Malakaw daw Kamo sa Kaibahan nin Dios?

“Magin hababa an boot sa paglakaw sa kaibahan kan saimong Dios.”​—MIQUEAS 6:8.

1, 2. Paano puedeng ikomparar an saboot ni Jehova sa sato sa saboot nin sarong magurang na tinotokdoan an sarong aki na maglakaw?

AN SARONG sadit na aki, na nagtitindog mantang nagkokobogkobog an mga tabay, iinaabot an kamot sa nakaunat na mga takyag kan magurang asin minalakad nin nagkapira sa kaenot-enoteng pangyayari. Tibaad garo baga simpleng bagay iyan, alagad para sa ina asin ama, saro iyan na makahulogan na pangyayari, sarong okasyon na pano nin paglaom para sa ngapit. Galagang inaantisipar kan mga magurang na nagkikinabitan sindang maglakaw kan saindang aki sa mga bulan asin taon na maabot. Sa dakol na paagi, naglalaom sinda na tawan an aki nin paggiya asin pagsuportar sagkod sa harayo pang ngapit.

² Pareho kaiyan an saboot ni Jehova Dios sa saiyang daganon na mga aki. Sarong beses may sinabi sia mapadapit sa saiyang banwaan na Israel, o Efraim: “Tinokdoan kong maglakaw an Efraim, na kinakarga ko sinda sa sakong mga takyag . . . Paagi sa mga pisi nin daganon na tawo padagos ko sindang binotong, paagi sa mga lubid nin pagkamoot.” (Oseas 11:​3, 4) Ilinaladawan digdi ni Jehova an saiyang sadiri bilang sarong mamomoton na magurang na pasensiosong tinotokdoan an sarong aki na maglakaw, tibaad kinakarga sia sa Saiyang mga takyag kun sia natutumba. Si Jehova, an pinakamarahay na Magurang, galaga na tokdoan kita kun paano maglalakaw. Naoogma man siang marhay na ibanan kita mantang padagos kitang nag-ooswag. Arog kan ipinapaheling kan pinakatemang teksto niato, puede kitang maglakaw sa kaibahan nin Dios! (Miqueas 6:8) Alagad ano an boot sabihon kan paglakaw sa kaibahan nin Dios? Taano ta kaipuhan niatong gibohon iyan? Paano iyan posible? Asin anong mga bendisyon an ibinubunga kan paglakaw sa kaibahan nin Dios? Saro-saro niatong pag-olayan an apat na hapot na ini.

Ano an Boot Sabihon kan Paglakaw sa Kaibahan nin Dios?

3, 4. (a) Ano an pambihira manongod sa paglaladawan sa paglakaw sa kaibahan nin Dios? (b) Ano an boot sabihon kan paglakaw sa kaibahan nin Dios?

³ Siempre, an tawong may laman asin dugo dai literal na makakapaglakaw sa kaibahan ni Jehova na sarong espiritung persona. (Exodo 33:20; Juan 4:24) Kaya kun sinasabi kan Biblia na an mga tawo naglalakaw sa kaibahan nin Dios, ginagamit kaiyan an piguratibong pananaram. Pambihira an paglaladawan na iyan, saro na dai nalilimitaran nin nasyonal asin kultural na mga linderos asin na aplikable pa ngani sa ano man na panahon. Total, sa anong lugar o kapanahonan na dai kayang saboton nin mga tawo an ideya nin sarong tawo na may kaibahan sa paglakaw? Bako daw na ipinapahayag kan paglaladawan na ini an mainit na pakikiiba asin kadayupotan? An siring na mga pagmate nagtatao sa sato nin pakarorop sa kun ano an boot sabihon kan paglakaw sa kaibahan nin Dios. Pero, magin mas espesipiko kita.

