Makinabang sa Pinakamarahay na Edukasyon na Makukua!

IPINAPAMIDBID kan Biblia si Jehova Dios bilang an Kaglalang kan gabos na bagay, kaiba an mga tawo. (Genesis 1:27; Kapahayagan 4:11) Bilang an Kaharohalangkaweng Paratokdo, tinokdoan nia an enot na mag-agom na tawo, si Adan asin Eva, asin inandam sindang mabuhay sa magayon na hardin sa Eden. Katuyohan nia na padagos sindang tokdoan asin asikasohon nin daing sagkod. (Genesis 1:​28, 29; 2:15-17; Isaias 30:​20, 21) Isip-isipa nanggad an oportunidad na iyan!

Minsan siring, makamomondo ta iwinara kan enot na mag-agom an gabos na iyan. An saindang suwayan na dalan an nagin kapinonan kan moral asin pisikal na pagkaraot kan rasa nin tawo. (Genesis 3:17-19; Roma 5:12) Manongod sa mga nabuhay nin pira pa sanang henerasyon pagkatapos na lalangon an katawohan, an Biblia nagsasabi: “Naheling ni Jehova na an karatan nin tawo abunda na sa daga asin an gabos na tendensia kan mga kaisipan kan saiyang puso danay na maraot na sana.”​—Genesis 6:5.

Haros 4,500 na taon na an nakalihis poon kan magkonklusyon si Jehova na an tawo danay na may tendensiang gumibo nin karatan, asin an situwasyon kan katawohan mas maraot ngonyan kisa kasuarin man. Dakol an daing supog na nagpuputik, naghahabon, o nananalakay sa iba. An mga problema nadadagdagan aroaldaw, mantang an pagmakolog sa kapwa tawo naiinaan. Bako daw na totoong nasa krisis an personal na marhay na mga relasyon, pati na an sa laog kan mga pamilya? Pero, bako an Dios an dapat basolon sa mga kamugtakan sa presente, ni nagpondo man sia sa pagmalasakit sa mga problema ngonyan. Si Jehova kaidto pa pirmeng interesado sa ikakarahay nin tawo, asin andam sia na tokdoan an mga nag-aasa sa saiya para sa paggiya tanganing makamit an maogmang buhay. Kaidtong mga 2,000 na taon na an nakaagi, sinugo nia sa daga an saiyang Aki, si Jesu-Cristo, asin ipinaheling an Saiyang interes sa pagtotokdo sa mga tawo na gustong magin mapanggana an saindang buhay. Si Jesus nagwalat nin arogan para sa sangkap na edukasyon huli ta tinokdoan sia kan Kaharohalangkaweng Paratokdo sa laog nin dai masokol na lawig nin panahon.

An Tunay na Kristianismo​—Sarong Edukasyon

Inestablisar ni Jesu-Cristo an tunay na Kristianismo, sarong pamumuhay na nakabasar sa pagkamoot. Dian, an gabos na kaisipan asin gawe-gawe kaipuhan na kaoyon kan kabotan nin Dios, sa katuyohan na magtao nin onra asin kamurawayan sa saiyang ngaran. (Mateo 22:37-39; Hebreo 10:7) An naggigiya sa mga katokdoan ni Jesus manongod sa pamumuhay na ini iyo an saiyang Ama, si Jehova. Mababasa niato sa Juan 8:29 an manongod sa suportang inako ni Jesus hale sa Dios: “Sia na nagsugo sa sako nasa sako; dai nia ako pinabayaan, huli ta danay kong ginigibo an mga bagay na nakakapaogma sa saiya.” Iyo, yaon ki Jesus an pagsuportar asin paggiya kan saiyang Ama sa bilog niang ministeryo. Dai kaipuhan kan enot na mga parasunod ni Jesus na atubangon an mga kadepisilan sa buhay na mayo nin paggiya. Tinokdoan sinda ni Jehova paagi sa saiyang Aki. Dahel sa pagsunod sa mga katokdoan asin halimbawa ni Jesus, sinda nagin mas marahay na klase nin tawo. Totoo ini sa mga disipulo nia ngonyan.​—Helingon an kahon na “An Impluwensia ni Jesus Asin kan Saiyang mga Katokdoan,” sa pahina 6.

An sarong napapalaen na kabtang kan tunay na Kristianismo iyo na kaiba dian an edukasyon na nakakaapektar sa isip asin puso tanganing bagohon  an mga tawo hale sa laog. (Efeso 4:​23, 24) Sa pagsitar nin saro sanang halimbawa, isipon an itinokdo ni Jesus manongod sa pagigin maimbod sa agom: “Nadangog nindo na sinabi, ‘Dai ka magsambay.’ Alagad ako nagsasabi sa saindo na an lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:​27, 28) Paagi sa mga tataramon na ini, tinotokdoan ni Jesus an saiyang mga disipulo na an puso maninigo na papagdanayon na malinig asin na an salang mga kaisipan asin kamawotan, minsan ngani dai pa isinasagibo, puedeng magkaigwa nin grabeng epekto. Bako daw totoo na an maraot na mga kaisipan puedeng magresulta sa mga gibo na nakakapaanggot sa Dios asin nakakakolog sa iba?

