaho, dai mag-alangan na magpamidbid bilang saro sa mga Saksi ni Jehova. Iyan sa parate pinapahalagahan nin mga among.” Itinao ni Ryszard an konsehong ini: “Maghapot sa siisay man na midbid mo manongod sa mga malalaogan na trabaho, pirmeng maghapot sa mga ahensiang nagtatao nin trabaho, magbasa nin mga anunsio, siring kan: ‘Kaipuhan, babae na mag-aataman nin baldado’; o, ‘Temporaryong trabaho: Pagguno nin istroberi.’ Dai mag-ontok sa paghanap! Dai magin sobra kamapamili, dawa kun kaipuhan na an magin trabaho nindo hababang klase o saro na bakong sono sa saindong ambisyon.”

Iyo, “si Jehova an [saindong] paratabang.” Sia ‘sa ano man na paagi dai ka babayaan ni sa ano man na paagi ika papabayaan.’ (Hebreo 13:​5, 6) Dai kamo kaipuhan na mahadit nin labi-labi. An salmistang si David nagsurat: “Idolot mo ki Jehova an saimong dalan, asin manarig ka sa saiya, asin sia mismo mahiro.” (Salmo 37:5) ‘An pagdolot ki Jehova kan satong dalan’ nangangahulogan na kita nagsasarig sa saiya asin ginigibo an mga bagay oyon sa saiyang kabotan, dawa kun an mga kamugtakan bakong paborable sa sato.

Nahimong suportaran ni Adam asin Irena an saindang sadiri paagi sa paglinig nin mga bintana saka nin mga hagyanan asin paagi sa pag-ekonomiya kun nagbabakal nin mga gamit. Regular man nindang binisita an ahensiang nagtatao nin trabaho. “Pirmeng minadatong an tabang sa eksaktong oras na kaipuhan niamo iyan,” an sabi ni Irena. Idinugang pa kan saiyang agom: “Napatunayan niamo paagi sa eksperyensia na an mga bagay na ipinamibi niamo bakong pirmeng kaoyon kan kabotan nin Dios. Ini nagtokdo samo na manarig sa saiyang kadonongan asin dai humiro segun sa samong sadiring pakasabot. Mas marahay na maghalat nin kalmado para sa solusyon na itatao nin Dios.”​—Santiago 1:4.

Si Ryszard asin Mariola nag-ako nin minsan ano sanang trabaho alagad kadungan kaiyan nakikabtang sa paghuhulit sa mga teritoryo na mas dakula an pangangaipo. “Kami nakakakua nin kinakaipuhan na mga trabaho sa mismong panahon na mayo na kami nin makakakan,” an sabi ni Ryszard. “Sinayumahan niamo an dakula an bayad na mga trabaho na makakaolang sa samong teokratikong mga paninimbagan. Pinili niamo na maghalat ki Jehova.” Sinda naniniwala na minaniobra ni Jehova an mga bagay-bagay tanganing sinda makaarkila nin apartment na baratohon asin si Ryszard sa katapustapusi nakakua nin trabaho.

Puedeng makologon an pagkawara nin pagbuhay, alagad taano ta dai iyan mansayon bilang sarong oportunidad na maeksperyensiahan mismo nindo na nungka na kamo papabayaan ni Jehova? Kamo inaataman ni Jehova. (1 Pedro 5:​6, 7) Sia nanuga paagi ki propeta Isaias: “Dai ka mangalagkalag, huli ta ako an saimong Dios. Papakosogon taka. Tatabangan taka nanggad.” (Isaias 41:10) Nungkang togotan an dai linalaoman na pangyayari, kaiba an pagkawara nin trabaho, na paralisaron kamo. Gibohon an gabos nindong makakaya, dangan ipabaya an iba pa sa mga kamot ni Jehova. Maghalat ki Jehova, “na dai ngani naggigirong.” (Lamentacion 3:26) Mapapasaindo an nagsosopay na mga bendisyon.​—Jeremias 17:7.

[Ritrato sa pahina 9]

Gamiton an panahon para sa espirituwal na mga aktibidad

[Ritrato sa pahina 10]

Makanood na mag-ekonomiya, asin dai magin sobra kamapamili kun kamo naghahanap nin trabaho