⁴ Girumdoma an maimbod na mga lalaki na si Enoc asin Noe. Taano ta ilinaladawan sinda na naglalakaw sa kaibahan nin Dios? (Genesis 5:​24; 6:9) Sa Biblia, an terminong “maglakaw” parateng  nangangahulogan nin pagsunod sa sarong paagi nin paggawe. Pinili ni Enoc asin Noe an paagi nin pamumuhay na kaoyon kan kabotan ni Jehova Dios. Bakong arog kan mga kabtang kan kinaban na nasa palibot ninda, nag-asa sinda ki Jehova para sa paggiya asin kinuyog ninda an saiyang instruksion. Nagtiwala sinda sa saiya. Nangangahulogan daw ini na si Jehova an nagdesisyon para sa sainda? Dai. Tinawan ni Jehova an mga tawo nin libreng kabotan, asin gusto nia na gamiton niato an balaog na iyan kaiba kan satong “kakayahan na mangatanosan.” (Roma 12:1) Minsan siring, mantang naggigibo kita nin mga desisyon, mapakumbaba niatong tinotogotan na giyahan kan nakakalabing marhay na kaisipan ni Jehova an satong kakayahan na mangatanosan. (Talinhaga 3:​5, 6; Isaias 55:​8, 9) Garo baga sa paglakaw niato sa buhay, dayupot niatong kaibahan si Jehova.

5. Taano ta nagtaram si Jesus manongod sa pagdagdag nin sarong maniko sa lawig nin buhay nin saro?

⁵ An Biblia parateng iinaagid an buhay sa pagbaklay o paglakaw. Sa nagkapirang kamugtakan, direkta an pagkokomparar na iyan, alagad sa ibang kamugtakan, iyan ipinapasentido. Halimbawa, si Jesus nagsabi: “Siisay sa saindo na sa paghadit makakadagdag nin sarong maniko sa lawig kan saiyang buhay?” (Mateo 6:27) Tibaad magpaisip sa saindo an mga tataramon na iyan. Taano ta magtataram si Jesus manongod sa pagdagdag nin “sarong maniko,” na pansokol sa distansia, sa ‘lawig kan buhay’ nin tawo, na sinosokol nin panahon? * Minalataw na ilinaladawan ni Jesus an buhay bilang sarong pagbaklay. Garo man sana itinotokdo nia na an paghadit dai makakatabang sa saindo na dagdagan nin dawa sadit na lakad an paglakaw nindo sa buhay. Minsan siring, maninigo daw niatong ikonklusyon na mayo kitang magigibo manongod sa lawig kan paglakaw na iyan? Dai nanggad! Dinadara kita kaiyan sa ikaduwa niatong hapot, Taano ta kaipuhan niatong maglakaw sa kaibahan nin Dios?

Taano ta Kaipuhan Niatong Maglakaw sa Kaibahan nin Dios?

6, 7. Ano an kaipuhan na marhay kan bakong sangkap na mga tawo, asin taano ta marahay na dumolok kita ki Jehova tanganing mapanigoan an pangangaipong iyan?

⁶ An sarong dahelan kun taano ta kaipuhan niatong maglakaw sa kaibahan ni Jehova Dios ipinapaliwanag sa Jeremias 10:23: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” Kaya kitang mga tawo mayo kan kakayahan ni kan deretso na giyahan an sadiri niatong pamumuhay. Kaipuhan niatong marhay nin paggiya. Idtong mga nag-iinsistir na sunodon an gusto ninda, na independiente sa Dios, inaarog an sala na nagibo ni Adan asin Eva. Kinaptan kan enot na mag-agom an deretso na magsadiring determinaran kun ano an marahay asin maraot. (Genesis 3:​1-6) Talagang ‘bako niatong kapot’ an deretsong iyan.

⁷ Dai daw nindo namamatean na kaipuhan nindo nin paggiya sa pagbaklay sa buhay? Aroaldaw, napapaatubang kita sa paggibo nin saradit asin darakulang desisyon. An nagkapira kaini depisil asin puedeng makaapektar sa satong ngapit​—saka sa ngapit kan satong mga namomotan. Pero an isipon niato igwa nin mas gurang asin mas madonong na marhay kisa sato na naoogmang tawan kita nin mamomoton na paggiya sa paggibo kan mga desisyon na iyan! Makamomondo, an kadaklan na tawo ngonyan pinipili na magtiwala sa sadiri nindang paghusgar asin giyahan an sadiri nindang mga lakad. Dai ninda iniintindi an katotoohan na sinambit sa Talinhaga 28:26: “An nagtitiwala sa saiyang sadiring puso mangmang, alagad an naglalakaw sa kadonongan iyo an makakaligtas.” Gusto ni Jehova na makaligtas kita sa grabeng mga kapahamakan na resulta kan pagtiwala sa madayang puso nin tawo. (Jeremias 17:9) Gusto nia na kita maglakaw sa kadonongan, magtiwala sa saiya bilang satong madonong na Giya asin Paratokdo. Kun ginigibo niato iyan, an satong paglakaw sa buhay tiwasay asin nakakakontento.