Kun siring, an Biblia nagtatao kan hatol na ini: “Dai na kamo magpamolde sa sistemang ini nin mga bagay, kundi maliwat kamo paagi sa pagbago kan saindong pag-isip, tanganing mapatunayan nindo sa saindong sadiri kun ano an marahay asin inaako patin sangkap na kabotan nin Dios.” (Roma 12:2) ‘Posible daw talaga na mabago an pag-isip paagi sa edukasyon?’ an tibaad ihapot nindo. Kalabot sa pagbago kan pag-isip an pagmotibar dian sa ibang direksion paagi sa pagpano kaiyan nin mga prinsipyo asin instruksion na itinatao sa Tataramon nin Dios. Magigibo ini paagi sa pag-ako nin edukasyon na itinatao nin Dios paagi sa saiyang Tataramon.

Namotibar na Magbago

“An tataramon nin Dios buhay asin mapuersa.” (Hebreo 4:12) May mapuersang impluwensia pa man giraray iyan sa mga indibiduwal, sa siring nagpapatunay na iyan dai minalihis sa uso. Puedeng makatao iyan nin motibasyon sa saro na bagohon an saiyang dalan, maogmang akoon an Kristianismo, asin magin mas marahay na tawo. Ipinapaheling kan masunod na mga halimbawa an halaga kan edukasyon sa Biblia.

Si Emilia, na nasambitan sa naenot na artikulo, nagsabi: “An basta sana paghihingoa nin solo bakong igo tanganing magrahay an situwasyon sa sakong harong. Kan magpoon akong mag-adal kan Biblia sa mga Saksi ni Jehova, naaraman ko na igwa nin paglaom asin pinonan kong bagohon an sakong aktitud. Nakanood akong magin mas mapasensia asin dai magpadara sa mga pagputok nin kaanggotan. Pag-abot nin panahon, an sakong agom nakiayon sa sako sa pag-adal. Dai nagin pasil sa saiya na magpondo sa pag-inom nin arak, alagad nahimo niang pumondo. Nagtao ini nin bagong pagpopoon sa samong pag-agoman. Ngonyan kami maogmang mga Kristiano asin itinatadom mi sa samong mga aki an marahay na mga prinsipyo kan Biblia.”​— Deuteronomio 6:7.

An edukasyon na itinatao kan tunay na Kristianismo puedeng patalingkason an saro sa mga bisyo asin inmoral na estilo nin pamumuhay. Nanompongan ni Manuel * na totoo ini. Sa edad na 13, naglayas sia sa harong ninda asin nagpoon na gumamit nin marihuana. Pag-abot nin panahon, sia naggamit nin heroina. Nakidorog sia sa mga lalaki asin babae karibay nin istaran asin kuarta. Kun beses, tangani man na masustentohan an sadiri, si Manuel  nambubugbog nin mga tawo tanganing habonan sinda. Sia haros pirmeng nasa impluwensia nin droga. Dahel sa saiyang madahas na paggawe, parate siang nabibilanggo. Sarong beses nabilanggo sia nin apat na taon, asin duman naimbuelto sia sa pagnegosyo nin mga armas. Kan makaagom sia, padagos na inani ni Manuel an resulta kan saiyang pamumuhay. An sabi nia: “Nag-istar kami sa dating laoman nin manok. Nagigirumdoman ko pa na an sakong agom nagluluto sa nagkapirang adobe. An samong kamugtakan daing kasegurohan nanggad kaya inenkaminar kan sadiri kong pamilya an sakong agom na bayaan ako.”

Ano an nakapabago sa saiyang buhay? Si Manuel nagsimbag: “Sarong kamidbid an nagduman sa samong harong na nakikipag-olay manongod sa Biblia. Inako ko an saiyang mga pagdalaw tanganing ipaheling sana sa saiya na dai nag-eeksister an sarong Dios na interesado sa mga tawo. Ibinibilang ko an sakong sadiri na buhay na ebidensia kaiyan. Napangalas ako na an Saksi mapasensia asin magalang, kaya uminoyon akong mag-atender sa mga pagtiripon sa Kingdom Hall. Maski ngani aram kan nagkapira duman an pinaghalean ko, tinaratara ninda ako sa makikatood na paagi. Ipinamate ninda sa sako na garo saro ako sa sainda. Naranga akong marhay kaini. Napahiro ako na magdesisyon na bayaan an kinaban nin droga tanganing makakua nin onestong trabaho. Pakalihis nin apat na bulan kan magpoon akong mag-adal kan Biblia, nakualipikar akong umiba sa paghuhulit, asin apat na bulan pakalihis kaiyan, nabautismohan ako bilang saro sa Mga Saksi ni Jehova.”

