Ipinapaabot Ninda an Maogmang Bareta sa mga Bungog

“SINDA nagdadara nin espirituwalidad!” Iyan an pagkaladawan kasuarin pa sana kan direktor nin sarong erokan para sa mga gurang na sa Navalcarnero, Madrid, España, sa mga pagdalaw kan mga Saksi ni Jehova sa erokan na pinapamahalaan nia. Ano an nagin dahelan na sinabi nia iyan?

Bungog an nagkapira sa mga residente kan erokan nin Rosas del Camino. Minsan siring, palibhasa an mga Saksi naghingoa na makanood kan Pagtaram sa Senyas sa España, nakakapagkomunikar sinda sa mga residenteng ini. Inomaw kan direktor an mga Saksi huli sa libreng pagtao kan saindang panahon na tokdoan nin pagpapahalaga sa espirituwal na mga bagay idtong mga nangangaipo. Naobserbaran nia an paborableng epekto sa mga residente kan pagtotokdo kan maogmang bareta kan Kahadean. Asin an mga residente​—nangorogna idtong may mga depekto sa pagdangog o pagheling​—​nagpapahalaga man na marhay sa mga pagdalaw kan mga Saksi.

Si Eulogio, saro sa mga residente na buta asin bungog, ngonyan nakikipag-adal na kan Biblia sa mga Saksi ni Jehova. Sarong aldaw mientras na nag-aadal, an sarong lalaki na may edad na duminolok asin itinao sa Saksi an sarong berso na kinomponer kan mga residente bilang kapahayagan kan saindang pagpasalamat. An berso may titulong “An Magin Sarong Saksi.” Sa sarong kabtang, ini nagsabi: “Nakakakontento asin disiplinadong marhay an buhay ninda, asin an magayagayang kadonongan ninda gikan ki Jehova. Sa mga harong pabalikbalik sinda huli sa pagtitiwala ki Jehova.”

Ini nanggad na pagtitiwala ki Jehova an nagmotibar sa dakol na Saksi sa bilog na kinaban na pag-adalan an pagtaram sa senyas kan mga bungog sa saindang nasyon. Sa paaging ini ipinapaabot ninda sa siring na mga tawo an nakakaparigon sa boot na mensahe nin paglaom na manonompongan sa Biblia.