8. Sa anong destinasyon natural na dinadara kan kasalan asin pagkabakong sangkap an mga tawo, pero ano an gusto ni Jehova para sa sato?

⁸ An saro pang dahelan kun taano ta kaipuhan niatong maglakaw sa kaibahan nin Dios may labot sa gusto niatong magin lawig kan satong paglakaw. Sinasabi kan Biblia an mapungaw na katotoohan. Sa sarong sentido, an gabos na bakong sangkap na tawo naglalakaw pasiring sa sasarong destinasyon. Sa paglaladawan sa mga kasakitan na minaabot huli sa pagkagurang, an Eclesiastes 12:5 nagsasabi: “An tawo naglalakaw pasiring sa saiyang maghahaloy na harong asin an mga paratangis nagririlibot sa lansangan.” Ano an “maghahaloy na harong” na ini? Iyan an lolobngan, na dian kita natural na dinadara kan kasalan asin pagkabakong sangkap. (Roma 6:23)  Minsan siring, an gusto ni Jehova para sa sato labi pa sa halipot, masakit na paglakaw paghale sa kuna pasiring sa lolobngan. (Job 14:1) Solamente paagi sa paglakaw sa kaibahan nin Dios na makakaasa kitang maglakaw sa lawig na katuyohan nin Dios para sa sato​—sagkod lamang. Bako daw na iyan an gusto nindo? Kun siring, malinaw nanggad na kaipuhan kamong maglakaw sa kaibahan kan saindong Ama.

Paano Kita Makakalakaw sa Kaibahan nin Dios?

9. Taano ta may panahon na natatago si Jehova sa saiyang banwaan, pero anong pagpasarig sa boot an itinao nia oyon sa Isaias 30:20?

⁹ An ikatolong hapot sa satong pag-estudyar maninigo sa pinakamaingat na pagtao niato nin atension. Ini iyo an, Paano kita makakalakaw sa kaibahan nin Dios? Manonompongan niato an simbag sa Isaias 30:​20, 21: “Dai na itatago kan saimong Kaharohalangkaweng Paratokdo an saiyang sadiri, asin an saimong mga mata maninigong mga mata na nakakaheling sa saimong Kaharohalangkaweng Paratokdo. Asin an saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” Sa nakakaparigon sa boot na tekstong ini, an mga tataramon ni Jehova na nakarekord sa bersikulo 20 tibaad nagpagirumdom sa saiyang banwaan na kan sinda magrebelde sa saiya, garo man sana sia natatago sa sainda. (Isaias 1:​15; 59:2) Minsan siring, irinerepresentar digdi si Jehova, bakong siring sa nagtatago, kundi siring sa hayag na nagtitindog sa atubangan kan saiyang maimbod na banwaan. Puede niatong imahinaron an sarong paratokdo na nagtitindog sa atubangan kan saiyang mga estudyante, na idinedemonstrar kun ano an gusto niang manodan ninda.

10. Sa anong sentido na tibaad ‘makadangog kamo nin tataramon sa likod nindo’ hale sa saindong Kaharohalangkaweng Paratokdo?