Ano an kahulogan kan tunay na Kristianismo ki Manuel asin sa saiyang pamilya? “Kun mayo an edukasyon sa Biblia seguradong haloy na akong gadan. Paagi sa pamumuhay na itinokdo ni Jesus, nakabalik sa sako an sakong pamilya. Dai na kaipuhan na maeksperyensiahan pa kan duwa kong aki an inagihan ko kan ako hoben pa. Nakakamate ako nin pag-orgolyo asin pagpasalamat na marhay ki Jehova sa marahay na relasyon ko ngonyan sa sakong agom. An nagkapira sa sakong mga dating kamidbid pinelisitar ako asin sinabihan ako na sa heling ninda an dalan na sinusunod ko ngonyan iyo an pinakamarahay.”

Sa Kristianong pamumuhay, an moral na kalinigan kaiba kan pisikal na kalinigan. Nasabotan  iyan ni John, na nag-iistar sa sarong tios na lugar sa Aprika del Sur. Sia nagpapaliwanag: “An samong aking babae kun beses dai nagkakarigos sa laog nin sarong semana, asin mayo sa samo an garo baga nag-iintindi.” Inaadmitir kan saiyang agom na an harong ninda maation. Alagad huli sa Kristianong edukasyon, nabago an mga kamugtakan. Nagpondo na si John sa pakikiasosyar sa sarong gang nin mga parahabon nin kotse asin nagpoon na siang mas tawan nin atension an saiyang pamilya. “Naaraman mi na bilang mga Kristiano, maninigo na papagdanayon mi na malinig an samong hawak asin gubing. Nagugustohan ko an mga tataramon sa 1 Pedro 1:​16, na nagsasadol sa samo na magin banal huli ta si Jehova Dios banal. Ngonyan pinagmamaigotan mi man na magin malinig asin aregladong paghelingon an samong simpleng harong.”

Puede Nindong Makua an Pinakamarahay na Edukasyon

An mga eksperyensia na nasambitan sa enotan bakong daing kaparehong mga kamugtakan. Bilang resulta kan edukasyon na nakabasar sa Biblia, rinibong tawo an nakanood na mamuhay nin mas marahay. Paagi sa pagigin sadiosan asin mahigos, sinda inaapresyar kan saindang mga among. Sinda nagin marahay na mga kataed asin katood, na interesado sa ikakarahay kan saindang kapwa. Determinado sindang likayan an mga bisyo asin makalaman na mga tendensia, kaya inaataman nindang marhay an saindang sadiring pisikal, mental, asin emosyonal na salud. Imbes na sayangon an saindang kuarta sa mga bisyo, ginagamit ninda iyan para sa ikakarahay ninda asin kan saindang pamilya. (1 Corinto 6:9-11; Colosas 3:18-23) Daing duda, an mga resulta kan pag-aplikar kan ipinasurat ni Jehova sa Biblia nagpapaheling na an pamumuhay na kaoyon kan tunay na Kristianismo iyo an pinakamarahay na klase nin buhay, na nagtatao nin pinakamarahay na edukasyon na makukua. Kun manongod sa sarong tawo na namumuhay kaoyon kan mga ley nin Dios, an Biblia nagsasabi: “An gabos niang ginigibo mapapakarhay.”​—Salmo 1:3.

Nakakaparigon sa boot na maaraman na andam an Makakamhan sa Gabos na Dios, si Jehova, na tokdoan kita. Sia nagsasabi manongod sa sadiri nia: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) Iyo, ipinaheling ni Jehova an dalan paagi sa halimbawa asin mga katokdoan kan saiyang Aki, si Jesu-Cristo. An saiyang mga katokdoan nagkaigwa nin epekto sa buhay nin dakol na nakamidbid sa saiya kan sia yaon pa kaidto sa daga, asin totoo man iyan sa dakol na iba pa na namumuhay sono sa saiyang mga katokdoan ngonyan. Taano ta dai magtao nin panahon tanganing makanood nin orog pa manongod sa mga katokdoan na ini? An mga Saksi ni Jehova sa saindong lugar maoogmang tabangan kamo na mag-ako kan siring na mahalagang edukasyon.

[Nota sa Ibaba]

[Kahon/Ritrato sa pahina 6]

An Impluwensia ni Jesus Asin kan Saiyang mga Katokdoan

Ginagamit an saiyang posisyon bilang namomoon na parakolekta nin buhis, si Zaqueo nagyaman paagi sa pangingikil nin kuarta asin paghabon sa ordinaryong mga tawo. Alagad binago nia an saiyang pamumuhay paagi sa pag-aplikar kan mga katokdoan ni Jesus.​—Lucas 19:1-10.

Si Saulo nin Tarso puminondo sa paglamag sa mga Kristiano asin nakombertir sa Kristianismo, na nagin si apostol Pablo.​—Gibo 22:6-21; Filipos 3:4-9.

An nagkapira sa mga Kristiano sa Corinto dating ‘mga parapakisaro, parasamba sa idolo, parasambay, homoseksuwal, parahabon, tawong mahanab, paraburat, paramuda, asin parakikil.’ Pero, kan manodan an tunay na Kristianismo, sinda ‘nahugasan, sinantipikar, asin ipinahayag na matanos sa ngaran kan saindang Kagurangnan na si Jesu-Cristo.’​—1 Corinto 6:9-11.

[Ritrato sa pahina 7]

Ikakatokdo sa saindo kan Biblia kun paano kamo magigin mapanggana