¹⁰ Sa bersikulo 21, sarong laen na paglaladawan an itinatao. Ilinaladawan si Jehova na naglalakaw sa likod kan saiyang banwaan, na nagtatao nin mga instruksion sa tamang dalan na lalakawan. Sinabi kan mga nag-espesyalisar sa Biblia na an pananaram na ini tibaad ibinasar sa pagsunod kun beses nin sarong pastor sa saiyang mga karnero, na minakurahaw tanganing giyahan sinda asin tanganing ilikay sinda na mapasala nin dalan. Paano minaaplikar sa sato an paglaladawan na ini? Bueno, kun kinokonsulta niato an Tataramon nin Dios para sa paggiya, an binabasa niato mga tataramon na isinurat rinibong taon na an nakaagi. Garo baga, sa sulog nin panahon, naghahale an mga tataramon na iyan sa likod niato. Pero, an mga iyan may halaga pa man giraray ngonyan kapareho kaidtong isurat an mga iyan. An hatol kan Biblia puedeng gumiya sa sato sa aroaldaw na pagdedesisyon niato, asin makakatabang iyan sa sato na iplano an direksion kan satong buhay sa mga taon na maabot. (Salmo 119:105) Kun maigot niatong hinahanap an siring na hatol asin iinaaplikar iyan, kun siring si Jehova iyo an satong Giya. Naglalakaw kita sa kaibahan nin Dios.

11. Oyon sa Jeremias 6:​16, anong nakakaogmang paglaladawan an itinao ni Jehova para sa saiyang banwaan, alagad ano an nagin reaksion ninda?

¹¹ Talaga daw na tinotogotan niato an Tataramon nin Dios na giyahan kita nin siring kaiyan kalubos? Kapakipakinabang na pumondo nguna kun beses asin sadiosan na siyasaton an satong sadiri. Estudyare an sarong bersikulo na makakatabang sa sato na gibohon iyan: “Ini an isinabi ni Jehova: ‘Tumindog kamo sa mga dalan asin magheling kamo, asin ihapot nindo an mga dalan kan suanoy, kun saen man  nanggad an marahay na dalan; asin maglakaw kamo dian, asin makanompong kamo nin kaginhawahan para sa saindong kalag.’” (Jeremias 6:16) An mga tataramon na ini puedeng magpagirumdom sa sato kan sarong parabiahe na minapondo sa sarong krosing tanganing maghapot nin direksion. Sa espirituwal na sentido, an rebeldeng banwaan ni Jehova sa Israel kaipuhan na gumibo nin kaagid kaiyan. Kaipuhan na makabalik sinda sa “mga dalan kan suanoy.” An “marahay na dalan” na iyan iyo an dalan na linakawan kan saindang maimbod na mga apoon, an dalan na dian may kalolongan na naparayo an nasyon. Makamomondo, may katagasan an nagin reaksion kan Israel sa mamomoton na pagirumdom na ini hale ki Jehova. An iyo man sanang bersikulo nagpapadagos: “Alagad ta sinda nagsasarabi: ‘Dai kami malakaw.’” Pero, sa presenteng mga panahon, iba man an nagin reaksion kan banwaan nin Dios sa siring na hatol.

12, 13. (a) Ano an nagin reaksion kan linahidan na mga parasunod ni Cristo sa hatol kan Jeremias 6:16? (b) Paano niato puedeng siyasaton an satong sadiri mapadapit sa kun paano an satong paglakaw ngonyan?

¹² Poon kan huring kabtang kan ika-19 siglo, iinaplikar kan linahidan na mga parasunod ni Cristo an hatol kan Jeremias 6:16 sa saindang sadiri. Bilang sarong grupo, pinangenotan ninda an bilog na pusong pagbabalik sa “mga dalan kan suanoy.” Bakong arog kan apostatang Kakristianohan, maimbod sindang nagsusog sa “arogan nin ikakarahay na mga tataramon” na inestablisar ni Jesu-Cristo asin sinuportaran kan saiyang maimbod na mga parasunod kaidto pang enot na siglo C.E. (2 Timoteo 1:13) Sagkod ngonyan, tinatabangan kan mga linahidan an lambang saro saka an kairiba nindang “ibang karnero” na magpadagos sa ikakarahay, maogmang pamumuhay na binayaan kan Kakristianohan.​—Juan 10:16.

¹³ Paagi sa pagtao nin espirituwal na kakanon sa tamang panahon, minilyon an natabangan kan grupong maimbod na oripon na manompongan “an mga dalan kan suanoy” asin na maglakaw sa kaibahan nin Dios. (Mateo 24:45-47) Kabilang daw kamo sa minilyon na iyan? Kun iyo, ano an magigibo nindo tanganing makalikay na ikaanod, na sinusunod an sadiri nindong dalan? Madonong na pumondo sa panapanahon asin siyasaton kun paano an saindong paglakaw sa buhay. Kun maimbod nindong binabasa an Biblia asin an mga publikasyon na basado sa Biblia asin inaatenderan nindo an mga programa nin pagtotokdo na pinapalakop kan mga linahidan ngonyan, kun siring sinasanay kamo na maglakaw sa kaibahan nin Dios. Asin kun mapakumbaba nindong iinaaplikar an hatol na itinao sa saindo, tunay nanggad na naglalakaw kamo sa kaibahan nin Dios, na sinusunod “an mga dalan kan suanoy.”

Maglakaw na Garo Baga “Nakakaheling kan Saro na Dai Naheheling”

14. Kun si Jehova totoo sa sato, paano iyan ikakapabanaag sa personal na mga desisyon na ginigibo niato?

¹⁴ Tanganing makalakaw kita sa kaibahan ni Jehova, dapat na magin totoo sia sa sato. Girumdomon, inasegurar ni Jehova an mga maimbod sa suanoy na Israel na dai sia natatago sa sainda. Ngonyan, ihinahayag man nia an saiyang sadiri sa saiyang banwaan bilang an Kaharohalangkaweng Paratokdo. Arog daw kaiyan katotoo sa saindo si Jehova, na garo baga nagtitindog sia sa atubangan nindo tanganing tokdoan kamo? Iyan an klase nin pagtubod na kaipuhan niato tangani na kita makalakaw sa kaibahan nin Dios. Si Moises igwa kan siring na pagtubod, “huli ta sia nagpadagos na marigon na garo baga nakakaheling kan Saro na dai naheheling.” (Hebreo 11:27) Kun totoo sa sato si Jehova, kun siring kokonsideraron niato an saiyang saboot kun naggigibo kita nin mga desisyon. Halimbawa, dai lamang ngani niato iisipon na gumibo nin maraot dangan probaran na itago an satong mga kasalan sa Kristianong kamagurangan o sa mga miembro kan satong pamilya. Imbes, hinihingoa niato na maglakaw sa kaibahan nin Dios dawa kun mayong kapwa tawo na nakakaheling sa sato. Kapareho ni Hadeng David kan suanoy, ini an desidido niatong gibohon: “Malakaw ako sa integridad kan sakong puso sa laog kan sakong harong.”​—Salmo 101:2.

15. Paano an pakikiasosyar sa satong Kristianong mga tugang na lalaki asin babae makakatabang sa sato na mamatean na totoo si Jehova?

 ¹⁵ Nasasabotan ni Jehova na kita bakong sangkap, laman na mga linalang asin na kun beses tibaad nadedepisilan kitang tumubod sa dai niato naheheling. (Salmo 103:14) Dakula an saiyang ginigibo tanganing tabangan kita na pangganahan an siring na kaluyahan. Halimbawa, saiyang tinipon an “sarong banwaan para sa saiyang ngaran” hale sa gabos na nasyon kan daga. (Gibo 15:14) Mantang sararo kitang naglilingkod, nakakakua kita nin kosog sa lambang saro. An pakadangog sa kun paano tinabangan ni Jehova an sarong espirituwal na tugang na lalaki o babae na mapangganahan an sarong kaluyahan o an sarong masakit na pagbalo nagpapangyari na an satong Dios magin orog pa nganing totoo sa sato.​—1 Pedro 5:9.

16. Paano an pakanood manongod ki Jesus makakatabang sa sato na maglakaw sa kaibahan nin Dios?

¹⁶ Orog sa gabos, itinao sa sato ni Jehova an halimbawa kan saiyang Aki. Si Jesus nagsabi: “Ako iyo an dalan asin an katotoohan patin an buhay. Mayo nin makakaduman sa Ama kun bakong huli sa sako.” (Juan 14:6) An pag-adal sa pamumuhay ni Jesus digdi sa daga saro sa pinakamarahay na paagi tanganing orog na magin totoo si Jehova sa sato. An gabos na sinabi o ginibo ni Jesus sangkap na ladawan kan personalidad asin mga paagi nin paghiro kan saiyang langitnon na Ama. (Juan 14:9) Mantang naggigibo kita nin mga desisyon, kaipuhan na maingat niatong isipon kun ano an gigibohon ni Jesus sa bagay na iyan. Kun ipinapabanaag kan satong mga desisyon an siring na maingat asin mapagngayongayong kaisipan, sinusunod niato kun siring an mga lakad ni Cristo. (1 Pedro 2:21) Bilang resulta, kita naglalakaw sa kaibahan nin Dios.

Ano an Ibinubungang mga Bendisyon?

17. Kun kita naglalakaw sa dalan ni Jehova, anong “kaginhawahan” an manonompongan niato para sa satong kalag?

¹⁷ An paglakaw sa kaibahan ni Jehova Dios nangangahulogan nin nakakakontentong buhay. Girumdomon an ipinanuga ni Jehova sa saiyang banwaan manongod sa paghanap kan “marahay na dalan.” Sia nagsabi: “Maglakaw kamo dian, asin makanompong kamo nin kaginhawahan para sa saindong kalag.” (Jeremias 6:16) Ano an kahulogan kan “kaginhawahan” na iyan? Sarong maginhawang buhay na pano nin kasiraman asin luho? Bako. An itinatao ni Jehova bagay na orog nanggad karahay, bagay na bihirang manompongan dawa kan pinakamayaman sa katawohan. An pakanompong nin kaginhawahan para sa saindong kalag pakanompong nin panlaog na katoninongan, kagayagayahan, pagkakontento, asin espirituwal na satispaksion. An siring na kaginhawahan nangangahulogan na puede kamong magin kompiado na pinili nindo an pinakamarahay na dalan sa buhay. An siring na katoninongan nin isip sarong bihirang bendisyon sa kinaban na ini na pano nin problema!

18. Anong bendisyon an gustong itao ni Jehova sa saindo, asin sa ano kamo determinado?

¹⁸ Siempre, an buhay mismo sarong dakulang bendisyon. Dawa halipot na paglakaw sa buhay mas marahay kisa dai lamang pakalakaw sa buhay. Minsan siring, nungka na nagin katuyohan ni Jehova na an saindong paglakaw magin halipot sanang biahe poon sa kabagsikan nin pagkahoben sagkod sa kakologan nin paggurang. Dai, gusto ni Jehova na magkaigwa kamo kan nakakalabi sa gabos na bendisyon. Gusto nia na maglakaw kamo kaiba nia sagkod lamang! Marahay an pagkapahayag kaini sa Miqueas 4:5: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.” Boot daw nindong makamtan an bendisyon na iyan? Boot daw nindong maeksperyensiahan an sa nakakaakit na paagi inaapod ni Jehova na “tunay na buhay”? (1 Timoteo 6:19) Kun siring, magin determinado nanggad kamong maglakaw sa kaibahan ni Jehova ngonyan, sa aga, asin sa gabos na aldaw na maabot sagkod sa panahon na daing sagkod!

[Nota sa Ibaba]

Ano an Isisimbag Nindo?

• Ano an kahulogan kan paglakaw sa kaibahan nin Dios?

• Taano ta namamatean nindo an pangangaipo na maglakaw sa kaibahan nin Dios?

• Ano an makakatabang sa saindo na maglakaw sa kaibahan nin Dios?

• Anong mga bendisyon an inaako kan mga naglalakaw sa kaibahan nin Dios?

[Mga Hapot Para sa Pag-adal]

[Mga Ritrato sa pahina 23]

Paagi sa mga pahina kan Biblia, nadadangog niato an tingog ni Jehova sa likod ta na nagsasabi, “Ini an dalan”

[Ritrato sa pahina 25]

Sa mga pagtiripon, inaako niato an espirituwal na pagkakan sa tamang panahon